Galeshanə 4 - Əka yi Fîə

¹ Á mə́ ghɛn nə́ nə́ mbi, mɔ́ mbyâŋnə páʼ a pə́ nə́ njîndɛ̂ tǎ əyǐ ḿbɛ́d Mɔ̂nkə̂ lə́ a chî lə́ ándó apoʼə, páʼ apeʼə atsəmə á pǎ nə́ tə ḿbə́ ají lə́,

² əghâ páʼ a nə ḿbɛ́d nə́ Mɔ̂nkə̂ lə́, pɨ pə́ nə ńchî ə́wɨ́ páʼ pó nə̈ ńnáŋ nə́ yə́ ńkə́ ńdɔg ndɛd nə́ apeʼə ají tə ńkoʼ nə́ ndɛd páʼ tǎ əyǐə a nə ŋwaʼlə̂ nə́ ńgə́ pə́ yǒ fɛ̂ ajúmə atsəmə á mbô yə́.

³ Tsɔʼə nə́ ndú yí ə́wə́, pɛn nə ńkə́ ḿbə́ lə́ əpoʼə á mbô əjwi páʼ ə́ sáʼ nə́ mbîə, záʼ pɛn pɔŋə̂ ghɛd kwíŋ jîə ajú ndə̌ŋdəŋ á pə́ nə́ zə́ələ́.

⁴ Lə́ əghâ ándó chigə ndɛd yi əwɨ ə́ nə ńkoʼ nə́, Əsê a tú əyǐ Móonə, Məngyě a pîə yə́ á mə́m noŋkə Pəjusə,

⁵ á mə́ tsóʼ nə́ ətûə pɨ páʼ pó nə ńchî nə́ á mə́m noŋkə, ńjî ńgə́ pɛn ghɛd ńtíʼ ḿbə́ pɔ́ pə́ Əsê.

⁶ Á mə́ nɨd nə́ ńgə́ pɨ lə́ pɔ́ pí, Əsê a túmə Ajwiə Mɔ́ əyə́ a məntɨ́ pɛnə̂, Ajwi páʼ a kyéŋ nə́ ńgə́, “Aba, Tǎ mə.”

⁷ Ńdaŋ nə́ Əsê gho kě pɛ́d ḿbə́ apoʼ pô ńtíʼ ḿbə́ móonə. Ndzaŋə ándó gho tíʼ nə́ ḿbə́ mɔ́ əyǐ lə́, Əsê a yǐ fɛ̂ ajúmə atsəmə á mbô gho páʼ a túg nə́ á mbô pəjî pə́ məláʼ píə.

Ndzaŋə Ándó Pɔlə a nə Ńtúg nə́ Afɨnə Ńté Pɨ pə́ Galatya

⁸ Á nə ḿbə́ á ntsɛɛmbi lə́ pɨ nə ńkě Əsê jî pô, ńdaŋ ə́lɨ́d pɨ nə ńtíʼ ḿbə́ əpoʼə á mbô əpú páʼ ə́ nə ńkě nə́ məsê pô.

⁹ Lə́ nə́ əghâ páʼ pɨ jî nə́ Əsê, kɨ təmbɔʼ maŋ sóŋ ńgə́ əghâ nə́ páʼ Əsê a jî nə́ áwɨ́ lə́, lə́ ghɛlə̂ akə̂ nə́ pɨ ńdoonə̂ á mə́ sɛdnə̂ nə́ ə́ ghɛnə̂ á mbô Əjwi páʼ ə́ kě nə́ anu yətsə́ chî pô ńkě mətɨ kə́ ńtúg pô? Lə́ ghɛlə̂ akə̂ nə́ pəənə̂ ńkə́ ńdoonə̂ á mə́ pə́ nə́ əpoʼ pɔ́b ngǎ yitsə̌?

¹⁰ Nə́ chígə́ ńtúg əlěmbî pətsə́, pə́ sáŋ pətsə́, məndɛd mə́ mbî mətsə́ ḿbá məngoʼ mətsə́ ə́wə́.

¹¹ Ntə́əmə mə tə́ ńchígə́ ńjwaʼə̂ mə́ ńté áwə́ənə́! Təmbɔʼ á pə́ ńgə́ afaʼə mə atsəm ńté áwə́ənə́ á laŋ lə́ kətaŋə?

¹² Pəlimə́ mə, maŋ póʼ mbô á mbô pəənə́, chî nə́ ándó maŋə, ndzaŋ páʼ maŋ kə́ nə́ ńchîə ándó pəənə́, nə́ kě anu yətsə́ á mbô maŋ fankə̂ pô.

¹³ Təmbɔʼ nə kwúmtə anu á nə ńgɛd nə́ maŋ sóŋ nkɨ yi əshîʼnə á mbô pəənə́ á ntsɛɛmbi; Anu a nə ńgɛd nə́ lə́ ńté ńgə́ maŋ nə ńtə́ ńgoonə̂.

¹⁴ Pɨ nə ńkě mə nyáŋkə kɨ ńkǐ pô, páʼ á aghoonə́ mə á nə ḿbǎ nə́ tə ńchîə ándó tə́kɔʼ moomə á mbô pɨ lə́, pɨ pə́ ńdɔgə̂ mə əshîʼnə ándó ntseŋndɛ̂sê kəənə ándó Yeso Klisto.

¹⁵ Mbɨ əzɨ nə ḿbyádnə ḿbɔŋə̂! lə́ nə ńgɛlə̂ akə̂? Maŋ nə́ nkɔ̌ʼmbəəmə mə təmbɔʼ maŋ sóŋ ńgə́ pɨ nə ńchî mbɔʼ pɨ fóg məmɨ́ mə́g fɛ̂ nə́ maŋ, páʼ təmbɔʼ ndu nə ńchî ə́wə́.

¹⁶ Nə əghâ nə́ maŋ tíʼ ḿbə́ lə́ ngaŋkəpa əwɨ páʼ maŋ fiʼtə̂ nə́ áwɨ́ nə́ ndə̌ŋdəŋ?

¹⁷ Pətsə́ pɨ pə̂ pó pyádnə néŋə áwə́ənə́ á ntɨ́ pô, lə́ əkwaŋ mənu pɔ́b pə́ ńkě pɔŋ pô. Ndaʼə anu pó lɔ nə́ lə́ á mə́ shamkə̂ nə́ áwɛ̂nə, ńjî ńgə́ nə́ kə́ ńnéŋə ághóobə́ á ntɨ́ pɨ tsɔʼə ndzaŋ pó kə́ nə́ ńnéŋə áwə́ənə́ á ntɨ́ pó lə́.

¹⁸ Á pɔŋə̂ á mə́ túg nə́ akwaŋ yə əshîʼnə ńté pəənə, ńkě á pə́ tsɔʼə əghâ maŋ chî nə́ ə́wɨ́ pô.

¹⁹ Póonə mə pi əshîʼnə, ngǎ yitsə̌, tsɔʼə ándó məngyě a zóʼ nə́ mɔ́, maŋ kə́ ńdzóʼ ntê mbɛ́n yi wə́ ńté áwə́ənə́, tə ńkoʼ nə́ ndɛd páʼ mbɔ́ Klisto a yǒ nə́ ńchîə á mə́m pəənə́.

²⁰ Maŋ pyádnə ńkɔŋ ńgə́ mbɔʼ pɛn pěʼ ńchî əghâ nə́, ńjî ńgə́ maŋ kwúblə ngye atséebə mə, ńté ńgə́ ntə́əmə mə ə́ jwaʼə̂ mə ńté áwə́ənə́.

Aga Pó Sala Ándó Pəfiʼnəghɔlə

²¹ Fiʼtə̂ nə́ mə, pɨ páʼ pɨ kɔŋ nə á mə́ zoŋ nə́ noŋkə, pɨ kë zóʼə anu páʼ noŋkə á sóŋ nə́?

²² Ńté ńgə́ pə́ nə ŋ́ŋwaʼlə̂ ńgə́ Ablaam a nə ńtúg pɔ́ pə́ mbyâŋnə pə́ pɛ̌, táʼə a pə́ yə apoʼə məngyě, yitsə̌ mǎ əyǐə a kě apoʼ pô.

²³ Lə́ apoʼə məngyě zə̂ a nə ḿbə́ ḿbî əyǐ mɔ́ lə́ ńdzoŋ lə́ ndzaŋ na mbɨ sóŋ nə́, lə́ məngyě wə́ páʼ a nə ńkě nə́ pə́ apoʼ lə́ a pî əyǐ ńdzoŋ ndaʼnə Əsê.

²⁴ Zəənə́ á nəələ̂ áwɛ̂n lə́ nə́ anu yətsə́, pəngyě pɨ pɛn pɛ̌ pó tɨ́ lə́ ándó əka pɛn pɛ̌ pə́ wad nə́; Táʼə a fɛ́d lə́ á nkwəənə Sinayi ḿbîə pɔ́ pə́ apoʼə, məngyě wɨ́d ghɛnə́ a nə ḿbə́ Aga.

²⁵ Aga a tə́əmə ándó nkwəənə Sinayi á mə́m Alabya, a tɨ́ lə́ ándó aláʼə Jɛlusalɛm əghâ nə́, ḿbə́ apoʼ pópə pɨ pí pətsəmə.

²⁶ Lə́ Jɛlusalɛm páʼ a chî nə́ nəpó lə́ á kě lə́ apoʼ pô, lə́ yí ḿbə́ mǎ əwɛ̂nə.

²⁷ Ńté ńgə́ aŋwaʼlə Əsê a sóŋ ńgə́, “Kɔŋtə̂, məngyě tə pî! Póʼ ngoŋ ńkə́ ńkyéŋ nə́ akɔŋtə, gho páʼ gho kě nə́ mbɛ́n mə́ mɔ́ kə̂ zóʼə pô. Ńté ńgə́ məngyě páʼ pə́ kə myaʼ nə́, a yǐ túg pɔ́ pə́ nɨ́ nə́ tsɛɛlə̂ məngyě páʼ a zɔ́ʼ nə́.”

²⁸ Pəlimə́ mə, nə́ pə́ əghâ nə́, pɛn lə́ pɔ́ pə́ pî nə́ á mə́m ndaʼnə, tsɔʼə ndzaŋə ándó Azigə a chî nə́ lə́.

²⁹ Á nə ḿbə́ nə́ ndɛd yi ə́wɨ́ lə́ mɔ́ pə́ nə ḿbî nə́ ndzoŋ ndzaŋ na mbɨ ə́ sóŋ nə́ lə́, a tsaŋkə̂ yi páʼ pə́ nə ḿbî nə́ ńdzoŋ ndzaŋ Ajwǐəsê á sóŋ nə́, lə́ tsɔʼə ə́lɨ́d əghâ nə́.

³⁰ Lə́ aŋwaʼlə Əsê a sóŋ ńgə́ kə̂? Á sóŋ ńgə́, “Kəmə̂ apoʼə məngyě wə́ pó mɔ́ əyǐə, ńté ńgə́ móonə apoʼə məngyě wə́ təmbɔʼ a kě ndɛ̂ tǎ əyǐ jî pô, lə́ yǐ jî mɔ́ páʼ mǎ əyǐə a kě nə́ apoʼ pô lə́.”

³¹ Ńdaŋ ə́lɨ́d nə́ pəlimə́ mə, pɛn kě lə́ pɔ́ pə́ apoʼə məngyě pô, pɛn lə́ pɔ́ pə́ məngyě páʼ a kě nə́ lə́ apoʼ pô.