Sawal la giled’a 12 - Bible azumeina

David mi tchen Alona mi ndjun suma d’ingêrâ

¹ Ni sawal la David mi hlat kading ma ziyom klavandina, mi hat mi ma ngolâ hi suma hle sawalina.

² Ma didina, ang ndjunumiya! Sama d’engzeng nga d’uo d’a, suma d’ingêrâ a nga dap pei aduk suma.

³ Suma a nga de tazi zla d’a kad’a, zla d’a avunazid’a ni mbulâ, azi ni suma mbàmbàd’a mi.

⁴ Ma didina, ar ang pat suma a nga de zlad’a ki vunazi ma mbulîna woi zlapa ki suma a nga de zla d’a subur tad’ina,

⁵ ki suma a nga dala: Ami mba kuzumi ayîna ki vunamiya, ami nga ki vunami á de zlad’a; ni nge ba, mba mi te kami ge na mi.

⁶ Ma didina mi dala: Ki tchetchemba, an nga ni tchol akulo á sut suma suma a nga golozi isâ, kayam a nga las suma hohoud’a, suma houd’a a nga zam tazi mi.

⁷ Ma didina, zla manga ni zla d’a irata; ti ni d’igi bege d’a hap pa a yorot kakud’a yoyor yat kid’iziya d’a bei zozota kua ba d’a na.

⁸ Ang ma didina, ang mba ngom zla manga, ang mba ngomomi abo andjaf sum ndazina gak didin.

⁹ Le suma asa’atna a nga tamula aduk suma, le suma tchona a i avogovok kur tcho mazid’a pî, ang mba ngomomi hina.