Galeshanə 3 - Əka yi Fîə

A Pɔŋ lə́ á mə́ Zoŋ nə́ Noŋkə kɨ Mbimə́

¹ Əkəkóg pɨ pə́ Galatya! lə́ fumkə̂ əwə fumkə̂ áwə́ənə́, Maŋ kwaŋ ńgə́ pə́ nə ḿbyádnə fiʼtə̂ áwɨ́ ndzaŋ páʼ Yeso Klisto a nə ńkwû nə́ atǐə apagləpaglə.

² Fiʼtə̂ nə́ mə tsɔʼə nə́ táʼə anu ghɛn mɔʼə́ ńgə́, pɨ nə ńkwáalə Ajwǐəsê lə́ ńdaŋ lə́ mə zóʼnə nə́ anu páʼ noŋkə ä sóŋ nə́ kɨ mə zóʼnə nə́ nkɨ yi əshîʼnə ə́ kə́ néŋ ntɨ́ əwə?

³ Nə́ lánə ńchígə́ ńgəənə̂ lɛ ə́lɛ́? Pɨ nə́ ńchwáakə lə́ nə́ Ajwǐəsê, á pɛn ḿbə́ əghâ nə́ nə́ tíʼə ńdoonə̂ lə́ á mə́ lwigtə̂ nə́ lə́ nə́ məmɨ́ mətɨ?

⁴ Lə́ ndə̌ŋdəŋ ńgə́ mənu mətsəm nə́ zɨ́ nə́ mə́ laŋ lə́ kətaŋə? Maŋ kwaŋ ńgə́ mə́ kə kwúnə anu yətsə́!

⁵ Əsê a fɛ̂ Ajwiə á mbô pɨ ńkə́ ə́faʼ əkɨʼnəmə́nuə á mə́m pɨ ńté lə́ ńgə́ nə́ faʼə̂ anu páʼ pənoŋkə pə́ nɨd nə́ kɨ ńté lə́ ńgə́ nə́ zóʼ nkɨ yi əshîʼnə wə́ ńkə́ néŋ ntɨ́ ə́wə́?

⁶ Ablaam a nə “Néŋ ntɨ́ əyí nə́ Əsê, ńdzoŋ nə́ mbimə́ əjǐ Əsê a pímə yə́ ándó ŋwunə a tɨ́ nə́ ndə̌ŋdəŋə́.”

⁷ Ńdaŋ ə́lɨ́d nə́ chîə á mə́ pyádnə nə́ jî ńgə́ chigə pɔ́ pə́ Ablaam lə́ pɨ pə́ túg nə́ mbimə́.

⁸ Aŋwaʼlə Əsê kə pɛ́d tə fiʼtə̂ á ngoʼ pəchə́ ńgə́ Əsê a yǒ ghɛd Pətəjǐsê pó tɨ́ ńkoʼnə̂ ńdaŋə̂ á mə́m mbimə́. Ńdaŋ ə́lɨ́d aŋwaʼlə Əsê á tíʼ ńnáŋkə nkɨ yi əshîʼnə á mbô Ablaam ndɛd pɔŋə̂ koʼə̂, ə́sóŋ ńgə́: “Ńdaŋ nə́ gho Əsê a yǒ fɛ̂ afoʼə á mbô ŋwu mbî ntsəmə.”

⁹ Ndzaŋ Ablaamə a nə néŋ nə́ ntɨ́ yí nə́ Əsê lə́, Əsê a fɛ̂ afoʼə ají, ńdaŋ ə́lɨ́d ŋwu ntsəm páʼ a néŋ nə́ ntɨ́ yí nə́ Əsê, a yǐ kə́ túgə afoʼə ándó Ablaamə.

¹⁰ Pɨ páʼ po faʼ nə́ ńdzoŋə̂ á pə́ noŋkə, ndɔ ə́ chîə atû pó. Ńté ńgə́ aŋwaʼlə Əsê á sóŋ ńgə́, “Ndɔ Əsê ə́ tə́əmə atû ŋwu ntsəm páʼ a kě nə́ tə́ ńdzóʼnə mənu mətsəm páʼ pə́ ŋwaʼlə̂ nə́ á mə́m noŋkə pô.”

¹¹ Nə́ əghâ nə́ a pyádnə ŋwaʼ ńgə́ ŋwu tsə̌ a kě tɨ́ ńkoʼnə̂ á mbi Əsê ńdzoŋ lə́ noŋkə pô, ńté ńgə́ aŋwaʼlə Əsê á sóŋ ńgə́, “Ŋwu páʼ a tɨ́ nə́ ndə̌ŋdəŋə́ á mbi Əsê ńdaŋə̂ á mə́m mbimə́ a yǒ jî mbîə.”

¹² Lə́ noŋkə á kə̌ túgə anu yətsə́ á mə́ faʼ nə́ pó mbimə́ pô, á chî lə́ ńté ńgə́ aŋwaʼlə Əsê á sóŋ ńgə́, “Ŋwu ntsəm páʼ a faʼ nə́ anuə atsəm páʼ noŋkə á sóŋ nə́ a yǒ jî mbî ńté noŋkə.”

¹³ Klisto a nə ńtsóʼə atûə azɛ̂nə á mə́m ndɔ noŋkə, ndzaŋ yí nə́ nkɔ̌ʼmbɨ yə́ a nə ḿbɨ nə́ sɛdnə̂ ńtíʼ ḿbə́ ndɔ ńté atûə azɛ̂n lə́, ńté ńgə́ aŋwaʼlə Əsê á sóŋ ńgə́ “Ndɔ ə́ chîə atû ŋwu ntsəm páʼ a lə́ŋ nə́ atûə atǐə.”

¹⁴ Yeso Klisto a nə ńgɛlə̂ zɨ́d zɨ lə́ ńjî ńgə́ afoʼ zɨ páʼ Əsê a nə ńdaʼnə̂ nə́ á mbô Ablaam lə́ á fɛ̂ zə́ələ́ á mbô Pətəjǐsê ńdaŋə̂ á ndzəm Yeso Klisto, ńjî ńgə́ ńdaŋə̂ á mə́m mbimə́ pɛn kwáalə Ajwi páʼ Əsê a nə ńdaʼnə̂ nə́.

Noŋkə á nə Ńkě Ndaʼnə Əsê Kwúblə pô

¹⁵ Pəlimə́ mə, tíʼ maŋ lɔgə̂ fiʼ nəghɔd mənu mə́ ŋwu məsɔŋə́ əlě ntsəmə, təmbɔʼ pɨ pə́ pɛ̌ pó pímnə nə́ anu tə ńgwad əka əwɨ́, təmbɔʼ ŋwu tsə̌ a kě wɨ́d shaʼtə̂ kɨ ḿbegə̂ ajûtsə́ ə́wɨ́ pô.

¹⁶ Əsê a nə ńgɛd ndaʼnə lə́ á mbô Ablaam pó mɔ́ əyǐə. Ńkě sóŋ lə́ ńgə́ “pɔ́ pô” ńkě kə́ sóŋ lə́ ńgə́ pɔ́ pipə nɨ́ nə́ pô, a nə sóŋ lə́ tsɔʼə ńgə́ “pɨ mɔ́ əgho” páʼ a pə́ nə́ lə́ Klisto.

¹⁷ Anu páʼ mäŋ sóŋ nə́ lə́ ńgə́ Əsê a nə ńgwad əka pó Ablaam ńkə́ ńdaʼnə̂ á mə́ lɔʼkə̂ nə́ áwə́ələ́. Noŋkə páʼ pə́ nə fɛ̂ nə́ áwɨ́d lə́ ngoʼ nkɛd nəkwa nə́ ngoʼ məghə́m mɛ́n teelə́ təmbɔʼ wə́ələ́ á kě əka wə́ shaʼtə̂ kɨ shígtə ndaʼnə Əsê pô.

¹⁸ Lə́ təmbɔʼ Əsê a fɛ̂ əpúmə á mbô pɛn ńté á pə́ ńgə́ pɛn tə́ ńdzoŋə̂ noŋkə, lə́ á pə́ ńgə́ a kě pɛ́lə ńdzoŋə̂ lə́ ndaʼnə əjǐ pô. Lə́ Əsê a nə fɛ̂ məfɛ̂nə á mbô Ablaam lə́ ńdzoŋ lə́ ndaʼnə páʼ a nə fɛ̂ nə́ á mbô yə́.

¹⁹ Nətɛ́n nə́ anu páʼ noŋkə á nə nɨd nə́ lə́ ńgə́ akə̂? Əsê a nə ḿbegə̂ á noŋkə lə́ á mə́ ghɛd nə́ ŋwunə a jîə təpɔŋ əyǐə, tə ńkoʼ nə́ ndɛd páʼ Mɔ́ wə́ Əsê a nə ńgɛd nə́ ndaʼnə pó yí lə́ a yǐ nə́ yǐəə. Pə́ kə fɛ̂ noŋkə a laŋ lə́ á mbô pətseŋpə́ndɛ́pə́sê ńkwúnə á mbô Mosisə, a tíʼ faʼə̂ a tətɨ pɛ̌npə Əsê.

²⁰ Əghâ nə́, pə́ kě ŋwunə a yǐ nə́ faʼə̂ tətɨ tə́ náŋə páʼ təmbɔʼ a pə́ tsɔ́ʼə táʼ ŋwu pô; ŋwu ghɛn lə́ Əsê.

Nətɛ́n nə́ Anu ńté Noŋkə

²¹ Zəənə́ á nəələ̂ lə́ ńgə́ noŋkə a kǐ məndaʼnə mə́ Əsê? Ngá! Lə́ kě ə́lɨ́d pô, ńté ńgə́ təmbɔʼ pə́ nə ə́fɛ̂ noŋkə wə́ələ́ chî mbɔʼ á fɛ̂ nchîmbî, tə ḿbə́ ŋwu ntsəmə a pěʼ ńtɨ́ ndə̌ŋdəŋ pó Əsê ńdaŋə̂ ndzəm wə́ələ́.

²² Lə́ aŋwaʼlə Əsê á pə́ sóŋ ńgə́ mbî ntsəm chîə atsáŋə á mə́m mbô mə́ təpɔŋə, ńjî ńgə́ məfɛ̂nə páʼ pə́ laʼnə̂ mɨ́d ńdzoŋə̂ nə́ mbimə́ á mə́m Yeso Klisto pə́ yǐ fɛ̂ á mbô pɨ pó néŋ nə́ ntə́əmə.

²³ Záʼ ndɛd mbimə́ nə ńjǐ tə́ yǐəə lə́, noŋkə a fwɔnə̂ áwɛ̂n pətsəmə ándó ngaŋə́tsáŋə lə́ ńkoʼ nə́ ndɛd Əsê a yǐ nə kyaʼə̂ áwɛ̂n nə́ mbimə́ zəənə́.

²⁴ Lə́ pə́ ńgə́ noŋkə a nə ńtúgə áwɛ̂n tə ńkoʼ lə́ nə́ ndɛd páʼ Yeso a nə ńgyǐ nə́, ńjî ńgə́ pɛn tíʼ ńtɨ́ ńkoʼnə̂ pɛ̌npə Əsê ńdaŋ nə́ mbimə́.

²⁵ Nə́ əghâ nə́ páʼ mbimə́ yǐ nə́ lə́, noŋkə á kě áwɛ̂n pɛ́d ńtúg pô.

²⁶ Ńté ńgə́ á mə́m Yeso Klisto pɨ pətsəm lə́ pɔ́ pə́ Əsê ńdaŋə̂ á mə́m mbimə́.

²⁷ Ńté ńgə́ pɨ nə ńkwá nkǐ nə́ əlɛ́n Yeso Klisto lə́ á pə́ ńgə́ nə́ sɛdnə̂ ńtíʼ ńtúgə mbɔ́ Yeso Klisto.

²⁸ Lə́ á pə́ ńgə́ kwúblə yitsə̌ á kě chîə á tətɨ Pəjusə pó Pətəjǐsê pô, kwúblə yitsə̌ á kě chîə á tətəənə apoʼ pó ŋwu páʼ a kě nə́ apoʼ pô, kwúblə a kě kə́ ńchîə á tətɨ ŋwu mbyâŋnə pó məngyě pô, ńté ńgə́ pɨ pətsəm tíʼ ḿbə́ lə́ táʼə á mə́m Yeso Klisto.

²⁹ Təmbɔʼ gho chîə á mə́m Klisto, lə́ á pə́ ńgə́ pɨ lə́ pɔ́ pə́ Ablaam, ḿbə́ pəjî pə́ məláʼ ńdzoŋ ndzaŋ ndaʼnə Əsê ə́ sóŋ nə́.