Iblus 3 - Əka yi Fîə

Yeso a Tsɛɛlə̂ Mosisə

¹ Pəlimə́ mə á mə́m Yeso, páʼ Əsê a kə kə́ nə́ fóŋ! Kwaŋ nə́ Yeso páʼ Əsê a kə tú nə́ yí ńgə́ a pə́ Mbêsê yi Ngweŋ mbimə́ ándó pɛn chî nə́ á mə́m ə́wə́.

² A kə̈ faʼə̂ á mbô Əsê nə́ ntɨ́ əyí ətsəmə, Əsê páʼə a kə tsɔ́ʼ nə́ yí ńgə́ a faʼə̂ afaʼ zəənə́, tsɔʼə ndzaŋ Mosisə a kə kə́ nə́ faʼə̂ afaʼə jíə á ndɛ̂sê nə́ ntɨ́ yí ətsəmə.

³ Ŋwu páʼ a kwúd nə́ ndɛ̂, pə́ ghóʼkə yí ńtsɛ ndɛ̂ zɨ́d zə̂. Tsɔʼə nə́ ndú wɨ́d wə́, Yeso a koʼnə̂ təmbɔʼ pə́ pyádnə fɛ̂ ngóʼkə nə́ yí ńtsɛɛlə̂ Mosisə.

⁴ (Ńté ńgə́ ndɛ̂ ntsəm lə́ pɔ́ ŋwunə, lə́ ḿbóomə ajúmə atsəmə á pə́ ḿbə́ lə́ Əsê.)

⁵ Mosisə a kə̈ faʼə̂ á ndɛ̂sê ándó ngaŋəfaʼ nə́ ntɨ́ yí ətsəmə, mbɨ ńtsáb mənuə ándó Əsê a yǒ nə́ sóŋə mə́ələ́ á mə́m ndɛd páʼ pɛ́d nə́ tə yǐəə.

⁶ Lə́ Klisto a pə̈ ə́faʼə̂ nə́ ntɨ́ yí ətsəmə ándó Mɔ́ páʼ a náŋ nə́ ndɛ̂sê. Pɛn lə́ ndɛ̂ əjǐ páʼ təmbɔʼ pɛn túg ntɨ́ ńgɛn nə́ mbi ńkə́ ńchîə anu yətsə́ tə́ pɔ́gə á mə́mə akwaŋ ńtə́ ḿbyáabə pɛn túg nə́ lə́ pô.

Pɔ́ Pə́ Əsê Pó Yǒ Jwitə̂

⁷ Lə́ pə́ ńgə́, ndzaŋə ándó Ajwǐəsê a sóŋ nə́ ńgə́, “Ə́sɛ̂nə̌, təmbɔʼ nə́ zóʼ ngye Əsê,

⁸ Kɔ nə́ tyantə̂ atûə ándó pətǎ pə́ pətǎ pɨ pó nə́ tyantə̂ nə́ atû ńtíʼ ńkǐə ághɔ́b Əsê lə́, ndzaŋə ándó pó kə faʼ nə́ ə́lə́ələ́ á kɔŋ məŋkwâʼlə̌ á mə́ zɨ́ nə́ anu Əsê a yǐ nə́ ghɛlə̂.

⁹ A nə ḿbə́ á kɔŋ məŋkwâʼlə̌ lə́ pətǎ pə́ pətǎ pɨ́ pó néŋə a mə á mə́m moomə, páʼ pó nə ḿbə́ nə́ ḿbǎtə ńdzə́ənə á pə́ afaʼə mə á mə́m ngoʼ məghə́m mɛ́n nəkwa lə́.

¹⁰ Ńdaŋ ə́lɨ́d maŋ záŋ ndě nə́ pɨ pɨ́d pə̂ ńtíʼ ə́sóŋ ńgə́, Pó zá ńtyantə̂ atûə, ńtíʼ ńkǐə á mə́ zóʼ nə́ nə́ məntəgə́ mə.

¹¹ Ndě mə nə ńdzáŋ maŋ tíʼ ńgɛd ndaʼnə tə kwúblə á mbô pó. Pó láʼ kě kwúnə aliʼ páʼ maŋ nə ńchî nə́ á mə́ ghɛd nə́ pó jwitə̂ ə́wɨ́ lə́ pô!”

¹² Pəlimə́ mə á mə́m Yeso, lɔg nə́ ndɛlə́, ńjî ńgə́ kɔ ŋwu tsə̌ á ndzɔʼ pəənə́ a kwéʼnə ńtúg ntɨ́ təpɔŋ ńkě ńtɨ́ nə́ Əsê néŋ tə ńkǐə ətsáb pɨ pô, nə́ ndú ńgə́ á sɛdnə̂ yə́ á ndzəm yə́.

¹³ Lə́, néŋ nə́ məntɨ́ mə́ pɔ́pə́mɛ́ pə́ənə́ á tətɨ pɨ əlě ətsəmə, tə ńkoʼ nə́ ndɛd pə́ pɛ́d nə̈ ə́fóŋə zɨ́d ńgə́, “Ə́sɛ̂n,” lə́, ńjî ńgə́ kɔ pə́ yǐ ńgɛd məfɨgə páʼ mə́ chî nə́ á mə́m təpɔŋ, mə́ ghɛd ntɨ́ ŋwu əwɨ yitsə̌ tyantə̂.

¹⁴ Ńté ńgə́ pɛn pətsəm lə́ táʼə ajú pɛ̌npə Klisto páʼ təmbɔʼ pɛn tɨ́ ńtyantə̂ nə́ ńtɨ́ pɛn kə túg nə́ áwə́ələ́ á nəchwaakənə́ ńgɛn ńkoʼə̂ á ndwigtə.

¹⁵ Lɛ̌ anu páʼ aŋwaʼlə Əsê a sóŋ nə́ ńgə́, “Təmbɔʼ gho zóʼ ngye Əsê ə́sɛ̂n, kɔ gho tyantə̂ atûə, ándó pətǎ pə́ pətǎ pɨ́ pó kə tyantə̂ nə́ atû əghâ pó kə kǐ nə́ ághɔ́b Əsê lə́.”

¹⁶ Pəənə ándó pó nə ńdzóʼ nə́ ngye Əsê ńkǐə ághóobə́ yí, lə́ nə́ ḿbə́ mbə̂kə̂? Lə́ nə́ ḿbə́ pɨ pə́ pətsəm páʼ Mosisə a kə lɔg nə́ ághɔ́b ə́fɛ́lə aláʼə Ijib lə́.

¹⁷ Lə́ nə ḿbə́ mbə̂kə̂ páʼ Əsê a nə ńdzáŋ nə́ ndě nə́ pó nə́ ngoʼ məghə́m mɛ́n nəkwa? Lə́ kə pə́ pəənə ándó pó nə ńgɛd nə́ təpɔŋə, pɨ pó kə wǔ nə́ ńkwúkə á kɔŋ məŋkwâʼlə̌ lə́.

¹⁸ Əghâ Əsê a nə́ fɛ̂ nə́ ndaʼnə tə kwúblə əjǐ ńgə́, “Pó láʼ kě kwúnə á mə́mə aliʼə́ ndəsê maŋ kə chî nə́ mə́ ghɛd nə́ pó jwitə̂ ə́wɨ́ lə́ pô,” A kə tsáb lə́ á mbô mbə̂kə̂? lə́ nə ḿbə́ pəənə ándó pó nə ńkǐ nə́ ághɔ́b Əsê.

¹⁹ Pɛn tíʼ ńdzɨ́ əghâ nə́ ńgə́ pó nə ńkě chî təmbɔʼ pó kwúnə aliʼə́ ndəsê yi wɨ́ ńté ńgə́ pó nə ńkě ntɨ́ nə́ Əsê néŋ pô.