Sawal la giled’a 111 - Bible azumeina

Subura yam sun nda ndandala hAlonid’a

¹ Agi gilegi Ma didina! An mba ni gile Ma didina ki hurun pet aduk toka hi suma d’ingêrîd’a.

² Sunda hi Ma didinid’a ti ngola. Suma tazi lazi djivid’a katna a hal á wat ad’ud’u.

³ Sun mamba nga d’i wile ki subura, d’ingêr mamba ti nga kaka gak didin mi.

⁴ Mi nga mi ge hum suma yam sun mam mba ndandala. Ma didina ni ma we hohowa sumina, ni ma sumad’a mi.

⁵ Nga mi he tena mi suma a nga lum mandarama, nga mi djib’er yam vun mam ma djinda burâ ki burâ mi.

⁶ Mi tak ad’eng mam mba mam nga mi le ki sundid’a mi sum mama ata yima mi hazi djona handjaf suma dingîna.

⁷ Sun nda mi lat kabomba ni gagazid’a ki d’ingêra; vun mam ma hed’a pet ni ma sana mi ndak á tin hurum kama,

⁸ mi nga ni kaka hina gak didin, mi ni gagazid’a ki d’ingêra mi.

⁹ Ma didina mi sunï á sut sum mama, mi djin vunam ki sed’eziya. Simiyêm ala ma bei tchod’a ma suma a lum mandarama.

¹⁰ Le mandara Ma didina nad’u tinda hi ned’id’a. Suma pet suma a nga le hina na ni suma a nga ki djib’er ra djivid’ina. Ar suma a gilem gak didin!