Sawal la giled’a 137 - Bible azumeina

Ami kagami avun aluma sä Babilon

¹ Kid’a ami kagami avun aluma sä Babilon-nda, ami tchimi kurumi krovo á djib’eremi yam Siyon.

² Ami gabamiza ading mamina ata da’ara avun mbina.

³ Ata yi máma suma a yomi magombina, a dami ala ami hlazi sawala. Suma a djobomi vunamina a dami ala ami hlazi sawal la furîd’a. Azi dami ala: Agi hlami sawal la ding nga Siyon-nda tcha.

⁴ Ni nana ba, ami hlami sawala hi Ma didinid’a yam andaga d’a dinga ge?

⁵ Ndak Jerusalem, le an mar kagu ni, ar abon ma ndjufâ mi tche mogod’a!

⁶ Le an djib’er nga kak kuo, le an we nga ala nda’î furî man nda ngol la kal papad’a d’uo ni, ar sinan ndi b’al akulo ata d’id’ingânu!

⁷ Ma didina, ang djib’er yam suma Edom suma kur bur ma a b’lak Jerusalem-ma a dala: Tot kä woyo! Tot kä woi gak ad’ut ta ged’a na.

⁸ Ndak Babilon, ndak ka a nga b’lagak keid’a, sama mba mi lak tcho d’a ndak lamizi mi amid’ina, mi le furîd’a!

⁹ Sama mba mi yo gro’â mi tchazi woi yam ahinad’ina, mi le furîd’a!