Jɔnə 17 - Əka yi Fîə

Ndzaŋə Ándó Yeso a nə Ńchaʼtə̂ nə́ Əsê á Atû Ngaŋə́zoŋə́ndzəm Əjíə

¹ Əghâ ándó Yeso a nə məgtə̂ nə́ á mə́ tsáb nə́ ndɛn mənu ghɛn lə́, ḿbɨgə̂ atûə ají ńnáŋ nəpó ə́sóŋ ńgə́, “Tǎ, ndɛd zə̂ əyǐə, fɛ̂ nəgháʼə á mbô Mɔ́ əgho, ńjî ńgə́ mbɔʼ Móonə a kə́ ə́fɛ̂ nəgháʼə á mbô gho.

² Gho nə fɛ̂ mətəənə á mbô yə́ á ndu ŋwu ntsəm ńjî ńgə́ a fɛ̂ nchîntɨ páʼ ə́ mɛdnə̂ nə́ ngǎ mɔʼə́ á mbô ŋwu ntsəm páʼ gho nə fɛ̂ nə́ á mbô yə́.

³ Lɛ̌ nchîntɨ páʼ ḿmɛdnə̂ ngǎ mɔʼə́ ńgə́, pɨ pə́ jî ńgə́ gho lə́ ndaʼ ndə̌ŋdəŋ Əsê, ńkə́ ńjîə Yeso Klisto páʼ gho nə ńtú nə́.

⁴ Maŋ nə nəələ̂ a nəgháʼ əgho á ndu ndəsê; Maŋ nə ńkə́ məgtə̂ afaʼə azô páʼ gho nə́ ńtú nə́ mə ńgə́ maŋ yǐ faʼə̂.

⁵ Tǎ, fɛ̂ nəgháʼə á mbô maŋə á mbi gho əghâ nə́, tsɔʼə nəgháʼ maŋ nə ńchî nə́ nə́ wɨ́d záʼ pə́ pɔŋə̂ tsoŋkə̂ mbî lə́.”

⁶ Maŋ nə ńgɛd ŋwu ntsəm páʼ gho nə́ fɛ̂ nə́ yə́ á mbô maŋ á mə́m mbî nə́ a jîə gho. Pó nə ḿbə́ lə́ pɨ pó, lə́ fɛ̂ gho fɛ̂ ághóobə́ á mbô maŋə. Pó nə ńdzóʼnə atséebə azô,

⁷ lə́ nə́ pə́ əghâ nə́ pó jî ńgə́ ajúmə atsəm páʼ gho nə fɛ̂ nə́ á mbô maŋ á lǒ lə́ á mbô gho.

⁸ Maŋ nə náŋkə nkɨ yi ə́wə́ á mbô pó páʼ gho nə ńtú nə́ mə nə́ wɨ́d lə́, pó kə́ ńdzóʼə áwə́ələ́. Pó jî ńgə́ lə́ ndə̌ŋdəŋ ńgə́ maŋ lǒo lə́ á mbô gho, ńkə́ ḿbí ńgə́ lə́ tú gho ńtúmə mə.

⁹ Maŋ tə́ ńchaʼtə́sê atû pó, maŋ kě əsê lə́ atû mbî chaʼtə̂ pô, maŋ chaʼtə́sê lə́ atû pɨ páʼ gho fɛ̂ nə́ nə́ maŋə, ńté ńgə́ pó lə́ pɨ pô.

¹⁰ Ajúmə atsəm páʼ maŋ túg nə́ lə́ azô, ajúmə atsəm páʼ gho kə́ nə́ ńtúg lə́ azéemə; Pó yǒ zə́ənə nəgháʼə mə laŋ lə́ á ndzəm pɨ pəənə́.

¹¹ Lə́ nə́ pə́ əghâ nə́, maŋ tə́ ńgyǐəə á mbô gho, maŋ kě á mə́m mbî pɛ́d pô, lə́ pó pə́ ḿbɛ́lə á mə́m mbîə. Tǎ mə páʼ gho ŋwaʼ nə́, pyáabə ághɔ́b nə́ mətɨ páʼ mə́ chî nə́ nə́ əlɛ́n əghô, əlɛ́n ə́wə́ páʼ gho nə fɛ̂ nə́ nə́ maŋ lə́; ńjî ńgə́ pó pə́ táʼ tsɔʼə ndzaŋ páʼ pɔ̌ pə́ nə́ táʼ lə́.

¹² Əghâ ándó maŋ nə ńchî nə́ pə̌gpo lə́, maŋ nə ḿbyáabə ághɔ́b əshîʼnə nə́ mətɨ mə́ əlɛ́n gho, əlɛ́n ə́wə́ páʼ gho nə fɛ̂ nə́ á mbô maŋ lə́. Maŋ nə ḿbyáabə ághóobə́, tə táʼ ŋwu əghɔb yitsə̌ a kě péŋ pô, tə ńdéʼtə yí páʼ a nə́ ńchî nə́ á mə́ péŋ nə́, á mə́ ghɛd nə́ ńgə́ anu páʼ a nə ńchî nə́ á mə́mə aŋwaʼlə Əsê lə́ á lɔgə̂ aliʼə́.

¹³ Nə́ əghâ nə́ maŋ tə́ ńgyǐəə á mbô gho, mäŋ sóŋə mənu məənə́ á mə́m mbî lə́ ńjî ńgə́ mbɔʼ pó túgə akɔŋtə mə á lwɛ́nkə məntɨ́ móobə́.

¹⁴ Maŋ nə fɛ̂ nkɨ əghô á mbô pó, lə́ mbî tíʼ ḿbeenə̂ ághɔ́b ńté ńgə́ pó kě lə́ pɨ pə́ mbî pɨ pô, tsɔʼə ndzaŋ páʼ maŋ kě nə́ kə́ ḿbə́ ŋwu mbî ghɛn pô lə́.

¹⁵ Maŋ kě sóŋ lə́ ńgə́ gho fógə ághóobə́ á mə́m mbî pô, maŋ sóŋ lə́ ńgə́ gho pyáabə ághóobə́ á mə́m mbô mə́ Ŋwu Təpɔŋ Wə́.

¹⁶ Ndzaŋə ándó maŋ kě nə́ pə́ ŋwu mbî nə́ lə́, pó kě kə́ ḿbə́ lə́ pɨ pə́ mbî pɨ pô.

¹⁷ Tsɔ́ʼə ághɔ́b pópə pɨ pô pipə́ ŋwaʼ nə́ ńdaŋə̂ ndzəm ndə̌ŋdəŋ, ńté ńgə́ atséebə azô lə́ ndə̌ŋdəŋə́.

¹⁸ Maŋ nə ńtúmə ághóobə́ á mə́m mbî lə́ tsɔʼə ndzaŋ páʼ gho nə ńkə́ nə́ ńtúmə a mə á mə́m mbî lə́.

¹⁹ Ńté atû azɔ́b maŋ fɛ̂ mbəəmə mə á mbô gho ńjî ńgə́ təmbɔʼ pó kə́ fɛ̂ əzoobə́ á mbô gho ndə̌ŋdəŋə́.

²⁰ “Maŋ kě Əsê lə́ tsɔʼə á mbô pó chaʼtə̂ pô, maŋ kə́ ńchaʼtə́sê á mbô pɨ páʼ pó néŋ nə́ ntɨ́ nə́ maŋ ńdaŋ nə́ atséebə azóobə́.

²¹ Maŋ chaʼtə́sê ńgə́ mbɔʼ pó pətsəm yǐ ḿbə́ táʼə. Tǎ! Ghɛd pó chîə á mə́m pɔ̌, tsɔʼə ndzaŋ páʼ gho chî nə́ á mə́m maŋə, maŋ kə́ ńchîə á mə́m gho lə́. Ghɛd pó pə́ táʼ ŋwu, ńjî ńgə́ mbî pí ńgə́ lə́ nə ńtú gho ńtúmə mə.

²² Maŋ nə fɛ̂ á nəgháʼə á mbô pó lə́ tsɔʼə yi páʼ gho nə fɛ̂ nə́ á mbô maŋ lə́, ńjî ńgə́ mbɔʼ pó pə́ táʼ ŋwu tsɔʼə ndzaŋ pɔ̌ pə́ nə́ táʼ ŋwu lə́.

²³ Maŋə á mə́m pó, gho á mə́m maŋə, ńjî ńgə́ təmbɔʼ pó kwéʼnə ḿbə́ táʼ ŋwunə, ńjî ńgə́ mbî yǐ ńjî ńgə́ lə́ tú gho ńtúmə mə, ńkə́ ńkɔŋə̂ ághɔ́b tsɔʼə ndzaŋ páʼ gho kɔŋ nə́ mə lə́.

²⁴ Tǎ! Gho fɛ̂ ághóobə́ á mbô maŋə, maŋ kə́ ńdoonə̂ ńgə́ pó chîə aliʼ páʼ maŋ chî nə́ ə́wə́, ńjî ńgə́ mbɔʼ pó zə́ənə á nəgháʼə mə, nəgháʼ páʼ gho nə fɛ̂ nə́ nə́ maŋ ńté ńgə́ gho nə ńkɔŋə̂ mə záʼ ḿbɔŋə̂ tsoŋkə̂ mbîə

²⁵ Tǎ mə páʼ a tɨ́ nə́ ndə̌ŋdəŋə́! Mbî kě a gho jî pô, lə́ maŋ pə́ ńjîə gho, lə́ pó pə́ ńjî ńgə́ lə́ tú gho ńtúmə mə.

²⁶ Maŋ nə ńgɛd pó jî əlɛ́n əghô, lə́ maŋ yǐ ghɛn nə́ mbi á mə́ ghɛd nə́ pó jîə gho ńjî ńgə́ akɔŋnə páʼ gho túg nə́ ńté mə, á kə́ ńchî nə́ pó, ńjî ńgə́ maŋ kə́ ńchî nə́ pó.”