Galeshanə 1 - Əka yi Fîə

¹ Aŋwaʼlə zəənə́ á lǒo lə́ á mbô maŋ Pɔlə, lə́ nə ńkě ŋwu mbî tsɔ́ʼ ńtsɔ́ʼə mə ńgə́ maŋ pə́ ntú Yeso Klisto pô, kɨ lə́ nə ńkě mətɨ mə́ ŋwu mbî ghɛd ńgə́ maŋ pə́ ntú Klisto pô, lə́ nə́ ḿbə́ Yeso Klisto pó Əsê a pə́ nə́ Tǎ a kə júmkə nə́ yə́ á nəwûə.

² Pəlim pətsəmə á mə́m Yeso pó chî nə́ aliʼə́ nə́ pó kyeetə̂ pə̌gpo á mə́ tú nə́ achaʼtə á mbô mənkyeetə mə́ pɔ́ pə́ Əsê á mə́m Galatya.

³ Apɔŋə́ntə́əmə Əsê nə́ mbwɔ́dnə lǒo nə́ á mbô Tǎ əwɛ̂n Əsê pó Mmaʼmbî Yeso Klisto ə́ chîə a mə́m pəənə́.

⁴ Ńjî ńgə́ tə mbɔʼ á chwádkə áwɛ̂nə á mə́m ndɛd mbî təpɔŋ zɨ, Klisto a fɛ̂ mbɨ əjǐ ńté a təpɔŋ əwɛ̂nə, pɛ́n zóʼnə anu Əsê páʼ a pə nə́ Tǎ əwɛ̂nə a lɔ nə́.

⁵ Nəgháʼə á chîə á mbô Əsê ḿmɛdnə̂ ngǎ mɔʼə́! Amɛn.

Lə́ Ndaʼ Táʼ Nkɨ yi Əshîʼnə

⁶ Á pyádnə ńkɨʼnə̂ a mə ńgə́ pɨ nə́ ńgə́glə ńkǐə áwə́ənə́ a ŋwu páʼ a fóŋ nə́ áwɨ́ ńdaŋə̂ á ndzəmə apɔŋə́ntə́əmə Klisto, ńtíʼə ńdzoŋə̂ á pə́ nkɨ yi əshîʼnə yi ndaʼə.

⁷ Lə́ ndə̌ŋdəŋ ńgə́ “Nkɨ yi əshîʼnə yi ndaʼ,” ə́ kě ə́wɨ́ chî pô, lə́ mäŋ sóŋə anu zɨ lə́ ńté ńgə́ pɨ pətsə́ pó chî əwɨ́ páʼ pó jwaʼlə̂ nə́ məntɨ́ mɨ́ ḿbəənə̂ ńkə́ ńdoonə̂ á mə́ kwúblə nə́ nkɨ yi əshîʼnə Klisto wə́.

⁸ Lə́ təmbɔʼ á pə́ pəg, kɨ ntseŋndɛ̂sê a lǒo nə́ nəpó ńtə́ sóŋə anǔəsê á mbô pɨ ńté nkɨ yi əshîʼnə páʼ ə́ pə nə́ yi ndaʼ ńdaŋə̂ yi páʼ pəg sóŋ nə́ á mbô pɨ lə́, tə ḿbə́ ndɔ Əsê ə́ chîə atû yə́.

⁹ Pəg nə ḿbɛ́d tə ə́sóŋə zəənə́ a ntsɛɛmbiə, lə́ nə́ əghâ nə́ maŋ kə́ ḿbɨ ḿbégnə ə́sóŋə zɨ́d ngǎ yitsə̌, təmbɔʼ ŋwu tsə̌ a sóŋə anǔəsê á mbô pɨ ńté nkɨ yi əshîʼnə páʼ ə́ pə́ nə́ yi ndaʼ ńdaŋə̂ a yi páʼ pɨ nə́ ḿbí nə́ lə́, tə ḿbə́ ndɔ Əsê ə́ chîə atû yə́.

¹⁰ Nə́ kwaŋ ńgə́ maŋ tséebə ńdoonə̂ lə́ ńgə́ pɨ pə́ zə́ənə á mə ándó ŋwu yi əshîʼnə? Lə́ kě ə́lɨ́d pô, anu páʼ maŋ lɔ nə́ lə́ ńgə́ Əsê a zə́ənə mə ándó ŋwu yi əshîʼnə. Nə́ kwaŋ ńgə́ maŋ loonə̂ lə́ á mə́ ghɛd nə́ mbɨ pɨ ə́ pɔŋ ńté mə? təmbɔʼ maŋ nə ńtə́ ńdoonə̂ lə́ ə́lɨ́d tə ḿbə́ maŋ kě lə́ ngaŋəfaʼ Klisto pô.

Ndzaŋ Páʼ Pɔlə a nə Ḿbə́ nə́ Ntú Yeso

¹¹ Tíʼ maŋ fiʼtə̂ áwə́ənə́ á ḿbə́ pəlimə́ mə, ńgə́, nkɨ yi əshîʼnə páʼ mäŋ náŋkə nə́ lə́ kě ŋwu mbî ghɛd pô.

¹² Maŋ nə ńkě kwáalə áwɨ́d lə́ á mbô ŋwu mbî yitsə̌ pô, ŋwu mbî yitsə̌ a kě mə ə́wɨ́ kə́ ńdzéʼkə pô. Lə́ nə ńgɛd Yeso Klisto nə́ nkɔ̌ʼmbɨ əyí maŋ jîə á wə́ələ́.

¹³ Pə́ kə fiʼtə̂ áwɨ́ ndzaŋ maŋ nə́ ńchî nə́ lə́ ńchîə əghâ ándó maŋ nə fɛ̂ nə́ mbəəmə mə á mə́m anǔəsê Pəjusə lə́; ndzaŋ páʼ maŋ nə̈ ńtsaŋkə̂ nə́ nkyeetə pɔ́ pə́ Əsê tə akóolə́mə́lə́ŋ, ḿbɨ ə́fǔəlóʼə á mə atsəmə á mə́ tsəŋkə̂ nə́ wə́ələ́.

¹⁴ Á mə́m nkaŋə mə tsɔʼə ətsəm pə́ nə ḿbî nə́ áwə́g pó maŋ nə́ ńtyantə̂ nə́ nə́ anǔəsê Pəjusə ńtsɛɛlə̂ ághɔ́b pətsəmə, ńkə́ néŋ ntə́əmə mə nə́ pənoŋkə pə́ pətǎ pə́ pətǎ pə́gə.

¹⁵ Lə́ Əsê á mə́m apɔŋə́ntə́əmə ajíə a tsɔ́ʼə mə záʼ pə́ yǒ ḿbɔŋə̂ pîə mə, ńtíʼ ə́fóŋə mə ńgə́ maŋ faʼə̂ á mbô yə́. Lə́ əghâ páʼ a nə kɔŋ nə́

¹⁶ a nəələ̂ a Mɔ́ əyə́ á mbô maŋə, ńjî ńgə́ təmbɔʼ maŋ fiʼtə̂ Nkɨ yi Əshîʼnə á mbô Pətəjǐsê, maŋ nə ńkě ntəgə́ á mbô ŋwu náŋ pô,

¹⁷ maŋ nə ńkě kə ńgɛnə̂ á Jɛlusalɛm á mə́ náŋ nə́ məntú mə́ Yeso mə́ chî nə́ á mbi maŋ pô. Əghâ wɨ́d wə́ lə́ maŋ nə ḿbɨ ńtíʼ ńgɛnə̂ a pə́ Alabya ḿbɨ ńtíʼ ḿbəənə̂ á Damakɔsə.

¹⁸ Lə́ ngoʼ teelə́ ə́ laŋ, maŋ kɔ́ʼ ńgɛnə̂ á Jɛlusalɛmə á mə́ ghá nə́ Pita, ńchî pəg yí nə́ əlě mbî ntsɔb tênə.

¹⁹ Maŋ kə kě ntú Yeso yi ndaʼ zɨ́ tə ńdéʼtə Jɛmsə mɔ́mɛ́ Mmaʼmbîə.

²⁰ Anu páʼ maŋ ŋwaʼlə̂ nə́ lə́ ndə̌ŋdəŋə́, Əsê a jî ńgə́ maŋ kě lə́ ntsɨd tsəələ̂ pô.

²¹ Ndɛd yətsə́ yi ńdaŋ, maŋ ghɛn nə mboʼ Silya ńkə́ ńgɛnə̂ mboʼ Silisya.

²² Nə́ əghâ wɨ́d wə́ pɨ páʼ pó nə ńchî nə́ á mə́m mənkyeetə mə́ pɔ́ pə́ Əsê á Judya pó nə ńkě mə kə́ zə́ənə pô.

²³ Pó nə ńjî lə́ tsɔʼə anu pɨ pə́ nə sóŋ nə́ ńgə́, “Ŋwu páʼ a nə ńchî nə́ ńtsaŋkə̂ áwɛ̂n a pɨ ńtíʼə ə́sóŋə anu ńté mbimə́ páʼ a nə ńdɔ nə́ á mə́ shamkə̂ nə́.”

²⁴ Ńdaŋ ə́lɨ́d pó tíʼ ŋ́ŋáŋkə Əsê ńté mə.