Wana ni mbaktumba hi Oze-d’a 13 - Bible azumeina

Matna handjaf suma a kak djangûna ki Ma didinina

¹ Ata yima suma Efraim-ma a de zlad’ina, suma pet a le mandarâ. A hle yazi akulo yam andaga d’a Israel-la, wani a kud’or Bäl, zlad’a vaziya, a bo.

² Ki tchetchemba, a nga le tchod’a, a nga i avogovogo, a nga yor angus ahlena ki kawei ma hapma, a nga yor fileina ki lem mazid’a pet. Ni sun nda sama d’alâ mi lat kabomba. A nga de kat ala: Ar suma a nga mba kahle suma ngat buzunina a sop vun gor amuhl ma a yorom máma.

³ Kayam ndata, a mba mbut d’igi amborogei d’a yorogod’a na, d’igi mbad’ï d’a ti ge ndjö ti gas seid’a na, d’igi mbirlim mba ti tor hububu ma ata yima to awuna woid’a na, d’igi andos ma mi buzuk kei akulo yam azid’ina na mi.

⁴ An ni Ma didina Alo magina ei yam andaga d’a Ezipte-d’a dei, agi wagi nga alo ma ding ngi, ni an tu. Ma sut ma ding nga d’i, ni an tu mi.

⁵ An wagï ni hur ful ma yam andaga d’a so d’a gangrasina.

⁶ Ata yima an hagi tena ndak yam mei magid’ina, agi hobogiya, agi hlagi yagi akulo. Ni kayam ndata ba, agi maragi kanu.

⁷ Ni kayam ndata ba, an ni mbut d’igi azlona na kagiya, d’igi sindilâ mi bur suma kä glovot na mi.

⁸ An nga ni lad’agi d’igi ambur urs sa a yot grotnid’a na, an nga ni zagagi hurugi woyo, an nga ni kizagagi woi d’igi azlo d’a ti kizak ahlena woi d’a na, amburei suma abageina a mba kizagagi woi kikizek mi.

⁹ Agi Israel-lâ, agi b’lagagi woi ni kayamba agi kagagi djangûna ki an ma ni ndjunuginid’a.

¹⁰ Amul magi ma mi sud’ugina mi nga ni lara ge? Magi suma nglo suma avorogi suma a tagagi lovotina a nga ni lara ge? Ni agi ba, tchenen ala: Ang hami amulâ ki suma nglo suma avoromina d’uo zu?

¹¹ An hagi amuleina ni kayîna; ata yima an hurun zalâ, an yogizi woi mi.

¹² Tchod’a hi suma Efraim-mid’a, a b’irit nga kä; tchila mazid’a, a ngomot nga kä mi.

¹³ Ndaka mba d’i nde kazi ni d’igi vuta ti nde yam atchad’a na. Azi ni d’igi gor ma yam nga d’uo na na. Ata yima yam ma vuta nda’â, nga mi ndeï woi kur asum mbi.

¹⁴ An mba ni prud’uzi woi ata yima azuleina zu? An mba ni prud’uzi woi abo matna zu? Ang matna, tugud’ei mang nga tcho d’a tchi matna ti nga ni lara ge? Ang yima azuleina, ad’engêng nga ang b’lak ki sumid’a ti nga ni lara ge? We hohoud’a dap vita iranu.

¹⁵ Le andjafâ hi Efraim-ma nga mi i avogovok aduk b’oziyoma pî, simetna mba mi tcholï abo ma yorogona, ni simet ma tcholï hur fulâ ata Ma didinina. Mba mi som mbiyo mam ma laud’a woyo, mba mi sid’amam golong mamba woi mi. A mba hurumum ahle mam suma guzuzi kal teglesâ mi.

¹⁶ Suma Samari-na zlad’a mba d’i vaziya, kayam a kak djangûna kAlo mazina. A mba tchazi avun ayîna, a mba ndjirebezi grozi suma gureina woyo, amiyôzi suma wirâ, a mba zazi huruzi woi mi.