Lomanə 15 - Əka yi Fîə

Ghɛd nə́ A Pɔŋ Mbɨ Pɨ pə́ Ndaʼə, kɔ á pə́ Əzəənə́

¹ Pɛnə̂ ándó mbimə́ əzɛn tyantə̂ nə́ chîə á mə́ kwá nə́ pɨ páʼ mbimə́ əzɔb pwɔ́dnə nə́ á mə́m məngə́ʼ móobə́. Pɛn kě chîə á mə́ ghɛd nə́ á pə́ mənu mə́ yǐ nə́ pɔŋə̂ áwɛ̂n pô.

² Ŋwu əwɛn ntsəmə a chîə á mə́ ghɛd nə́ mbɨ mɔ́mɛ́ əyǐ ə́ pɔŋ ńjî ńgə́ mɔ́mɛ́ əyǐə a kwéŋə á mə́m mbimə́.

³ Ńté ńgə́ Klisto a nə ńkë ghɛlə̂ anu lə́ ńgə́ əjǐ mbɨ ə́ pɔŋ pô, lə́ ndzaŋə á chî nə́ á mə́mə aŋwaʼlə Əsê ńgə́, “Məndzɔmnə ándó páʼ pɨ pə́ zɔ nə́ gho əwɨ́ mə́ záŋə lə́ mə.”

⁴ Anuə atsəmə ándó pə́ nə ŋ́ŋwaʼlə̂ nə́ á mə́mə aŋwaʼlə Əsê, pə́ nə ŋ́ŋwaʼlə̂ lə́ á mə́ zéʼkə nə́ áwɛ̂n ə́wə́, ńjî ńgə́ mbɔʼ pɛn túgə akwaŋ ńtə́ ḿbyáabə ńdaŋə̂ á mə́mə awaamə́ntɨ́ pópə mə́ néŋ nə́ ntɨ́ páʼ aŋwaʼlə Əsê á fɛ̂ nə́ á mbô pɛnə̂.

⁵ Pəg chaʼtə́sê ńgə́, Əsê páʼ a fɛ̂ nə́ awaamə́ntɨ́ pópə mə néŋ nə́ ntɨ́, a yǐ ghɛd nə́ túgə apímnə á ndzɔʼ pɨ ńdaŋə̂ á ndzəm ntag məko Yeso Klisto.

⁶ Ńjî ńgə́ təmbɔʼ pɨ pətsəm nə́ táʼ ngye pɨ ŋáŋkə Əsê a pə́ nə́ Tǎ pə Mmaʼmbî əwɛn Yeso Klisto.

Nkɨ yi Əshîʼnə á Mbô Pətəjǐsê

⁷ Pímə ndim əgho tsɔʼə ndzaŋ Yeso a nə ḿbí nə́ gho ńjî ńgə́ á fɛ̂ nəgháʼ á mbô Əsê.

⁸ Maŋ fiʼtə̂ áwɨ́ ńgə́ afaʼ páʼ Klisto a nə̈ faʼ nə́ á mə́m nchîmbî əjǐ, a nə̈ faʼə̂ lə́ á mbô Pəjus, á mə́ nɨd nə́ ńgə́ Əsê a nə ńdzoŋ ndaʼnə əjǐə á mə́ ghɛd nə́ ndaʼnə a nə fɛ̂ nə́ á mbô pətǎ pɔ́b ə́ fɛ́d ḿbə́ ndə̌ŋdəŋə́,

⁹ á mə́ pɨ nə́ ghɛd mbɔʼ Pətəjǐsê pó ŋáŋkə Əsê ńté akóolə́mə́lə́ŋə ajíə, tsɔʼə ndzaŋ pə́ ŋwaʼlə̂ á mə́m aŋwaʼlə Əsê ńgə́, “Ńdaŋ ə́lɨ́d maŋ yǐ ŋáŋkə gho á ndzɔʼ Pətəjǐsê; ə́ kə́ əzɔb nkǐ ŋáŋkə əlɛ́n əghô ə́wə́.”

¹⁰ Ngǎ yitsə̌ á kə́ ḿbɨ ə́sóŋ ńgə́, “Pətəjǐsê, kɔŋtə̂ nə́ pɨ pə́ pɨ pə́ Əsê.”

¹¹ Aŋwaʼlə Əsê a kə́ ḿbɨ ə́sóŋ ńgə́, “Pətəjǐsê ŋáŋkə Mmaʼmbîə, ńkə́ ńgɛd ŋwu ntsəmə a ŋáŋkə yə́.”

¹² Izaya a nə ńkə́ ḿbɨ ə́sóŋ ńgə́, “Ŋwu tsə̌ a yǒ fɛ́d nə́ əla Jese ə́ yǐəə, a yǒ yǐəə á mə́ sáʼ nə́ Pətəjǐsê, pó yǒ túgə akwaŋ té yí tíʼə pyáabə.”

¹³ Maŋ chaʼtə́sê ńgə́ Əsê páʼ a ghɛd nə́ pɛn túgə akwaŋ ńté yí ńtíʼə ḿbyáabə a yǐ lwɛ́nkə ntɨ́ ə́wɨ́ nə́ akɔŋtə pó mbwɔ́dnə ə́ laŋə̂ á mə́m mbimə́ əzo nə́ yə́. Ńjî ńgə́ akwaŋ páʼ ghö pyáb nə́ lə́ a ghɛn nə́ mbiə á mə́ kwéŋ nə́ ńdaŋə̂ á ndzəm mətɨ mə́ Ajwǐəsê.

Anu páʼ á Ghɛd nə́ Pɔlə a Ŋwaʼlə̂ Aŋwaʼlə Zɨ tə Apɔ́gə

¹⁴ Pəlimə́ mə, maŋ nə́ nkɔ̌ʼmbəəmə mə, maŋ chígə́ ńjî ńgə́ məntɨ́ mɨ́ mə́ lwɛ́nkə nə́ əshîʼnə. Ńkə́ ḿbɨ ńjî ńgə́ atûə azə́ənə́ á lwɛ́nkə nə́ ntê ajîə atsəmə, pɨ tíʼ ńkoʼnə̂ mbɔʼ nə́ zéʼkə məmbɨ mə́ənə́.

¹⁵ Lə́ ńgɛnə̂ á mə́m aŋwaʼlə zɨ maŋ lánə ńtúg ntə́əmə á mə́ ŋwaʼlə̂ nə́ mənu mətsə́ á mbô pɨ lɔg ə́ kwumtə̂ áwɨ́ ə́wə́. Maŋ túg ntə́əmə á mə́ ŋwaʼlə̂ nə́ mənu lə̂ ńté apɔŋə́ntə́əmə Əsê páʼ a túg nə́ ńté mə,

¹⁶ ńté ńgə́ maŋ lə́ ngaŋəfaʼ Yeso Klisto páʼ ä faʼ nə́ á mbô Pətəjǐsê. Mäŋ faʼə̂ lə́ ándó mbêsê ńnáŋkə nkɨ yi Əshîʼnə páʼ ə́ lǒo nə́ á mbô Əsê, ńjî ńgə́ mbɔʼ Pətəjǐsê pó chîə ándó akáŋə́sê páʼ á koʼnə̂ nə́ á mbô Əsê, páʼ Ajwǐəsê á ghɛd nə́ á ŋwaʼə̂ á mbô Əsê.

¹⁷ Ndzaŋ maŋ chî nə́ á mə́m Yeso Klisto mbɔʼ maŋ tíʼ ńtúgə kətɨd nə́ afaʼ maŋ faʼ nə́ á mbô Əsê.

¹⁸ Maŋ yǐ túg ntə́əmə á mə́ tsáb nə́ tsɔʼə anu Əsê a ghɛd nə́ ńdaŋə̂ á mə́m maŋə. Á mə́ ghɛd nə́ Pətəjǐsê pó zóʼnə Əsê ńdaŋ nə́ anu mäŋ sóŋ nə́ ńkə́ faʼə̂,

¹⁹ ḿbɨ ńdaŋ nə́ mətɨ mə́ əkyeʼmə́nu pópə mənu mə́ yɛ́d nə́ yɛ́d nə́, nə́ mətɨ mə́ Ajwǐəsê ńjî ńgə́ əliʼ ətsəm ńchwáakə nə́ Jɛlusalɛm ńgɛn tə ńkoʼə̂ Ililikum, maŋ pɛ́dtə ńnáŋkə nkɨ yi əshîʼnə ətsəm ə́wɨ́ tə məgə̂.

²⁰ Azéemə anu maŋ lɔ nə́ á mə́ faʼ nə́ lə́ á mə́ ghab nə́ nkɨ yi əshîʼnə wə́ aliʼə́ ándó pə́ kě nə́ əlɛ́n Klisto ə́wɨ́ kə́ zóʼə pô, ńjî ńgə́ kɔ maŋ pɔ́ ndɛ̂ á ndumə achîəndɛ̂ ŋwu ndaʼə.

²¹ Tsɔʼə ndzaŋ páʼ aŋwaʼlə Əsê ä sóŋ nə́ ńgə́, “Pəənə ándó pó nə ńkě nə́ anu kə́ zóʼə ńté yí pô, pó yǐ zə́ənə́, pəənə ándó pó kě nə́ kə́ zóʼə pô, pó yǐ zóʼ atûə azóobə́ a lá ə́wə́.”

Ndzaŋ Pɔlə a nə Ńtyáŋtə nə́ á mə́ Ghá nə́ Pɨ pə́ Lomanə

²² Lɛ̌ anu á kə́ kɨ́ʼ nə́ mə ngǎ yi nɨ́ nə́ maŋ kě əsa túg á mə́ ghá nə́ á wɨ́ pô.

²³ Lə́ nə́ əghâ nə́ maŋ məgtə̂ nə́ afaʼə á mboʼ ghɛn lə́, ḿbɨ ḿbə́ nə́ ndzaŋ maŋ kə tə́ nə́ ńdoonə̂ á mə́ yǐ nə́ zə́ənə wə́ənə́ mə́m məngoʼ mimə nɨ́ nə́ lə́,

²⁴ maŋ loonə̂ lə́ mə́ faʼ nə́ ə́lɨ́d əghâ nə́. Maŋ yǐ kɔŋə̂ á mə́ ghá nə́ á wɨ́ nə́ ndɛlə́ ándó maŋ tə́ nə́ ńdaŋə̂ ńgɛnə̂ á Spen, ńjî ńgə́ pɛn chî nə́ akɔŋtə nə́ mɔ́ akəmə ndɛd nə́ tíʼ ńkwáalə mə, maŋ ghɛn ə́wə́.

²⁵ Nə́ pə́ əghâ nə́ maŋ ghɛnə̂ lə́ Jɛlusalɛm nə́ əpúmə á mbô ńkyeetə̂ pɔ́ pə́ Əsê ə́wə́.

²⁶ Ńté ńgə́ mənkyeetə mə́ chî nə́ Masedonya pó Akaya pó fɛ̂ əpú nə́ apɔŋə́ntə́əmə á mbô pəfə́m pó chî nə́ á ndzɔʼ pɨ pə́ Əsê á Jɛlusalɛmə.

²⁷ Lə́ kɔŋ pó a ngǎ pó á mə́ faʼ nə́ ə́lə́ələ́, lə́ nə ḿbə́ aliʼə́nuə azóobə́ á mə́ kwá nə́ pəfə́m pə̂. Təmbɔʼ Pəjus pó nə̈ ńgeebə̂ afoʼə ajwi ə́fɛ̂ á mbô Pətəjǐsê, lə́ á kə́ ḿbə́ ndzaŋ Pətəjǐsê pó yǐ nə̈ gheebə̂ apeʼə azɔ́b ə́fɛ̂ á mbô Pəjusə.

²⁸ Əghâ ándó maŋ məgtə̂ nə́ afaʼ zɨ ḿbɨ́ fɛ̂ nkáb pə́ nə maʼ nə́ ńgə́ pə́ fɛ̂ á mbô pó lə́, maŋ tíʼ ńgɛnə̂ á Spenə, lə́ əghâ maŋ tə́ nə́ ńgɛnə̂ ə́wɨ́ lə́ maŋ yǐ laŋ ə́ ghéenə áwə́ənə́.

²⁹ Maŋ jî ńgə́ əghâ maŋ yǐ nə́ yǐəə á mbô pɨ lə́, Klisto a yǐ fɛ̂ afoʼ nə́ pɨ əshîʼnə.

³⁰ Pəlimə́ mə, maŋ póʼmbô nə́ pɨ ndzaŋ nə́ néŋ nə́ ntɨ́ nə́ Mmaʼmbî əwɛ̂n Yeso Klisto, ńkə́ ḿbə́ ndzaŋə Ajwiə ä ghɛd nə́ ńgə́ pɛn kɔŋ məmbɨ mɛ́n: mbɔʼ pɛn kyeetə̂ ńtə́ ńchaʼtə́sê á atû maŋə.

³¹ Chaʼtə̂ nə́ Əsê ńgə́ təmbɔʼ a kwáalə mə á mbô pɨ pə́ kě nə́ Əsê pímə á mə́m aláʼə Judya, ńkə́ ńgɛd ńgə́ mbɔʼ pɔ́ pə́ Əsê pó chî nə́ á Jɛlusalɛm pó pímə afaʼə mə.

³² Ńdaŋ ə́lɨ́d mbɔʼ Əsê a pí maŋ tíʼ ńgyǐəə á mbô pɨ ńdwɛ́nkə nə́ akɔŋtə, ńtíʼ ńdzóʼ əshîʼnə ándó ngəənə á mə́m pəənə́.

³³ Pɛn chaʼtə́sê ńgə́, Əsê páʼ ä fɛ̂ nə́ mbwɔ́dnə á mbô ŋwu ntsəm a chî pɨ po. Amɛnə.