Filipyanə 3 - Əka yi Fîə

Mə́ Chígə́ nə́ Tɨ́ Ndə̌ŋdəŋə́

¹ Pəlimə́ mə, á mə́ lwigtə̂ nə́, tə́ nə́ ńkɔŋtə̂ ńgə́ nə́ chî pɨ̌pə Mmaʼmbîə. Á kě mə jwaʼə̂ á mə́ pégnə nə́ anu maŋ nə ḿbeg nə́ ŋ́ŋwaʼlə̂ á mbô pɨ pô. Ńté ńgə́ a yǐ pɔŋə̂ á mbô pɨ páʼ təmbɔʼ maŋ ghɛd lɛ̌.

² Lɔg nə́ ndɛd nə́ pɨ páʼ pö ghɛd nə́ mənu mə́ təpɔŋə, məngwû mə́, páʼ pó sóŋ nə́ ńgə́ pó yǐ shib kə́ʼtə na mbəəmə;

³ Lə́ pɛn páʼ pɛn pə́ nə́ chigə pɨ páʼ pə́ póʼ nə́ ághóobə́, lə́ kě pó pô, ńté ńgə́ pɛn ghóʼkə Əsê ńdaŋə̂ lə́ á mə́mə Ajwiə ajíə, ḿbəənə̂ ńkɔŋtə̂ á mə́m nchîmbî əzɛ̂n ńté ńgə́ lə́ chî pɛn pə́ Yeso Klisto. Pɛn kě ntɨ́ əwɛ̂n nə́ na mbɨ néŋ pô.

⁴ Təmbɔʼ maŋ kə ḿbɛ́d ńnéŋ ntə́əmə mə nə́ mbô mənu mimə wə́. Təmbɔʼ ŋwu tsə̌ a kwaŋ ńgə́ təmbɔʼ a néŋ ntɨ́ yə́ á pə́ nə́ mənu páʼ pə́ faʼ nə́ á pə́ nə́ na mbɨ tə ḿbə́ maŋ tsɛɛlə̂ ághɔ́b pətsəmə

⁵ Pə́ kə póʼə a mə páʼ maŋ pə́ nə́ táʼ ngeebə. Maŋ lə́ pî ŋwu Islɛlə, ə́fɛ́d nə́ əla Bɛnjamɛnə, chigə pî Pəyiblus. Ndzaŋə ándó mə zoŋ nə́ á noŋkə á nə ḿbə́ nə́, maŋ nə ḿbə́ lə́ ŋwu Falasi,

⁶ ńkwéʼnə ńnéŋ ntə́əmə mə wɨ́ nə́ ndú ətsəm tə ńtíʼə ńtsaŋkə̂ nkyeetə pɔ́ pə́ Əsê. Ńgɛn nə́ anu ńté mə́ zóʼ nə́ anu páʼ noŋkə á sóŋ nə́, maŋ kə tɨ́ ndə̌ŋdəŋ, ńkě awǔənu túg pô.

⁷ Mənu mə́ mətsəm páʼ təmbɔʼ maŋ jîə ape ə́wɨ́ maŋ lɔgə̂ á mɨ́d əghâ nə́ ándó péŋ ńté Klisto.

⁸ Lə́ kě lə́ tsɔʼə mənu mɨ́d mə̂ pô, maŋ lɔg ńgə́ maŋ péŋə ajúmə atsəm ńté ajú páʼ á pyádnə nə́ ə́səglə̂ ńtsɛɛlə̂ ajúmə atsəmə ḿbə́ ajíənu ńté Klisto Yeso a pə́ nə́ Mmaʼmbîə. Ńté atûə ají maŋ myaʼə̂ ajúmə atsəmə, ńdɔgə̂ zə́ələ́ ándó pə́pə̌ məkɔ́lə, ńjî ńgə́ təmbɔʼ azéemə ape á pə́ Klisto

⁹ pəg yí tíʼ ḿbə́ táʼə. Maŋ kě mə́ tɨ́ nə́ ndə̌ŋdəŋ páʼ mə́ pə́ nə́ məmá túg pô, yə ándó páʼ pə́ zoŋ nə́ á pə́ noŋkə ńtúgə lə́, maŋ túg lə́ pə́ mə́ tɨ́ nə́ ndə̌ŋdəŋ páʼ mə́ laŋ nə́ lə́ á mə́m mbimə́ nə́ Klisto, mə́ tɨ́ nə́ ndə̌ŋdəŋ páʼ mə́ lǒo nə́ á mbô Əsê ńdaŋə̂ á mə́m mbimə́.

¹⁰ Ndaʼə anu páʼ maŋ lɔ nə́ lə́ á mə́ jî nə́ Klisto, á mə́ jî nə́ mətɨ páʼ a kə túg nə́ nə́ ndɛlə́ a kə júmnə nə́ nəwûə, ə́ pɨ jɨ́ ngə́ʼə ándó yí ə́ kə́ chîə ándó yə́ á mə́m nəwû əyǐə,

¹¹ ńjî ńgə́ əghâ tsə̌ maŋ yǒ ńjúmnə á nəwûə.

Mə Faʼ nə́ ə́ Kwá Ntsɔ́ʼəfaʼə

¹² Maŋ kě tə́ sóŋə ńgə́ maŋ pɛ́dtə faʼ məg pô kɨ ńkoʼnə̂ ńgɛn fyag pô, maŋ pɛ́lə ńtáŋnə á mə́ kwá nə́ ntsɔ́ʼəfaʼ ńté ńgə́ Klisto Yeso a nə ḿbɛ́dtə ńdɔgə̂ mə ándó ajúmə ajíə.

¹³ Pəlimə́ mə, maŋ kě ntsɔ́ʼəfaʼ yi wɨ́ kə́ kwáalə pô. Táʼə anu mäŋ faʼ nə́ əghâ nə́ lə́ ńgə́ maŋ ləgnə̂ anu atsəm á chî nə́ á ndzəm maŋə, ńtə́g əmə́gə á pə́ nə́ yi á chî nə́ á mbiə.

¹⁴ Lə́ á pə́ ńgə́ maŋ tə́gə atûə mə ńkəələ̂ ńnáŋə lə́ ndú ntsɔ́ʼəfaʼ chî nə́ ə́wɨ́ ńjî ńgə́ mbɔʼ maŋ kwáalə zə́ələ́. Ntsɔ́ʼəfaʼ zɨ lə́ nchîmbîə ándó Əsê a fóŋ nə́ áwɛ̂n ə́wə́ á nəpóolə, ńdaŋ nə́ Klisto Yeso.

¹⁵ Pɛn pətsəmə ándó pɛn kwíŋ nə́ á mə́mə ajwi pɛn chîə á mə́ túg nə́ lə́ mbô akwaŋ zəənə́. Lə́ təmbɔʼ pɨ pətsə́ á mə́m pɨ pó túg mbô akwaŋ yi ndaʼ tə ḿbə́ Əsê a yǐ ghɛd zəənə́ ŋwaʼə̂ á əshî əmə́g pəənə́.

¹⁶ Ndzaŋ ntsəm páʼ á yǐ nə́ ńchî, pɛn ghɛn nə́ mbiə á mə́ zoŋ nə́ tsɔʼə pənoŋkə ándó pɛn kə́ zoŋ nə́ pɨ́d tə ńkoʼ əghâ nə lə́.

¹⁷ Pəlim, ghɛn nə́ nə́ mbiə á mə́ faʼ nə́ tsɔʼə anu mäŋ faʼ nə́ lə́, jwə́ʼtə nə́ á mbô pəənə ándó pó tə́ nə́ faʼə̂ á chigə anu pə̈g lɔ nə́ ńgə́ pɨ tə́ faʼə̂ lə́.

¹⁸ Maŋ pɛ́d tə fiʼtə̂ áwɨ́ ngǎ yi nɨ́ nə́, nə́ əghâ nə́ maŋ tíʼə ḿbégnə lə́ nə́ nkǐmə́g ńgə́; pɨ pipə nɨ́ nə́ pó chî ə́wɨ́ páʼ nchîmbî əzɔb ə́ ghɛd nə́ pó tíʼ ḿbə́ ngaŋkə́pa nəwû nə́ Klisto á atǐəpagləpaglə.

¹⁹ Pó yǒ lwigtə̂ lə́ á mə́m atyǎntə móg, ńté ńgə́ Əsê əzɔb lə́ nəpəm zóobə́. Pó təələ̂ nə́ mənu páʼ mbɔʼ əsɨ́ pěʼ ńkóolə ághɔ́b ńté, ńkə́ ńdzá ńkwaŋə̂ ághɔ́b tsɔʼə mənuə ándó mə́ chî nə́ á mə́m mbî zəənə́.

²⁰ Ńgɛn nə́ pɛn, pɛn lə́ pɨ pə́ nəpóolə, pɛn tə́ ḿbyádnə ḿbyáabə Nchwádkə əwɛ̂nə a yǐ nə́ lǒo á nəpó tsóolə, páʼ á pə́ nə́ Mmaʼmbî Yeso Klisto.

²¹ A yǐ kwúblə apwɔ̌dkə na mbɨ əzɛ̂n zɨ páʼ zɨ̈d kwû nə́ lɛ̌, ə́ ghɛlə̂ zɨ́d ə́ tíʼ ńchîə ándó mbɨ əjǐ páʼ ə́ túg nə́ nəgháʼə. Mətəənə ándó a yǐ nə́ lɔg kwúblə əwɨ́, lə́ mətəənə ándó a yǐ nə́ kə́ lɔg ə́ ghɛd ajúmə atsəmə á zóʼnə yə́.