Məfaʼə 13 - Əka yi Fîə

Ajwǐəsê a Tsɔ́ʼə Banabas pó Sɔl pə́ Tíʼ Ńtúmə Ághóobə́

¹ Á mə́m ngaŋə́zoŋə́ndzəm Yeso aláʼ Antiok, ngaŋə́náŋkə́nkɨ yi əshîʼnə pó zóʼ nə́, pópə ngaŋə́zéʼkə anǔəsê pó kə kə́ ńchî ə́wə́. Lə́ nə ḿbə́ Banabasə, Saamun (páʼ pə́ nə fóŋ nə́ yi ńgə́ Shíshíə) Lusya páʼ a nə fɛ́d nə́ aláʼ Sayileen, Manayinə (páʼ a nə ńkwíŋ nə́ pó Ɛlɔd Antipas páʼə a kə pə́ nə́ gɔbnɔ lə́), ḿbɨ́ ḿbə́ nə́ Sɔlə.

² Ndɛd pó kə tə́ nə́ ńgóʼkə Mmaʼmbî, ńgɛlə̂ achaʼtə́sênji lə́, Ajwǐəsê a sóŋ nə́ pó ńgə́, “Tsɔ́ʼ nə́ Sɔl pó Banabas ńtə́gə á mbô maŋ nə́ afaʼ maŋ fóŋ nə́ ághɔ́b nə́ zɨ́d ńgə́ pó faʼə̂.”

³ Ndzaŋ pó nə məgtə̂ nə́ á mə́ chaʼtə̂ nə́ əsê ə́ kə́ ghɛlə̂ achaʼtə́sênji lə́, ńtíʼ ńnoŋkə̂ mbô móobə́ atû Banabasə pó Sɔl ńtúmə ághɔ́b pó ghɛnə̂.

Banabasə pó Sɔl Ghɛnə̂ á Sayiplusə

⁴ Ndzaŋə ándó Ajwǐəsê á kə tú nə́ ághɔ́b lə́, Banabasə pó Sɔl tsó ńgɛnə̂ á Silosya, ńtíʼ ńkwúnə aŋkənúʼə́ ńgɛnə̂ á Sayiplusə.

⁵ Əghâ ándó pó nə ńkoʼ nə́ á Salamisə lə́, ńtíʼ ə́sóŋə anǔəsê á mə́m məndɛ̂ mə́ Əsê mə́ Pəjusə. Jɔn Magə a nə ńchî wɨ́ pó po ńtə́ ńkwáalə ághɔ́b nə́ afaʼ yi wə́.

⁶ Pó kə nyinə̂ kyádkənkǐ ntsəm tə ńgɛn ńkoʼə̂ Pafosə. A Pafos pó téekə ngaŋnəkaŋ yitsə̌ pə́ fóŋə yí nə́ Ba Yeso, á pə́ ŋwu Jusə, ə́fóŋ mbɨ əjǐ ńgə́ yí lə́ ntûsê məfɨgə.

⁷ Ba Yeso a nə ḿbə́ lə́ ngaŋəko gɔbnɔ aláʼ yi wə́, pə́ nə fóŋə yí lə́ nə́ Selegiyus Pawulus, gɔbnɔ ghɛn a kə pə́ lə́ ŋwu ńjî ənuə. Gɔbnɔ a nə fóŋə Banabasə pó Sɔl ńté ńgə́ a kə tə́ ńdoonə̂ á mə́ zóʼ nə́ Anǔəsê.

⁸ Ngaŋnəkaŋ wə́ əlɛ́n yi yitsə̌ pə́ nə́ Elimas (lɛ̌ ndzaŋ pə́ fóŋ nə́ yí nə́ atséebə Glikə) lə́ a kə kě kɔŋ ńgə́ pó yǐ pô, ńté ńgə́ a kə kě kɔŋ ńgə́ gɔbnɔ wə́ a zóʼə anǔəsê néŋ ntɨ́ əyí wɨ́ pô.

⁹ Lə́ Sɔl páʼ pə́ nə ńkə́ nə̈ ə́fóŋə yí nə́ Pɔl lə́, a nə́ ńdwɛ́nkə nə́ Ajwǐəsê, ńtə́g əmə́g mí ńnáŋə ngaŋnəkaŋ wə́ ngɔ̌dmə́g yí,

¹⁰ ńtíʼ ə́sóŋ nə́ yí ńgə́, “Gho mɔ́ Dɛbəəl gho lə́ ngaŋkəpeenə́ anuə atsəm páʼ á tɨ́ nə́ ndə̌ŋdəŋə́ á mbi Əsê, ńtúg mbô məfɨg mətsəmə pópə ntɨ́ təpɔŋə, ńkə́ ńdáʼə ńdoonə̂ tsɔʼə mə́ sɛdkə̂ nə́ ndə̌ŋdəŋ Mmaʼmbîə a tíʼ ntsəələ.

¹¹ Nə́ əghâ nə́ apô Mmaʼmbîə á yǐ tsóolə ndu gho, gho tíʼ ə́fəg ńkě əliʼ pɨ ńjɨ́ nə́ akəmə ndɛd yitsə̌ pô.” Tsɔʼə əghâ yi ə́wɨ́ shíshíə alə́mə á kə́bkə əmə́g míə, ä tíʼə ńnáŋə a ŋwu tsə̌ a waamə̂ apô ají ńnəələ̂ yí nə́ ndúmə.

¹² Ndzaŋ gɔbnɔ a kə jɨ́ nə́ anu páʼ a laŋ nə́ lə́, ńnéŋ ńtɨ́ əyí nə́ Əsê, ńté ńgə́ mənu pə́ kə zéʼkə nə́ ńté Mmaʼmbî mə́ kə kɨʼnə̂ yí lɛ tǐə.

Pɔl pó Banabas Ghɛnə̂ Antiokə á Mə́m Mboʼ Pisidya

¹³ Pɔl pópə ngaŋmə́ko əjí pó kwúnə aŋkənúʼə́ ńgɛnə̂ Pafos ńdǒo ə́wɨ́ ńkwúnə á Pega páʼə á pə́ nə́ tə́kɔʼ tɔ̂ŋə á mə́m Pamfilya lə́. Ndzaŋ pó nə ńkwú nə́ ə́wɨ́ lə́, Jɔn Magə a mɛdtə̂ ághɔ́b ə́wɨ́ ḿbəənə̂ yə́ á Jɛlusalɛmə.

¹⁴ Pó fɛ́lə Pega ńgɛnə̂ Antiok páʼə á chî nə́ á mboʼ Pisidya, á lǒo ḿbə́ alěláʼə́sê pó ghɛnə̂ á mə́m ndɛ̂sê pəjusə ńnáanə əsê.

¹⁵ Əghâ ándó pə́ nə məgtə̂ nə́ á mə́ fóŋ nə́ aliʼə́ aŋwaʼlə á mə́m pənoŋkə pə́ Mosisə pópə yitsə̌ aliʼə́ aŋwaʼlə á mə́m aŋwaʼlə məntúmə́sê lə́, mətû mə́ ndɛ̂sê pəjusə mə́ tú nkəənə á mbô pó ńgə́: “Pəlim, pəg loonə̂ lə́ ńgə́ nə́ tséebə á mbô pɨ pəənə́, páʼ təmbɔʼ nə́ túgə atsáb yitsə̌ mbɔʼ zə́ələ́ á néŋ ntɨ́ əghóobə́.”

¹⁶ Pɔl a tíʼ ńdǒo əsê megtə̂ apô ají ńchúʼə á mə́ sóŋ nə́ ńgə́: Pɨ pə́ Islɛl ḿbɨ ḿbə́ nə́ pɨ pó pɔ́g nə́ Əsê, jwə́ʼtə nə́ anu maŋ yǐ nə́ sóŋə!

¹⁷ Əsê pɨ pə́ Islɛl zɨ kə tsɔ́ʼ pətǎ pə́ pətǎ pɛn ńgɛd pó tíʼ ḿbə́ mɛ́ tə́kɔʼə atú yitsə̌ nə́ ndɛlə́ ándó pó kə chî nə́ aláʼə atúmə Ijibə ándó pə yǐyinə́ lə́. Əsê a kə fógə ághóobə́ á mə́m Ijib lə́ nə́ atyǎntə mətəənə ajíə.

¹⁸ Á mə́m ngoʼ məghə́m mɛ́n nəkwa, a wam ńtɨ́ pó po á kɔŋ yi njǔbtə.

¹⁹ A kə shíg əláʼ ətú pɛ́n asaambɛ̂ tsɔʼə ətsəm á mə́m ndəsê Kanan ńgɛd pɨ pə́ Islɛl pó tíʼ ḿbə́ pə ŋwúd pə́ ndəsê yi wə́,

²⁰ tə ńkoʼə̂ ándó ngoʼ nkɛd nəkwa nə́ ngoʼ məghə́m mɛ́n tênə. Zəənə́ anuə a kə laŋ lə́ Əsê a tíʼə̈ ə́fɛ̂ lə́ ngaŋə́sáʼə́məsáʼ nə́ pɨ pə́ Islɛl, tə ńgɛn ńkoʼ nə́ ndɛd ntûsê Samuɛlə.

²¹ Á nə ḿbə́ nə́ ndɛd ntûsê Samuɛl pɨ pə́ Islɛl pó pítə Əsê ńgə́ a fɛ̂ ághɔ́b nə́ əfo. Əsê a fɛ̂ Sɔl a pə́ nə́ mɔ́ Kish ńgə́ a pə́ əfo əghɔb nə́ ngoʼ məghə́m mɛ́n nəkwa. Kishə a nə fɛ́d lə́ nə́ əla Bɛnjamɛn.

²² Əghâ ándó Əsê a nə fóg nə́ a Sɔlə aləŋ lə́, ńtíʼ ntsɔ́ʼə Debilə ándó əfo əghoobə́. Lɛ̌ anu Əsê a nə sóŋ nə́ ńté Debilə, “Maŋ jɨ́ ńgə́ Debid mɔ́ Jese lə́ ndzaŋ ŋwu páʼ ntə́əmə mə kɔŋtə̂ nə́ ńté yə́, ńté ńgə́ lə́ ŋwu páʼ mbɔʼ a faʼə̂ anuə atsəm maŋ lɔ nə́ ńgə́ a faʼə̂.”

²³ Lə́ nə ḿbə́ Yeso, a fɛ́d nə́ mə́m ngwud Debid lə́, páʼ Əsê kə lɔg nə́ yí ńgɛlə̂ ńchwádkə pɨ pə́ Islɛl wə́, tsɔʼə ndzaŋ páʼə a kə laʼnə̂ nə́ lə́.

²⁴ A kə pə́ ndɛd páʼ Yeso a kə pɛ́d nə́ pɔŋə̂ chwáakə afaʼə ají lə́, Jɔnə a fɛ̂ nkɨ yi əshîʼnə á mbô pɨ pə́ Islɛl pətsəm ńgə́ pó fɛ́lə á mə́m pətəpɔŋ pɔ́b ńkwá nkǐə.

²⁵ Jɔnə a kə tíʼə ńdoonə̂ á mə́ məgtə̂ nə́ afaʼə ají lə́, ḿbítə pɨ pipə wɨ́ ńgə́: Nə́ kwaŋ ńgə́ maŋ lə́ əwə? Maŋ kě lə́ ŋwu pɨ pyáb nə́ lə́ pô. Lə́ jwə́ʼtə nə́, a chîə ndzəm ńtə́ ńgyǐəə, maŋ pěʼ ńkě koʼnə̂ ŋwu mbɔʼ maŋ tsɔ́ʼ ngwub yə́ ako yí pô.

²⁶ Pəlimə́ mə pɔ́ pə́ Islɛl, ngwud Ablaamə, pópə Pətəjǐsê pətsəmə aliʼə́ nə́ páʼ pó pɔ́g nə́ Əsê, pə́ tú nkɨ ghɛn páʼ wɨ́d chwádkə nə́ lə́ á mbô pɛnə̂.

²⁷ Ńté ńgə́ pɨ pə́ Jɛlusalɛm pópə mətû mɔ́b nə ńkě jí ńgə́ Yeso lə́ nchwádkə pô, atûə azóobə́ kě kə́ ńdá nə́ atséebə məntú mə́ əsê páʼ pə́ kə̈ fóŋ nə́ á mə́mə aŋwaʼlə əlěláʼsê ətsəm lə́ pô. Pó kə jwítə yí lə́ ńdwɛ́nkə lə́ anu páʼ məntú mə́ əsê mə́ kə ŋwaʼlə̂ nə́.

²⁸ Pó nə ḿbǎtə ńkě chigə anu yitsə̌ jɨ́ páʼ Yeso a nə fankə̂ nə́ mbɔʼ pó jwítə yí lə́, ḿbə́ ə́sóŋə á mbô Payilɛd ńgə́ a ghɛd pə́ jwítə yə́.

²⁹ Əghâ ándó pó nə məgtə̂ nə́ mənu mətsəm páʼ pə́ nə ŋwaʼlə̂ nə́ ńté yí lə́, ńtsóokə yə́ atǐəpagləpaglə ńtíʼ ńnéŋə á nəse.

³⁰ Lə́ Əsê a pə́ ńjúmkə yə́ á nəwûə,

³¹ á mə́m əlěmbî pipə nɨ́ nə́, a nɨd mbɨ əjǐə á mbô pɨ pó po nə ə́fɛ́d nə́ á Galili ńkɔ́ʼ ńkoʼə̂ á Jɛlusalɛmə. Lə́ pó páʼ pó nə́ ńjɨ́ nə́ ńtíʼə ə́sóŋə anu ńté a yə́ á mbô pɨ pə́ Islɛl ńgə́.

³² “Pəg fiʼtə̂ áwɨ́ nə́ nkɨ yi əshîʼnə ńgə́, anu páʼ Əsê a nə ńdaʼnə̂ nə́ pətǎ pɛnə̂,

³³ a faʼə̂ zə́ələ́ á mbô pɛn pɔ́ póobə́ á mə́ júmkə Yeso á nəwûə.” Tsɔʼə ndzaŋ pə́ kə ŋwaʼlə̂ nə́ á mə́mə azoŋkə Salmsə ńgə́, “Gho lə́ móonə mə yi mbyâŋnə; ə́sɛ̂n lɛ̌ maŋ yǐ tíʼ pə́ lə́ tǎ əgho.”

³⁴ Lɛ̌ anu páʼ Əsê a kə sóŋ nə́ ńté yə́, ńgə́ a kě nəse yǐ lə̂ pô, mbɨ ńkə́ sóŋ ńgə́: Maŋ yǐ fɛ̂ afoʼ páʼ á pə́ nə́ azá lə́, páʼ á kə́ nə́ ḿbə́ yə ndə̌ŋdəŋ páʼ maŋ kə laʼnə̂ nə́ Debid wɨ́ lə́ á mbô gho.

³⁵ Lə́ tsɔʼə ə́lɨ́d páʼ pə́ sóŋ nə́ á mə́mə aliʼə́ aŋwaʼlə Salmsə yitsə̌ ńgə́: Gho kě əgho páʼ á Ŋwaʼ nə́ yǐ mɛdtə̂ a lə̂ nəse pô.

³⁶ Debilə a kə faʼə̂ anu páʼ Əsê nə ńdɔ nə́ nə́ əjǐ ndɛd tə ńkwûə yí pə́ twə́ŋə yə́ á nəpɛnə́ pətǎ píə, na mbɨ əjǐ tíʼ ńdə̂ á nəse.

³⁷ Lə́ ŋwu páʼ Əsê a nə ńjúmkə nə́ yə́ á nəwû lə́, a nə ńkě lə̂ pô.

³⁸ Pəlim, lə́ pə́ ńgə́ maŋ loonə̂ lə́ ńgə́ nə́ jî ńgə́, ńdaŋ nə́ Yeso pə́ náŋkə nkəənə á mbô pɨ ńté mə́ ləgnə̂ nə́ pətəpɔŋ pə́ pəənə.

³⁹ Ńdaŋ nə́ ŋwu ghɛn pɛn fɛ́lə á mə́m təpɔŋ páʼ á kwúd nə́ áwɛ̂n, páʼ təmbɔʼ noŋkə á nə ńkě áwɛ̂nə á mə́m wɨ́ fóg pô.

⁴⁰ Lɔg nə́ ndɛd ńgə́ anu páʼ məntúmə́sê mə́ sóŋ nə́ kɔ á yǐ ńdaŋ nə́ pəənə́

⁴¹ Jɨ́ nə́, pɨ ngaŋə́leŋnə pɨ, á yǐ tsɛɛlə̂ áwɨ́, nə́ kwúkə, ńté ńgə́ maŋ yǐ faʼə̂ anu yitsə̌ á mə́m ndɛd əzəənə́ á ndu ndəsê, anu páʼ nə́ kě nə́ ntɨ́ wə́ yǐ néŋ pô, páʼ təmbɔʼ ŋwu tsə̌ a pěʼ ḿbǎtə ḿbyáatə zɨ́d pyáatə nə́ ə́fiʼtə̂ áwə́ənə́.

⁴² Əghâ ándó Pɔl pó Banabasə nə ńtə́ nə́ ḿmɛdtə̂ ndɛ̂sê Pəjusə lə́, pɨ pipə wɨ́ pó póʼ mbô nə́ pó ńgə́ pó lǒo mbɨ ə́fiʼtə̂ ághɔ́b nə́ mənu mɨ́d məənə́ Alěláʼə́sê páʼ á tə́ nə́ ńgyǐəə lə́.

⁴³ Əghâ ándó nkyeetə yi wɨ́ kə shamnə̂ nə́ lə́, Pəjusə pipə nɨ́ nə́ pópə Pətəjǐsê páʼ pó kwúblə nə́ ńdzoŋ Əsê pó zoŋə̂ Pɔl pó Banabasə. Məntú mə́ Yeso mə̂ mə́ tséebə á mbô pó ńnéŋ ntɨ́ əghɔ́b ńgə́ pó ghɛn nə́ mbiə á mə́ túg nə́ nchîmbî əzoobə́ á mə́mə apɔŋə́ntə́əmə Əsê.

⁴⁴ Alěláʼə́sê á koʼ pɨ pə́ fɛ́lə á mə́m tə́kɔʼ tɔ̂ŋ wə́ tə ńtíʼə měe, ńkyeetə̂ á mə́ zóʼ nə́ atséebə Əsê.

⁴⁵ Ndzaŋə ándó Pəjus pó nə ńdzɨ́ nə́ mboŋ pɨ zɨ lə́ ńtíʼ ńtúgə ŋwéetə́ á məntɨ́ pó, ńtíʼə ńkǐə ághóobə́ anu páʼ Pɔl a nə̈ sóŋ nə́, ńdzɔmtə̂ yə́.

⁴⁶ Lə́ Pɔl pó Banabasə tíʼ ńtséebə á mbô pó tsɔʼə tə apɔ́g ə́sóŋ ńgə́, “A nə ḿběʼ ḿbɔŋ ńgə́ mbɔʼ pə́ nə ḿbeg ə́sóŋə atséebə Əsê á mbô pəənə́. Ndzaŋə ándó pɨ nə ńkǐ nə́ áwə́ənə́ zɨ́d ńkə́ ńdɔg məmbɨ mɨ́ ńgə́ pɨ kě koʼnə̂ á mə́ jî nə́ nchîntɨ páʼ zɨ́d ḿmɛdnə̂ nə́ ngǎ mɔʼə́ lə́, pəg mɛdtə̂ áwɨ́ ńgɛnə̂ á mbô Pətəjǐsê.”

⁴⁷ Ńdaŋ ə́lɨ́d Əsê a tíʼ fɛ̂ ntəgə́ zəənə́ á mbô pəg ə́sóŋ ńgə́, “Maŋ ghɛd ńgə́ nə́ pə́ nkyaʼə á mbô pətəjǐsê, ńjî ńgə́ nə́ yǒ ńchwádkə ŋwu ntsəm á mə́m mbîə.”

⁴⁸ Ndzaŋə ándó Pətəjǐsê pó nə ńdzóʼ nə́ atsáb zɨ lə́ ńkɔŋtə̂ ńtíʼ ə́fɛ̂ nəgháʼə á mbô atséebə Mmaʼmbîə. Pəənə ándó Əsê á tsɔ́ʼ nə́ ághɔ́b ńgə́ pó yǒ ńjî nchîmbî páʼ ə́ mɛdnə̂ nə́ ngǎ mɔʼə́ lə́, pó néŋ ntɨ́ əghɔ́b nə́ yə́.

⁴⁹ Atséebə Mmaʼmbîə á tíʼ shamnə̂ á mboʼə aláʼ yə wɨ́ tsɔʼə atsəmə.

⁵⁰ Lə́ Pəjus pó tóotə Pətə́kɔʼ pə́ pəngyě pə́ Pətəjǐsê pó kə pɔ́g nə́ Əsê, ndzoŋ ḿbá mbyâŋnə wɨ́ páʼ pó kə pə́ nə́ mətû mə́ aláʼ ńkə́ ḿbɔ́g Əsê, pó tíʼ ńchwáakə mə́ tsaŋkə̂ nə́ Pɔl pó Banabas tə ə́fógə ághóobə́ mboʼə aláʼ pó.

⁵¹ Pó tíʼ ńkɔdtə̂ akəpóglə́ á məko pó á mə́ nɨd nə́ ńgə́ mbɔʼ ndɔ waamə̂ ághóobə́, ńtíʼ ḿmɛdtə̂ ághɔ́b ńgɛnə̂ aláʼə Ikonumə.

⁵² Ngaŋə́zoŋə́ndzəm Yeso tíʼ ńdwɛ́nkə nə́ akɔŋtə pópə Ajwǐəsê.