Jɛmsə 2 - Əka yi Fîə

Akwantə Ńté mə Kɔŋ nə́ Ŋwu ə́ Peenə̂ Yitsə̌

¹ Pəlimə́ mə, ándó pɨ pó túg nə́ mbimə́ á mə́m Mmaʼmbî əwɛ̂n Yeso Klisto, yi páʼ a túg nə́ nəgháʼ lə́, kɔ pɛn tə́ náŋə pɨ tsɔʼə á əshî ńkɔŋə̂ pətsɨ́ ḿbeenə̂ pətsə́.

² Təmbɔʼ ngaŋnkáb páʼ a wê nə́ əféŋ pə́ tsoŋkə̂ nə́ nə́ gôl pópə ətsəʼ pi əshîʼnə a yǐəə á mə́m nkyeetə pɨ, əfə́m páʼ a wê nə́ əpí ətsəʼ ə́ kě pɔŋ pô a kə́ ńgyǐəə ají,

³ pɨ tíʼ ńgóʼkə a ŋwu páʼ a wê nə́ ətsəʼ pipə əshîʼnə lə́, ə́sóŋ nə́ yí ńgə́ “náanə nə́ aləŋ yə əshîʼnə zəənə́ aliʼə́ nə” ə́sóŋə á mbô mbóŋ wə̂ ńgə́, “Tə́əmə aliʼ wə̂, kɨ yǐ ńnáanə á nəpɛnə́ məko maŋə á ndəsê,”

⁴ pɨ pɛ́dtə ńnəələ̂ á tətɨ pɨ ńgə́ ŋwu tsə̌ a tsɛɛlə̂ yitsə̌, ńtíʼ ńchúʼə á mə́ tsɔ́ʼtə nə́ əsáʼ pɨ nə́ akwaŋə təpɔŋ páʼ nə́ túg nə́.

⁵ Pəlimə́ maŋ kɔŋ nə́, jwə́ʼtə nə́! Əsê a nə ńtsɔ́ʼ lə́ pəənə ándó pó póŋ nə́ á mə́m mbî ghɛn ńjî ńgə́ pó pə́ pəfoʼə á mə́m mbimə́ ńtíʼ ńtúgə aliʼə́ á mə́mə anuə nəfoonə ají páʼ a nə ńdaʼnə̂ nə́ pɨ pó kɔŋ nə́ yə́.

⁶ Lə́ pɨ pə́ ńgwág pəpóŋə; Lə́ kě pəfoʼ pó néŋ nə́ ngə́ʼə á mbɨ pɨ pô, lə́ kě pó páʼ pö lɔg nə́ áwɨ́ ńgɛnə̂ nə́ əliʼə́ asáʼə́məsáʼ pô?

⁷ Lə́ kě pó pəfoʼ páʼ pó zɔmtə̂ nə́ əlɛ́n ngóʼkə ə́wə́ páʼ pə́ nə́ fɛ̂ nə́ á mbô pɨ lə́ pô.

⁸ Nə́ yǐ ghɛd lə́ chigə anu yə əshîʼnə páʼ təmbɔʼ pɨ tə́ ńdzóʼnə noŋkə anuə nəfɔ páʼ a fɛ́d nə́ á mə́mə atséebə Əsê ńgə́, “Kɔŋə̂ ngaŋnəpad əgho ándó mbɨ əzo.”

⁹ Lə́ təmbɔʼ pɨ tə́ ńnáŋə pɨ tsɔʼə əshî ńkɔŋə̂ pətsɨ́ ḿbeenə̂ pətsɨ́, nə́ jî ńgə́ nə́ ghɛlə̂ lə́ təpɔŋ, noŋkə á kə́ ńgwaamə̂ áwə́ənə́ ándó pɨ páʼ pó fankə̂ nə́ noŋkə.

¹⁰ Ŋwu ntsəm páʼ a fankə̂ nə́ táʼ noŋkə, a jî ńgə́ a fankə̂ pɨ́d pətsəmə.

¹¹ Ńté ńgə́ ŋwu páʼ a sóŋ nə́ ńgə́, “Kɔ jîə mə̂ghabə” a nə ńkə́ ə́sóŋ ńgə́, “Kɔ jwítə” lə́ təmbɔʼ gho chîə mə̂ghabə jî pô ḿbə́ ńjwítə ŋwu, jî ńgə́ gho fankə̂ noŋkə.

¹² Nə́ tə́ ńtséebə ńkə́ ńtə́ faʼə̂ mənuə ándó pɨ pə́ yǒ nə́ tsɔ́ʼtə əsáʼ əghɔ́b ə́zoŋə̂ noŋkə páʼ á fóg nə́ áwɛ̂nə atsáŋ lə́.

¹³ Ńté ńgə́ Əsê yǒ kě túgə akóolə́mə́lə́ŋ əghâ páʼ a tə́ nə́ ńtsɔ́ʼtə əsáʼ ŋwu a kě nə́ akóolə́mə́lə́ŋ á ndu pətsə́ pɨ túg pô; lə́ akóolə́mə́lə́ŋə a pə́ ńtsɛ ńtsɔ́ʼtə əsáʼə.

Mbimə́ pópə Məfaʼə

¹⁴ Pəlimə́ mə, chigə ape a chî nə́ á mə́m wɨ́ lə́ akə̂ mbɔʼ ŋwunə a sóŋ ńgə́, “Maŋ túg mbimə́” páʼ təmbɔʼ a chîə zɨ́d nəələ̂ á mə́m məfaʼ míə? Təmbɔʼ mbimə́ zɨ́d zə́ ə́ chwádkə yə́?

¹⁵ Təmbɔʼ ndim əwɛ̂n yi məngyě kɨ yi mbyâŋnə a póŋə atsəʼə́ á mə́ wê nə́ kɨ məjîə á mə́ jî nə́,

¹⁶ zəənə́ yǐ kwáalə ághɔ́b lə́ ə́lɛ́ mbɔʼ gho sóŋ ńgə́, “ghɛn nə́ mbwɔ́dnə, lê ńdumtə̂ ńkə́ ńjî məjî əshîʼnə” tə ghə́ gho fɛ̂ məjî mətsɨ́ kɨ ətsəʼ pətsɨ́ nə́ pó? zə̂ á yǐ kwáalə ághɔ́b lə́ nə́ akə̂ lə́?

¹⁷ Lə́ pə ńgə́ mbimə́ á ngǎ yí tə məfaʼ lə́ akwûə mbimə́.

¹⁸ Lə́ ŋwunə a yǐ sóŋ ńgə́, “Táʼ ŋwunə a túg mbimə́, yitsə̌ a túg məfaʼə,” Akwe mə lə́ ńgə́, “Nəələ̂ mə ndzaŋ təmbɔʼ ŋwu tsə̌ a túg mbimə́ tə məfaʼə. Maŋ yǐ nəələ̂ áwɨ́ nə́ mbimə́ mə ə́ laŋ lə́ á mə́m məfaʼə mə.”

¹⁹ Nə́ pí ńgə́ lə́ chî tsɔʼə táʼ Əsê ə́wɨ́? a pɔŋə̂; Pəpɛ̌sê pó kə́ ḿbímə, ńdzoŋə̈ ḿbɛ́nkə nə́ apɔ́gə.

²⁰ Akəkóg, gho loonə̂ lə ńgə́ pə́ nəələ̂ gho ńgə́ mbimə́ tə afaʼ ə́ kě nə́ anu yitsə̌ chî?

²¹ Nə́ kwaŋ ńgə́ tǎ pətǎ əwɛ̂n Ablaamə a nə ńtɨ́ ńkoʼnə̂ a mbi Əsê lə́ ə́lɛ́? A nə ńdaŋ lə́ á mə́m məfaʼ mí əghâ ándó a nə fɛ̂ nə́ mɔ́ əyǐ Azigə á nəpá nə́ Əsê?

²² Nə́ kě zɨ́ ńgə́ mbimə́ əjǐ pópə məfaʼ mí nə nɔd ə́faʼə̂ aliʼə́ mɔʼə́? Mbimə́ əjǐ nə ńkoʼnə̂ ńgɛn ə́fyag ńdaŋ lə́ á mə́m məfaʼ míə.

²³ Anu páʼ aŋwaʼlə Əsê a nə sóŋ nə́ a tíʼ ńkoʼnə̂ ńgə́, “Ablaam a nə néŋ ntɨ́ əyí nə́ Əsê, ńté mbimə́ əjǐ Əsê a pímə yə́ ándó ŋwu páʼ a tɨ́ nə́ ndə̌ŋdəŋə́.” Ńdaŋ ə́lɨ́d pə́ tíʼ fóŋə Ablaam nə́ əshu Əsê.

²⁴ Nə́ zɨ́ əghâ nə́ ńgə́ ŋwunə a tɨ́ ńkoʼnə̂ a mbi Əsê lə́ nə́ məfaʼ míə, ńkě té lə́ tsɔʼə mbimə́ əjǐ pô.

²⁵ Lə́ tsɔʼə ndzaŋ a nə ńdaŋ nə́ nə́ akwɛlə zə́ pə́ nə fóŋ nə́ nə́ Laʼab lə́. A nə ńtɨ́ ńkoʼnə̂ a mbi Əsê ńdzoŋ lə́ nə́ məfaʼ míə; ńdaŋ ndzaŋ a nə ńkwá nə́ məntú mə́ pəjus ńgɛd pó laŋ nə́ alaŋə́ yə ndaʼ ńgə́ kɔ ngaŋkə́pa əzɔ́b jwítə ághóobə́.

²⁶ Lə́ pə́ ńgə́, ndzaŋə ándó na mbɨ páʼ ə́ kě nə́ ajwi túg ə̈ kwû nə́ lə́, lə́ kə́ ḿbə́ ndzaŋə ándó mbimə́ tə afaʼ ə́ kə́ nə́ ńkwûə.