Sawal la giled’a 103 - Bible azumeina

Od’a hAlonid’a

¹ Wana ni sawal la gile d’a David mi hlata. An min gile ni Ma didina, an min gile Alo man ma bei tchod’ina ki hurun pet.

² An min gile ni Ma didina, an nga ni mar yam djivi mam mba led’a tu d’i.

³ Mam mi ma vat hurum mbei yam tcho mandina; mam mi ma sud’un ndei kur tugud’ei mandina.

⁴ Mam mi ma nga mi prud’un ndei ata yima azuleinina, ni ma mi oyôn ki o mam mba didinda ki we hohoud’ina mi.

⁵ Ni ma hobon kahle suma djivina kur mamarana, ni ma mbud’un azongôn d’igi b’arauna na na.

⁶ Ma didina ni ma mi ka sariya d’a d’ingêrina, ni ma mi ka sariya d’a irata mi suma a nga djobozi vunazina.

⁷ Mi tak lovot mamba woi mi Moise, mi tak sun mam mba ndandala woi mi Israel-lâ mi.

⁸ Ma didina ni ma mi we hohowa sumina, ni ma sumad’a, ni ma hurum nga mi zal atogo d’uo na, ni ma nga oîd’a ki o mam mba didindina mi.

⁹ Ni ma nga mi ngop teteu d’uo na, ni ma nga mi ve sa kurum ki iram fafat tuo na mi.

¹⁰ Ni ma nga mi toi yam tcho meid’a d’uo na, ni ma nga mi wuragei yam tchila meid’a d’uo na mi.

¹¹ O mam mba didinda kal lei akulo yam suma a nga lum mandarama, d’igi akulod’a ti kal lei akulo yam andagad’a na mi.

¹² Mi wal tcho mei d’a led’a woi dei ki sed’ei d’igi mi wal abo ma yorogona kabo ma fladegena woi na mi.

¹³ Ma didina nga mi le yam mam suma d’engzengâ d’igi abud’a nga mi le yam groma na mi.

¹⁴ Mi we vama mi lei ki na, mi djib’er ala ei nandaga d’a gugud’upa.

¹⁵ Sana burum ni d’igi asuna na, mi ni d’igi b’od’a hasu ma abageinid’a na mi.

¹⁶ Ata yima simetna mi sir kama, mi felem mbeyo; blangâm mi ar kä hawa papana mi.

¹⁷ Wani od’a hi Ma didinid’a ti nga ni yam suma a nga ringîm mandarama hina gak didin; d’ingêr mamba ti nga yam grozina ki grozi ngolona,

¹⁸ yam suma a nga ngom vun mam ma djindina, yam suma a nga djib’er yam gat mamba á ndagat memetna mi.

¹⁹ Ma didina mi tin nga zlam mam mba amula sä akulo, nga mi tamula yam ahlena pet mi.

²⁰ Agi malaikana hi Ma didina suma ad’eng suma kal papa suma nga lagi sunda yam zla mamba suma nga gagi yagi kä ad’u zla mam mba ded’ina, agi gilemu!

²¹ Agi b’rang nga akulod’a hi Ma didina suma nga lum sunda suma nga lagi min mambina, agi gilemu!

²² Agi ahle suma Ma didina mi lagi ata yima nga mi te leud’a kuana pet, agi gilemu! An tan pî ni min gilem mi!