Məfaʼə 16 - Əka yi Fîə

Timotiə a Ghɛn pópə Pɔl nə́ Silasə

¹ Pɔl pó Silasə ghɛn ńkoʼə̂ á tɔ̂ŋ Dɛbə, ə́fɛ́d ə́wɨ́ pó ghɛn nə́ yətsə́ aláʼ pə́ fóŋ nə́ nə́ Listəla, ndzoŋdzəm Yeso yitsə́ a nə ńchî ə́wɨ́ pə́ fóŋə nə́ Timotiə. A nə ḿbə́ lə́ mɔ́ məngyě yitsə̌ páʼ a nə ḿbə́ nə́ ŋwu Jusə, ńkə́ ḿbî ńdzoŋ ndzəm Yeso, lə́ tǎ əyǐə á nə́ ḿbə́ lə́ ŋwu Glikə.

² Pəlim pətsəmə á mə́m Listəla pó Ikonum tsáb əshîʼnə ńté Timoti.

³ Pɔlə a nə ńdɔ ńgə́ Timoti a ghɛn pó yə́, A tíʼ ńdɔgə̂ yí, ḿbóʼə yí ńté ńgə́ Pəjus pó nə ńchî nə́ á mə́m əliʼ pipə wɨ́ pó nə́ ńjî ńgə́ tǎ əyǐ lə́ ŋwu Glikə.

⁴ Ndzaŋə ándó pó nə̈ ńgɛn nə́ ńdaŋə̂ á mə́m pətə́kɔʼ pə́ tɔ̂ŋ lə́, ə́fiʼtə̂ pəlimə́ á mə́m Yeso páʼ pó nə ńtéekə nə́, nə́ mənu páʼ məntú mə́ Yeso pópə mətû mə́ nkyeetə á Jɛlusalɛm nə́ ńdɔg nə́ ándó pənoŋkə pó chî nə́ mə́ zoŋ nə́.

⁵ Ńdaŋ ə́lɨ́d, mənkyeetə mə́ pɔ́ pə́ Əsê mə́ tɨ́ ńtyantə̂ á mə́m mbimə́ əzoobə́, ndɛn əghɔ́b tíʼə ḿbegə̂ á mə́m əlě mbî ətsəm páʼə ə́ kə laŋ nə́.

Pɔlə a Lê Ndzəəmə Atəəmə́tɨ́ Ńté Pɨ pə́ Məsidonya

⁶ Pɔl pópə ngaŋmə́ko əjí nyi ńdaŋə̂ á mə́m mboʼ Fligya pó Galatya, ńté ńgə́ Ajwǐəsê a kə kě pí ńgə́ pó sóŋə anǔəsê á mə́m əlá aláʼ Esya nə́ ndɛd yi ə́wɨ́ pô.

⁷ Əghâ ándó pó nə́ ńkwú nə́ á ndɛtə Mysya pó Bitinya, ńtíʼə ńdoonə̂ á mə́ ghɛn nə́ á Bitinya, Ajwiə Yeso a pə́ ńkě pí ńgə́ pó ghɛn ə́wɨ́ pô.

⁸ Pó tíʼ ńgɛn nə́ mbi ńdaŋə̂ á mə́m Mysya ńtsó ńgɛnə̂ aláʼ Təlowasə.

⁹ Ə́wə́, Pɔlə a lê ndzəəmə atəəmə́tə́əmə á nətúʼ ńgə́ ŋwu tsə́ á fɛ́lə á aláʼə Məsidonya ńgyǐ ńtə́əmə á mbi yí ńtíʼ ḿbóʼmbô nə́ yí ə́sóŋ ńgə́, “Yǐəə á mboʼ Məsidonya ńkwáalə áwə́gə́.”

¹⁰ Əghâ ándó Pɔl a nə ńdê nə́ ndzɨ yi wɨ́ lə́, tsɔʼə əghâ yi ə́wɨ́ pəg lɔ ndú ətsəmə á mə́ ghɛn nə́ Məsidonya, ńté ńgə́ pəg kə pyádnə ńjî ńgə́ lə́ nə ńtə́ fóŋ Əsê fóŋə áwə́g ńgə́ pəg ghɛn ńnáŋkə nkɨ yi əshîʼnə á mbô pɨ pə́ aliʼ yə ə́wə́.

Lidya a Pí Nkɨ yi Əshîʼnə Wə́ Ńté Yeso Klisto á Filipiə

¹¹ Pəg məgtə̂ Təlowas ńnyinə̂ á mə́m nkǐ ńgɛn ndə̌ŋdəŋ á Samodlasə, mbî fóg pəg ghɛnə̂ a Nyapolisə.

¹² Ə́fɛ́d ə́wɨ́ ńnyi ńgɛnə̂ á Filipiə a nə ḿbə́ nə́ lə́ ntsɛɛmbi tə́kɔʼ tɔ́ŋə á mə́m mboʼ Masedonya, lə́ nə ḿbə́ aláʼ páʼ pɨ pə́ Loman pó kə kwúd nə́ ńchî ə́wə́. Pəg chîə á mə́m tɔ̂ŋ wɨ́d ghɛn nə́ əlěmbî pətsə́.

¹³ Ndzaŋə ándó Alěláʼə́sê á nə ńgyǐ nə́ lə́, pəg fɛ́lə á mə́m tɔ̂ŋ ńgɛnə̂ á nkǎŋkǐə, aliʼ páʼ pəg nə́ ńkwaŋ nə́ ńgə́ pɨ pə̈ jwánə ə́wə́ á mə́ chaʼtə̂ nə́ Əsê, ńnáanə əsê ńtíʼ ńtséebə á mbô pəngyě páʼ pó nə ńkyeetə̂ nə́ ə́wə́.

¹⁴ Məngyě yitsə̌ a nə ńchî ə́wɨ́ pə̈ fóŋə yí nə́ Lidya, a nə́ fɛ́lə á mə́m tə́kɔʼ tɔ̂ŋ páʼ pə́ fóŋ nə́ ńgə́ Tiyatika lə́. A nə ḿbə́ lə́ ntâŋməteenə́, ə́finə̂ lə́ ətsəʼ pipə dya nə́ páʼ pɨ́d nə́ ḿbə́ nə́ paŋpaŋə. A nə ńkə̈ ńgóʼkə Əsê, Mmaʼmbîə a tíʼ ŋ́ŋáʼ ntɨ́ əyí a jwə́ʼtə anu páʼ Pɔlə a nə́ sóŋ nə́, ńkə́ ḿbí ńdzoŋə̂ anu páʼ Pɔlə a kə sóŋ nə́.

¹⁵ Əghâ ándó a nə ńkwá nə́ nkǐ ḿbéenə ŋwu ntsəm páʼ á nə chî nə́ á ndɛ̂ yí lə́, ḿbóʼmbô nə́ pəg ńgə́, “Mbɔʼ nə́ lɔgə̂ á mə́ ándó ŋwu páʼ a néŋ nə́ ntɨ́ yí nə́ Mmaʼmbî, nə́ yǐ ńchîə á ndɛ̂ maŋə.” A kə tə́g nə́ pəteenə́, tə pəg ghɛnə̂.

Pə́ Néŋə Pɔl pó Silasə á Atsáŋə á Filipiə

¹⁶ Ndzaŋ pəg kə tə́ nə́ ńgɛnə̂ aliʼə́ achaʼtə́sê lə́, ńjwánə mɔ̂ məngyě yitsə̌ páʼ a nə ḿbə́ nə́ apoʼə. A nə ńtúgə Ajwiə təpɔŋ páʼ a nə ńgɛd nə́ ä sóŋə mənu á mbô pɨ páʼ mə́ yǐ nə́ lɔgə̂ aliʼə́. A kə̈ ghɛd ndɛn mənu ghɛn lə̈ ə́faʼ nkáb yi nɨ́ nə́ ə́fɛ̂ á mbô pɨ pó nə ńdɔʼkə̂ nə́ yə́ ándó apoʼ lə́.

¹⁷ Əghâ ándó a nə ńdzɨ́ nə́ áwə́g lə́, ńchúʼə á mə́ zoŋ nə́ Pɔl ńkə́ ńdzoŋə̂ áwə́gə́, ńtïʼ ńgyɛ́ɛlə ə́sóŋə ńgə́, “Lɛ̌ ngaŋə́faʼ Əsê, Əsê páʼə a tsɛ nə́ ajúmə atsəmə, pö fiʼtə̂ áwɨ́ lə́ nə́ ndú páʼ mbɔʼ pə́ laŋ wɨ́ ńchwáalə.”

¹⁸ A kə faʼə̂ anu zɨ nə́ əlěmbî pipə nɨ́ nə́. Lə́ Pɔlə pə́ ńdzáŋ ndě ə́sóŋə á mbô ajwiə təpɔŋ zə̂ ńgə́, “Nə́ əlɛ́n Yeso Klisto maŋ sóŋ ńgə́ gho fɛ́lə á mə́m mɔ̂ məngyě nə́!” Tsɔʼə əghâ ə́wɨ́ ajwiə təpɔŋ zə̂ á fɛ́lə á mə́m mɔ̂ məngyě ə́wə́.

¹⁹ Lə́ pɨ páʼ pó nə́ ńtúg nə́ a mɔ̂ məngyě wə́ pó jɨ́ ńgə́ ndú páʼ pó nə̈ ńtúg nə́ nkáb əzɔb wɨ́ ə́ kě wɨ́ pɨ̌ ńchî pô, Pó tíʼ ńgwaamə̂ Pɔl pó Silasə ə́soŋə̂ ághɔ́b ńgɛn nə́ pó á tətɨ məteenə́ á mbi mətû mə́ aláʼə.

²⁰ Əghâ ándó pɨ pó nə ńtúg nə́ mɔ̂ məngyě ə́wə́ pó nə ńdɔg nə́ Pɔl pó Silasə ńgyǐ nə́ pó á mbi ngaŋə́sáʼə́məsáʼ lə́ ńtíʼ ə́sóŋ ńgə́, “Pɨ pɨ lə́ Pəjusə, pó tə́ maʼə̂ ajwaʼlə á mə́m tə́kɔʼ tɔ̂ŋ əwɛ̂nə.”

²¹ Pö zéʼkə áwɛ̂n nə́ mənu páʼ noŋkə əwɛ̂n Pəlomanə a kě nə́ pí ńgə́ pɛn zoŋ pô.

²² Mboŋ pɨ zə̂ kwúnə azɔ́b wɨ́ ńchwáakə mə́ jwábtə nə́ Pɔlə pó Silasə, ngaŋə́sáʼə́məsáʼ zə̂ ə́sɛɛtə̂ ətsəʼ Pɔl pó Silasə mɛdtə̂ ághɔ́b ntə̌blə, ńtíʼ ńgɛd pə́ shúmə ághɔ́b nə́ ngwanə atəənə́.

²³ Əghâ ándó pə́ nə ńchígə́ nə́ ə́shúmə ághɔ́b lə́, ńtíʼ ńnéŋə ághóobə́ á nkáʼə atsáŋə, ə́sóŋ nə́ ŋwu páʼə a kə náŋ nə́ nkáʼə atsáŋ lə́ ńgə́, a lɔg ndɛd nə́ pó kɔ pó kəələ̂.

²⁴ Ndzaŋ ŋwu páʼ a nə ńnáŋ nə́ nkáʼə atsáŋə a kə zóʼ nə́ ntəgə́ zɨ lə́, ńtíʼ ńnéŋ ághɔ́b nə́ atɔ́g páʼə á chî nə́ á tətɨ nkáʼə atsáŋə, ńtíʼ ńnéŋ məko móobə́ á mə́m kəpoʼə.

²⁵ A yǐ ḿbə́ ándó ntɨ̌túʼ, Pɔl pó Silasə tə́ ńchaʼtə́sê ńtûə ńdzoobə̂ mənkǐ ńgóʼkə Əsê, ngaŋə́tsáŋ tíʼə ńjwə́ʼtə.

²⁶ Tsɔʼə əghâ yi wɨ́ ndəsê páʼ atsáŋə á kə tɨ́ nə́ ndu wɨ́ ə́ tíʼə̈ ńchiʼnə̂ tsɔʼə nə́ mətɨ mətəənə, ńdaŋ ə́lɨ́d nchîndɛ̂ atsáŋ chiʼnə̂, məntso mə́ ndɛ̂ mə́ tíʼ ŋ́ŋáʼkə, məŋkɛd mə́ atəənə́ pə́ kə kwúd nə́ ngaŋə́tsáŋ wɨ́ mə́ kyakə̂.

²⁷ Əghâ ándó ŋwu páʼ á náŋ nə́ nkáʼə atsáŋ a kə jimnə̂ nə́ lə́, ńtíʼ ńdjɨ́ ńgə́ məntso mə́ ndɛ̂ mətsəm á nkáʼə atsáŋ mə́ kə ŋáʼkə. A tsɔ́ʼə mɔ́ ŋwéŋ ntso ńtə́ ńdoonə̂ mə́ jwítə nə́ mbɨ əji wɨ́, nə́ akwaŋ ńgə́ ngaŋə́tsáŋ shamnə̂ ńkəəkə̂.

²⁸ Lə́ Pɔlə á kyéŋ nə́ tə́kɔʼ ngye ə́sóŋ ńgə́, “Kɔ límkə mbɨ əzo, pəg pətsəm chîə aliʼə́ nə́!”

²⁹ Ŋwu páʼ a nə̈ náŋ nə́ nkáʼə atsáŋ lə́ a ghɛd pə́ yǐ nə́ nkyaʼ ə́fɛ̂ nə́ yə́, a kə ńkwúnə á mə́m nkáʼə atsáŋ nə́ mətəənə, ńgwǔəə á məko Pɔl pó Silasə ńtíʼə ḿbénkə nə́ apɔ́gə.

³⁰ A tíʼ ńdɔgə̂ Pɔl pó Silasə ńgɛnə̂ apeŋ ḿbítə ághɔ́b ńgə́, “Mbɔʼ maŋ shib ńgɛd lə́ ə́lɛ́ ḿbɔŋə́ chwáalə?”

³¹ Pó kwěe yí ńgə́, “Néŋ ntɨ́ əghô nə Mmaʼmbî Yeso, ńjî ńgə́ gho chwáalə, pɨ̌pə ngwud əzo ntsəmə.”

³² Pɔl pó Silasə tíʼ náŋkə nkɨ Mmaʼmbîə á mbô yí, ńdzoŋ ḿbéenə ŋwu ntsəm páʼ a nə ńchî nə́ ndɛ̂ yə́.

³³ A tíʼ ńdɔgə̂ ághɔ́b tsɔʼə əghâ wə́ á nətúʼ ə́sog məfəŋ mɔ́b, pə́ tíʼ ə́fɛ̂ nkǐ nə́ yí ńdzoŋ ḿbá ngwud əjǐ tsɔʼə ntsəmə.

³⁴ A tíʼ ńdɔgə̂ ághɔ́b ńgɛnə̂ á ndɛ̂ yí ə́fɛ̂ məjîə á mbô pó ńgə́ pó jîə. Yə́, ḿbéenə á ŋwu ntsəmə á ndɛ̂ yí pó nə ḿbyádnə ńchígə́ ńkɔŋtə̂ ńgə́ pó néŋ ntɨ́ əghɔ́b nə́ Əsê.

³⁵ Mbî ə́ fóg, ngaŋə́sáʼə́məsáʼ zə̂ ə́ tú ngaŋə́maʼə́ntsoolə á mbô ŋwu páʼə a nə ńnáŋ nə́ nkáʼə atsáŋ lə́ ńgə́, “Mɛdtə̂ pɨ pə̂ pó ghɛnə̂.”

³⁶ Ŋwu páʼ a nə náŋ nə́ nkáʼə atsáŋ lə́ a tíʼ ə́fiʼtə̂ anu yə ə́wə́ á mbô Pɔl, ńgə́, Ngaŋə́sáʼə́məsáʼ ə́ sóŋ ńgə́ maŋ mɛdtə̂ áwɨ́ nə́ ghɛnə̂, laŋ nə́ ńtíʼ ə́fɛ́d ńgɛn nə́ mbwɔ́dnə.

³⁷ Lə́ Pɔlə á sóŋə á mbô ngaŋə́maʼə́ntso zə́ ńgə́, “Pó ghɛd pə́ shúmə áwə́gə́ á əshîsaŋə, ńtíʼ ńnéŋə áwə́gə́ á nkáʼə atsáŋə, páʼ pəg kě nə́ əsáʼ yitsə̌ wǔ pô, pəg pɨ ńkə́ ḿbə́ tsɔʼə pɨ pə́ Lomanə, pó tíʼə ńdɔ əghâ nə́ ńgə́ pəg pánə ə́fɛ́lə á nkáʼə atsáŋə? mbɔʼ pəg kě fiʼ pô. Pó chîə á mə́ yǐ nə́ á ngǎ pó ə́fógə áwə́gə́.”

³⁸ Lə́ ngaŋə́maʼə́ntso zə́ pó ghɛn ə́fiʼtə̂ anuə atsəmə á mbô ngaŋə́sáʼə́məsáʼ tsɔʼə ndzaŋ Pɔl a pěʼ nə́ ə́sóŋə. Ngaŋə́sáʼə́məsáʼ nə ḿbɔ́g ńté ńgə́ pó nə ńdzóʼ ńgə́ Pɔl pó Silasə lə́ pɨ pə́ Loman.

³⁹ Ngaŋə́sáʼə́məsáʼ zə̂ ghɛn ḿbóʼmbô á mbô Pɔl pó Silasə ńgə́ pó ləgnə̂ awǔənuə azóobə́, ńtíʼ ńdɔgə̂ Pɔl pó Silasə ə́fɛ́d nə́ pó á nkáʼə atsáŋ ńtíʼ ńgɛd pó mɛdtə̂ á tə́kɔʼ tɔ̂ŋ yi ə́wə́.

⁴⁰ Pɔl pó Silasə tíʼ ḿmɛdtə̂ nkáʼə atsáŋ ńgɛnə̂ á ndɛ̂ Lidya. Pó tséebə á mbô pəlim pə́ pó nə ńtéekə nə́ ə́wɨ́ lə́ ńkə́ ńtû néŋ ntɨ́ əghóobə́, ńtíʼ ḿmɛdtə̂ á tɔ̂ŋ Filipi ńgɛnə̂ ághóobə́.