Iblus 6 - Əka yi Fîə

¹ Lə́ pə́ ńgə́ pɛn ghɛn nə́ mbiə á mə́ zoŋ nə́ ndzéʼkə páʼ ə́ kwíŋ nə́ ńtíʼ ḿmɛdtə̂ ntsɛɛmbi məndzeʼkə́ mə́ nkɨ yi əshîʼnə mə́ páʼ pɔ́ pə́ Yeso pó kə zéʼkə nə́ lə́, kɔ pɛn kə́ ńdáʼə̈ ńnoŋkə̂ tsɔʼə achîəndɛ̂, páʼ á pə́ nə́ mə kwúblə nə́ məntɨ́ mɨ́ ə́fɛ́lə á mə́m mənu páʼ mə́ yǐ nə́ nə́ nəwûə, ə́ tíʼ néŋ ntɨ́ nə́ Əsê:

² achîəndɛ̂ yə ndzeʼkə́ ńté akwáalə́nkǐ pó yə mə noŋkə̂ nə́ apô atû pəghoonə́, ḿbɨ ḿbə́ nə́ achîəndɛ̂ yə pəkwû pó yǒ nə́ júmnə nəwû ḿbɨ ḿbə́ nə́ mələ́g nə́ əsáʼ ngǎ mɔʼə́ ə́ mɛdnə̂.

³ Pɛn ghɛn nə́ mbiə! Lɛ̌ anu páʼ pɛn yǐ nə́ faʼə̂, páʼ təmbɔʼ Əsê a pímə.

⁴ Lə́ təmbɔʼ pəənə ándó pó myaʼ nə́ mbimə́ əzɔb, mbɔʼ pə́ pɨ ńgɛd pó kwúblə məntɨ́ mɔ́b lə́ ə́lɛ́ ə́fɛ́lə á mə́m təpɔŋ əghɔb ngǎ yitsə̌ ḿbəənə̂ á mbô Əsê? Á kə pə́ ndɛd yitsə̌ pó chîə á mə́m nkyaʼ Əsê, ńjwə́ʼ məfɛ̂nə páʼ mə́ lǒo nə́ nəpóolə, ńkə́ ńkwáalə azóobə́ Ajwǐəsê;

⁵ pó kə laŋ lə́ á mə́m mənu pó jɨ́ nə́ ńkə́ faʼ ḿbɔŋə́ jî ńgə́ anǔəsê á pɔŋə̂, pó kə kə́ ńjwə́ʼ mətɨ páʼ mə́ chî nə́ á mə́m mbî ə́ tə́ nə́ ńgyǐəə lə́.

⁶ Ńtíʼ ḿbɨ ḿmyaʼ mbimə́ əzoobə́! Á tyantə̂ təmbɔʼ pə́ pɨ ḿbɨnkə̂ ághɔ́b pó kwúblə məntɨ́ mɔ́b ə́fɛ́lə á mə́m pətəpɔŋ pɔ́b ngǎ yitsə̌, ńté ńgə́ pó pəənə̂ ńkwumtə̂ mɔ́ Əsê lə́ kwumtə̂ nə́ ngǎ yitsə̈, ńnéŋ əsə́ənə atû yə́ á əshîsaŋə.

⁷ Əsê a fɛ̂ afoʼə á mbô ndəsê páʼ ə̈ nô nə́ nkǐ mbəŋ páʼ ə̈ zá nə́ ńdǒ ə́wə́. Ndəsê yi wɨ́ məjî mə́ kɔ́ʼə ə́wɨ̈, ńkwáalə pɨ páʼ pó líʼ nə́ zə́ələ́.

⁸ Lə́ təmbɔʼ ndəsê zɨ ə́ kɔ́ʼ məsɔbsɔb pó ngɔ́n təpɔŋ, ndəsê yi wɨ́ ə́ kě atûə anu yətsə́ chî pô, zɨ́d ə́ chî təmbɔʼ Əsê a wɛ́ʼə zɨ́d, pə́ yǐ ńtíʼ ńtoonə̂ ázə́ələ́ á mə́m mógə́.

⁹ Pəlim pə́g pəg kɔŋ nə́, lə́ təmbɔʼ pəg pěʼ ńtə́ ńtséebə pə́ nə́ ndú ghɛn lɛ̌, məntɨ́ mə́g mə́ kě tə́ ńkoʼlə̂ ńté áwɨ́ pô, pəg jî ńgə́ nə́ túgə chigə afoʼ páʼ á pə́ nə́ yə nchwadkə́ əzəənə́

¹⁰ Əsê ä sáʼ əsáʼ əyí lə́ ndə̌ŋdəŋə́; A kě afaʼ páʼ gho kə faʼ nə́ lə́ yǐ ləgnə̂ pô, kəənə akɔŋnə páʼ gho kə nɨd nə́ á mbô yí ńdaŋə̂ á mə́m akwá páʼ gho kə fɛ̂ nə́ á mbô pəlim pó pɔ́ pə́ Yeso, gho pɛn ḿbɛ́lə ńkə́ ə́fɛ̂ tsɔʼə fɛ̂ nə́.

¹¹ Əwəg mɛ́ anu pəg lɔ nə́ lə́ ńgə́ ŋwu wɨ́ ntsəmə a kə́ ńtə́g tsɔʼə atû nə́ anu páʼ ä faʼ nə́ tə ńkoʼə̂ á ndwigtə ńjî ńgə́ mənu pɨ túg nə́ akwaŋ ńtə́ ḿbyáabə ńté mɨ́d lə́, mə́ yǐ ńdɔgə̂ aliʼə́.

¹² Pəg kě kɔŋ ńgə́ nə́ pə́ pəlɔŋ pô, pəg lɔ ńgə́ nə́ chîə ándó pɨ páʼ pó túg nə́ mbimə́, ńkə́ ńtúgə awaamə́ntə́əmə, ńjî ńgə́ mbɔʼ nə́ yǒ ńkwáalə ajú páʼ Əsê a kə laʼnə̂ nə́ áwɨ́ ə́wə́.

Ndə̌ŋdəŋ Ndaʼnə Əsê

¹³ Əghâ ándó Əsê a nə ńgɛd nə́ ndaʼnə əjǐə á mbô Ablaam lə́, ńgɛlə̂ atyǎntə ndaʼnə ńgə́ a yǐ shib faʼə̂ anu páʼ a nə ńdaʼnə̂ nə́ zə́ələ́. Ndzaŋə ándó ŋwu tsə̌ a nə ńkě nə́ ə́wɨ́ chî ńtsɛɛlə̂ yí pô lə́, a lɔg əlɛ́n əyí ńdzɔ ə́wɨ́ əghâ a kə̈ ghɛd nə́ atyǎntə ndaʼnə ajíə.

¹⁴ A kə sóŋ ńgə́, “Maŋ laʼnə̂ gho ńgə́ maŋ yǐ shib fɛ̂ afoʼə á mbô gho ə́ kə́ peg ngwud əzo.”

¹⁵ Ablaamə a nə ńtúgə awaamə́ntɨ́, ńdaŋ ə́lɨ́d ńtíʼ ńkwáalə ajú páʼ Əsê a kə laʼnə̂ nə́ yí ə́wə́.

¹⁶ Əghâ ŋwunə a tə́ nə́ ńgɛlə̂ atyǎntə ndaʼnə lə́, a lɔg əlɛ́n ŋwu tsə̌ páʼ a tsɛ nə́ yí ńtə́gə á mbiə, atyǎntə ndaʼnə zə́ á tíʼ ńdə́gə azɔŋə atsəmə.

¹⁷ Əsê a nə ńdoonə̂ lə́ á mə́ ghɛd nə́ á pyádnə ŋ́ŋwaʼə̂ á mbô pəənə ándó pó kə chî nə́ á mə́ kwá nə́ ajúmə a kə laʼnə̂ lə́, ə́sóŋ ńgə́, a láʼ kě anuə a kə lɔ́btə nə́ lə́ kwúblə pô; ńdaŋ ə́lɨ́d a pegə̂ atyǎntə ndaʼnə ajíə á mə́m ndaʼnə yi wə́,

¹⁸ mənu mɨ mɛ́n mbɛ̌ mbɔʼ mə́ kě kwúblə pô, mbɔʼ Əsê a kě kə́ ńtsɨ́d ntsɨd ńté pô. Pɛnə̂ ándó pɛn lyáŋ nə́ á nəpab yí, pə́ néŋ ntɨ́ əwɛ̂n ńgə́ pɛn lánə ńgwaamə̂ akwaŋ pɛn túg nə́ ńtə́ ḿbyáabə lə́ əshîʼnə.

¹⁹ Akwaŋ zɨ pɛn túg nə́ ńtə́ ḿbyáabə lə́, lə́ ajú páʼ a ghɛd nə́ ntɨ́ əwɛ̂n ə́ tɨ́ ńtyantə̂ tsɔʼə ndzaŋ páʼ áŋkɔ apáŋə́nkǐə ä wam nə́ zə́ələ́ á tə́əmə̈ táʼə aliʼə́. Akwaŋ zɨ ńtə́ ḿbyáabə á kwúnə á ndzəmə apagə atsəʼ á ndɛ̂sê ə́ chî nə́ nəpóolə, ńdaŋ ńtíʼ ńkwúnə á mə́m ndɛ̂sê yi mə́mə.

²⁰ Yeso a nə ńkwá mbi ńgɛn ńkwú əwɨ́ nə́ əlɛ́n əwɛ̂nə, ńtíʼ ḿbə́ mbêsê yi ngweŋ páʼ a mɛdnə̂, á mə́m ngwud pəpépə́sê pə́ Mɛkisidɛgə.