Lomanə 2 - Əka yi Fîə

Ndzaŋ Əsë a Tsɔ́ʼtə nə́ Məsáʼ mə́ Pəənə

¹ Təmbɔʼ gho pə́ pə́ əwə, gho kě chî nə́ anu yitsə̌ á mə́ sóŋ nə́ lɔg nɨd ńgə́ gho koʼnə̂ á mə́ tsɔ́ʼtə əsáʼ pɨ pipə ndaʼ pô. Ńté ńgə́ təmbɔʼ gho tə́ ńtsɔ́ʼtə əsáʼ ŋwu ndaʼ, ḿbə́ ńgɛlə̂ tsɔʼə ntê anu páʼ ngaŋə ä ghɛd nə́ zɨ́d, ghö wǔ lə́ əsáʼ á ngǎ gho.

² Pɛn jî ńgə́ ńtsɔ́ʼtə əsáʼ Əsê ə́ koʼnə̂ á mbô pɨ páʼ pó ghɛd nə́ ntê mənu mɨ́d məənə́.

³ Lə́ pə́ ńgə́, nə́ gho əshunə́ mə, gho tsɔ́ʼtə əsáʼ əghóobə́, lə́ ńkə́ ḿbɛ́lə ńgɛd ntê mənu páʼ pó ghɛd nə́, gho kwaŋ ńgə́ mbɔʼ gho lə́ʼ ńtsɔ́ʼtə əsáʼ Əsê?

⁴ Kɨ əghâ yitsə̌ gho wág nə́ lə́ ntəənə anu yi əshîʼnə páʼ Əsê a ghɛd nə́ nə́ gho, kɨ mənu páʼ gho ghɛd nə́ Əsê a wágnə ḿbɨ ḿbə́ nə́ awaamə́ntɨ́ páʼ a túg nə́ ńté gho, lə́ ndə̌ŋdəŋ ńgə́ gho jî ńgə́ Əsê a túg ntɨ́ yi əshîʼnə. Ńté ńgə́ a tə́ ńdɔ ndú ətsəm ńgə́ gho kwúblə ntɨ́ əgho ə́fɛ́lə á mə́m təpɔŋ əgho.

⁵ Lə́ gho túgə atyǎntə atûə ńkě kɔŋə̂ mə́ kwúblə nə́ ntɨ́ əgho ə́fɛ́lə á mə́m təpɔŋ əgho pô. Ńdaŋ ə́lɨ́d gho tíʼə̈ ńgɛlə̂ ńgə́ atsáŋə azô á yǒ ńnə́ənə Alě páʼ azáŋə́ndé Əsê pó ńtsɔ́ʼtə əsáʼ əjǐ yi tɨ nə́ ndə̌ŋdəŋ ə́ yǒ nə́ nɨd mbɨ əjǐə.

⁶ Ńté ńgə́ Əsê a yǒ tsɔ́ʼə afaʼə ŋwu ntsəm ə́zoŋ lə́ ndzaŋə a nə̈ faʼ nə.

⁷ Pɨ pətsə́ pə́ ghɛn nə́ mbiə á mə́ tə́ nə́ faʼ əshîʼnə ńnáŋə nəgháʼə, ńnáŋ ngóʼkə ḿbəənə̂ ńnáŋ nchîmbî páʼ pó yǐ nə́ kě kwû pô. Əsê a yǐ fɛ̂ nchîntɨ páʼ ə́ mɛdnə̂ nə́ ngǎ mɔʼə́ á mbô pô.

⁸ Pətsə́ pɨ pó náŋə lə́ tsɔʼə mbɨ əzoobə́ ńkǐə ághóobə́ ndə̌ŋdəŋə́, ńdzoŋə̂ ághóobə́ á pə́ mənu mə́ tə koʼə̂. Əsê a yǒ záŋ ndě ə́ tíʼ néŋ ngə́ʼə a mbɨ pó.

⁹ Ngə́ʼ pó mbɨ yi ńdzáŋnə nə́ yǒ chîə á mbɨ pɨ pö ghɛd nə́ mənu mə́ təpɔŋə, ə́ chwáakə nə́ Pəjus ḿbɨ́ ḿbá Pətəjǐsê ə́wə́.

¹⁰ Lə́ Əsê a yǒ fɛ̂ nəgháʼ pó ngóʼkə nə́ mbwɔ́dnə á mbô pɨ pö ghɛd nə́ əshîʼnə: ə́ chwáakə nə́ Pəjus ḿbɨ ḿbá Pətəjǐsê.

¹¹ Ńté ńgə́ Əsê ä tsɔ́ʼtə əsáʼ ŋwu ntsəm lə́ tsɔʼə táʼ ntê.

¹² Pɨ pətsəm páʼ pó kə ghɛd nə́ təpɔŋ á əghâ noŋkə Mosisə a kə kě nə́ ə́wɨ́ chî, pó yǒ kwû ə́ péŋ, pə́ kə́ ə́sáʼ əsáʼ əghɔ́b tə noŋkə. Pəənə́ ándó pó ghɛd nə́ təpɔŋə á əghâ noŋkə Mosisə a kə chî nə́ ə́wɨ́, pə́ yǒ sáʼ əsáʼ əghɔ́b lə́ nə́ noŋkə.

¹³ Ńté ńgə́ lə́ kě pɨ páʼ pó zóʼ nə noŋkə wə̂ páʼ mənu mɔ́b mə́ tɨ́ nə́ ndə̌ŋdəŋə́ á mbi Əsê pô, lə́ pəənə ándó pó faʼ nə́ anu páʼ noŋkə yi wə́ á sóŋ nə́, Əsê náŋkə nə́ ńgə́ mənu mɔ́b mə́ tɨ́ ndə̌ŋdəŋə́.

¹⁴ Pətəjǐsê pó kě noŋkə túg pô, lə́ pó pǎtə ńkě noŋkə túg lə́, təmbɔʼ á pə́ əghâ pó faʼ nə́ anu noŋkə á sóŋ nə́, ńdzoŋ ndzaŋ mbɨ əzɔb ə́ sóŋ nə́ ńgə́ pó faʼ, zəənə́ nɨd lə́ ńgə́ pó túgə noŋkə.

¹⁵ Ngɛdmə́nu əghɔ́b ə́ nɨd ńgə́ anuə atsəm noŋkə á sóŋ nə́ ńgə́ pó faʼ, pə ŋwaʼlə̂ zə́ələ́ á ntɨ́ pó. Əkwaŋ ntɨ́ pɔ́b ə́ kə́ nɨd ńgə́ anu yə wɨ́ lə́ ndə̌ŋdəŋ ńté ńgə́ əkwaŋ pɔ́b ə́ pə́ əghâ yitsə̌ ə́ sáʼə ághɔ́b ńgə́ kɨ pó lɛ̌ ńgɛlə̂ á koʼnə̂ kɨ ńkě koʼnə̂.

¹⁶ Á pə́ ńgə́ anu páʼ Nkɨ yi əshîʼnə wə́ mäŋ fɛ̂ nə́ ə́ sóŋ nə́, lɛ̌ ndzaŋ a yǒ nə́ chîə Alě páʼ Əsê a yǒ nə́ tsɔ́ʼtə mənu mə́ nəlyaŋnə́ mə́ ŋwu ntsəm ə́ laŋ nə́ əlɛ́n Mɔ́ əyǐ Yeso Klisto.

Anu Noŋkə á Sóŋ nə́ Ńté Pəjusə

¹⁷ Lə́ nə́ gho, mbɔʼ gho tə́ ə́fóŋ mbɨ əzo nə́ ŋwu Jus ńkə́ ńnéŋ ntɨ́ əgho nə́ noŋkə ńtíʼə ńkɔn ndzɔʼ əzo ńté ńgə́ gho jî Əsê,

¹⁸ ńkə́ ńjîə anu páʼ Əsê ä lɔ nə́ ńgə́ gho faʼ, ńkə́ ḿbɨ ńdzéʼə á mə́m noŋkə á mə́ jɨ́ nə́ anu páʼ a koʼnə̂ nə́,

¹⁹ ḿbyádnə ńjî ńgə́ gho lə́ ngwaamə apô pəfəg, ńkə́ ḿbɨ ḿbə́ nkyaʼ pɨ pó chî nə́ á mə́m ndzəmə,

²⁰ ḿbə́ ntə́gtə əkəkóg, ḿbɨ ḿbə́ ndzéʼkə pɔ̂nkə̂ ńté ńgə́ gho pyádnə ńjî ńgə́ gho túgə ajíənuə atsəm pó ndə̌ŋdəŋ páʼ á chî nə́ á mə́m noŋkə,

²¹ ndzéʼkə pɨ pə́ ndaʼə, lə́ pə́ ńgɛlə̂ akə̂ mbɔʼ gho kě əzo mbɨ zéʼkə pô? Ghö sóŋə ńgə́, “Kɔ pə́ zəələ̂” ghö zəələ̂ azô?

²² Ghö sóŋə ńgə́, “Kɔ pə́ jîə mə̂ghabə,” ghö jîə azô mə̂ghabə? gho pa məsê mə́ məfɨgə, lə́ ḿbə́ ńdzəələ̂ á mə́m pəŋweŋ?

²³ Gho kɔn ndzɔʼ əzo ńgə́ gho túgə á noŋkə Əsê, lə́ ghö néŋ əsə́ənə atû Əsê ńté ńgə́ ghö wǔəə á noŋkə əyǐ?

²⁴ Aŋwaʼlə Əsê ä sóŋə ńgə́, “Pɨ Pəjus nə́ ghɛd Pətəjǐsê pə́ tíʼə ńdzɔ Əsê.”

²⁵ Mbɔʼ gho zoŋə̂ anu páʼ noŋkə ä sóŋ nə́, mə póʼ nə́ mɔ́ mə́ yǐ ńkwúnə anuə; lə́ mbɔʼ gho pə́ ńchîə anu páʼ noŋkə a sóŋ nə́ zoŋ pô, á chîə ándó pə́ nə ḿběʼ ńkě gho póʼ pô.

²⁶ Mbɔʼ pɨ pə́ kě nə́ ághɔ́b póʼ pô pó zoŋ mənu páʼ noŋkə ä sóŋ nə́ tə ḿbə́ pə́ yǐ kě ághɔ́b lɔg tsɔʼə ándó pə́ póʼə ághɔ́b?

²⁷ Ŋwu páʼ pə́ kě nə́ na mbɨ əji póʼ pô a pə́ ńdzoŋə̂ noŋkə lə́, a yǐ sóŋ ńgə́ gho wǔ əsáʼə, gho pǎtə ńtúgə noŋkə pə́ pɨ ḿbóʼə gho lə́, gho pə̈ fankə̂ noŋkə.

²⁸ Pə́ kě ŋwu Jüs jîə lə́ ndzaŋ páʼ a nɨd nə́ á əshî pô. Chigə mə póʼ nə́ ŋwu mə́ kě kə́ ḿbə́ lə́ anu páʼ a nɨd nə́ a apeŋ pə́ kə́ ńdzə́ənə á əshî pô.

²⁹ Chigə Jus a pɨ ḿbə́ lə́ ŋwu páʼ a pə́ nə́ wə́ələ́ á mə́mə. Lə́ələ́ á pə́ ńgə́ lə́ ŋwu páʼ pə́ póʼ nə́ ntɨ́ əyǐ ńdaŋ nə́ Ajwǐəsê, ńkě laŋə̂ á pə́ nə́ noŋkə pə́ ŋwaʼlə̂ nə́ pô. Mbô ŋwu zɨ́d zɨ ə́ chî lə́ Əsê ä ŋáŋkə nə́ yə́, lə́ kě ŋwu mbî ŋáŋkə pô.