Amos 5 - Bible azumeina

Sawal la yor ta d’a yam Israel-lîd’a

¹ Agi Israel-lâ, agi humugi zla d’a an nga ni data. Wana ni sawal la yor ta d’a an nga ni hlat kagid’a:

² Agi Israel-lâ, agi ni d’igi gor wei d’a ti puk kä andaga d’a ti mita na. Agi mba hulong tchologi akulo d’i. A mba aragi kä yam andaga magid’a, Sama mi yogi akulona nga d’uo mi.

³ Kayam Salad’a Ma didina mi dala: Azì ma ngol ma Israel ma suma a buzuk kei kur dubu á i durîna a mba hulong kurumî kis; azì ma ngol ma suma a buzuk kei kur kis á i durîna a mba hulong kurumî dogo mi.

Alona mi dazi ala a halamu

⁴ Ma didina mi de mi Israel-lâ ala: Agi halan-ngïya, va mba mi lagi d’i.

⁵ Agi halandi Betel li, agi igi Gilgal luo mi. Agi igi Berseba d’uo mi, kayam a mba yo suma Gilgal-lâ magomba ki zla tazi pet, Betel mba d’i mbut ni vama hawana mi.

⁶ Le agi min va mi lagi d’uo ni, agi halagi ni Ma didina. Agi andjafâ hi Josef-fâ, le hina d’uo ni, mba mi fo d’igi akud’a na; mba d’i ngal Betel lei pet bei fe sama tchat teina ba.

⁷ Agi ni suma mbud’ugi zla d’a irata yat kä na, agi ni suma mired’egi d’ingêra kä andagana.

⁸ Mi lades tchitchiu d’a a yat ala Gro azungeîna d’a ki d’a a yat ala Gro yuguneina, ni ma mbut yima nduvunda yima fod’ina, ni ma mbut yima b’od’a nduvundina, ni ma mi yi mbiyo alum ma ngolâ mi wed’em mbei yam andagad’a petna. Simiyêm ala Ma didina.

⁹ Mam nga mi mba ki b’laka yam suma ad’engâ atogo zak, nga mi mba ki b’laka yam azì ma ad’eng ma ngunguna mi.

¹⁰ Agi nga noyôgi sama nga mi de zla d’a d’ingêra avun agre’â ata yima ka sariyad’ina, agi nga gologi sama mi le glangâs ma iratnina is mi.

¹¹ Agi nga mired’egi ma kid’aka kä kasegiya, agi nga yom geme mama ki mbut ira. Ni kayam ndata ba, agi nga minigi azì ma djivina kahina d’a tcheta, wani agi mba kagagi kur ri, agi nga pagi guguzlu d’a djivid’a, wani agi mba tchat sümut ti.

¹² Kayam an we tchila magid’a tablaud’a, tcho magid’a ti kal ngola heî mi; agi nga kid’eyêgi ir ma d’ingêrâ, agi nga vagi bege d’a mbut ira abomu, agi nga d’elegi suma ka sariyad’a á ka sariyad’a hi suma houd’id’a.

¹³ Kayam ndata, sama ned’a mi kak ki vunam ma du’â kur atchogoi d’a hina d’a, kayam natchogoi d’a tchod’a.

¹⁴ Agi halagi ni djivid’a, agi halagi ni tchod’a d’i. Hina wani, va mba mi lagi d’i. Ma didina Alo ma ad’engêm kal petna mba mi kak ki sed’egi d’igi agi dagi na.

¹⁵ Ar agi noyôgi tchod’a woyo, agi lagi yam djivid’a, ar agi tinigi sariya d’a d’ingêra. Hina wani, dam Ma didina Alo ma ad’engêm kal petna mba mi we hohowa andjafâ hi Josef ma arâ kla.

¹⁶ Kayam ndata, Salad’a Ma didina Alo ma ad’engêm kal petna mi dala: Ata yima lara ge pet, ir palum mba lara ge pet, a mba tchi horâ kua, a mba tchi ala: Alë! Alë! A mba yï suma zuma á tchina, a mba yï suma a we ge horâ heîna á tchina mi.

¹⁷ Ma didina mi dala: Fata an kal adigagid’a, suma a mba tchi horâ aduk asine ma guguzlu ma lara ge pet.

Bur ma Ma didina mba mi mba kuana

¹⁸ Ni zla d’a hohoud’a kagi agi suma tagi nga d’i lagi zlezleû yam bur ma mbad’a hi Ma didinina. Agi mba fagi ni me kur bur ma mbad’a hi Ma didinina ge? Bur máma mba mi mbut ni bur ma nduvunda, nga ni bur ma b’od’a d’i.

¹⁹ Mba mi mbut ni d’igi sama ring avok azlona mi ngaf ki ursîna na, d’oze mi kal avo hatam mi gabom yam gulumun mama guguina mi ed’ema na mi!

²⁰ Burâ hi Ma didinina ni bur ma b’od’a d’i, ni bur ma nduvunda, mba mi wile d’uo mi.

Kud’or ra Alona mi golot isa

²¹ Ma didina mi dala: An noî vun til magina, an golom is mi, tan nga d’i lan djivi yam vun til magina d’uo mi.

²² Ata yima agi nga mbandï ahle suma ngat buzu suma ngala ki he d’a hawa d’a afutina, an nga ni vazi abogi d’i. Ata yima agi nga mbandï ki gro amuzlei suma d’orâ ahle suma ngat buzu suma ngalina, an nga ni golozi ki iran nduo ko.

²³ Agi hud’ugi sä woi ki sawal magi d’a hawa yaka, an min hum del la ading magina d’uo mi.

²⁴ Wani agi aragi sariya d’a d’ingêra ti djang d’igi mbina na, agi aragi d’ingêra ti djang d’igi toliyon nda bei sod’a ba d’a na mi.

²⁵ Agi Israel-lâ, kid’a agi lagi bizad’a dok fid’i abagei hur fulîd’a, na ni agi handï ahle suma ngat buzuna ki he d’a hawad’a zu?

²⁶ Hawa! Agi yogi ni Sakut alo mala namul magina na ki Kewan alo mala ni tchitchiud’a na suma agi minizi kabogina.

²⁷ Kayam ndata, an Ma didin ma simiyên ala Alo ma ad’engên kal petna na nga ni dagiya. An mba ni yogi ni igi magomba sä woi dei bugol Damas.