Galeshanə 6 - Əka yi Fîə

Kwá nə́ Məmbɨ Mə́ənə́ á mə́ Twám nə́ Apeʼə Azə́ənə́

¹ Pəlim, mbɔʼ nə́ waamə̂ ŋwunə a chî nə́ á mə́m təpɔŋ yitsə̌, pəənə́ ándó Ajwiə a chî nə́ á mə́m pɨ, nə tə́gə yə́ alaŋə́; ḿbə́ shib ə́faʼ ə́lɨ́d nə́ ndú páʼ wɨ́d pwɔ́dnə nə́. Pɨ tə́ ńgɛlə̂ nə lɔg ndɛd ńgə́ kɔ nə pɨ ńkə́ ńgwǔəə azə́ənə́ á mə́mə akwaʼlə.

² Tə́ nə́ ńkwáalə məmbɨ mə́ənə́ á mə́ twá nə́ əpeʼ əpə́ənə́, ńjî ńgə́ pɨ lwɛ́nkə noŋkə Klisto.

³ Mbɔʼ ŋwu tsə̌ a kwaŋ ńgə́ yí lə́ ajûtsə́ páʼ a kě nə́ ajûtsə́ pô, a fɨgə̂ lə́ tsɔʼə mbɨ əjǐə.

⁴ Ŋwu ntsəmə a náŋ əyí ngɛdmə́nuə, mbɔʼ zɨ́d koʼnə̂, gho kɔŋtə̂ nə́ anu páʼ gho faʼ nə́, ńkě fiʼkə̂ pə́ nə́ anu páʼ ŋwu ndaʼə a faʼ nə́ pô.

⁵ Ńté ńgə́ ŋwu ntsəmə a chîə mə́ twám nə́ ajíə apeʼə.

⁶ Pəənə́ ándó pə́ zéʼkə nə́ ághɔ́b nə́ atséebə Əsê lə́, pó shib ńgabtə̂ əpú pipə əshîʼnə pətsəm ə́fɛ̂ pipə́ ndzéʼkə əghoobə́.

⁷ Kɔ nə fɨg məmbɨ mə́ənə́, mbɔʼ ŋwu tsə̌ a kě Əsê fɨg pô, ŋwu ntsəmə a foʼə̂ lə́ ajú páʼ a pǐ nə́.

⁸ Mbɔʼ pó pǐ ńdzoŋə̂ pə́ mənu mbɨ əzɔb lɔ nə́ ńgə́ pó faʼ, pó yǐ foʼ lə́ nəwûə á mə́m ə́wə́; lə́ mbɔʼ pó pǐ ńdzoŋə̂ pə́ anu Ajwǐəsê lɔ nə́ ńgə́ pó faʼ, pó yǐ ə́foʼ lə́ nchîmbî páʼ zɨ́d mɛdnə̂ nə́ ngǎ mɔʼə́.

⁹ Lə́ pə́ ńgə́ kɔ pɛn kéenə mə ghɛd nə́ əshîʼnə; ńté ńgə́ mbɔʼ pɛn chî ká pó, ndɛd yǒ ńkoʼ páʼ pɛn yǐ nə́ foʼə̂ ajúmə atsəm pɛn kə pǐ nə́.

¹⁰ Lə́ á pə́ ńgə́ əghâ ətsəmə ándó pɛn túg nə́ əsa pɛn ghɛd əshîʼnə á mbô ŋwu ntsəmə, ḿbə́ ḿbyádnə ńgɛlə̂ á mbô pəlim pɛnə̂ á mə́m Yeso.

Ndwegtə Akwantə pópə Achaʼtə

¹¹ Zɨ́ nə́ pəmɛ́ pə́ əmə́g mə́ aŋwaʼlə maŋ lɔg nə́ ŋ́ŋwaʼlə̂ ə́wə́ á mbô pɨ nə́ apô mə!

¹² Pəənə ándó pó lɔ nə́ mə́ fyád nə́ wɨ́ ńgə́ pə póʼə wɨ́ lə́ pəənə ándó pó tə́ nə́ nɨd mbɨ əzoobə́, ḿbəənə̂ ńkɔ́ʼkə mbɨ əzɔb ńté mənu mə́ ndzəmə apeŋə́. Pó faʼ ndɛn mənu ghɛn lə́ ńté ńgə́ kɔ pə́ tsaŋkə̂ ághɔ́b ńté atǐəpagləpaglə Yeso.

¹³ Pɨ pə́ póʼ nə ághɔ́b pó kě azóobə́ noŋkə kə́ ńdzoŋə̂ pô, pó loonə̂ lə́ ńgə́ pə póʼə wɨ́ ńjî ńgə́ pó tíʼə ńtəələ̂ ńté na mbɨ əzəənə́.

¹⁴ Nə́ maŋ, maŋ yǐ təələ̂ azá ə́ té lə́ tsɔʼə atǐəpagləpaglə Mmaʼmbî əwɛ̂n Yeso Klisto, ńdaŋə̂ á mə́m atǐəpagləpaglə ají mbî ə́ kwûə á mbô maŋə, maŋ kə́ ńkwûə á mbô mbîə.

¹⁵ Kɨ pə́ póʼə mə, kɨ ńchî póʼ, lə́ kě anu yitsə̌ pô, mɛ́ anuə á mbô maŋ lə́ ńgə́ maŋ tíʼ lə́ ajú yə fîə.

¹⁶ Ńgɛn nə́ pɨ páʼ pö zoŋ nə́ anu zəənə́ á mə́m nchîmbî əzɔb, ńgə́ mbwɔ́dnə pó akóolə́mə́lə́ŋə Əsê ə́ chîə á mə́m pó ńkə́ ńchîə á mə́m pɨ pə́ Əsê pətsəmə.

¹⁷ Á mə́ lwigtə̂ nə́, kɔ ŋwu tsə̌ a kə́ ḿbɨ́ ə́fɛ̂ mə nə́ ngə́ʼə, ńté ńgə́ əlagə́ məfəŋ ə́ chî nə́ á mbɨ maŋ ə́ nɨd ńgə́ maŋ lə́ apoʼə Yeso.

¹⁸ Pəlim, ńgə́ apɔŋə́ntə́əmə Mmaʼmbî əwɛ̂n Yeso Klisto a chî nə́ pɨ tsɔʼə pɨ pətsəmə. Amɛn.