Lukasə 15 - Əka yi Fîə

Mbéŋ Ndzɛd Páʼ ə́ Péŋ nə́

¹ Á nə ḿbə́ alě tsə́ ngaŋə́kwáalə́ nchubə aláʼ pópə ngaŋə́ghɛlə təpɔŋ ə́ tíʼə ńgyǐəə á mə́ jwə́ʼtə nə́ atséebə Yeso.

² Lə́ Pəfalasi pópə ngaŋə́zéʼkə pənoŋkə ə́ chúʼə á mə́ ŋwuntə̂ nə́ ə́sóŋə ńgə́, “Ŋwu nə́ a lɔg ngaŋə́ghɛlə təpɔŋ əshîʼnə ńtíʼə ńkə́ ńjîə məjî pó po!

³ Yeso a tíʼ fiʼtə̂ ághɔ́b nə́ atséebə́nə́múʼ zəənə́.”

⁴ Mbɔʼ ŋwu əwɨ yitsə̌ a túg məmbéŋ mə́ ndzɛd táʼ nkɛd, táʼə á yǐ ḿbéŋə á mə́m ə́wɨ́ a ghɛd ə́lɛ́? A kě mɛdtə̂ apuʼ zə́ məghə́m nəpuʼə́ nə́ mɛ́n nəpuʼə́ á ndu kɔŋ ńgɛn ńchwaalə̂ táʼ wə̂ páʼ á péŋ nə́ lə́ tə ńdzə́ənə áwɨ́d?

⁵ Mbɔʼ a zə́ənə áwɨ́d, mbɨ əjǐ ə́ pɔŋ lɛ tətətə a tíʼ ńtwáamə áwɨ́d ńnoŋkə̂ á mbeʼtə yí,

⁶ Ńkwə̂ nə́ wə́ələ́. Ńtíʼ ə́fóŋ pəghɨ pí pópə ngaŋ məpad ə́sóŋə á mbô pó ńgə́, “Pɛn kɔŋtə̂ ńté ńgə́ maŋ jɨ́ mbéŋ ndzɛlə mə páʼ ə́ nə mbéŋ nə́.

⁷ Mäŋ fiʼtə̂ áwɨ́ ńgə́ ndzaŋ mbɨ ŋwu wə̂ ə́ pɔŋ nə́ ńgə́ a jɨ́ mbéŋ ndzɛd əjǐ zə́ lə́, lə́ ndzaŋ páʼ akɔŋtə á yǐ nə́ kə́ chîə á nəpó té táʼ ngɛdtəpɔŋ páʼ a kwúblə nə́ ńtsɛ pɨ məghə́m nəpuʼə́ nə́ nəpuʼə́ páʼ pó kwaŋ nə́ ńgə́ pó ŋwaʼ ḿbɨ ńkě chî mbɔʼ pó kwúblə pô.”

Atséebə́nə́múʼ ńté Nkéebə Atəənə́ Páʼ ə́ Péŋ nə́

⁸ “Kɨ pɛn lɔg ńgə́ məngyě yitsə̌ a túg nkéebə atəənə́ ntáʼ nəghə́mə, táʼə á péŋə á mə́m ə́wə́, A yǐ ghɛd ə́lɛ́? A yǐ chúʼ nkyaʼ, ə́zəg mbindɛ̂, ə́ lɔg ndɛd ńnáŋ əliʼ ətsəm tə ə́zə́ənə zə́ələ́.

⁹ Ndzaŋ a jɨ́ nə́ ájɨ́d lə́, ə́fóŋ pəghɨ pí pópə ngaŋ məpad əjíə, aliʼə́ mɔʼə́ ńtíʼ ə́sóŋ nə́ pó ńgə́, ‘Pɛn kɔŋtə̂, maŋ jɨ́ nkéebə mə páʼ ə́ nə ḿbéŋ nə́!’

¹⁰ Maŋ lɔg ə́lɨ́d ə́fiʼtə̂ áwɨ́ ńgə́ pətseŋpə́ndɛ́pə́sê pə́ kɔŋtə̂ ńté táʼ ngɛdtəpɔŋ páʼə a kwúblə nə́.”

Atséebə́nə́múʼ ńté Mɔ́ páʼ a nə Ḿbéŋ nə́

¹¹ Yeso a ghɛn nə́ mbiə á mə́ sóŋ nə́ ńgə́, “Ŋwu tsə́ a nə ńdáʼ ńchî ə́wɨ́ ńtúg pɔ́ pí pə́ pɛ̌.

¹² Yi ńkoʼnə̂ nə́ a yǐ ə́sóŋ nə́ yí ńgə́, ‘Tǎ, fɛ̂ azéemə apeʼ nə́ maŋə.’ Ŋwu wə̂ a tíʼ ńgeebə̂ apeʼə ajíə á mbô pó.

¹³ Əlě pətsə́ ə́ ghə́ laŋə̂ mɔ́ yi ńkoʼnə̂ nə́ wə̂ a finə̂ ajíə apeʼ zə̂ tsɔʼə atsəm ńdɔg nkáb ə́fɛ́lə yə́ aláʼ ńgɛnə̂ atú yi ndaʼ tə ndi ə́ sag ńtə́mə́sɛ́ nə́ zɨ́d, ńdɔg ńjî əpú mbî ə́wə́.

¹⁴ A nə ńkə́ ńgə́ kɔ́d nkáb zə̂ tə məg, nji ə́ wǔəə á mə́mə aláʼ páʼ a kə chî nə́ ə́wɨ́ lə̂, ajûtsə́ á pə́ ńkě á mbô yí pɛ́d pô.

¹⁵ A tíʼ ńgɛnə̂ á mə́ faʼ nə́ á mbô ŋwunə aláʼ wɨ́d wə̂ yitsə̌, a túmə yə́ akad pəkwúna yə́ ńgə́ a ghɛn ńtə́ ńdzə́gə pəkwúna píə.

¹⁶ Nji nə ńdzáŋə yí tə a tíʼə ńdoonə̂ á mə́ jî nə́ mənta mə́ atǐ pə́ nə̈ ə́fɛ̂ nə́ nə́ pəkwúneemə, lə́ ŋwu tsə̌ a pə́ ńkě nə́ yí fɛ̂ pô.

¹⁷ Əghâ əjî əyí ə́ nə ḿbɨ nə́ ḿbɨ lə́, a sóŋ ńgə́, Ngaŋə́faʼ tǎ mə tsɔʼə ətsəm ə́ túg məjî tə mə́ tsɛɛlə̂ ághóobə́ á mə́ jî nə́, maŋ pə́ ńchîə aliʼə́ nə́ ńtə́ ńkwû njiə.

¹⁸ Maŋ yǐ lǒo á əsê pɨ pəənə̂ á mbô tǎ mə ə́sóŋ nə́ yí ńgə́, Tǎ, maŋ ghɛlə̂ təpɔŋə á mbô Əsê ńkə́ ńgɛlə̂ á mbô gho.

¹⁹ Maŋ kě pɨ ńkoʼ mbɔʼ pə́ fóŋə mə nə́ mɔ́ əgho pô. Lɔgə̂ mə ándó táʼ ngaŋəfaʼ əgho yitsə̌.”

²⁰ A tíʼ ńdǒo á əsê ḿbəənə̂ á mbô tǎ əyǐə. “A nə ḿbɛ́d tsɔʼə á ndi yi sɛ, tǎ əyǐə a zə́ənə yí ńkó mələ́ŋ míə, ńkə ńgɛn ńtégə mɔ́ yí wɨ́ ḿmaʼ mbô mí nə́ yí ńtíʼ ńchwegə̂ yə́.

²¹ A tíʼ ə́sóŋ nə́ tǎ əyǐ ńgə́, ‘Maŋ ghɛlə̂ təpɔŋ á mbô Əsê ńkə́ ńgɛlə̂ á mbô gho. Maŋ kě pɨ ńkoʼ mbɔʼ pə́ fóŋə mə nə́ mɔ́ əgho pô.’

²² Lə́, tǎ əyǐə a pə́ ə́fóŋ ngaŋə́faʼ əjí ə́sóŋ ńgə́, Ghə́glə nə́! yǐ nə́ nə́ chigə atsəʼ yə əshîʼnə ḿmaʼə̂ á mbɨ yə́. Néŋ nə́ yílə á fîəpô yə́ ńkə́ ńgwê ngwubə á məko yə́.

²³ Ńtíʼ ńgyǐ nə́ tə́kɔʼ ndu na wə́ ńgwaalə̂ áwɨ́d pɛn ghɛd məjî ə́wɨ́ ńjî ńkɔŋtə̂.

²⁴ Ńté ńgə́ móonə mə ghɛnə́ a nə ńkwûə, a pɛn ḿbɨ ńjúmnə, a nə ḿbéŋə, pə pɛn ḿbɨ ńdzə́ənə yə́. Pó tíʼ ńchúʼə á mə́ kɔŋtə̂ nə́.”

²⁵ “Əghâ yi wɨ́ lə́, mɔ́ əyǐ yi ntəŋkaŋə́ a pə́ ńchîə yə́ afoonə. Ndzaŋə a kə kwə̂ nə́ tə ńtíʼə ḿbáatə nchîndɛ̂ lə̂, ńdzóʼ ndzaŋ pə̈ póʼ nə́ apɛ́n ḿbɛ́nə.

²⁶ A fóŋə táʼ ngaŋəfaʼ yitsə̌ ńtíʼ ḿbítə yí nə́ anu páʼ á laŋ nə́.

²⁷ A sóŋ nə́ yí ńgə́, ‘Ndim əgho a kwə̂ tə tǎ əwəənə́ a waalə̂ tə́kɔʼ ndú na wə̂ ńté ńgə́ a kwə̂ əshîʼnə tə alɔʼ yətsə́.’

²⁸ Ntsɛɛmbi əyǐ wə̂ a záŋ ndě lɛ tətətə ńkǐəə yə́ á mə́ kwú nə́ á ndɛ̂. Tǎ əyǐə a fɛ́lə apeŋ ńtíʼ ḿbóʼmbô nə́ yí ńgə́ a kwúnə á ndɛ̂.

²⁹ A pə́ ńkwěe tǎ əyǐ ńgə́, ‘zə́ənə! Ndɛn məngoʼ ghɛn tsɔʼə ətsəm mäŋ faʼə̂ á mbô gho ándó apoʼə, ńdáʼ ńkě anu yətsə́ á mbô gho kǐ pô. Gho pɛ́dtə əfɛ̂ akə̂ á mbô maŋə? Kɛ́ tsɔʼə mɔ́ mbéŋ təmbɔʼ pə̂gpə ngaŋ məkoolə mə tɔ ńkɔ́d ńkɔŋtə̂!

³⁰ Lə́ mɔ́ əgho ghɛnə́ a nə ḿbɛn ńtə́mə́sɛ́ nə́ apeʼə azô tsɔʼə atsəmə á ndzəm əkwɛlə. A pɛn ńkwə̂ gho waalə̂ tə́kɔʼ ndú na wə̂ ńté yə́.’

³¹ Tǎ əyǐə a kwěe yí ńgə́, ‘Móonə mə, lə̈ chîə tsɔʼə pɔ̌ əghâ ətsəmə, ajúmə atsəm maŋ túg nə́ á pə́ azô.

³² Pɛn pə́ ńchîə á mə́ jî nə́ ə́ kɔŋtə̂ ńté ńgə́ ndim əgho ghɛnə́ a nə ńkwûə, a pɛn mbɨ ńjúmnə, a nə ḿbéŋə, pə́ pɛn mbɨ ńdzə́ənə yə́.’ ”