Iblus 13 - Əka yi Fîə

Lɛ̌ Ndzaŋ Təmbɔʼ nə́ Ghɛd Əsê a tə́ Nkɔŋtə̂

¹ Ghɛn nə́ nə́ mbiə á mə́ tə́ nə́ kɔŋə̂ məmbɨ mə́ənə́ ándó pɔ́ pə́ Klisto.

² Kwúmtə nə́ á mə́ tə́ nə́ lɔgə̂ pəghəənə a məláʼ pəənə́. Pətsə́ pɨ pə́ kə faʼ ə́lɨ́d tə ńdɔg pətseŋpə́ndɛ́pə́sê á məláʼ pô ńkě jî pô.

³ Kwúmtə nə́ pɨ páʼ pó chî nə́ á nkáʼə́tsáŋə, ándó lə́ chî pɨ̌ po á nkáʼə́tsáŋ lə́. Kwúmtə nə́ pɨ páʼ pó tə́ nə́ ńdzɨ́ ngə́ʼə, ándó lə́ zə́ənə pɨ̌ po ńdzɨ́ ngə́ʼ lə́.

⁴ Ŋwu ntsəmə ándó a pɛ́d nə́ tə ńdzɔ́ʼə a ghóʼkə mbɨ əjǐə, ŋwu mbyâŋnə pó ngwě əyǐ shib ńchîə mə́ túg nə́ məmbɨ mɔ́b nə́ ntɨ́ əghɔ́b ətsəmə. Əsê a yǒ tsɔ́ʼtə əsáʼ pɨ páʼ pö zɔ́ʼ nə́ ndzɔʼə́ tə apímnə ńkə́ ḿbə́ nə́ yi pɨ páʼ pó jî nə́ mə̂ghabə.

⁵ Kɔ nə́ pímə anuə akɔŋə́nkéebə á chîə á mə́m nchîmbî əzəənə́, ajúmə atsəm pɨ túg nə́, a koʼnə̂ á mbô pəənə́. Ńté ńgə́ Əsê a sóŋ ńgə́, “Maŋ láʼ kě áwɨ́ mɛdtə̂ pô; Maŋ láʼ kě áwɨ́ ləgnə̂ pô.”

⁶ Ńdaŋ ə́lɨ́d təmbɔʼ pɛn sóŋ tsɔʼə tə apɔ́g ńgə́, “Mmaʼmbî lə́ nkwáalə mə, təmbɔʼ maŋ kě pɔ́g pô. Təmbɔʼ ŋwunə a ghɛlə̂ akə̂ nə́ maŋə?”

⁷ Kwúmtə nə́ mətû mə́ənə́, pi páʼ pó nə náŋkə nə́ nkɨ Əsê á mbô pəənə́. Kwúmtə nə́ ndzaŋ nchîmbî əzɔb kə chî nə́ pó pɔŋə̂ kwûə, ńtíʼ fiʼkə̂ ndzaŋ pó nə ńtúg nə́ mbimə́ nə́ Əsê.

⁸ Yeso Klisto a chî lə́ tsɔʼə ndzaŋ a kə chî nə́ á əzoonə́ pó ə́sɛ̂n tə mɛdnə̂.

⁹ Kɔ pɨ pí pɨ pó tə́ ńdzéʼkə áwɨ́ nə́ mbǒʼḿbóʼ məntəgə́ mə̈ ghɛd nə́ nə́ fankə̂ ndú əwə́ənə́, a pɔŋ ńgə́ məntɨ́ mɛ́n mə́ tɨ́ ńtyantə̂ nə́ apɔŋə́ntə́əmə Əsê, ńkě pə́ á mə́ tə́ nə́ zóʼnə məntəgə́ ńté məjî pô, ńté ńgə́ pɨ páʼ pó nə̈ ńdzóʼnə nə́ məntəgə́ mɨ́d mə́, mə́ nə ńkě ághɔ́b kwá pô.

¹⁰ Pəpépə́sê páʼ pö faʼ nə́ á mə́m aliʼə́ghóʼkə́sê Pəjus pó kě túg mətəənə á mə́ jî nə́ ajûtsə́ páʼ pə́ fyaʼ nə́ Əsê ə́wɨ́ á nəpá pɛn pô.

¹¹ Mbêsê yi Ngweŋ Pəjusə ä yǐəə nə́ achǐə məna Chigə Aliʼ yə Ŋwaʼ nə á mə́ fɛ̂ nə́ zə́ələ́ ándó afyaʼə́nu ńté pətəpɔŋə, lə́ na mbɨ məna zɨ́d zə́ pə̈ toonə̂ lə́ á ndzəmə apeŋ pə́lə́glə́.

¹² Ńté zɨ́d zəənə́ anu, Yeso a nə ńkə́ ńkwû lə́ á ndzəmə apeŋ tə́kɔʼ tɔ̂ŋ ńjî ńgə́ a sogə̂ təpɔŋ pɨ nə́ ajíə achǐə.

¹³ Lə́ á pə́ ńgə́ pɛn fɛ́d ńgɛnə̂ apeŋə́ á ndzəm pə́lə́glə́ ńkə́ ńkwá məndzɔmnə páʼ a kə kwá nə́ lə́.

¹⁴ Ńté ńgə́ tə́kɔʼ tɔ̂ŋ yitsə̌ á kě ə́wɨ́ chî páʼ a mɛdnə̂ nə́ á mbô pɛnə̂ á ndú ndəsê pô, pɛn náŋə lə́ tə́kɔʼ tɔ̂ŋ páʼ á chî nə́ mə́ yǐ nə́ lə́.

¹⁵ Ńdaŋə̂ á ndzəm Yeso pɛn chîə á mə́ tə́ nə́ ghɛnə̂ nə́ mbi ə́ ghɛlə̂ afyaʼə́nu ŋ́ŋáŋkə Əsê, á chî lə́ ándó nənta nə́ atǐ nə́ əkwub ntso páʼ nə́ sóŋ nə́ anu ńté əlɛ́n yə́.

¹⁶ Kɔ nə ləgnə̂ á mə́ tə́ nə́ ghɛd əshîʼnə ə́ kə́ tə́ gheebə̂ apô á tətɨ pəənə́, ńté ńgə́ ndɛn mənu ghɛn lə́ ə́fyaʼmə́nu páʼ ə̈ ghɛd nə́ mbɨ Əsê pɔŋə̂.

¹⁷ Zóʼnə nə́ mətû mə́ənə́ ńkə́ ńdzoŋ mənu pö sóŋ nə́ ńgə́ pɨ faʼə̂. Pó tə́ ḿbyáabə məntɨ́ mɨ́ tsɔʼə tə jwitə̂ ńté ńgə́ pó yǒ fiʼtə̂ á mbô Əsê ndzaŋ pó nə faʼ nə́. Təmbɔʼ pɨ tə́ ńdzóʼnə ághɔ́b pó faʼə̂ afaʼə azɔ́b nə́ akɔŋtə, mbɔʼ á chî ə́lɨ́d pô, pó tíʼə ə́faʼə̂ nə́ afɨnə, zə́ yǐ ə́ kě áwɨ́ nə́ anu yətsə́ kwá pô.

¹⁸ Ghɛn nə́ nə́ mbiə á mə́ chaʼtə̂ nə́ Əsê atû pəgə́. Pəg pyádnə ńjî ńgə́ məntɨ́ mə́g mə́ ŋwaʼ ńté ńgə́ pəg loonə̂ á mə́ faʼ nə́ anu páʼ á koʼnə̂ nə́ əghâ ntsəmə.

¹⁹ Maŋ lánə ńchígə́ ḿbóʼmbô á mbô pɨ ńgə́ nə́ tə́ ńchaʼtə́sê ńgə́ təmbɔʼ Əsê a pɨ ńdzaŋkə̂ ḿbɨnkə̂ mə á mbô pəənə́.

Ndwigtə Achaʼtə́sê

²⁰ Nə́ əghâ nə́, ńgə́ Əsê mbwɔ́dnə páʼ ə́ kə júmkə nə́ Mmaʼmbî Yeso á nəwû, yí páʼ a pə́ nə́ tə́kɔʼ ntseŋnə məmbéŋ, ńdaŋə̂ á mə́m achǐə əka yi mɛdnə̂ nə́,

²¹ ńgə́ a fɛ̂ ajú yə əshîʼnə atsəmə á mbô pɨ ńjî ńgə́ təmbɔʼ nə́ faʼə̂ anu páʼ ä lɔ nə́. Ńgə́ á laŋə̂ á mə́m Yeso Klisto ə́faʼə̂ anuə atsəmə á mə́m pɛn páʼə á pɔŋ nə́ yə́. Ńgə́ Nəgháʼə á pə́ yi Klisto tə ńgɛn ḿmɛdnə̂! Amɛn.

Ndwigtə Ətséebə

²² Pəlimə́ mə, maŋ póʼmbô á mbô pɨ ńgə́ nə́ wam ntɨ́ ńjwə́ʼtə atsáb zɨ páʼ a yǐ nə́ néŋ ntɨ́ əwə́ənə́, ńté ńgə́ aŋwaʼlə zɨ maŋ ŋwaʼlə̂ nə́ á mbô pɨ lə́ á kě tə́shú sag pô.

²³ Maŋ loonə̂ ńgə́ pɨ jî ńgə́ ndim əwɛ̂n Timoti á kə fɛ́lə á nkáʼə atsáŋə. Təmbɔʼ a zaŋkə̂ ńgyǐ, tə ḿbə́ maŋ yǐ yǐ lə́ pəg yí nə́ ndɛd maŋ tə́ nə́ ńgyǐəə á mə́ zɨ́ nə́ áwə́ənə́.

²⁴ Fɛ̂ nə́ achaʼtə azə́gə́ á mbô mətû mɨ́ mətsəm ńkə́ ə́fɛ̂ nə́ pɨ pə́ Əsê pətsəmə. Pəlim pó chî nə́ á Itali pó túmə achaʼtə á mbô pəənə́.

²⁵ Ńgə́ apɔŋə́ntə́əmə Əsê á chî nə́ pɨ pətsəmə.