Jɛmsə 5 - Əka yi Fîə

Akwantə á Mbô Pəfoʼə

¹ Nə́ pə́ əghâ nə́, pɨ pəfoʼ, jwéʼtə nə́ anu maŋ sóŋ nə́, tə́ nə́ ńkyéŋə ńtûə ḿbóʼ ngoŋ nə́ məngə́ʼ mə́ yǐ nə́ yǐəə á mbô pəənə́;

² Afoʼə azə́ənə́ á lə̂ yə́, əsəʼ pɨ ńjî ətsəʼ pə́ənə́.

³ Ate á kɔ́d nkáb əzəənə́, ate á tə́əmə á mə́ nɨd nə́ ndɛn mənu mətsəm pɨ ghɛd nə́, zə́ələ́ á yǒ kɔ́d na mbɨ əzəənə́ ándó mógə́. Pɨ chwíʼtə apeʼə azɨ́ ńdɔg ńtə́ ḿbyáb ndwigtə əlě mbî pəənə́.

⁴ Nə́ kě mənkáb mə́ pɨ pó faʼ nə́ á mə́m əfɔ pɨ tû pô. Jwéʼtə nə́ anu pó sóŋ nə́, nəkyéŋ pɨ páʼ pó foʼ nə́ məjî mɨ́, á kwúnə á nətôglə Əsê páʼ á pə́ nə́ Mmaʼmbî ńtsɛɛlə̂ ajúmə atsəm lə́.

⁵ Nchîmbî əzəənə́ á ndu mbî ə́ lwɛ́nkə nə́ əpú məshu pópə mə zóʼ nə́ əshîʼnə; Nə́ ghɛd mbɨ əzɨ ə́ fáŋ ńkoʼ ńtíʼə ḿbyáabə alě pə́ yǒ nə́ ə́sə́ələ áwə́ənə́.

⁶ Nə́ sáʼ məsáʼ mə́ pɨ páʼ pó kě nə́ anu yətsə́ jî, ńgɛd pó wǔ əsáʼ nə́ jwítə ághóobə́, pó kě anu yətsə́ nə́ pɨ kə́ ńgɛd pô.

Nə́ Túgə Asəgə́ndzɔʼə

⁷ Pəlimə́ mə, túg nə́ asəgə́ndzɔʼ tə ńkoʼ əghâ Mmaʼmbîə a ghɛd nə́ ńgyǐəə. Zɨ́ nə́ ndzaŋ ngaŋə́líʼə́líʼ ə́ túg nə́ asəgə́ndzɔʼ ḿbyáabə ńgə́ mbəŋ ə́ lôo á ndəsê ə́fɛ̂ məjî mimə əshîʼnə, ndíʼ məjîə a kə́ ńtúgə asəgə́ndzɔ̈ʼ ḿbyáabə alu pó məgheemə́.

⁸ Nə́ kə́ ńchîə á mə́ túg nə́ asəgə́ndzɔʼ ə́ kə́ tɨ́ tyantə̂ ńté ńgə́ əlě mbî páʼ Mmaʼmbîə a yǐ nə́ yǐ ə́ páatə.

⁹ Pəlimə́ mə, kɔ nə́ fɛ̂ fid ńté pəlim pəənə́, ńjî ńgə́ Əsê a yǒ ńkě məsáʼ mɨ́ tsɔ́ʼtə pô. Əsáʼməsáʼə a tə́əmə á ntsǒndɛ̂ ńtə́ ńdoonə̂ á mə́ kwú nə́ á ndɛ̂.

¹⁰ Pəlimə́ mə, kwúmtə nə́ məntú mə́ Əsê pó nə́ ńtsáb nə́ ńté əlɛ́n Mmaʼmbîə. Lɔg nə́ ághóobə́ ándó afiʼkə pɨ pó túg nə́ awaamə́ntɨ́ pópə asəgə́ndzɔʼ əghâ pó chî nə́ á mə́m ngə́ʼə.

¹¹ Pɛn fóŋə ághɔ́b nə́ pɨ pó kɔŋtə̂ nə́ lə́ ńté ńgə́ pó túgə asəgə́ndzɔʼə. Pɨ nə ńdzóʼ ndzaŋ Jobə a túg nə́ asəgə́ndzɔʼə, ḿbɨ ńkə́ ńdzóʼ ndzaŋ Əsê a nə fɛ̂ nə́ apeʼ nə́ yə́ á ndwigtə. Ńté ńgə́ Mmaʼmbî a lwɛ́nkə nə́ akóolə́mə́lə́ŋ pó apɔŋə́ntə́əmə.

¹² Pəlimə́ mə, mɛ́ anu páʼ á chî nə́ ə́wɨ́ lə́ ńgə́, kɔ nə́ wad əka əghâ nə́ tə́ nə́ ńgɛd ndaʼnə. Kɔ zɔ nə́ əlɛ́n nəpó kɨ nə́ yi ndu mbî kɨ nə́ əlɛ́nə ajûtsə́. Ghɛd “Ə̂” əgho á pə́ ə̂, “Ngá” əgho á kə́ ḿbə́ ngá, ńjî ńgə́ kɔ Əsê a yǐ ńtsɔ́ʼtə əsáʼ əgho, gho wǔəə.

¹³ Ŋwu tsə̌ a ndzɔʼ pəənə́ a chîə á mə́m ngə́ʼ? A chaʼtə́sê. Ŋwu tsə̌ a tə́ nkɔŋtə̂? A tə́ ńdzoobə̂ mənkǐ ŋ́ŋáŋkə Əsê.

¹⁴ Ŋwu tsə̌ a chî ə́wɨ́ páʼ a tə́ nə́ ńgoonə̂? A chîə á mə́ fóŋ nə́ mətû mə́ nkyeetə pɔ́ pə́ Əsê páʼ pó yǐ nə́ chaʼtə́sê nə́ pó ə́ tíʼ zɔ́ʼə ághɔ́b nə́ məghɔ́d nə́ əlɛ́n Mmaʼmbîə.

¹⁵ Achaʼtə́sê pə́ chaʼtə̂ nə́, nə́ mbimə́ a yǐ tsóʼə a ngɔ yí wə́, Mmaʼmbî a pɨ ńgɛd ngɔ yi wə́ a lǒo; pə́ ləgnə̂ pətəpɔŋ pí páʼ a nə ńgɛd nə́.

¹⁶ Lə́ á pə́ ńgə́ fiʼtə̂ pətəpɔŋ pó á mbô táʼ táʼ ŋwunə ńkə́ ńchaʼtə́sê á mbô ŋwu ntsəmə, ńjî ńgə́ pɨ yǐ féŋtə; Lə́ á pə́ achaʼtə́sê ŋwu páʼ a tɨ́ nə́ ndə̌ŋdəŋə́ a túg mətɨ ńkə́ ńtə́ ḿbyádnə ə́faʼə̂.

¹⁷ Elayija a nə ḿbə́ tsɔʼə ŋwunə ándó pɛnə̂. A nə ńchaʼtə́sê nə́ ntɨ́ əyí ətsəm ńgə́ kɔ mbəŋ lô, mbəŋ kě kə́ ńdô á mə́m aláʼ nə́ ngoʼ teelə́ nə́ asánə pô.

¹⁸ A kə́ ḿbɨ ńchaʼtə́sê nəpó nə́ tsóokə mbəŋ ndəsê tíʼ ńgɛd məjî mə́ kɔ́ʼə.

¹⁹ Pəlimə́ mə, təmbɔʼ táʼ ŋwunə á mə́m pəənə́ a fɛ́lə yə́ á mə́m ndə̌ŋdəŋ, ŋwu tsə̌ a pɨ ḿbɨnkə̂ yə́ á mə́m wɨ́!

²⁰ á kwúmtə ńgə́ ŋwu ntsəm páʼ a pɨ nə́ ḿbɨnkə̂ a ngɛdtəpɔŋə á mə́m ndə̌ŋdəŋ a chwádkə ajwiə ajíə a mə́m nəwûə, ńkə́ ńgɛd pə́ ləgnə̂ pətəpɔŋ pipə nɨ́ nə́.