Sawal la giled’a 135 - Bible azumeina

An we Ma didina ni ma ngolâ

^1-2 Agi gilegi Ma didina! Agi gilegizi simiyêmu! Agi azungeîna hi Ma didina suma nga tchola kur gong mamba nala kur gulumuna hi gonga hAlonid’ina, agi gilemu!

³ Agi gilegi Ma didina kayam mam mi ma djivina! Suburugizi simiyêm ki sawala! Hina wani, ni vama djivina avoromu.

⁴ Kayam Ma didina mi man Jakob, mi tin Israel mi ka’î mama.

⁵ Gagazi, an we Ma didina ni ma ngolâ; Salad’a ni ma kal akulo yam alona petna.

⁶ Vama lara ma Ma didina mi min luma mi lumu, mi lum kur akulod’a, yam andagad’a, kur alum ma nglona, kur zul galilei mazina pet mi.

⁷ Nga mi ka d’ugula akulo avun dabid’a handagad’id’a, nga mi wile á se alona, nga mi buzugï simetna woi ata yi mam ma ngei ahlena.

⁸ Ni ma tchi gro suma a vut avo’â hi Ezipte-na woi tin ad’ud’a ata suma gak mba yam d’uwarîna mi.

⁹ Mi sunï ahle suma simata kahle suma yoyouna yam andaga d’a Ezipte-d’a á dur Faron kazungeî mama pet.

¹⁰ Mi tchi andjaf suma ablaud’a, mi tchi amulei suma ad’engâ,

¹¹ nala, Sihon, amul ma Amor-râ, Ok, amul ma Basan-na, kamulei suma Kanan-na pet mi.

¹² Mi handaga mazid’a woi djona mi mam suma Israel-lâ.

¹³ Ma didina, simiyêng mi nga gak didin; Ma didina, suma a nga djib’er kangî kur atchogoi d’a lara ge pet.

¹⁴ Ma didina mba mi ka sariyad’a hi sum mamid’a, mba mi we hohowa azungeî mama mi.

¹⁵ Fileina handjaf suma dingîna nahle suma a lazi ni ki kawei ma hapma ki lorina; ni sun nda suma a lat kabozid’a.

¹⁶ Azi nga ki vuna, a nga de zla d’i; azi nga ki ira, a nga we d’i;

¹⁷ azi nga ki humba, a nga hum mbi, azi nga ki vuna, a nga fo va d’uo mi!

¹⁸ Suma a lazina a hle tazi ni d’igi azi na, suma pet suma a tin huruzi kazina, a hle tazi ni d’igi azi na mi.

¹⁹ Agi andjafâ hi Israel-lîna, agi suburugi Ma didina; agi andjafâ hi Aron-na, agi suburugiziya;

²⁰ agi andjafâ hi Levi-na, agi suburugiziya; agi suma lagi mandara Ma didinina, agi suburugiziya;

²¹ agi suma avo Siyon-na, agi suburugi Ma didin ma nga kaka avo Jerusalem-ma. Agi gilegi Ma didina!