Lomanə 12 - Əka yi Fîə

Nchîmbî Əzɛnə̂ á Mə́mə Afaʼə Əsê

¹ Pəlimə́ mə, ńté tə́kɔʼə akóolə́mə́lə́ŋ Əsê á ndu pɛn, maŋ póʼmbô á mbô pɨ ńgə́; nə́ fɛ̂ məmbɨ mə́ənə́ ándó ajúmə afyaʼə́sê páʼ á chî nə́ mbîə á mbô Əsê. Ajúmə afyaʼə́sê yə ŋwaʼ nə́ páʼ Əsê á kɔŋ nə́. Lɛ̌ ndə̌ŋdəŋ ndú páʼ təmbɔʼ pɨ tə́ ngóʼkə Əsê wə́.

² Kɔ nə́ tə́ ńgɛlə̂ mənu páʼ pɨ pə́ mbî pö ghɛd nə́, nə́ mɛdtə̂ Əsê a kwúblə məntɨ́ mɨ́ tsɔʼə mətsəm tə əkwaŋ mənu əpɨ́ ə́ tíʼ ḿbə́ pi fîə. Ńjî ńgə́ nə́ tíʼ ńjîə anu páʼ Əsê a lɔ nə́, mənu mimə əshîʼnə páʼ Əsê a kɔŋ nə́ ńkə́ ḿbə́ nə́ mənu páʼ mə́ koʼnə̂ nə́ ńgɛn ə́fyagə̂.

³ Ńté ńgə́ Əsê a túgə apɔŋə́ntə́əmə á ndu maŋ, maŋ sóŋə á mbô pɨ pətsəm ńgə́, kɔ nə́ ŋáŋkə mbɨ əzɨ ńtsɛ ndzaŋ nə́ pěʼ nə́ ńchîə á mə́ chî nə́. Lə́ ŋwu ntsəmə a tə́ ńkwaŋə̂ anu ńté mbɨ əjǐ, ńkwaŋə̂ pə́ ndzaŋ páʼ a tsóokə mbɨ əjǐə, ndzaŋ páʼ Əsê ä kwá nə́ yə́ a túg mbimə́ á mbô yə́.

⁴ Pɛn túg əlam pi nɨ́ nə́ á mə́m táʼ mbəəmə, lə́, əlam mbɨ pɨ ə́ kě lə́ táʼə afaʼ túg pô.

⁵ Lə́ tsɔ́ʼə ə́lɨ́d nə́ pɛnə̂, pɛn pǎtə nɨ́ lə́, ḿbə́ ḿbə́ lə́ tsɔʼə táʼə á mə́m Klisto, lə́ pə́ ńgə́ pɛn kyeetə̂ məmbɨ mɛ́n ńtíʼ ḿbə́ táʼə ándó əlam mbɨ ə́ kə́ nə́ ńkyeetə̂ ḿbə́ táʼ mbəəmə.

⁶ Ŋwu ntsəmə á mə́m pɛnə̂ a lɔgə̂ ajíə ajú páʼ Əsê a fɛ̂ nə́ nə́ apɔŋə́ntə́əmə ají ńtíʼə faʼə̂ ə́wə́. Təmbɔʼ məfɛ̂nə mɛ́n mə́ pə́ lə́ á mə́ tə́ nə́ náŋkə nkɨ Əsê, pɛn shib faʼ ə́lɨ́d ńdzoŋ mbimə́ páʼ pɛn túg nə́.

⁷ Təmbɔʼ á pə́ pə́ mə faʼ nə́ á mbô pɨ, pɛn faʼə̂. Təmbɔʼ á pə́ mə tə́ nə́ zéʼkə pɨ, pɛn zéʼkə.

⁸ Təmbɔʼ á kə́ ḿbə́ ńgə́ pɛn tə́ ńkwáalə pɨ néŋə məntɨ́ mɔ́b, pɛn faʼ lə́ələ́; ŋwu tsəm páʼ a ghab nə́ ajúmə atsəm páʼ a túg nə́ á mbô pətsə́, a shib fɛ̂ tə ghɔnkə̂ apô; ŋwu ntsəm páʼ a chî nə́ nətû pɨ, a shib faʼ nə́ ntɨ́ əyí ətsəmə; ŋwu páʼ ä ghɛd nə́ mənu mimə əshîʼnə a mbɨ pətsə́ pɨ, a shib ńgɛlə̂ á mə́mə akɔŋtə.

⁹ Təmbɔʼ pɛn tə́ ńkɔŋə̂ pətsə́ pɨ pɛn kɔŋə̂ ághɔ́b ndə̌ŋdəŋə́. Nə́ peenə̂ ajúmə atsəm páʼ á kě nə́ pɔŋ pô. Tɨ́ nə́ ńtyantə̂ nə́ ajúmə atsəm páʼ á pɔŋ nə́.

¹⁰ Kɔŋ nə́ a ŋwu ntsəmə á mə́m pəənə́ ándó pəlimə́ á mə́m klisto, ŋwu ntsəmə á mə́m pəənə́ a chígə́ ńdzóʼnə mɔ́mɛ́ əyǐə.

¹¹ Pɨ faʼ nə́ mətəənə kɔ nə́ tə́ ńdɔ́ŋnə. Faʼ nə́ á mbô Mmaʼmbî nə́ məntɨ́ mɨ́ mətsəmə.

¹² Tə́ ńkɔŋtə̂ nə́ anuə atsəm gho tə́ nə́ ńkwaŋə̂ ḿbyáabə, ńgwam ntɨ́ nə́ ndɛd ngə́ʼə ńkə̈ ńchaʼtə́sê əghâ atsəmə.

¹³ Ghab nə́ apeʼə azə́ənə́ á mbô pɨ pə́ Əsê pi ŋwaʼ nə́ pó kě nə́ túg pô, ńkə́ ḿbí pəghəənə á mə́m məláʼ mə́ənə́.

¹⁴ Néŋ nə́ mbwɔ́dnə á atû pɨ pó tsaŋkə̂ nə́ áwə́ənə́. Kɔ nə́ néŋə á pə́ ndoonə atû pó, fɛ̂ nə́ pə́ mbwɔ́dnə á mbô pó.

¹⁵ Tə́ nə́ ńkɔŋtə̂ pɨ̌pə pɨ páʼ pó tə́ nə́ ńkɔŋtə̂, ńkə̈ ńkyéŋə pɨ̌pə pɨ páʼ pó kyéŋ nə́.

¹⁶ Chî nə́ nə́ mbwɔ́dnə pɨ pə́ ŋwu ntsəmə. Kɔ nə́ tə́ ńtəələ̂, kə́ nə́ ḿbímə á mə́ faʼ nə́ á mbô ŋwu ntsəm nə́ atsóokə́mbəəmə. Kɔ nə́ lɔg mbɨ əzəənə́ ándó pɨ pó jî nə́ ənuə.

¹⁷ Təmbɔʼ ŋwunə a ghɛlə̂ á təpɔŋə á mbô gho, kɔ gho tûə yí nə́ təpɔŋə. Lɔ nə́ ndú ətsəmə á mə́ ghɛd nə́ anu páʼ ŋwu ntsəmə a jî nə́ ńgə́ á pɔŋə̂.

¹⁸ Lɔ ndú ətsəm nə́ əzo ngǎ, á mə́ zɨ́ nə́ ńgə́ gho chî nə́ mbwɔ́dnə pɨ̌pə ŋwu ntsəmə.

¹⁹ Pəlimə́ mə, kɔ nə́ láʼ ḿbəələ̂ təpɔŋ nə́ təpɔŋə, lə́ mɛdtə̂ azáŋə́ndé Əsê á faʼə̂ zə́ələ́. Ńté ńgə́ aŋwaʼlə Əsê á sóŋ ńgə́, “Mmaʼmbîə a sóŋ ńgə́ lə́ chî maŋə á mə́ pɨd nə́ təpɔŋ páʼ ŋwunə a ghɛd nə́ á mbô gho.”

²⁰ Lə́ aŋwaʼlə Əsê á pə́ mbɨ ə́sóŋə á mbô pɨ lə́ ńgə́, Təmbɔʼ nji tə́ ńdzáŋə ngaŋkəpa əgho, fɛ̂ məjîə á mbô yə́, nji nkǐ ə́ tə́ ńdzáŋə yí fɛ̂ nkǐə á mbô yə́ a nô. Ndzaŋə ándó gho faʼ nə́ ə́lɨ́d lə́, ghö kwɛlə̂ lə́ wummogə́ á atû yə́.

²¹ Kɔ gho pí təpɔŋə á tsɛɛlə̂ gho, á tíʼə ə́lɨ́d əshîʼnə əghô tsɛɛlə̂ təpɔŋə.