Koloshanə 4 - Əka yi Fîə

¹ Pətǎ pə́ afaʼ páʼ pó túg nə́ əpoʼ, nə́ túg əpoʼ pɨ nə́ ndú páʼ wɨ́d pə́ nə́ yi ndə̌ŋdəŋ ńkə́ ńkoʼnə̂, ńté ńgə́ nə́ kə́ ńtúg əwɨ Tǎ nəpóolə.

Məntəgə́ páʼ pə́ Chî nə́ á mə́ Zoŋ nə́

² Tə́ nə́ ńchaʼtə́sê əghâ atsəmə, ndzaŋ nə́ tə́ nə́ chaʼtə́sê lə́ nə́ tə́ ńdɔg ndɛlə́, ə́fɛ̂ ndǎ á mbô Əsê.

³ Nə́ tə́ ńchaʼtə́sê nə́ tə́ néŋə áwə́gə́ á mə́m wə́, ńjî ńgə́ Əsê a yǐ fɛ̂ ndúmə á mbô pəgə́ á mə́ náŋkə nə́ nkɨ nəlyaŋnə́ Klisto. Lə́ ghɛd nkɨ wɨ́d ghɛn maŋ chîə atsáŋ əghâ nə́.

⁴ Tə́ nə́ ńchaʼtə́sê nə́ maŋ ńjî ńgə́ maŋ yǐ ńtsáb nə́ ndú páʼ maŋ chî nə́ á mə́ tsáb nə́ əwɨ́, nə́ ndú páʼ wɨ́d yǐ nə́ ŋwaʼ mbɔʼ ŋwu ntsəmə a zóʼə.

⁵ Chî nə́ nə́ ayáŋ nə́ ndú pɨ faʼ nə́ mənu wɨ́ pɨ̌pə pɨ pó kě nə́ Əsê jî pô, zɨ́ nə́ ńgə́ nə́ faʼə̂ anu yə əshîʼnə nə́ mɔ́ akəmə ndɛd ntsəm pɨ túg nə́.

⁶ Atséebə azə́ənə́ á túgə alɨ́ yə əshîʼnə ńkə́ ńchî nə́ ndú páʼ mbɔʼ ŋwu ntsəmə a kɔŋə̂ á mə́ jwə́ʼtə nə́, nə́ kə́ ńjî ndú páʼ təmbɔʼ nə́ fɛ̂ ndə̌ŋdəŋə́ akwe nə́ əpítə ətsáb ətsəmə á mbô ŋwu ntsəm a pítə nə́ áwɨ́ ə́wə́.

Ndwegtə Achaʼtə

⁷ Taakikusə a yǐ fiʼtə̂ áwɨ́ nə́ anuə atsəm ńté mə; lə́ ndim əwɛ̂n páʼ pɛn pyádnə nə́ ńkɔŋə̂ yə́, a kə́ ə́faʼə̂ á mbô Mmaʼmbî nə́ ntɨ́ yi ətsəmə;

⁸ Maŋ túmə yə́ á mbô pɨ lə́ ńté lə́ tsɔʼə anu zɨ́d zəənə́, ńjî ńgə́ nə́ tíʼ ńjî ndzaŋ pəg chî nə́, ńjî ńgə́ a laŋ ə́lɨ́d ńnéŋ məntɨ́ mə́ənə́;

⁹ Onisimusə a yǐ ghɛn pó yə́, lə́ ndim əwɛ̂n páʼ pɛn kɔŋ nə́ yə́ a chî nə́ á mə́m nkyeetə zɨ ńkə́ ə́faʼə̂ á mbô Yeso nə́ ntɨ́ yí ətsəm lə́. Pó yǐ tíʼ fiʼtə̂ áwɨ́ nə́ anuə atsəm páʼ á laŋ nə́ ə́fênə̌.

¹⁰ Alistakusə páʼ a chî nə́ atsáŋ pəg yí, a tə́ ńchaʼtə̂ áwə́ənə́, ńdzoŋ ḿbéenə Magə, páʼ a pə́ nə́ ndim Banabasə. (Pə́ pɛ́dtə ńtə́gtə áwɨ́ ńté Magə, əghâ páʼə a yǐ nə́, pɨ kwáalə yí əshîʼnə)

¹¹ Joshwa páʼ pə́ kə́ fóŋ nə́ yí nə́ Justusə lə́, a ghə́ pə́ chaʼtə̂ áwə́ənə́, pɨ pɨ pɛ́n teelə́ lə́ ndaʼ Pəjus páʼ pó néŋ nə́ ntɨ́ əghɔ́b nə́ Yeso, lə́ faʼə̂ pə̌gpo ńté Anuə Nəfoonə Əsê, pó pyádnə ńchígə́ ńkwáalə mə.

¹² Ɛpaflusə a tə́ ńchaʼtə̂ áwə́ənə́, yí páʼ a pə́ nə́ táʼ ŋwunə á mə́m nkyeetə əzəənə́ ńkə́ ḿbə́ ngaŋəfaʼ Yeso Klisto. A zá ḿbyádnə ńchaʼtə́sê əghâ ətsəm ńté áwə́ənə́, ḿbítə Əsê ńgə́ a ghɛd nə́ tɨ́ ńtyantə̂, ándó pɨ pə́ kwíŋ nə́ ńkə́ ńchígə́ ńdzoŋ ndzəm Klisto ńkə́ ńdánə ńdzóʼnə anu páʼ Əsê a lɔ nə́.

¹³ Maŋ zɨ́ ńkə́ ḿbí ńgə́ lə́ ndə̌ŋdəŋ ńgə́ a faʼə̂ atyǎntə afaʼə á mbô pɨ, ḿbá pɨ pə́ Lawodesya pó pipə́ Ilypolisə.

¹⁴ Lukasə páʼ a pə́ nə́ ntsóʼ əwəg pəg kɔŋ nə́ pó Dɛmasə, pó ghə́ pə́ chaʼtə̂ áwə́ənə́.

¹⁵ Fɛ̂ nə́ achaʼtə mə á mbô pəlim pɛn pə́ chî nə́ Lawodesya ńkə́ ńtú ńchaʼtə̂ Nimfa pópə nkyeetə pɔ́ pə́ Əsê á ndɛ̂ yə́.

¹⁶ Əghâ ándó pɨ fóŋ nə́ aŋwaʼlə zəənə́ á ndzɔʼ pɨ, nə́ kə́ fóŋə zə́ələ́ á mə́m nkyeetə pɔ́ pə́ Əsê á Lawodesya. Tsɔʼə əghâ yi wɨ́ nə́ yǐ pɨ kə́ fóŋə aŋwaʼlə páʼ nkyeetə Lawodesya ə́ yǐ nə́ ə́ túmə á mbô pəənə́.

¹⁷ Sóŋ nə́ á mbô Akipusə ńgə́, “A jî ńgə́ a chîə á mə́ məg nə́ afaʼ pə́ nə fɛ̂ nə́ á mbô yí ńgə́ a tə́ faʼə̂ ńté Mmaʼmbî lə́.”

¹⁸ Achaʼtə zɨ lə́ ŋwaʼlə̂ maŋ Pɔl nə́ apô mə, kɔ nə́ ləgnə̂ ńgə́ maŋ chîə á mə́m məŋkɛd mə́ atəənə́! Əsê a nəələ̂ áwɨ́ nə́ apɔŋə́ntə́əmə ajíə.