Məfaʼə 28 - Əka yi Fîə

Pɔlə á Mə́mə Aláʼə Malta

¹ Əghâ ándó pəg nə ńkə nə́ nəwû tə ńkoʼə̂ á nkaŋ asəg lə́, ńdzóʼ ńgə́ kyádkənkǐ yi ə́wɨ́ lə́ Malta.

² Pɨ pə́ aliʼ yi wɨ́ pó kə chígə́ ńnəələ̂ akɔŋnə á mbô pəgə́, ńnyagtə̂ móg ńtíʼ ńgɛd pəg zɔ́gə, ńté ńgə́ mbəŋ nə ńtə́ ńdô, əfə́g kə́ ńchîə apeŋə́.

³ Pɔlə a nə ńdag nkwə́ŋ ńchúʼə á mə́ tɔ nə́, ndzaŋ móg nə ńtə́ nə́ ńkɛ́lə lə́, sénəsê a fɛ́lə á mə́m nkwə́ŋ zə̂ ńdúmə apô Pɔlə ńdáʼ ə́wə́.

⁴ Əghâ ándó ngaŋə́láʼə Malta nə ńjɨ́ nə́ ndzaŋ sénəsê wə́ á tsə́ŋnə nə́ apô Pɔlə lə́, pó chúʼə á mə́ sóŋ nə́ tətɨ pó ńgə́, “Lə́ ndə̌ŋdəŋ ńgə́ ŋwu ghɛn lə́ njwítə ńté ńgə́ a pǎtə ńkəələ̂ nəwûə á mə́m nkǐ lə́, əsê páʼ ä sáʼ nə́ məsáʼ mə́ pɨ ńkə́ ə́fɛ̂ ajú páʼ á pə́ nə́ azɔ́b a kě yǐ mɛdtə̂ yə́ a chîə á mbî pô.”

⁵ Lə́ Pɔlə a megə̂ apô ají, nó zə̂ ə́ wǔəə á mə́m móg tsɔʼə tə ghɛlə̂ anu yitsə̌ nə́ yə́.

⁶ Ngaŋə́láʼ zə̂ pyádnə ńtíʼə ḿbyáabə ńgə́ a yǐ kɔ́ʼkə kɨ ghabkə̂ wǔəə əsê kwûə. Pó pyáb nə́ tə́sɛ ndɛd anu yətsə̌ a pə́ ńkě nə́ Pɔl laŋ pô, pó tíʼ ńkwúblə məntɨ́ mɔ́b, ńtíʼ ńkwaŋ ńgə́ lə́ əsê yitsə̌.

⁷ Ḿbáatə aliʼ páʼ Pɔl pó pətsə́ pɨ pó nə chî nə́ wɨ́ lə́, əliʼ ndəsê pətsɨ́ kə chî wɨ́ ḿbə́ pipə́ ŋwu pə́ fóŋ nə́ nə́ Publusə lə́, a kə pə́ lə́ Əfo kyádkənkǐ yi wə́. A nə ńdɔgə̂ áwə́g əshîʼnə, ńkə́ ńdzə́gə áwə́g nə́ əlě mbî pɛ́n teelə́.

⁸ Á laŋ ńgə́ Tǎ pə Publusə a nə noŋnə̂ ńtə́ ńgoonə̂. A nə ńtúg əfə́g pó ntsə́ŋə. Pɔlə a ghɛn ńdzə́ənə yí ńnoŋkə̂ mbô míə á ndu yí ńtíʼ ńchaʼtə́sê nə́ yə́ a tíʼ ńgyáŋə.

⁹ Ndzaŋə á nə ńdaŋ nə lə́, pɨ pətsəm á mə́m kyádkənkǐ páʼ pó nə ńtə́ nə́ ńgoonə̂ pó yǐəə á mbô Pɔlə a chaʼtə́sê pó yáŋə.

¹⁰ Pɨ pə̂ pó fɛ̂ əpú pipə́ nɨ́ nə́ á mbô pəgə́, ndzaŋə ándó pəg nə ńchî nə́ á mə́ ghɛn nə́ nə́ mbi nə́ nənyi əwəg lə́, pó néŋə ajúmə atsəmə á mə́m aŋkənúʼə́ páʼ á nə́ ńkoʼnə̂ nə́ nə́ nənyi əwəgə́.

Pɔlə a Nyi Ə́fɛ́lə Malta Ńgɛnə̂ á Lomə

¹¹ Ndzaŋ pə́ nə ńchî nə́ Malta nə́ sáŋ teelə́ lə́, pəg ghɛn nə́ mbi nə́ nənyi əwəgə́ á mə́m aŋkənúʼə́ yə ndaʼ páʼ á kə lǒo nə́ Alekzanda, pə́ fóŋə nə́ “Məfág mə́ məsê,” zə́ələ́ á kə pə́ ndɛd əfə́g ńtíʼ ńtə́əmə kyádkənkǐ ghɛnə́.

¹² Pəg nyi ńtə́əmə á tɔ̂ŋ yitsə̌ pə́ fóŋ nə́ nə́ Silakusə ńtíʼ ńchî ə́wɨ́ əlěmbî pɛ́n teelə́.

¹³ Pəg fɛ́lə Silakus ńnyinə̂ á mə́m nkǐ tə ńtíʼ ńgyǐ ńkwúnə á tɔ̂ŋ Ligumə. Mbî fóg kəfəələ á fɛ́lə á ndú mətoŋə́ ńchúʼə á mə́ kɔ́ʼ nə́, yətsə̌ alě á laŋ pəg kwúnə á tɔ̂ŋ Putɔli á mə́mə aláʼə Itali, ńtə́gə aŋkənúʼə́ ńtíʼ ńgɛnə̂ á mə́m tɔ́ŋə.

¹⁴ Pəg jɨ́ pəlim pətsə́ ə́wɨ́ á mə́m Yeso pó tíʼ sóŋ ńgə́ pəg yǐ ńchî pə̌gpo nə́ əlěmbîə asaambɛ̂. Ə́fɛ́d ə́wɨ́ ńgɛn ńkwúnə á Lomə.

¹⁵ Pəlimə́ a ndzəm Yeso á Lom pó zóʼ ńgə́ pəg yǐəə, ńtíʼ ńchúʼə á mə́ yǐ nə́ tégə áwə́gə́. Pó pətsə́ pó láʼ ńtégə áwə́gə́ á məta Apusə, pətsə́ pə́ tégə áwə́gə́ aliʼ pə́ fóŋ nə́ ńgə́ (Məndɛ̂ mɛ́n teelə́ mimə́ Pəghəənə) əghâ ándó Pɔlə a nə ńdzɨ́ nə́ ághɔ́b lə́ ə́fɛ̂ ndǎ á mbô Əsê anu yi wə́ á tíʼ ńnéŋ ńtíʼ əyə́.

Ndzaŋ Pɔlə a nə Ńkwú nə́ á Lomə

¹⁶ Əghâ ándó pəg nə koʼ nə́ á Lom, pəg mɛdtə̂ Pɔl ńgə́ a chîə á ngǎ yə́, táʼ ŋwunə á mə́m ngaŋə́maʼə́ntso á tə́ ńnáŋə yə́.

¹⁷ Əlěmbî pɛ́n teelə́ laŋ, Pɔlə a fóŋ mətû mə́ Pəjusə á Lomə, əghâ pó nə ńgyǐ nə́ á sóŋə á mbô pó ńgə́, Pəlimə́ mə, maŋ pǎtə ńkě anu yətsə̌ ghɛd ndzaŋ mbɔʼ ndě pɨ pɛn ə́ záŋ lə́, maŋ kě noŋkə pətǎ pɛn kǐ pô, pɨ pɛn pó waamə̂ mə á Jɛlusalɛm ńtíʼ ə́fɛ̂ mə á mbô pɨ pə́ Lomə ándó ngaŋətsáŋə.

¹⁸ Əghâ ándó mətû mə́ Lom mə́ nə náŋ nə́ əsáʼə mə lə́, ńtə́ ńdoonə̂ á mə́ mɛdtə̂ nə́ mə, ńté ńgə́ pó nə jɨ́ ńgə́ maŋ kě ghɛlə̂ anu yətsə̌ təmbɔʼ pə́ jwítə mə pô.

¹⁹ Lə́ mətû mə́ Pəjusə á Jɛlusalɛm pó kǐ ńgə́ kɔ pɨ pə́ Lom pó mɛdtə̂ mə. Maŋ tíʼ ńkě chî nə́ anu yitsə̌ á mə́ ghɛd nə́ tə ńdéʼtə ńgə́ maŋ sóŋ ńgə́ pə́ chaakə̂ əsáʼə mə á mbô Kasa pô, lə́ ḿbə́ ńkě túgə anu yətsə̌ á mə́ sóŋ nə́ ńté pəənə mə páʼ pó ghɛd nə́ á kě koʼnə̂ pô lə́.

²⁰ Lə́ ghɛd ə́lɨ́d maŋ fóŋə áwə́ənə́ á mə́ tsáb nə́ á mbô pəənə́, ńté ńgə́ maŋ nə ńdɔ ńgə́ nə́ jî ńgə́, maŋ chî feenə́ atsáŋ lə́ ńté ŋwu páʼ Pəjus pó tə́ nə́ ḿbyáabə lə́.

²¹ Mətû mə́ Pəjusə mə́ mə́ kwěe a Pɔl ńgə́, “Pəg kě aŋwaʼlə yətsə̌ jɨ́ páʼ á fɛ́d nə́ Judya ńté gho pô, lə́ táʼ ŋwunə á mə́m pəlim pəg a kě kə́ ńdǒ ə́wə́ ńgyǐ fiʼtə̂ áwə́g nə́ nkɨ ńgə́ gho ghɛlə̂ anuə təpɔŋ pô.

²² Lə́ pəg yǐ kɔŋə̂ á mə́ zóʼ nə́ á mbô gho, azô anu gho kwaŋ nə́, ńté ńgə́ pəg jî ńgə́ á mə́m əliʼ ətsəm, anu ńté nkyeetə zɨ nə́ sóŋ nə́ anu ńté lə́, pɨ pə́ tséebə tsɔʼə təpɔŋ ńté zə́ələ́.”

²³ Pó tíʼ ńdaʼnə̂ alě pó yǒ nə́ tégə yə́. Ndzaŋə ándó alě yə wə̂ a nə́ ńkoʼ nə́ lə́ pó pipə nɨ́ nə́, pó yǐ ńtéekə a Pɔl aliʼ páʼ a nə ńchî nə́ ə́wə́. Ńchúʼə məsânə tə ńkoʼə̂ á ndɛd nkwanə́, Pɔlə a fiʼtə̂ ághɔ́b nə́ anu ńté anuə nəfoonə Əsê, ńtíʼə ńdoonə̂ á mə́ ghɛd nə́ pó jîə anu ńté Yeso Klisto ńdɔgə̂ aŋwaʼlə pənoŋkə pə́ Mosisə ḿbá əŋwaʼlə páʼ Məntúmə́sê mə́ nə ŋwaʼlə̂ nə́ á mə́ nɨd nə́ ághɔ́b nə́ anu páʼ a pěʼ nə̈ ə́sóŋə.

²⁴ Pó pətsə́ nə ḿbímə anu páʼ Pɔlə a sóŋ nə́, lə́ pətsə́ pə́ pə́ ńkě pí pô.

²⁵ Pó chúʼə á mə́ zɔŋ nə́ á tətɨ pó. Pó nə ńjǐ tə́ shamnə̂ lə́, Pɔlə a fiʼtə̂ táʼ anuə yətsə́ ńgə́ “Ajwǐəsê a nə koʼnə̂ á mə́ tsáb nə́ á mbô pətǎ pɨ́ ńdaŋə̂ á mbô ntûsê Izaya ńgə́,”

²⁶ Ghɛn fiʼtə̂ pɨ pɨ ńgə́, Nə́ yǒ zóʼ kə́ zóʼ ngǎ yi nɨ́ nə́, lə́ atûə azə́ənə́ á pə́ ńkě nə́ anu yəwɨ́ tsɔ́ʼnə pô; Nə́ yǒ náŋə kə́ pɨ náŋə ə́ pə́ kě jɨ́ pô

²⁷ ńté ńgə́ pɨ pɨ pó kwúd məntɨ́ móobə́, pó kə́bkə mətôglə móobə́, ńjî ńgə́ kɔ pó zóʼə. Pó kə́bkə əmə́g móobə́, ńjî ńgə́ kɔ pó jɨ́ nə́ əmə́g móobə́, ńdzóʼ nə́ mətôglə móobə́, ńjî nə́ məntɨ́ móobə́, ə́sɛdnə̂ ńgyǐəə á mbô maŋ, ńgə́ maŋ tsóʼə ághóobə́.

²⁸ Á mə́ lwigtə̂ nə́, Pɔlə a sóŋ ńgə́, “Maŋ loonə̂ lə́ ńgə́ nə́ jî ńgə́ nkɨ Əsê ndzaŋ páʼ Əsê a chwádkə nə́ pɨ lə́, pə́ túmə á mbô Pətəjǐsê, pó yǐ ə́ tə́gə atû ńjwə́ʼtə.”

³⁰ Pɔlə tíʼ ńchî ə́wɨ́ ngoʼ pɛ̌ ə́faʼə̂ anuə atsəmə á ngǎ yə́, ńtû ndɛ̂ əjǐə a ngǎ yə́ ńtíʼə̈ ńdɔgə̂ ŋwu ntsəm əshîʼnə páʼ a yǐ nə́ á mə́ jɨ́ nə́ yə̈.

³¹ Ə́sóŋə anu ńté Anuə Nəfoonə Əsê ńdzéʼkə ághɔ́b nə́ anuə ńté Mmaʼmbî Yeso Klisto á əshîsaŋə ŋwu tsə̌ a kě yí pɨ ńjwaʼ pô.