Ezekiyel 15 - Bible azumeina

Guguzlu d’a a ngalat teid’a

¹ Ma didina mi dan ala:

² Ang gor sana, na ni agu guguzlud’a zlat ti kal agu ma lara ge ma aduk agud’ina pet tchu?

³ Na ni sana mi ndak á hlagu guguzlud’a á le ki sunda zu? D’oze sana mi ndak á hlagu mat ma gorâ á gum akulo á gap va kua zu?

⁴ Gola! A gat naduk akud’a á ngala. Akud’a ti ngalat vunat tei zla tam djak, ti vugut adigat mi, na ni ti ndak á le sun nda ding zu?

⁵ Gola mi, le ata yima ndat nga ki iratna, sa ndak á le sun ki sed’et tuo, le akud’a ti ngalad’u ni, ti mba d’i le ni nana d’ang nge? Ti ndak á le sun nda ding tu d’i.

⁶ Ma didina mi dala: D’igi an he agu guguzlud’a á ngala aduk agud’a na, d’igi an tchugut aku á ngala na, an mba ni tchuk suma a nga kaka avo Jerusalem-ma aku na mi.

⁷ An mba ni mbut iran ni ngoboziya. A mba djib’er ala a buzuk kei aduk akud’a da’, wani akud’a mba d’i ngalaziya. Fata an mbut iran á ngobozid’a, agi mba wagi ala an ni Ma didina.

⁸ An mba ni mbut ambas ndata djona, kayam suma kurutna a he tazi yam sun nda batranga. An Salad’a Ma didina ni de na.