Galeshanə 5 - Əka yi Fîə

Yeso a Fógə Áwɛ̂nə á Mə́mə Apoʼə

¹ Ńgɛn nə́ anu ńté á mə́ fɛ́d nə́ á mə́mə apoʼ, Yeso a fógə áwɛ̂nə á mə́mə apoʼə. Lə́ á pə́ ńgə́ nə́ tɨ́ ńtyantə̂ ńkě kə́ ḿbɨ ḿbí pə́ néŋə áwə́ənə́ á mə́mə apoʼ pô.

² Jwə́ʼtə nə́, maŋ Pɔl, mäŋ sóŋə á mbô pɨ lə́ ńgə́ təmbɔʼ pɨ mɛdtə̂ mbɨ əzɨ ńgə́ pə póʼə áwɨ́, lə́ á pə́ ńgə́ Klisto a kě áwɨ́ nə́ anu yitsə̌ kwá pô.

³ Ngǎ yitsə̌ maŋ pɨ ńkə́ ńkwantə̂ a ŋwu ntsəm páʼ a mɛdtə̂ nə́ mbɨ əjǐ ńgə́ pə́ póʼə, lə́ á pə́ ńgə́ a chîə á mə́ shib nə́ zóʼnə á noŋkə ntsəmə.

⁴ Pɨ páʼ pɨ lɔ nə́ á mə́ tɨ́ nə́ koʼnə̂ á mbi Əsê əlaŋə̂ á pə́ mə́m noŋkə, nə́ fóg mbɨ əzəənə́ á mə́m Klisto, lə́ á pə́ ńgə́ nə́ fɛ́lə áwə́ənə́ á mə́mə apɔŋə́ntə́əmə Əsê.

⁵ Ńgɛn nə́ pəg, azə́gə́ akwaŋ pə̈g kwaŋ nə́ ḿbyáabə lə́ ńgə́ Əsê a yǐ ghɛd pəg tɨ́ ńkoʼnə̂ á mbi yə́. Lɛ̌ anu pə̈g pyáb nə́ ńdaŋə̂ á mə́m mətɨ mə́ Ajwi páʼ mə́ faʼ nə́ ńdaŋə̂ á mə́m mbimə́ əzəgə́.

⁶ Əghâ ándó pɛn pə́ nə táʼ nə́ Yeso Klisto lə́, kɨ pə́ póʼə a gho kɨ ńchî tə póʼ, kwúblə yitsə̌ á kě ə́wɨ́ chî pô, ndaʼə anu chî nə́ ə́wɨ́ lə́ tsɔʼə mbimə́ páʼ ə́ faʼ nə́ ńdaŋə̂ á mə́mə akɔŋnə.

⁷ Pɨ nə ńtə́ ə́faʼ əshîʼnə! Lə́ nə ńgɛd əwə ńgə́ pɨ mɛdtə̂ á mə́ tə́ nə́ zóʼnə ndə̌ŋdəŋə́?

⁸ Anu zəənə́ a kə ghɛd nə́ pɨ kwúblə məntɨ́ mɨ́ lə́ a kə kě lə́ á mbô Əsê lǒo pô.

⁹ “Pə́ lɔgə̂ lə́ tsɔʼə á mɔ́ mbê ńnéŋə á mə́mə akáŋə apéenə á kɔ́ʼə” tsɔʼə ndzaŋ pə̈ sóŋ nə́ lə́.

¹⁰ Maŋ néŋ ntɨ́ nə́ gho ńdaŋə̂ á mə́m Mmaʼmbî ńgə́ gho kě anuə ndaʼ yi pí ńdaŋə̂ yi páʼ mäŋ sóŋ nə́ pô. Lə́ ŋwu ntsəm páʼ a jwaʼ nə́ áwə́ənə́, kəənə a pə́ əwə, Əsê a yǒ néŋə atsáŋə á mbɨ yə́.

¹¹ Lə́ ńgɛn nə́ maŋ nə́ pəlimə́ mə, təmbɔʼ maŋ ghɛn nə́ mbiə á mə́ náŋkə nə́ nkɨ ńgə́ mə póʼ nə́ ŋwu lə́ anu yə əshîʼnə, lə́ pə́ ḿbɨ ńgɛlə̂ akə̂ pə́ pɛ́lə ńtsaŋkə̂ mə? Təmbɔʼ maŋ kə pěʼ ńtə́ ə́faʼ mbô anu zɨ, á pə́ ńgə́ nkɨ yi maŋ náŋkə nə́ ńgə́ Klisto a kə kwûə atǐə apagləpaglə lə́, ə́ yǐ ńkě nə́ ngə́ʼ yitsə̌ yǐ pô.

¹² Akwaŋə mə lə́ ńgə́ pəənə ándó pó jwaʼlə̂ nə́ áwə́ənə́, pó yǐ sə́ mbɨ əzoobə́.

¹³ Lə́ ńgɛn nə́ pɨ nə́ pəlimə́ mə, pə́ nə fógə áwə́ənə́ á mə́mə apoʼə. Lə́ kɔ nə́ ghɛd mə́ fɛ́d nə́ á mə́mə apoʼ mə́ pə́ pə́ ndú yitsə̌ nə́ yǐ nə́ tíʼə zóʼə á pə́ á mbô na mbɨ əzəənə́, anu təmbɔʼ nə́ ghɛd lə́ ńgə́ akɔŋnə á chîə á tətɨ pɨ ńgɛd ŋwu ntsəmə a tíʼə faʼə̂ á mbô mɔ́mɛ́ əyǐə

¹⁴ Ńté ńgə́ pə́ kyeetə̂ pənoŋkə pətsəm pə́ tíʼ fɛ́d nə́ táʼ noŋkə ghɛn mɔʼə́ ńgə́, “Gho kɔŋə̂ á ngaŋnəpad əgho ándó gho kɔŋ nə́ mbɨ əzo.”

¹⁵ Lə́ təmbɔʼ nə́ tə́ ńgɛlə̂ mənu mə́ənə́ ándó məna mə́ nəyeŋ, ńdímkə pɔ́pə́mɛ́ pɨ ḿbəənə̂ néŋə məfəŋ nə́ pó, nə́ lɔg ndɛd ńté ńgə́ təmbɔʼ nə́ kwéʼnə ḿbóg məmbɨ mə́ənə́.

Ajwǐəsê pó Məfaʼ mə́ Na Mbəəmə

¹⁶ Anu maŋ sóŋ nə́ lə́ ńgə́ nə́ mɛdtə̂ Ajwǐəsê á tə́gtə nchîmbî əzəənə́, ńjî ńgə́ kɔ nə́ ghɛd mənu páʼ na mbɨ lɔ nə́ ńgə́ pɨ ghɛlə̂.

¹⁷ Ńté ńgə́ anuə ándó na mbɨ əzɛ̂n lɔ nə́ lə́ kě yə́ ándó Ajwǐəsê lɔ nə́ pô, anuə ándó páʼ Ajwǐəsê lɔ nə́ lə́ kě kə́ ḿbə́ yi páʼ na mbɨ lɔ nə́ pô, pó pɛ́n pɛ̌ lə́ ngaŋkə́peenə́; zəənə́ nəələ̂ ńgə́ təmbɔʼ gho kě faʼə̂ anu páʼ gho lɔ nə́ á mə́ faʼ nə́ pô.

¹⁸ Təmbɔʼ Ajwǐəsê a chîə nətû gho, gho kě pɨ ḿbə́ apoʼə á mbô pənoŋkə pô.

¹⁹ Lɛ̌ ndzaŋə ándó məfaʼ mə́ na mbɨ mə́ chî nə́; mə́ nɨd mbɨ əjǐ á mə́m mə̂ghabə, á mə́m mənu mə́ kě nə́ ŋwaʼ pô, pó mənu mə́ əsə́ənə.

²⁰ Pó ghóʼkə məsê mə́ məfɨgə ńkə́ ə́fɛ́d ələəmə, pɨ pó sɛdnə̂ nə́ ńtúgə ŋwéetə́ á tətɨ pó ńkə́ ḿbóʼnə məlaʼə́, ńtúgə kəpeenə́ pópə azáŋə́ndé ḿbəənə̂ ńnáŋə tsɔʼə mənu mə́ mbɨ móobə́, ńchî nə́ azɔŋə, ńgabtə̂ məmbɨ móobə́ á mənchwa mənchwa ŋwunə chî nə́ əjǐ ndzəm ŋwunə chî nə́ əjǐə;

²¹ pó túgə ŋwéetə́ á ndumə apeʼə pəənə, ḿbəənə̂ ńnô ḿbɛ́ɛlə, ńjîə ńtóokə ndɛtə, ńkə́ ḿbəənə̂ ə́faʼə̂ mətsə́ mənu mə́ təpɔŋə. Maŋ kwantə̂ áwɨ́ əghâ nə́ tsɔʼə ndzaŋ maŋ nə kwantə̂ nə́ áwə́ənə́ á ntsɛɛmbi lə́ ńgə́: pəənə ándó pö faʼ nə́ ndɛn mənu ghɛn pó yǒ kě anuə nəfoonə Əsê jî pô.

²² Lə́ mənta páʼ Ajwǐəsê á zə́m nə́ mə́ pə́ ḿbə́ akɔŋnə, akɔŋtə, mbwɔ́dnə, asəgə́ntə́əmə, apɔŋə́ntə́əmə á mə́ ghɛd nə́ mənu mimə əshîʼnə, mə faʼ nə́ nə́ ntɨ́ ntsəmə,

²³ atsóokə́mbəəmə, ḿbɨ ḿbə́ nə́ awaamə́mbəəmə. Noŋkə yətsə́ á kě ə́wɨ́ chî páʼ á zɔŋ nə́ ndɛn mənu ghɛn pô.

²⁴ Pəənə ándó pó pə́ nə́ pɨ pə́ Yeso Klisto pó jwítə na mbəəmə, ndzoŋ ḿbá mənu mətsəm páʼ na mbɨ lɔ nə́ ńgə́ pó faʼə̂.

²⁵ Ajwǐəsê a fɛ̂ nchîmbîə á mbô pɛnə̂, lə́ tsɔʼə yí mbɔʼə a shib ńdɔg ndɛd nə́ nchîmbî əzɛnə̂.

²⁶ Kɔ pɛn tə́ ńkɔ́ʼkə mbəəmə, kɔ pɛn kə́ ńgɛd ŋwunə a záŋ ndě, kɔ pɛn kə́ ńtúgə ŋwéetə́ á ndu pətsə́ pəənə.