Jɛmsə 1 - Əka yi Fîə

¹ Aŋwaʼlə zəənə́ lǒo lə́ á mbô Jɛmsə, ngaŋəfaʼ Əsê pó yi Mmaʼmbî Yeso klisto. Lə́ achaʼtə á mbô məla mə́ Islɛlə ntsɔb pɛ̌ páʼ pó shamnə̂ nə́ á mə́m mbî ntsəmə.

Mbimə́ pó Ayáŋə

² Pəlimə́ mə; lɔg nə́ mbɨ əzɨ ńgə́ pɨ lə́ pəpɔŋ pə́ atû nə́ ndɛd ntsəm páʼ akwaʼlə á téekə nə́ áwə́ənə́,

³ ńté ńgə́ nə́ jî ńgə́ təmbɔʼ mbimə́ əzɨ túgə moomə, wə́ələ́ ghɛd nə́ tɨ́ ńtyantə̂ lə́ tyantə̂ nə́.

⁴ Nə́ ghɛd ńgə́ asəgə́ndzɔʼə azə́ənə́ ä ghɛnə̂ tsɔʼə nə́ mbiə, ńjî ńgə́ nə́ koʼnə̂ ńgɛn ə́fyag tə ajûtsə́ á kě nə́ pɨ póŋ pô.

⁵ Təmbɔʼ ŋwu tsə̌ a póŋə ayáŋ, a pítə á mbô Əsê, páʼ ä fɛ̂ nə́ ayáŋə á mbô ŋwu ntsəm nə́ ntɨ́ ətsəm tsɔʼə tə sáʼə, a yǐ kə́ fɛ̂ nə yə́.

⁶ Lə́, a pítə á mə́m mbimə́, tə ghə́ atûə ajíə á koʼlə̂, ńté ńgə́ ŋwu ntsəm páʼ atûə ajíə ä koʼlə̂ nə́ a chî lə ándó kəfɨd páʼ á kɔ́ʼ nə́ á mə́m nkǐə, sə́mə a tíʼə ńtwáamə ńgɛnə̂ nə́ mbi ḿbəənə̂ nə́ ndzəmə.

⁷ -

⁸ Ŋwu páʼ atûə ajíə ä koʼlə̂ nə́, ä pɛ́nkə yə́ á mə́mə anuə atsəm, kɔ á kwaŋ ńgə́ Mmaʼmbiə a yǐ fɛ̂ ajûtsə́ á mbô yə́.

Mbóŋ pó Əfoʼə

⁹ Mɔ́mɛ́ páʼ á pə́ nə́ mbóŋ lə́ a tə́ nkɔŋtə̂ əghâ páʼ Əsê a yǐ nə́ ŋ́ŋáŋkə yə́ atǐə,

¹⁰ mɔ́mɛ́ páʼ a kə nə́ ḿbə́ əfoʼ lə́ a tə́ ńkɔŋtə̂ nə́ ndɛd páʼ Əsê á tsóokə nə́ yə́ əsê; Ńté ńgə́ əfoʼə a yǒ laŋ lə́ ándó flǎwa páʼ á chî nə́ á mə́m nəyeŋə́.

¹¹ Ńté ńgə́ əghâ mə́numə á sáʼ nə́ ńtɛ̂ ńtyantə̂ lə́, á toonə̂ nəyeŋə́ á júmə, flǎwa əyǐə á tíʼ ńkoonə̂ ńkwɛdnə̂, nəpɔŋ əyǐə á tíʼ měe yə́, lə́ ndzaŋə ándó əfoʼə a yǒ nə́ əlaŋə̂ əghâ páʼ a tə́ nə́ náŋə apeʼə ajíə.

Mɔ Pó Akwaʼlə

¹² Mbɔŋə lə́ yə ŋwu páʼ a túg nə́ asəgə́ndzɔʼə əghâ páʼ moomə a yǐ nə́, ńté ńgə́ əghâ páʼ a tɨ́ nə́ ńtyantə̂ á mə́m mɔ lə́, a yǐ kwá ntsɔ́ʼəfaʼ əjǐ páʼ ə́ pə́ nə́ nchîmbî Əsê a nə ńdaʼnə̂ á mbô pɨ pó kɔŋ nə yə́.

¹³ Əghâ páʼ ŋwu tsə̌ a chî nə́ á mə́mə akwaʼlə, kɔ a sóŋ ńgə́, Lə́ akwaʼlə Əsê á kwaʼlə̂ nə́ mə ə́wə́, ńté ńgə́ təmbɔʼ pə́ kě Əsê nə́ təpɔŋ kwaʼlə̂ pô, Əsê nə́ nkɔ̌ʼmbɨ əyə́ a kě ŋwu kə́ ńkwaʼlə̂ pô.

¹⁴ Akwaʼlə a yǐəə á mbɨ ŋwu lə́ əghâ páʼ mənu na mbɨ ə̈ lɔ nə́ mə́ legtə̂ nə́ yí ə́soŋtə̂ á tíʼə ńdzoŋə̂ mə́ələ́.

¹⁵ Mənu mə́ təpɔŋ mi mbɨ ŋwu ə̈ lɔ nə́ lə́ mɨ́d mə̈ tíʼə nə́ ḿbîə təpɔŋə, əghâ təpɔŋə á kwéŋ nə́ əshîʼnə wə́ələ́ pîə nəwûə.

¹⁶ Pəlimə́ mə maŋ kɔŋ nə́, kɔ ŋwu tsə̌ a fɨgə̂ áwə́ənə́!

¹⁷ Ajú yə əshîʼnə atsəm pó məfɛ̂nə mimə əshîʼnə mətsəm mə́ lǒo lə́ nəpóolə atǐə, ńdǒo lə́ á mbô Əsê ńtsóolə, ŋwu páʼ a tsoŋkə̂ nə́ nkyaʼ, a chî nə́ nəpóolə, yí nə nkɔ̌ʼmbɨ əyí a kë kwúblə pô, ńkě kə́ ńkwúblə ándó mə́lə́glə á kwúblə nə́ lə́ pô.

¹⁸ Lə́ kə kɔŋ yí ńtíʼ ńgɛd pɛn pə́ pɔ́ pí ńdaŋə̂ á mə́mə atséebə ají yə ndə̌ŋdəŋə́, ńjî ńgə́ pɛn túgə á ntsɛɛmbi aliʼə́ á mə́m əpú pí ətsəm páʼ a tsoŋkə̂ nə́.

Mə Jwə́ʼtə nə́ ə́ kə́ Faʼə̂

¹⁹ Pəlimə́ mə maŋ kɔŋ nə́, kwúmtə nə́ ńgə́! ŋwu ntsəmə á mə́m pəənə́ a chîə a mə́ tə́ nə́ zaŋkə̂ jwə́ʼtə, ə́ pə́ kě zaŋkə̂ tséebə pô, ə́ kě kə́ zaŋkə̂ záŋ ndě pô.

²⁰ Təmbɔʼ ŋwunə a tə́ ńdzáŋ ndě a kě mənu mə́ Əsê mə́ tɨ́ nə́ ndə̌ŋdəŋ lə́ faʼ pô.

²¹ Lə́ pə́ ńgə́ gho myaʼ mənu mimə ndɔtí pópə mənu mimə təpɔŋə, ḿbímə atséebə Əsê páʼ pə́ pǐ nə́ á məntɨ́ pəənə́. Lə́ atsáb yə wɨ́ páʼ á chî nə́ mbɔʼ á chwádkə áwə́ənə́.

²² Kɔ gho fɨg mbɨ əzo tsɔʼə a mə́ tə́ nə́ jwə́ʼtə atséebə ajíə, nə́ kə́ ńtə́ ńnéŋə ázə́ələ́ á mə́mə afaʼə.

²³ Ŋwu ntsəm páʼ a jwə́ʼtə nə́ atsáb yə wɨ́ ḿbə́ ńchîə á mə́mə afaʼ néŋ pô a chî lə́ ándó ŋwu páʼ a náŋ nə́ akyaʼə́shî ńtíʼə ńdzɨ́ ndzaŋ mbɨ əjǐ chî nə́.

²⁴ A náŋ ndzaŋ mbɨ əjǐ ə́ chî nə́ ńtíʼ ə́sɛdnə̂ ńtə́ ńgɛnə̂ ḿbɛ́dtə ńdəgnə̂ yí ndzaŋ mbɨ əjǐ pěʼ nə́ ńchîə.

²⁵ Lə́ ŋwu ntsəm páʼ ä náŋ nə́ noŋkə wə́ a koʼnə̂ nə́ ńgɛn fyag lə́ əshîʼnə, noŋkə wə́ ä fóg nə́ pəənə atsáŋ lə́, ńkə́ ńgɛn nə́ mbiə á mə́ zoŋ nə́ wɨ́d ńkë jwə́ʼtə tsɔʼə jwə́ʼtə nə́ ńdəgnə̂ pô ńkə́ néŋə á mə́mə afaʼ, Əsê yǒ fɛ̂ afoʼ nə́ pó á mə́mə anu pó faʼ nə́.

²⁶ Ŋwu ntsəm páʼ a kwaŋ nə́ ńgə́ yí lə́ ŋwu Əsê, təmbɔʼ a chî jî ndzaŋ təmbɔʼ a lɔg ndɛd nə́ alə́əmə ají pô tə ḿbə́ anǔəsê ají lə́ ənukə́taŋ a kə́ fɨgə̂ lə́ mbɨ əjǐə.

²⁷ Ajú páʼ Əsê a pə́ nə́ Tǎ a lɔg nə́ ńgə́ lə́ chigə anǔəsê, páʼ a kě nə́ ndɔtí túg ńkə́ ńkoʼnə̂ lə́ zəənə́: á mə́ lɔg nə́ ndɛd nə́ pətǐ pópə pəkog á mə́m ngə́ʼ əzoobə́, ə́ kə́ lɔʼkə̂ nchîmbî əzo nə́ ndú ńgə́ kɔ təpɔŋ mə́m mbîə á kwú ə́wə́.