Lomanə 16 - Əka yi Fîə

Pɔlə a Chaʼtə̂ Pɨ pə́ Lomə

¹ Maŋ pímə afaʼə ndim əwɛ̂n Fobe páʼ a pə́ nə́ nətûə á mə́m nkyeetə pɔ́ pə́ Əsê aláʼə Sɛnklya,

² kwá nə́ yí ándó pɨ pó túg nə́ mbimə́ nə́ əlɛ́n Mmaʼmbîə, ndzaŋə ándó pɔ́ pə́ Əsê pó chî nə́ á mə́ chî nə́, ńkə́ fɛ̂ akwáalə á mbô yí nə́ ajúmə atsəmə a lɔ nə́, á mbô pəənə́; ńté ńgə́ yí nə́ nkɔ̌ʼmbɨ əyí a nə ńkə́ ńkwá pɨ pipə nɨ́ nə́ ńdzoŋ ḿbéenə mə.

³ Chaʼtə̂ nə́ Plisila pó Akwila, pɨ páʼ pəg pö faʼ nə́ á mbô Yeso Klisto lə́,

⁴ páʼ pó nə fɛ̂ nə́ nchîmbî əzɔb ńté atûə mə. Maŋ lánə ńchígə́ ə́fɛ̂ ndǎ á mbô Əsê ńté ághóobə́, ńkě tsɔʼə maŋ pô, lə́ pəg pə́ mənkyeetə mətsəm páʼ mə́ chî nə́ á mə́m Pətəjǐsê.

⁵ Ńkə́ ńtú ńchaʼtə̂ nkyeetə páʼ ə́ kwú nə́ á ndɛ̂ pó. Chaʼtə̂ nə́ chigə əshunə́ mə Əpanetusə, páʼ a nə ḿbə́ nə́ ntsɛɛmbi ŋwunə á mboʼ Esya á mə́ pí nə́ Klisto.

⁶ Chaʼtə̂ nə́ Mɛɛlə páʼ a kə chígə́ nə́ ə́faʼə̂ á ndzɔʼ pəənə́.

⁷ Chaʼtə̂ nə́ Andlonikusə pó Junyasə, pəlimə́ mə páʼ pə̌gpo nə ńchî nə́ á nkáʼə atsáŋə, pə́ nə ḿbyádnə ńjîə ághóobə́ á mə́m məntú mə́ Yeso mə̂, pó nə ḿbeg nə́ ńjîə Klisto záʼ maŋ pɔŋə̂ jîə yə́.

⁸ Chaʼtə̂ nə́ Aplatusə, chigə əshunə́ mə á mə́m Mmaʼmbîə.

⁹ Chaʼtə̂ nə́ Ulbanus táʼ ngaŋəfaʼ əwɛ̂n yitsə̌ á mə́m Klisto, pó əshunə́ mə Stakus.

¹⁰ Chaʼtə̂ nə́ Apelles, páʼ a nɨd nə́ ńgə́ yí lə́ chigə ndzoŋdzəm Klisto lə̂. Chaʼtə̂ nə́ ŋwu ntsəm páʼ a fɛ́d nə́ á mə́m ngwud Alistobulusə.

¹¹ Chaʼtə̂ nə́ Ɛlɔdyon páʼ a fɛ́d nə́ á mə́m ngwud əzəgə́, ńkə́ ńchaʼtə̂ pɔ́pə́mɛ́ pɛnə̂ á mə́m ngwud Nasissusə.

¹² Chaʼtə̂ nə́ Təlifena, pó Təlifosa, páʼ pö faʼ nə́ á mbô Mmaʼmbî lə́; ńkə́ ńchaʼtə̂ əshunə́ mə Pelsis páʼ a chígə́ nə́ ə́faʼə̂ á mbô Mmaʼmbîə lə́.

¹³ Chaʼtə̂ nə́ Lufus, a pə́ nə́ atyǎntə ngaŋəfaʼə á mbô Mmaʼmbîə, ńkə́ ńchaʼtə̂ mǎ əyǐ páʼ a lɔg nə́ mə ándó mɔ́ əyǐə.

¹⁴ Chaʼtə̂ nə́ Asynklitus pó Flegon ḿbɨ ḿbə́ nə Elmes pó Patlobas, Elmas ḿbɨ ḿbə́ nə́ pɔ́pə́mɛ́ pɛn páʼ pó po chî nə́ pó po.

¹⁵ Chaʼtə̂ nə́ Filologus pó Julya, ḿbéenə Neleus pó ndim əyǐ yi məngyě ḿbɨ ḿbə́ nə́ Olympas ḿbɨ ḿbə́ nə́ pɔ́ pə́ Əsê tsɔʼə pətsəm pó po chî nə́.

¹⁶ Ŋwu ntsəmə a chaʼtə̂ mɔ́mɛ́ əyǐ ńchwigə̂ yə́ á nəghag yí nə́ akɔŋnə Klisto. Mənkyeetə mə́ pɔ́ pə́ Klisto tsɔʼə mətsəm mə́ túmə achaʼtə á mbô pəənə́.

Ntəgə́ yi Ńdwigtə̂ nə́

¹⁷ Pəlimə́ mə, maŋ póʼmbô á mbô pɨ ńgə́ nə́ lɔg ndɛd nə́ pɨ pó ghɛd nə́ nə́ chîə məntsoolə məntso, ńdaŋ ə́lɨ́d ḿmaʼ ngə́ʼə á mə́m pɨ pó túg nə́ mbimə́ nə́ Əsê. Pó kə kǐə ághɔ́b ndzéʼkə pə́ nə fɛ̂ nə́ á mbô pɨ lə̂, lə́ʼ nə́ ághóobə́.

¹⁸ Ńté ńgə́ mbô pɨ zɨ pó kě lə́ á mbô Klisto a pə́ nə́ Mmaʼmbîə əwɛ̂n faʼə̂ pô, pó faʼə̂ ńté lə́ məpəm móobə́. Ńdaŋ nə́ ətsáb pipə əshîʼnə pɔ́b pópə ətsáb məfɨgə pɔ́b, pó fɨgə̂ məntɨ́ mə́ pɨ páʼ pó kě nə́ anu yətsɨ́ jî pô.

¹⁹ Ńté ńgə́ ŋwu ntsəmə a jî ndzaŋ nə́ zóʼnə nə́ Nkɨ yi Əshîʼnə, ńdaŋ ə́lɨ́d maŋ tíʼə ńkɔŋtə̂ ńté áwə́ənə́. Maŋ loonə̂ ńgə́ nə́ túgə ajíənu ńté anu yi əshîʼnə, ḿbə́ ḿbə́ pəpóʼ pə́ ngaŋ á mə́mə anuə təpɔŋə.

²⁰ Ńdaŋ ə́lɨ́d, Əsê páʼ ä fɛ̂ nə́ mbwɔ́dnə á mbô pɛn a yǐ ghɛd pɛn ghɔʼə̂ Satan nə́ məko mɛ́nə. Maŋ chaʼtə́sê ńgə́ Apɔŋə́ntə́əmə Mmaʼmbî əwɛn Yeso Klisto á chîə á ndu pəənə́.

²¹ Timoti táʼ ŋwu pəg yí faʼ nə́ lə́, a ghə́ maŋ chaʼtə̂ áwə́ənə́; Lusis pó Jason nə́ Sosipata páʼ pó pə́ nə́ ngwud əzəg pó tə́ chaʼtə̂ áwə́ənə́.

²² Maŋ Tetiyus páʼ maŋ ŋwaʼlə̂ nə́ aŋwaʼlə zɨ lə́, mäŋ chaʼtə̂ áwɨ́ nə́ əlɛ́n Yeso Klisto.

²³ Gayɔs ŋwu páʼ mäŋ chî nə́ á ndɛ̂ yí, páʼ nkyeetə kə́ nə́ ńkwúnə á ndɛ̂ yí lə́, á ghə́ maŋ chaʼtə̂ áwə́ənə́. Elastus, ŋwu páʼ a lɔʼkə̂ nə́ nkéebə á tə́kɔʼ tɔ̂ŋ ghɛn lə́ pó mɔ́mɛ́ əwɛ̂n Kwatus pó kə́ ńgə́ maŋ chaʼtə̂ áwə́ənə́. (Maŋ chaʼtə́sê ńgə́ Apɔŋə́ntə́əmə Mmaʼmbî əwɛ̂n Yeso Klisto á chîə á mbô pɨ pətsəmə. Amɛn)

Ndwigtə Achaʼtə́sê

²⁵ Pɛn tíʼ ə́fɛ̂ nəgháʼə á mbô Əsê! A koʼnə̂ təmbɔʼ a ghɛd gho tɨ́ ńtyantə̂ á mə́m mbimə́ əzo, ńdaŋə̂ á mə́m Nkɨ yi Əshîʼnə maŋ náŋkə nə́, nkɨ ńté Yeso Klisto, ńdaŋ ndzaŋ páʼ Əsê a nə nɨd nə́ ndə̌ŋdəŋ əyǐ yi ńdyáŋ nə́, á nə ńdyáŋ nə́ ə́fɛ́lə á ngoʼ pəchə́.

²⁶ Lə́ nə́ pə́ əghâ nə́ ndə̌ŋdəŋ wɨ́d wə́ á fɛ́lə á əshîsaŋ ńdaŋ nə́ aŋwaʼlə məntúmə́sê; pə́ tíʼ ńgɛd ətú ətsəm ə́ jîə, ńdzoŋ ndzaŋ Əsê mɛdnə̂ ngǎ mɔʼə́ a kə sóŋ nə́ ńgə́ pə́ faʼə̂, ńjî ńgə́ təmbɔʼ ŋwu ntsəmə á néŋ ntɨ́ nə́ yí ńkə́ ńdzóʼnə yə́.

²⁷ Pɛn fɛ̂ nəgháʼ á mbô Əsê páʼ a pə́ nə́ ndaʼ yí páʼ a túg nə́ ajíə atsəmə. Pɛn tə́ fɛ̂ nəgháʼ tə měe á mbô yí ńdaŋə̂ á ndzəm Yeso Klisto. Amɛn.