Lomanə 1 - Əka yi Fîə

¹ Lə́ maŋ Pɔlə, ngaŋəfaʼ Klisto Yeso páʼ pə́ kə́ fóŋ nə́ mə ńgə́ maŋ pə́ ntú Yeso, ńtsɔ́ʼə mə ńgə́ maŋ tə́ ńnáŋkə Nkɨ Əsê yi əshîʼnə,

² Nkɨ Əsê yi əshîʼnə páʼ a nə ńdaʼnə̂ áwɨ́d ə́fɛ́lə á ngoʼ pəchə́ ńdaŋə̂ á mbô məntú mi tsɔʼə ndzaŋ pə́ ŋ́ŋwaʼlə̂ nə́ á mə́mə aŋwaʼlə Əsê.

³ Pó nə ŋwaʼlə̂ ńté lə́ Mɔ́ əyǐ Mmaʼmbî Yeso klisto, pə́ nə́ ḿbî nə́ a yə́ ándó ŋwu mbî á mə́m əla Debilə.

⁴ Ajwi yə ŋwaʼ nə́ á nə ńnɨd nə́ tə́kɔʼ mətɨ ńgə́ Yeso lə́ Mɔ́ Əsê ńdzoŋ ndzaŋ páʼ a nə ńkwû nə́ ḿbɨ ńjúmnə á nəwû lə̂.

⁵ Ńdaŋə̂ á ndzəm yí, Əsê a fɛ̂ əseenə á mbô maŋ ńgə́ maŋ pə́ ntú əyǐ ńté Yeso Klisto ńjî ńgə́ maŋ kwá mbi ńgɛd Pətəjǐsê pətsəm pó pímə yí ńkə́ ńdzóʼnə yə́,

⁶ ńkə́ ḿbéenə áwɨ́ pɨ pə́ Lom páʼ Əsê a fóŋ nə́ áwɨ́ ńgə́ nə́ yǐ ḿbə́ ngaŋə́zoŋə́ndzəm Yeso lə̂.

⁷ Ńdaŋ ə́lɨ́d maŋ tíʼ ŋ́ŋwaʼlə̂ á mbô pɨ pətsəmə á Lom páʼ Əsê a kɔŋ nə́ áwɨ́ ńkə́ fóŋə áwɨ́ ńgə́ nə́ yǐ ḿbə́ pɨ píə: Ńgə́ Əsê páʼ a pə́ nə́ Tǎ əwɛ̂n pó Mmaʼmbî Yeso Klisto pó nəələ̂ apɔŋə́ntɨ́ nə́ pɨ ńkə́ fɛ̂ mbwɔ́dnə nə́ pəənə́.

Pɔlə a Láʼkə Əsê ńté Pɨ pə́ Lomə

⁸ A mə́ chwáakə nə́, mäŋ láʼkə Əsê mə ńdaŋ nə́ Yeso Klisto ńté áwɨ́ pətsəm, ńté ńgə́ mbî ntsəm ə́ tə́ ńdyaʼtə̂ atsáb ńté mbimə́ əzəənə́.

⁹ Əsê a jî ńgə́ anu mäŋ sóŋ nə́ lə́ ndə̌ŋdəŋə́, Əsê zɨ́d jɨ lə́ Əsê páʼ mäŋ faʼ nə́ á mbô yí nə́ ntə́əmə mə ətsəm ńdaŋə̂ nə́ nkɨ yi əshîʼnə mäŋ náŋkə nə́ ńté Mɔ́ əyǐə. Əsê a jî ńgə́ mäŋ kwúmtə áwɨ́

¹⁰ əghâ ətsəm páʼ mäŋ chaʼtə̂ nə́ Əsê. Mäŋ pítə Əsê ńgə́ mbɔʼ a pə́ anu páʼ a lɔ nə́ tə ḿbə́ ndɛd koʼ mbɔʼ á ghɛd maŋ ghéenə wɨ́ əghâ nə́.

¹¹ Ńté ńgə́ maŋ lánə ńchígə́ ńkɔŋə̂ á mə́ jɨ́ nə́ áwɨ́ lɛ titi ńjî ńgə́ maŋ yǐ pɛn ghabtə̂ afoʼ páʼ a lǒo nə́ á mbô Ajwǐəsê á mə́ ghɛd nə́ nə́ tyantə̂.

¹² Anu mäŋ sóŋ nə́ lə́ ńgə́ pə́ yǐ néŋ məntɨ́ mɨ́, ə́ kə́ néŋ əghéemə, ə́ laŋ lə́ nə́ mbimə́ əzɛ̌n pətsəmə.

¹³ Pəlim, maŋ loonə̂ lə́ ńgə́ pɨ jî ńgə́ əghâ pipə nɨ́ nə́ ə́ chî ə́wɨ́ mäŋ kwaŋ nə́ ńgə́ maŋ yǐ ghéenə áwə́ənə́, lə́ ajûtsə́ á pə́ ńkə́ ńdzɔŋə̂ tsɔʼə zɔŋ nə́ tə ńkoʼ əghâ nə́. Maŋ loonə̂ lə́ mə́ kwúblə məntɨ́ mə́ pəənə á mə́m pɨ pó zoŋ ndzəm Yeso tsɔʼə ndzaŋ maŋ kə faʼ nə́ á mə́m pətsə́ Pətəjǐsê lə̂.

¹⁴ Ńté ńgə́ lə́ aliʼə́nuə mə á mə́ faʼ nə́ ə́lə́ələ́ á mbô ŋwu ntsəmə, á mbô pɨ əmə́g mɔ́b mə́ ŋáʼnə nə́ po pə pɨ pó pɛ́d nə́ á mə́m ndzəmə́. Nə́ pɨ pə́ yáŋ nə́ pópə əkəkógə́.

¹⁵ Lə́ ghɛd ə́lɨ́d maŋ chígə́ ńkɔŋə̂ á mə́ kə́ nə́ náŋkə nkɨ yi əshîʼnə á mbô pɨ páʼ nə́ chî nə́ á Lomə.

Mətɨ Páʼ mə́ Chî nə́ nə́ Nkɨ yi Əshîʼnə

¹⁶ Əshɨ́ yitsə̌ ə́ kě mə kóolə ńté nkɨ yi əshîʼnə ghɛn pô: Ńté ńgə́ lə́ mətɨ mə́ Əsê á mə́ chwádkə nə́ ŋwu ntsəm páʼ a túg nə́ mbimə́, ə́ chúʼ nə́ Pəjus ə́ tíʼ koʼ nə́ pətəjǐsê.

¹⁷ Ńté ńgə́ nkɨ yi əshîʼnə ghɛn ə́ nɨd ndzaŋ páʼ Əsê a ghɛd nə́ pɨ pə́ tɨ́ ndə̌ŋdəŋə́ á mbi yə́: a ghɛlə̂ ə́lɨ́d ńdaŋə̂ lə́ á mə́m mbimə́, ə́fɛ́lə a nəchwaakənə́ tə ńkoʼə̂ a ndwegtə. Ndzaŋ páʼ aŋwaʼlə Əsê á sóŋ nə́ ńgə́, “Ŋwu ntsəm páʼ a laŋ nə́ á mə́m mbimə́ ńtɨ́ ndə̌ŋdəŋə́ a yǐ chîə á mbîə.”

Azáŋə́ndé Əsê Ńté Ŋwu Məsɔŋə́

¹⁸ Əsê a nəələ̂ azáŋə́ndé ají á lǒo nə́ nəpó ńtsóolə á ndu ngaŋə́ghɛlə təpɔŋ ətsəm pópə pɨ pətsəm pə́ túg nə́ ńtɨ́ təpɔŋ ńdɔgə̂ áwɨ́d ńkɨ́ʼə ńgə́ kɔ pɨ pə́ jîə ndə̌ŋdəŋə́.

¹⁹ Əsê a néŋ ngə́ʼə á ndu pó lə́ ńté ńgə́ anu mbɔʼ pɨ pə́ jî ńté Əsê á ŋwaʼə̂ á əmə́g pó. Á ŋwaʼə̂ á əmə́g pó lə́ ńté ńgə́ Əsê a nə ńgɛlə̂ á ŋwaʼə̂ á əmə́g pó.

²⁰ Ə́fɛ́d páʼ pə́ nə ńtsoŋkə̂ nə́ mbî, ndzaŋ Əsê chî nə́, Əsê pə́ kə̌ nə́ zə́ənə pô, á pə́ nə́ Əsê mətɨ mí mə́ mɛdnə̂ nə́ ngǎ mɔʼə́ pó nkɔ̌ʼmbɨ yə́ ándó Əsê, ə́ ŋwaʼə̂ á əshî pɛn ńdaŋ lə́ nə́ əpú páʼ a tsoŋkə̂ nə́. Ńdaŋ ə́lɨ́d anu yitsə̌ a kě wɨ́ chî tə mbɔʼ pó sóŋ ńkwáalə atûə azɔ́b wɨ́ pô.

²¹ Pó nə́ ḿbǎtə ńjî Əsê lə́ ḿbə́ ńkě yí ghóʼkə ándó Əsê pô kɨ ńkě á ndǎ á mbô yí kə́ fɛ̂ pô. Pó pɨ ńchúʼə á pə́ mə́ túg nə́ əkəkóg əkwaŋə atû pó ndzaŋ Əsê a chî nə́, ńdaŋ ə́lɨ́d məntɨ́ mɔ́b mə́ tíʼ ńjwaʼlə̂ ńkə́ ə́sɛ́nə.

²² Pó sóŋ ńgə́ pó túgə ajíənu ḿbə́ ḿbə́ lə́ əkəkógə́.

²³ Nə́ pó á mə́ tə́ nə́ ghóʼkə á pə́ Əsê páʼ ə́ kě nə̈ kwû pô, pó tə́ ńgóʼkə á pə́ pɔ́ pə́ pəkɔ́, páʼ pə́ ghɛd nə́ pə́ fîə ŋwu páʼ ä kwû nə́, kɨ pəsə́ŋə́ kɨ məneemə kɨ mənóolə.

²⁴ Ńdaŋ ə́lɨ́d Əsê a myaʼə̂ ághɔ́b ńgə́ pó péŋə á mə́m mənu mə́ ndɔtí mbɨ əzɔb lwaʼ nə́ ə́wə́, ńtíʼə faʼə̂ mənu mə́ əsə́ənə á mə́m pó nə́ po.

²⁵ Pó kwúblə ndə̌ŋdəŋ yi Əsê á tíʼ ntsəələ, ńtíʼə ńgóʼkə ḿbəənə̂ ə́faʼə̂ á mbô ajú páʼ Əsê a tsoŋkə̂ nə́, pó pěʼ nə́ pə́ tə́ ghóʼkə ə́ kə́ tə́ faʼə̂ á pə́ á mbô Əsê páʼ á pə́ nə́ Ntsoŋkə pə́ chî nə́ á mə́ ŋáŋkə nə́ tə mbî láʼ měe! Amɛn.

²⁶ Ńté noŋkə təpɔŋ wɨ́d ghɛn, Əsê a myaʼə̂ ághɔ́b ńgə́ pó tə́ ńgɛlə̂ mənu mə́ əsɨ́ páʼ pó nə kɔŋ nə́ lə́. Pəngyě pɔ́b pó tíʼ ḿmɛdtə̂ á mə́ tə́ nə́ noŋnə̂ pópə mbyâŋnə əzɔ́b, məngyě a tíʼ ńnoŋnə̂ pə́ pó məngyě.

²⁷ Tsɔʼə nə́ ndú wɨ́d wə̂, mbyâŋnə əzɔ́b ḿmɛdtə̂ á mə́ tə́ nə́ noŋnə̂ pópə pəngyě əpɔ́b ndzaŋ á pěʼ nə́ ńchîə mə́ chî nə́, ŋwu mbyâŋnə a tíʼə ńnoŋnə̂ á pə́ pó ŋwu mbyâŋnə. Ŋwu mbyâŋnə a fɛ́d ńgɛn ńgɛd mənu mə́ əsɨ́ pó yitsə̌ ŋwu mbyâŋnə; pó kə́ ńtúgə atsáŋə azɔ́b páʼ á koʼnə̂ nə́ təpɔŋ əghoobə́.

²⁸ Ndzaŋ pɨ pə́ kǐ nə́ mə́ lɔʼkə̂ nə́ á ndə̌ŋdəŋə́ anuə a ńtɨ́ pó ńté Əsê lə́, Əsê a ḿmɛdtə̂ ághóobə́ á mə́m mənu mə́ təpɔŋ pó kwaŋ nə́ ńkə́ faʼə̂, ńdaŋ ə́lɨ́d pó faʼə̂ mənu páʼ pó pěʼ nə́ ńkě chîə á mə́ faʼ nə́ pô.

²⁹ Məntɨ́ mɔ́b mə́ lwɛ́nkə nə́ ntê təpɔŋ ntsəmə, ńdwɛ́nkə nə́ əfóʼńdé, ńdwɛ́nkə nə́ mənu mə́ təpɔŋə, ńdwɛ́nkə nə́ ŋwéetə́, ńjwítə pəənə, ḿbóʼnə məlaʼə́, ə́fɨgə̂ pəənə, ńkə́ ńkwaŋə̂ təpɔŋ ńté pəənə. Pó túgə asoŋə́.

³⁰ Ńtséebə á təpɔŋ ńté pəlim póobə́, ḿbá Əsê, ńdzɔmtə̂ pəənə, ńtəələ̂ ńkə́ ŋ́ŋáŋkə mbɨ əzoobə́. Pó kwaŋə̂ məndú mimə fîə á mə́ ghɛd nə́ təpɔŋə, pó kě á mbô pətǎ pɔ́b pó pəmǎ pɔ́b zóʼnə pô.

³¹ Pó zəŋtə̂, ḿbə́ pɨ páʼ pó kě nə́ ndaʼnə əzɔb zoŋə̂ pô, ńkě akóolə́mə́lə́ŋ túg pô, əkwaŋ ntɨ́ pɔ́b pə́ pi pə́ məna mə́ məyeŋə́.

³² Pó pǎtə ńjî ńgə́ noŋkə Əsê ä sóŋə ńgə́ pɨ páʼ pó túg nə́ ntê noŋkə zɨ́d zɨ pó chîə á mə́ kwû nə́ lə́, Ńgɛn nə́ mbiə á mə́ tə́ nə́ ghɛlə̂ tsɔʼə mənu mimə wə́, ńkə́ ḿbí ńgə́ pɨ pipə tsə́ pó tə́ ńgɛlə̂ azóobə́.