Məfaʼə 20 - Əka yi Fîə

Pɔlə a Nyinə̂ á Mə́m Mboʼ Masedonya pó Glikə

¹ Ndzaŋə ándó ajwaʼlə zə̂ á Ɛfesusə á nə ńdaŋ nə́ lə́, Pɔlə a fóŋ ngaŋə́zoŋə́ndzəm Yeso ńtséebə á mbô pó á mə́ néŋ nə́ ntɨ́ əghɔ́b ə́ tyantə̂, ńtíʼ ḿbookə̂ ághɔ́b, ə́fɛ́d ńchúʼə á mə́ ghɛn nə́ á mboʼ Masedonya.

² Ndzaŋə a nə̈ nyi nə́ ńdaŋ əliʼə́ á mə́m Masedonya lə́, ńnéŋə məntɨ́ mə́ ngaŋə́zoŋə́ndzəm Yeso á mə́m pətɔ̂ŋ nə́ ətsáb ntəgə́. Ńgɛn ńkwúnə á mə́m Glik,

³ ńchî ə́wɨ́ sáŋ zɛ́n teelə́. A nə ńtə́ ńdoonə̂ á mə́ nyi nə́ á mə́m nkǐ ə́ ghɛnə̂ á mboʼ Sylya lə́ ḿbə́ ńdzóʼ ńgə́ mətû mə́ Pəjus pó nə ńtyáŋtə á mə́ jwítə nə́ yə́ á ndú nkǐ á Sylya. A tíʼ ńkwúblə ntɨ́ yí ḿbəənə̂ á Masedonya á mə́ tíʼ nə́ ghɛnə̂ Sylya.

⁴ Pɨ pətsə́ pó nə ńdzoŋə̂ Pɔlə á nənyi wɨ́d wə̂, pó nə ḿbə́ lə́, Sopata mɔ́ Pilus páʼ a pə́ nə ŋwu Belya, Alistakus ḿbɨ́ ḿbə́ nə́ Sɛkondus páʼ pó nə ə́fɛ́d nə́ Tɛsalonika, Gayɔs páʼ a nə ə́fɛ́d nə́ Debə, Tikikɔs po Təlofimusə á mə́m mboʼ Esya, ḿbɨ́ ḿbə́ nə́ Timoti.

⁵ Pó nə ńkwá mbi ńgɛn ḿbyáabə áwə́gə́ á Təlowasə.

⁶ Pəg laŋə̂ á mə́m nkǐ ńdǒ á Filipi tsɔʼə páʼə alě akɔŋtə páʼ pə́ kɔ́d nə́ apéenə məkálə́ tə mbê a kə́ laŋ nə́, əlě mbî tâ laŋ pəg tégə ághóobə́ Təlowasə, pə̌gpo chî ə́wɨ́ əlě mbî asaambɛ̂.

Pɔlə a Júmkə Ŋwu Páʼ a Kwû nə́

⁷ A nə ḿbə́ nə́ ntsɛɛmbiə alě á mə́m ngab mbî lə́, pəg kyeetə̂ pə̂gpə ngaŋə́zoŋə́ndzəm Yeso á mə́ jî nə́ ntéelə. Pɔlə a tsáb pó po nə tə́sɛ ndɛd tə ńkoʼə̂ á ntɨ̌túʼ ńté ńgə́ a kə chîə á mə́ lê nə́ ghɛnə̂ yə́ á məsânə.

⁸ Pə lam pipə nɨ́ nə́ pə́ kə tə́ ńkɛ́lə á mə́m ndɛ̂ ajábtə aliʼ pə́ nə ńkyeetə̂ nə́ ə́wə́.

⁹ Mɔ́ mbyâŋnə yitsə̌ páʼ əlɛ́n yí nə ḿbə́ nə́ Utikɔsə á nə ńnáanə a ntsoolə ajweekə. Ndzaŋə atséebə Pɔlə a kə sag nə́ lə́, a wǔəə mə́m ntɨ pəlê, ńtíʼ ńgwǔ ə́fɛ́lə á ndumə ajábtə ndɛ̂ teelə́ pə́ yǐ ńtə́ ńtwáamə yə́ a pɛ́dtə ńkwûə.

¹⁰ Pɔlə a tsóolə əsê ŋ́ŋwúʼnə á ndu yí, ńgwaamə̂ ghaŋ yí ńtíʼ ə́sóŋ ńgə́, “Kɔ nə́ pɔ́gə, nchîmbî əjǐ ə́ pɛ́lə á mə́m yə́”

¹¹ Ndzaŋə ándó Pɔlə po kə pɨ nə́ ńkɔ́ʼə á mə́m ndɛ̂ ajábtə lə́, ńtíʼ ńjî ntéelə. Pɔlə a pɨ ńkə́ ńtsáb pó po nə tə́sɛ ndɛd tə mbî ə́ fógə. A tíʼ mɛdtə̂ ághɔ́b ńgɛnə̂ yə́.

¹² Pó tíʼ ńdɔgə̂ mɔ́ mbyâŋnə yí wɨ́ ńgɛn nə́ yí páʼ a pɛ́d nə́ mbî nə tə́kɔʼ akɔŋtə.

Pɔlə a Fɛ́lə Təlowasə á mə́ Ghɛn nə Miletus

¹³ Pəg kwá mbi ńdaŋə̂ á mə́mə aŋkənúʼə́ ńgɛnə̂ á Asos á mə́ pyáb nə Pɔlə ə́wə́, ńté ńgə́ a kə sóŋ ńgə́ pəg lɔgə̂ yí ə́wə́. A kə pɨ ńtə́ ńdoonə̂ ajíə á mə́ ńnyi nə́ lə́ á məko ə́fɛ́lə Təlowasə ə́ ghɛnə̂ Asosə, a kə jɨ́ ńgə́ mbɔʼ a nyinə̂ məko ńgɛn wə́.

¹⁴ Ndzaŋə a kə téekə nə áwə́gə́ Asos lə́, pəg tíʼ ńdɔgə̂ yí nə́ aŋkənúʼə́ pə̌gpo tíʼ ńgɛn ńkwúnə Mitilɛnə.

¹⁵ Mbî pɨ ə́fóg pəg tíʼ ńnyinə̂ á nkǐ ə́fɛ́lə á Mitilɛn ńgɛn ḿbáatə Kayus, yitsə̌ mbî ə́fóg pəg ghɛnə̂ Samos, yitsə̌ mbî pɨ ə́fóg pəg ghɛnə̂ Miletus.

¹⁶ Pɔlə a nə jɨ́ ńgə́ mbɔʼ a nyinə̂ á mə́m nkǐ ńdaŋə̂ Ɛfesus ńté ńgə́ a kə kě kɔŋə̂ á mə́ laŋkə̂ nə́ ndɛd yitsə̌ á mboʼ Esya pô. A kə tə́ ńgə́glə ńgə́ mbɔʼ á kwúnə á Jɛlusalɛm záʼ alě akɔŋtə Pɛntekɔs á pɔŋə̂ koʼə̂.

Atsáb Páʼ Pɔlə kə Fiʼtə̂ nə́ Mətû mə́ Nkyeetə Pɔ́ pə́ Əsê á Ɛfesus Záʼ Ḿbɔŋə̂ Mɛdtə̂ Ághóobə́

¹⁷ Əghâ ándó pəg nə ńkoʼ nə á Militɔs lə́, Pɔlə a tú nkəənə á Ɛfesus ńgə́ mətû mə́ nkyeetə mə́ téekə yə́.

¹⁸ Ndzaŋ pó nə ńgyǐ nə́ lə́, a chúʼə á mə́ sóŋ nə́ nə́ pó ńgə́, “Pɨ pətsəm nə́ jî ndzaŋ páʼ maŋ chî nə́ á tətɨ pɨ ə́fɛ́d nə́ ndɛd maŋ kə tə́g nə́ məkoolə mə á Esya.

¹⁹ Maŋ nə̈ faʼə̂ á mbô Mmaʼmbî Yeso lə́ nə atsóokə́mbəəmə atsəm nə́ nəkyéŋə á əmə́g maŋ ḿbɨ ḿbə́ nə́ əkwaʼlə páʼ ə́ nə̈ ńgyǐ nə́ á mbô maŋ ndzaŋə ándó pɨ pə́ Islɛl pó nə̈ ńdɔ nə á mə́ néŋ nə mə á mə́m ngə́ʼə.

²⁰ Nə kə̂ ńjî ńgə́ maŋ nə ńkě chîə tə ghə́ maŋ fiʼtə̂ áwɨ́ nə́ anu mbɔʼ á kwáalə áwɨ́ pô, ńkə́ ńdzéʼkə áwɨ́ nə́ anǔəsê á əshîsaŋ pópə ntso məláʼə.

²¹ Nə jî ndzaŋ maŋ nə̈ ńkwantə̂ pɨ pə́ Islɛl po pə Pətəjǐsê ńgə́ pó kwúblə á mə́m təpɔŋ əghɔb ńgyǐəə á mbô Əsê ńkə́ ńtúg mbimə́ a mə́m Mmaʼmbî əwɛn Yeso Klisto.

²² Əghâ nə maŋ ghɛnə̂ lɛ̌ á Jɛlusalɛmə á mə́ zóʼ nə́ anu páʼ Ajwǐəsê a sóŋ nə́ ńgə́ maŋ ghɛlə̂, ḿbə́ ńkě jîə anu maŋ yǐ nə́ ghɛn wə́ á laŋə̂ á mbɨ maŋ pô.

²³ Ndaʼə anu maŋ jî nə́ lə́ ńgə́ Ajwǐəsê ä sóŋ nə maŋ ńgə́ á mə́m tə́kɔʼ tɔ̂ŋ ntsəm pə́ yǐ ńnéŋə mə atsáŋə ə́ kə́ ghɛd maŋ zɨ́ ngə́ʼə.

²⁴ Maŋ pə́ ńkě nchîmbîə mə ándó ajûtsə́ lɔg pô, tsɔʼə ńgə́ anu yəwə́ á mɛdtə̂ maŋ məgtə̂ ndə̌ mə ḿbɨ́ ḿbə́ nə́ afaʼ páʼ Mmaʼmbî Yeso Klisto a nə ə́fɛ̂ nə́ ńgə́ maŋ faʼə̂. Afaʼ yə́ wɨ́ lə́ mə fiʼtə̂ nə́ pɨ nə́ nkɨ yi əshîʼnə ńté ndzaŋ páʼ Əsê a nɨd nə́ apɔŋə́ntə́əmə ajíə á ndu pəənə.”

²⁵ “Əghâ nə́, nə́ jwə́ʼtə, maŋ jî ńgə́ pɨ pətsəm páʼ maŋ yǐ nə́ á mbô pɨ ńnáŋkə nkəənə anuə nəfoonə Əsê, nə yǒ kě mə pɨ jɨ́ pô.”

²⁶ Maŋ tíʼ ə́sóŋə á mbô pɨ ə́sɛ̂n ńgə́, mbɔʼ ŋwu əwɨ yətsə́ a kwû tsɔʼə tə néŋ ntɨ́ əyí nə́ Yeso, apô mə á kě nə nəwû əyí chî pô.

²⁷ Maŋ sóŋ lɛ̌ ńté lə́ ńgə́ maŋ kě chîə tə ghə́ maŋ fiʼtə̂ áwɨ́ nə́ anuə atsəm páʼ Əsê a lɔ́btə nə́ ńté áwɨ́ pô.

²⁸ Lɔg nə́ ndɛd nə́ məmbɨ mɨ́ ńkə́ ńdɔg ndɛd nə́ pɨ pətsəm páʼ Ajwǐəsê a mɛdtə̂ nə́ á mbô pəənə́ ándó mətûə, ńjî ńgə́ pó lɔg ndɛd nə́ nkyeetə pɔ́ pə́ Əsê páʼ Əsê nə ńjú nə́ nə́ achǐə mɔ́ əyǐ Yeso Klisto.

²⁹ Maŋ jî ńgə́ əghâ maŋ yǐ nə́ ghɛnə̂ mə əfunə́ təpɔŋ ə́ yǐ kwúnə á tətɨ pɨ ə́ kě wɨ́ pɔ́ pə́ Əsê ḿmɛdtə̂ pô.

³⁰ Ndɛd tə́ ńkoʼə̂ páʼ pɨ pətsə́ pó yǐ nə́ ə́fɛ́lə á tətɨ pɨ páʼ pó yǒ nə́ kwúblə á ndə̌ŋdəŋ ńté atséebə Əsê, ə́ chúʼə á mə́ zéʼkə nə́ mənu mimə ndaʼ páʼ mə́ yǐ nə́ jwaʼlə̂ pɨ ə́ tíʼ soŋə̂ ághɔ́b pó zoŋə̂ ághóobə́.

³¹ Lə́ələ́ pə́ ńgə́ nə lɔg ndɛlə́. Kwúmtə nə́ ńgə́ nə́ ngoʼ teelə́, “Maŋ tə́gtə áwɨ́ tsɔʼə tə jwitə̂ á nətúʼ pópə nənumnə nə́ nəkyéŋə á əmə́g maŋ.”

³² “Əghâ nə́ mäŋ néŋə áwə́ənə́ á mə́m atéelə pô Əsê ńkə́ ə́sóŋə nə́ pɨ ńgə́ nə kwúmtə atsáb ńté apɔŋə́ntə́əmə Əsê páʼ a túg nə́ á ndu pɛnə̂. Atséebə Əsê jɨ́d zə̂ á chî təmbɔʼ á ghɛd nə́ tɨ́ ńtyantə̂ á mə́m mbimə́ ńkə́ ə́fɛ̂ ajú páʼ Əsê a nə ńdaʼnə̂ nə á mbô ŋwu ntsəm páʼ a tsɔʼ nə́ ńgə́ lə́ ŋwu əyǐə.

³³ Əghâ maŋ nə ńchî nə́ pɛn lə́, maŋ nə ńkě kə́ láʼə pítə ŋwu əwɨ yitsə̌ nə́ gôlə, kɨ sɛləba kɨ ətsəʼ pô.

³⁴ Tsɔʼə pɨ pətsəm jî ńgə́ maŋ nə̈ faʼə̂ lə́ nə mbô mə á mə́ túg nə ajúmə atsəm páʼ pə̂gpə ngaŋmə́koolə mə lɔ nə́.

³⁵ Maŋ nəələ̂ áwɨ́ ńgə́, á mə́m anuə atsəm á pɔŋə̂ mə́ pyádnə nə́ ə́faʼə̂ á mə́ kwá nə pɨ páʼ pó pwɔ́d nə́. Pɛn kwúmtə atséebə Mmaʼmbî Yeso páʼ a sóŋ nə ńgə́, Afoʼə á chî nə́ mbô páʼ mə́ fɛ̈ nə ńtsɛ mi páʼ mə́ kwá nə́.”

³⁶ Əghâ ándó Pɔlə a nə məgtə̂ nə́ á mə́ tsáb nə́ lə́, ńtíʼ ńkwə́ʼtə ndəsê pó po pətsəm chaʼtə́sê.

³⁷ Ńtíʼ ńnɔd ńkyéŋ ńgwaamə̂ yí ḿbáʼnə nə́ yí ńtíʼ ńchwegə̂ yə́, ə́fɛ̂ á mbǒ nə́ yə́.

³⁸ Pó nə fɨnə̂ tə́shú ńté atsáb páʼ a nə sóŋ nə́ nə́ pó ńgə́ pó láʼ kě yí pɨ jɨ́ pô lə́, ńtíʼ ńgɛn ńchaakə̂ yə́ á mə́mə apáŋə́nkǐə.