Filipyanə 4 - Əka yi Fîə

Məntəgə́ mə́ Pɔlə

¹ Pəlimə́ mə, lə́ á pə́ ńgə́ maŋ pyádnə ńkɔŋə̂ áwə́ənə́, pɨ pɨ́ ḿbéŋə á əmə́g maŋə! Nə ghɛlə̂ mbəəmə mə ə́ pɔŋə̂, maŋ pɨ ńkə́ ńtəələ̂ ńté áwə́ənə́! Pəlim, lə́ ndzaŋ təmbɔʼ nə́ tɨ́ ńtyantə̂ á mə́m nchîmbî əzɨ pɨ pə́ Mmaʼmbîə.

² Judya, pɨ Sɛnchə, maŋ póʼ mbô á mbô pɨ ńgə́ nə́ náŋ ndúmə á mə́ pímnə nə́ ándó pəlimə́ ándó pó néŋ nə́ ntɨ́ nə́ Mmaʼmbîə.

³ Ńgɛn nə́ gho páʼ pɔ̈ təb nə́ ako faʼə̂, ghö faʼə̂ nə́ ntɨ́ əgho ətsəm lə́, maŋ lɔ nə́ ńgə́ gho kwá pəngyě pəənə́; ńté ńgə́ pó kə pyádnə ə́faʼ pə̌gpo á mə́ náŋkə nə́ nkɨ yi əshîʼnə wə́, ńdzoŋ ḿbegə̂ Klɛmɛn ə́wɨ́ pópə pətsə́ pɨ pətsəm pə̌gpo nə̈ ńtəb nə́ ako ə́faʼə̂ páʼ məlɛ́n mɔ́b mə́ chî nə́ á mə́mə aŋwaʼlə Əsê yə́ pɨ páʼ pó chî nə́ á mbîə.

⁴ Tə́ nə́ ńkɔŋtə̂ ńté ńgə́ nə́ chî pɨ pə́ Mmaʼmbîə, maŋ kə́ ḿbəənə̂ ḿbégnə sóŋə lə́ sóŋ nə́; kɔŋtə̂ nə́!

⁵ Pwɔ́dnə á mbô ŋwu ntsəmə. Mmaʼmbîə a tə́ ńgyǐəə tsɔʼə ngǎ pɛ̌.

⁶ Kɔ nə́ tə́ ńjwaʼ mbɨ əzɨ ńté anu yətsə́. Lə́ á mə́mə achaʼtə́sê azɨ́ pətsəm, pítə nə́ Əsê nə́ ajú nə́ kě nə́ túg pô, əghâ ətsəm nə́ tə́ nə́ ḿbítə yí nə́ kə́ ńtə́ fɛ̂ ndǎ əjǐ nə́ mənu páʼ ä faʼ nə́.

⁷ Təmbɔʼ nə́ ghɛd ə́leenə́, mbwɔ́dnə Əsê páʼ təmbɔʼ ŋwu mbî yitsə̌ a kě jî ndzaŋ zɨ́d chî nə́ pô, ə́ yǐ ńgɛd məntɨ́ mɨ́ pópə akwaŋə́nuə azɨ́ mɛdnə̂ á mə́m Yeso Klisto.

⁸ Pəlim, á mə́ lwigtə̂ nə́ maŋ loonə̂ ńgə́ nə́ lwɛ́nkə akwaŋə́nuə azɨ́ nə́ mənu páʼ mə́ pɔŋ nə́ páʼ təmbɔʼ ŋwunə a jɨ́ ńtséʼə: ḿbə́ ndə̌ŋdəŋə́ anu, mənu pɨ pə́ zóʼnə nə́, mənu mə́ koʼnə̂ nə́, mənu mimə ŋwaʼ nə́, mənu pɨ pə́ kɔŋ nə́, ḿbɨ́ ḿbə́ nə́ mənu mə́ pɔŋ nə́.

⁹ Mənuə ándó páʼ pɨ zéʼ nə́, ńkwáalə, ńdzóʼə ńkə́ ńdzə́ənə á mbô maŋə, faʼ nə́ mə́ələ́, ńjî ńgə́ Əsê páʼ a túg nə́ mbwɔ́dnə a chî pɨ po.

Pɔlə a Fɛ̂ Ndǎ á Mbô Pəfilipyan nə́ Əpú pó kə Fɛ̂ nə́ á Mbô Yə́

¹⁰ Lə́ chigə mɛ́ akɔŋtə á mə́m nchîmbîə mə pəg Mmaʼmbî ńgə́ a pǎtə ńchî lɛ ti lə́, nə́ pə́ ńkə́ ḿbɨ ḿbɛ́d ńkwúmtə á mə́ nɨd nə́ mə ńgə́ nə́ kě mə ləgnə̂ pô. Maŋ sóŋ ńgə́ ndi sag lə́ á kě pə́ lə́ ńgə́ nə́ myaʼə̂ mə pô. Nə kə kě lə́ əsa yi wɨ́ túgə á mə́ nɨd nə́ akɔŋnə yə wɨ́ pô.

¹¹ Maŋ kě jɨ sóŋə ńté lə́ ńgə́ maŋ tə́ ńkwaŋə̂ ńgə́ pɨ kě ajú nə́ maŋ fɛ̂ pô, maŋ pɛ́dtə ńdzéʼə á mə́ kɔŋtə̂ nə́ mə́mə ajúmə atsəm maŋ túg nə́.

¹² Maŋ jî ndzaŋ á chî nə́ páʼ təmbɔʼ ŋwunə a tə ḿbóŋə ńkə́ ńjî ndzaŋə á chî nə́ páʼ təmbɔʼ ŋwunə a pyádnə ńtúgə. Maŋ zéʼə anuə nəlyaŋnə́ zɨ ńjî ńgə́ aliʼə́ atsəm, əghâ ətsəm maŋ chî təmbɔʼ maŋ kɔŋtə̂ nə́ ajúmə atsəm maŋ túg nə́, kɨ maŋ jî ńdzɛ́d kɨ ńchîə á pə́ nə́ nji, kɨ maŋ túgə á nɨ́ kɨ ńkə́gə.

¹³ Mbɔʼ maŋ faʼ mbô anu ntsəm ńdaŋə̂ á mə́m mətɨ Klisto a fɛ̂ nə́ nə́ maŋə.

¹⁴ Lə́ nə kə ghɛlə̂ á pyádnə ḿbɔŋ ndzaŋ nə kə kwá nə́ mə á mə́m məngə́ʼə mə lə́.

¹⁵ Pɨ Pəfilipyan nə́ pyádnə ńjî ńgə́ nə́ ndɛlə́ ándó maŋ kə fɛ́d nə́ Masedonya, əghâ ándó maŋ kə chúʼ nə́ á mə́ náŋkə nə́ Nkɨ yi əshîʼnə lə́, pɨ nə ḿbə́ lə́ ndaʼ nkyeetə pɔ́ pə́ Əsê páʼ pɨ nə́ ḿbí nə́ á mə́ faʼ nə́ pɛnə̂. Lə́ nə ḿbə́ ndaʼ pɨ páʼ pɨ nə́ fɛ̂ nə́ əpúmə á mbô maŋ ńkə́ ńkwáalə á mbô maŋə.

¹⁶ Lə́ kě tsɔʼə táʼ nga páʼ maŋ kə chî nə́ á Tɛsalonika ńtə́ ńdoonə̂ akwáalə á mbô pɨ nə́ fɛ̂ zɨ́d nə́ maŋ pô.

¹⁷ Lə́ kě pə́ tsɔʼə ńgə́ maŋ tə́ ńdoonə̂ á mə́ kwá nə́ əpúmə á mbô pɨ pô, maŋ loonə̂ azá lə́ pə́ ńgə́ nə́ jîə ape, zə́ələ́ kə́ ńkwíŋə.

¹⁸ Lɛ̌ aŋwaʼlə páʼ á nɨd nə́ ajúmə atsəm nə́ fɛ̂ nə́ nə maŋə - pɨd kə nɨ́ tə́ ńdaŋə̂! Nə́ əghâ nə́ maŋ túgə ajúmə atsəm maŋ lɔ nə́ ńté ńgə́ Ɛpafloditusə a yǐ nə́ əpú ətsəm nə́ fɛ̂ nə́ ńgə́ a fɛ̂ nə́ maŋə. Əpú pə́ ə́wɨ́ ə́ chî lə́ ándó akáŋə́sê yə lɨ nə́ á mbô Əsê, ándó afyaʼə́nu páʼ Əsê a pí nə́ zɨ́d ńkə́ ńkɔŋə̂ ázə́ələ́.

¹⁹ Ndzaŋ Əsê mə ə́ túg nə́ afoʼ yə nɨ́ nə́ lə́, a yǐ fɛ̂ ajúmə atsəmə á mbô pɨ nə́ lɔ nə́ əlaŋə̂ á mə́m Klisto Yeso ə́ zoŋ ndzaŋ afoʼə ajíə a chî nə́.

²⁰ Nəgháʼə á chîə á mbô Əsê páʼ ə́ pə́ nə́ Tǎ əwɛ̂n tə ḿmɛdnə̂! Amɛn.

Ndwigtə Achaʼtə

²¹ Achaʼtə á mbô pɨ pə́ Əsê pətsəm pó chî nə́ á mə́m Klisto Yeso, pəlim páʼ pə̌gpo chî nə́ aliʼə́ nə́ pó tə́ ńchaʼtə̂ áwə́ənə́.

²² Pɨ pə́ Əsê pətsəmə aliʼə́ nə́ pó túmə achaʼtə á mbô pəənə́, pɨ pó chî nə́ á ntɔ́ʼ əfo Lom pó pyádnə ńtə́ ńchaʼtə̂ áwə́ənə́.

²³ Apɔŋə́ntə́əmə Mmaʼmbî Yeso Klisto a chî nə́ pɨ pətsəmə.