Iblus 1 - Əka yi Fîə

Atséebə Əsê Ńdaŋə̂ á Mə́m Mɔ́ Əyǐə

¹ Á nə ḿbə́ ntsɛɛmbi lə́ Əsê ä tséebə á mbô pətǎ pə́ pətǎ pɛn ngǎ yi nɨ́ nə́, nə́ məndú mimə́ nɨ́ nə́ ńdaŋə̂ á mbô məntúmə́sê,

² lə́ nə́ ndwigtə əlě mbî pɨ lə́, a tséebə á mbô pɛn ńdaŋ lə́ á mbô Mɔ́ Əyǐə. Lə́ yí páʼ Əsê a nə tsoŋkə̂ nə́ mbî ńdaŋə̂ a ndzəm yə́, ḿbə́ yí páʼ Əsê a kə fɛ̂ nə́ ajúmə atsəm nə́ yə́.

³ Mɔ́ əyǐ wɨ́d ghɛnə̂ a ŋwaŋkə̂ nə́ nəgháʼ Əsê á mbɨ yə́, ńkə́ ńchîə ándó Əsê. A túg mbî lə́ nə́ mətɨ mə́ chî nə́ nə́ atséebə ajíə. Əghâ ándó a kə məgtə̂ nə́ mə sog nə́ təpɔŋ ŋwu ntsəm lə́, ńtíʼ ńnáanə á nəpóolə á əlá apô Əsê yə təənə, Əsê páʼ a túg nə́ mətəənə á ndumə ajúmə atsəmə.

Mɔ́ Əsê á Tsɛ Pətseŋpə́ndɛ́pə́sê

⁴ Əsê a kə ghɛd ńgə́ Mɔ́ Əsê á túg mətɨ ńtsɛ pətseŋpə́ndɛ̂ píə, tsɔʼə ndzaŋə ándó əlɛ́n páʼ Əsê kə fɛ̂ nə́ nə́ Mɔ́ əyǐ ə́ kə gháʼ nə́ ńtsɛ yi pətseŋpə́ndɛ̂ píə.

⁵ Ńté ńgə́ Əsê nə ńkě kə́ láʼə sóŋə nə́ ntseŋndɛ̂ əyǐ yitsə̌ ńgə́, “Gho lə́ Móonə mə, ə́sɛ̂n maŋ tíʼ ḿbə́ lə́ Tǎ əgho.” Kɨ Əsê kě kə́ láʼə ə́sóŋə nə́ ntseŋndɛ̂ əyǐ yitsə̌ ńgə́: “Maŋ yǐ pə́ lə́ Tǎ əyǐə, a kə́ ḿbə́ Móonə mə.”

⁶ Lə́ a kə pə́ əghâ Əsê kə tə́ nə́ ńdoonə̂ á mə́ tú nə Mɔ́ nətû əyǐə á mə́m mbî lə́, ə́sóŋ ńgə́, “Pətseŋ pə́ ndɛ̂ pə́ pə́ nə́ pipə́ Əsê pətsəm pə́ yǐ shib ghóʼkə yə́.”

⁷ Lɛ̌ anu páʼ Əsê sóŋ nə́ ńté pətseŋpə́ndɛ́pə́sê: “Əsê ghɛd pətseŋpə́ndɛ̂ pí pó pə́ kəfəələ, ḿbɨ́ ńgɛd ngaŋə́faʼ əjí pə́ alə́əmə mógə́.”

⁸ Lə́ ńtíʼ ńgɛn nə́ Mɔ́, Əsê sóŋ ńgə́, “O Əsê, anuə nəfoonə azô a yǐ mɛdnə̂ ngǎ mɔʼə́! Gho sáʼə pɨ pó nə əsêndú páʼ ə́ tɨ́ nə́ ndə̌ŋdəŋə́.

⁹ Gho kɔŋə̂ anu páʼ a koʼnə̂ nə́, ḿbeenə̂ yə tə koʼə̂. Lə́ ghɛd ə́lɨ́d Əsê páʼ ə́ pə́ nə́ Əsê əzo tsɔ́ʼə gho ḿbɨ ə́fɛ̂ akɔŋtə ngóʼkə á lánə ńgáʼ ńtsɛ ndzaŋ á fɛ̂ nə́ á mbô ngaŋmə́ko əzô.”

¹⁰ A pɨ ńkə́ sóŋ ńgə́, “Gho Mmaʼmbî, ə́fɛ́lə a nəfɛdnə́, lə́ tsoŋkə̂ gho ńtsoŋkə̂ mbîə, ńdɔg lə́ tsɔʼə mbô mó ńtsoŋkə̂ nəpó wə́.

¹¹ Əpú pɨ ətsəm ə́ yǒ péŋə, lə́ gho pə́ mɛdnə̂, pɨ́d yǒ lɛnə̂, ə́sɛɛkə̂ ándó ətsəʼə́.

¹² Pɨ yǒ píʼtə pə́ələ́ ándó tə́sɛ atsəʼə́ əfə́gə, pə́ tíʼ ńkwúblə pə́ələ́ ándó ətsəʼə́. Lə́ gho pə́ ńkě kwúblə pô, ńdáʼ ńkě kə́ ńdɛn pô.”

¹³ Əsê a kě kə́ láʼə ə́sóŋə nə́ ntseŋndɛ̂ əyǐ yitsə̌ ńgə́, “Náanə aliʼ ghɛnə́ á əlá apô maŋ yə təənə, tə ńkoʼ əghâ maŋ yǒ nə́ noŋkə̂ ngaŋkə́pa əzô ándó ajúmə tə́gə məkoolə á nətɛ́n nə́ məko gho.”

¹⁴ Pətseŋpə́ndɛ́pə́sê lə́ pěʼ ḿbə́ mbə̂kə̂? Lə́ əjwi páʼ ə́ faʼ nə́ mbô Əsê, ä túmə ághɔ́b ńgə́ pó tə́ ńkwáalə pɨ páʼ pó yǒ nə́ kwá nchwadkə́.