Sawal la giled’a 140 - Bible azumeina

Tchenda hi sama hal ndjundina

¹ Ni sawal la gile d’a David mi hlat mi hat mi ma ngolâ hi suma hle sawalina.

² Ma didina, ang prud’un ndei abo suma asa’atna, ang ngomon abo suma murud’umba.

³ Sum ndazina a nga de zla d’a tchod’a kan kuruzi krovo, a nga ndjak vunazi kur burâ kaf á dur ayîna.

⁴ A nga trâ sinazi d’igi guguina na; zla d’a de d’a avunazid’a ni d’igi ayî mageid’a na mi. Tchol ndjö

⁵ Ma didina, ang ngomon abo suma asa’atna, ang ngomon abo suma murud’um suma a nga hal lovota á pugun kä na.

⁶ Suma yam mba ad’enga a nga gun dauna kabeid’a kä avoronu, a nga gun abei kelegeuna kä avun lovota kanu, a nga burun kä á tchanu. Tchol ndjö

⁷ Ma didina, an nga ni dangû, angî Alo mana, Ma didina, ang tin humang hum tchen man nda hud’a.

⁸ Ma didina Salad’a, angî ad’eng nga sud’unda; kur bur ma dur ayîna, ang bar abong ngei kanu.

⁹ Ma didina, ar sama asa’atna mi ndak vun min mamba d’i, ar mi ndak vun nga hur mama á subur ki tam mbuo mi. Tchol ndjö

¹⁰ Ar suma a nguyuna zla d’a tchod’a ndavunazid’a, ti hulong kaziya.

¹¹ Ar gordjona mi tchuk kaziya, ar a tchuguzi aduk akud’a, ar a tchuguzi kur zul la yiyik ka azi ndak á buzuk kei kur ruo d’a.

¹² Sama ka zlad’a nga mi kak tatâ yam andagad’a d’i, sama murud’umba ndaka nga d’i digim á bam mbeyo.

¹³ Ma didina, an we ang nga ka ir zlad’a hi suma hohoud’id’a, ang nga wal ir zlad’a hi suma houd’id’a ki d’ingêra mi.

¹⁴ Gagazi, suma d’ingêrâ a mba gileng simiyêngû, a mba kak kä avorong mi.