Sawal la giled’a 101 - Bible azumeina

Amul ma ngolâ mi hle vunam á tit d’ingêr

¹ Wana ni sawal la gile d’a David mi hlata. An mba ni hle sawala yam o mang nga didinda, yam sariya mang nga kad’a mi. Ma didina, ni ang ba, an mba ni gilengû.

² An mba ni kak tchugot á hum zla d’a suma d’engzengâ a data. Ni mindja ba, ang mba mba kan nge? An mba ni tit yam gagazi d’a kurunda avo huraziyanu.

³ An mba ni tin iran yam vama tcho tu d’i. An noî sunda hi suma a hulong á tuwal fileinina woyo, an mba ni zlap ki sed’ezi d’i.

⁴ An mba ni ka’î ma mbut ira d’i, an min we tchod’a ki iran nduo mi.

⁵ Sama mi ka hula yam ndromina, an mba ni bam mbeyo; suma a nga fo avilid’a mi ndrozinina, an mba ni arazi woyo.

⁶ An mba ni tin iran yam suma d’engzeng suma yam ambasina, kayam azi kak gevenu; sama nga mi tit tit ta iratina ni mam ba, mba mi lan sunda.

⁷ Sama mbut ira mba mi kak kur aziyan ndi. Ma ka zlad’a mba mi tchol avoron nduo mi.

⁸ An nga ni tchi suma asa’at suma yam ambasina woi burâ ki burâ á dabazi woi kur azì ma ngolâ hi Ma didinina.