Koloshanə 3 - Əka yi Fîə

¹ Ndzaŋə ándó pə́ kə júmkə nə́ áwə́ənə́ á nəwû pɨ̌pə Klisto lə́, tíʼ nə́ ńtə́gə atûə azə́ənə́ pə́ mənu mə́ chî nə́ á nəpóolə, aliʼə́ ándó Klisto a chî nə́ ə́wə́, á əlá apô Əsê yə təənə.

² Tə́g nə́ atûə azə́ənə́ á pə́ nə́ mənu mə́ chî nə́ aliʼ yəwə́, kɔ nə́ tə́gə atûə azə́ənə́ pə́ nə́ mənu mə́ chî nə́ á ndu mbî ghɛnə́.

³ Ńté ńgə́ nə́ kwû pə́ lyáŋ nchîmbî əzəənə́ á mbô Klisto á mə́m Əsê.

⁴ Chigə nchîmbî əzɨ lə́ Klisto, ndɛlə́ ándó a yǐ nə yǐ, nə́ yǒ kə́ yǐ pɨ po ə́nɔd ńchîə á mə́m nəgháʼ əyǐə!

Nchîmbî yi Ndɛn pó Nchîmbî yi Fîə

⁵ Nə́ yǐ shib jwítə mənu mə́ mbî páʼ na mbɨ lɔ nə́ á mə́ ghɛd nə́, mənuə ándó ndzɔʼə́ tə apímnə, ndɔtíə, mə lum nə́ á mə́ ghɛd nə́ təpɔŋə, pópə mə lɔ nə́ ajú páʼə á kě nə́ pə́ azô pô (zəənə́ chî lə́ ándó mbô Əsê məfɨgə yitsə̌).

⁶ Əsê yǒ záŋ ndě nə́ pɨ páʼ pó kě nə́ yí zóʼnə pô, ńté ńgə́ po tə́ ńdzoŋ ndɛn mənu ghɛnə́.

⁷ Ndɛd yitsə̌ kə chî ə́wɨ́ páʼ pɨ kə chî nə́ á mbî ńkə́ ńdzoŋ ndɛn mənu ghɛnə́, mɨ́d mə́ túgə áwə́ənə́.

⁸ Nə́ əghâ nə́ pɨ yǐ shib myaʼ ndɛn mənu ghɛn ətsəmə, mənuə ándó azáŋə́ndé, mə záŋ nə́ ndě paŋ tə ə́sɛ́nə, ḿbɨ ḿbə́ nə́ ntɨ́ təpɔŋə, mə tsəŋ nə́ əlɛ́n ŋwunə. Kɔ ndzɔmnə yitsə̌, kəənə atsáb yə féŋ nə́ yitsə̌ á láʼ ə́fɛ́lə á ntso pəənə́.

⁹ Kɔ nə́ tsɨd ntsəələ á tətɨ pɨ ńté ńgə́ nə́ pěʼ ḿbɛ́d tə ntsɔ́ʼə ndɛn mbɨ əwɨ pópə mənu mí ḿmyaʼə̂,

¹⁰ ńtíʼ ńgwê mbɨ yi fîə. Lə́, mbɨ yi fî zɨ páʼ əsê páʼə tsoŋkə̂ nə́ zɨ́d lə́, á ghɛn nə́ mbiə á mə́ kwúblə nə́ zɨ́d ə́ chîə ándó yə́, ńjî ńgə́ mbɔʼ pɨ ghɛn nə́ mbiə mə́ pyádnə nə́ chígə́ jîə yə́.

¹¹ Ándó páʼ a pə́ nə́ ə́lɨ́d lə́, kwúblə yitsə̌ á kě əwɨ́ chîə á tətɨ Pətəjǐsê pó Pəjus pô, pɨ pə́ póʼ nə́ ághɔ́b pópə pí pə́ kě nə́ ághɔ́b póʼ pô, Əfɛ́ləné, ətúmə́yéŋə́, əpoʼə kɨ pɨ páʼ pó kě nə́ apoʼ pô. Lə́, Klisto lə́ ajúmə atsəmə, Klisto a chîə á mə́mə ajúmə atsəmə.

¹² Pɨ lə́ pɨ pə́ Əsê, a kɔŋə̂ áwɨ́ ńkə́ ńtsɔ́ʼə áwɨ́ ńgə́ pɨ lə́ pəpíə. Lə́ á pə́ ńgə́ nə́ yǐ shib wê akóolə́mə́lə́ŋə, ə́wê ntɨ́ yi ŋwaʼ nə́, ə́wê atsóokə́mbəəmə, ə́faʼə̂ mənu ndǎ ndǎ ə́ pɨ wê asəgə́ndzɔʼə.

¹³ Pɛn túgə awaamə́ntɨ́ nə́ pɨ pə́ ndaʼə, ḿbɨ́ ńkə̈ ńdəgnə̂ əfankə pɨ əghâ ándó pô wǔ nə́ anuə á mbô pɛnə̂, nə́ chîə á mə́ ləgnə̂ nə́ əfankə ŋwu ntsəm tsɔʼə ndzaŋə ándó Əsê a ləgnə̂ nə́ pəpɨ́ lə́.

¹⁴ Á mə́m mənu mɨ mətsəm nə́ chîə á mə́ wê nə́ akɔŋnə páʼ á tsɛntə̂ nə́ ajúmə atsəmə a tíʼ ḿbə́ táʼə

¹⁵ Mbwɔ́dnə páʼ Klisto ä fɛ̂ nə́, lə́ zɨ́d páʼ ə́ chî á mə́ ghɛd nə́ nə́ chî əshîʼnə, lə́ á mə́m mbwɔ́dnə əzɨ páʼ Əsê a fóŋ nə́ áwɛ̂n ńkyeetə̂ pɛn tíʼ táʼ na mbəəmə. Tə́ nə́ fɛ̂ ndǎ á mbô Əsê.

¹⁶ Atséebə Klisto nə́ afoʼə yə́ atsəm yǐ shib lwɛ́nkə á mə́m məntɨ́ pəənə́. Zə́ʼkə nə́ ńkə́ ńtə́gtə a ŋwu ntsəm nə́ ayáŋə atsəmə. Zɔb nə́ pəsamsə, ḿbɨ́ ńkə́ ńdzɔb mənkǐ mə́ ńgóʼkə, ḿbɨ́ ńdzɔb mənkǐ mə́ ajwi ə́fɛ̂ ndǎ wə́ á mbô Əsê á mə́m məntɨ́ pəənə́.

¹⁷ Anuə atsəm páʼ gho faʼ nə́ kɨ ə́sóŋə, faʼə̂ zə́ələ́ atsəm nə́ əlɛ́n Mmaʼmbî Yeso, ə́fɛ̂ á ndǎ á mbô Əsê páʼ pə́ nə́ Tǎ ńdaŋə̂ á mbô yí Mmaʼmbîə.

Ndzaŋ Pɛn Chî nə́ á mə́ Chî nə́ á Mə́m Nchîmbî yi Fîə

¹⁸ Pəngyě pə́ ndɛ̂, tsóokə nə́ mbɨ zəənə́ á mbi pəlú pəənə́, ńté ńgə́ lə́ anuə á koʼnə̂ nə́ á mbô ŋwunə á chî nə́ á mə́m Mmaʼmbîə.

¹⁹ Pəlú, kɔŋ nə́ pəngyě pə́ənə́, kɔ nə́ tə́ ńtsə́gə ághóobə́.

²⁰ Pɔ́, zóʼnə nə́ pətǎ pɨ pópə pəmǎ pɨ nə́ anuə atsəmə, ńté ńgə́ lɛ̌ anuə ä ghɛd nə́ Mmaʼmbî a kɔŋtə̂.

²¹ Pətǎ, kɔ nə́ tə́ ńjwaʼə̂ pɔ́ pə́ənə́, zə́ələ́ á yǐ ghɛd mbɨ əzɔb ə́ tə ḿbə́gə.

²² Əpoʼ, zóʼnə nə́ pətǎ pə́ faʼ pɨ́ pipə́ ndu mbî nə́ ndú ətsəmə, ńkě faʼə̂ á pə́ əghâ páʼ á chî nə́ aliʼ yi ə́wə́ ándó pɨ pətsə́ pə́ ghɛd nə́ lə́ pô, ə́faʼə̂ á pə́ nə́ ntɨ́ əwɨ́ ətsəm ḿbɔ́gə pə́ Mmaʼmbîə.

²³ Kəənə afaʼə azô á pə́ mbô zə́ənə́, faʼ nə́ ntɨ́ əghô ətsəmə ándó gho faʼə̂ á pə́ á mbô Mmaʼmbîə, ńkě á pə́ á mbô ŋwu mbî faʼə̂ pô,

²⁴ ńtə́ faʼə̂ ńtə́ ńjîə ńgə́ Mmaʼmbîə a yǒ tsɔʼə afaʼə azô nə́ apeʼ páʼ a lɔʼkə̂ nə́ á mbô pɨ píə. Ńté ńgə́ Yeso lə́ chigə Tǎ faʼ páʼ gho faʼ nə́ á mbô yə́.

²⁵ Ngaŋə́ghɛlə təpɔŋ yǒ kwá ntsɔ́ʼəfaʼ əzɔb nə́ təpɔŋ pö ghɛd nə́, ńté ńgə́ Əsê a tsɔ́ʼtə əsáʼ ŋwu ntsəm lə́ ndə̌ŋdəŋə́.