1 Sunda Hamuleinid’a 20 - Bible azumeina

Jowap mi hle Raba

¹ Tcha damad’a, natchogoi d’a amuleina a i durâ abageid’a, Jowap mi i ki azigarâ ablaud’a á b’lak ambasa hi suma Amon-nid’a, mba mi ngui azì ma Raba-na. Wani David mi ar kaka avo Jerusalem. Jowap mi dur azì ma Raba-na, mi b’lagam mbeyo.

² David mi hleï avaval la yam amul ma hur azì mámid’a. Aneget kal kilona dok hindi, a d’udjot ni kahina d’a guzut kal teglesa mi. A kulubut yam David. David mi hurumï ahle suma kur azinina ngola.

³ David mi yo suma kur azinina, mi tinizi ata sun nda ngat aguna ki sïna, á wak ahinad’a ki djiga ma kaweina, á ka aguna kandjet ma kaweina mi. Mi le suma kur azì ma Amon-na pet ni na mi. Bugola, mi hulong Jerusalem ki azigar mama pet.

David mi dur ki Filistê-na

⁴ Bugol ahle ndazina, ayîna mi tchol tchol la dinga aduk Israel-lâ ki Filistê-na avo Gezer. Ata yi máma Sibekai ma Husa-na mi tchi Sipai ma ad’u andjafâ hi Rafa-na. Suma Filistê-na a ge yazi kä.

⁵ Ayîna mi tchol tchol la dinga ki Filistê-na. Elanan Jayir goroma mi tchi Lami ma Gat-na Goliyat wiyema. Asap mamba aguwat ni d’igi gor zuzuna na.

⁶ Ayî ma dingâ mi tchol kua avo Gat. Sama fiya’â mi nga kua, tchitchit ta abomba ki d’a asemba ni karagaya karagaya. Tchitchid’am pet ni dok mbà yam fid’i; ni ma ad’u andjafâ hi Rafa-nina mi.

⁷ Mi ngul Israel-lâ. Jonatan Samma ma David wiyemina goroma mi tchumu.

⁸ Sum ndazina ni suma ad’u andjafâ hi Rafa ma Gat-nina. David azi ki azigar mama a tchaziya.