Buzuk ka Abud’a 1 - Bible azumeina

ALONA MI BUZUK ISRAEL-LÂ WOI AVO EZIPTE ( 1.1—15.21 ) A djop vun Israel-lâ avo Ezipte

¹ Wana ni simiyê Israel grom suma a mba ki sed’em Ezipte-na, nge nge pî mi mba ki sum mama:

² Ruben, Simeon, Levi, Juda,

³ Isakar, Zabulon, Benjamin,

⁴ Dan, Neftali, Gad ki Aser.

⁵ Andjafâ hi Jakob ma mbeï ki sed’em Ezipte-na pet ni dok kid’iziya, wani Josef mi sä ni Ezipte da’.

⁶ Josef mi mit zlapa ki b’oziyoma pet, ki suma a mba kabum kur atchogoi ndatina pet mi.

⁷ Gro Israel-lâ a nga vud’a, a nga zul avogovogo, a zul mimiyâk, a nga mbut ad’enga, a oî yam ambasa mi.

⁸ Amul ma awili ma we nga Josef fuo na, mi te yam Ezipte.

⁹ Mi de mi sum mama ala: Gola! Israel-lâ a zul ablaud’a, a kalei kad’enga mi.

¹⁰ Ei halei lovota á d’elezi á zula. Le hina d’uo ni, le ayîna tchola ni, a mba zlap ki mei suma djangûna, a mba duriya. Bugola, a mba buzuk kei kur ambasa.

¹¹ Ata yi máma a tin suma a golozi ata yima sundina kazi á kid’eyêzi irazi ki sun nda aneka. Ni hina ba, a min azì ma Pitom ki Ramses-sâ á tchuk ahlena hi Faron-na kua.

¹² A nga kid’eyêzi irazi ngola hina pî wani, a nga zula, a nga i avogovogo. Ezipte-na huruzi nga mi zal kaziya.

¹³ Ni kayam ndata ba, a tin Israel-lâ ata sun nda aneka d’igi magumeina na.

¹⁴ A mbud’uzi yima kaka irazi tchod’a ki sun nda aneka, nala, a tub’ok lubuna, a tchi derengelâ, a nga le sun nda asined’a mi. Ni hina ba, a tinizi sun nda anek ka lara ge pet kaziya, a nga wazi hohowozi d’i.

Faron mi djop vun Israel-lâ

¹⁵ Arop suma Hebre suma vud’aropma a nga mbà; d’a hid’a a yat ala Sifra, d’a hid’a a yat ala Puwa. Amul ma Ezipte-na mi dazi ala:

¹⁶ Le agi vud’ugi arop suma Hebre-na, le agi wagi ni gor mandjufâ ni, agi tchum mbeyo; le ni gor atchad’a ni, agi arat bei tchid’a.

¹⁷ Wani arop suma vud’aropma a nga ring mandara Alona, a le nga d’igi amul ma Ezipte-na mi hazi vuna na d’i, a nga ar gro andjofâ bei tchid’a.

¹⁸ Amul ma Ezipte-na mi yï arop suma vud’aropma, mi dazi ala: Ni kayam me ba, agi lagi hina ge? Agi aragi gro andjofâ bei tchid’a nana ge?

¹⁹ Arop suma vud’aropma a hulong dum ala: Arop suma Hebre-na a nga d’igi arop suma Ezipte-na na d’i; azi ad’enga heî; ami mbamiza ni d’igi azi vut wa da’.

²⁰ Alona mi mun yam arop suma vud’arop ndazina. Israel-lâ a nga zul kam kua kam kua, a mbut ad’enga.

²¹ Alona mi zul andjafâ harop suma a vud’aropmina, kayam a lum mandaramu.

²² Wani Faron mi he vuna mi sum mama ala: Agi tchugugi gro andjof suma Hebre suma a vut awilina woi pet kur aluma. Wani agi tchugugi gro aropma woi aduk aluma d’i.