Filipyanə 2 - Əka yi Fîə

Yeso a kə Tsóokə Mbɨ Əjǐ, Əsê a Ŋáŋkə Yə́

¹ Nchîmbî əzəənə́ á mə́m Klisto ə́ ghɛd pɨ tyantə̂, akɔŋnə ajíə a kə̈ ńdegtə̂ ntɨ́ əwə́ənə́. Nə́ kə́ ńtûə ńkyeetə̂ pɨ̌pə Ajwi, ḿbɨ ńkə́ ńtúg ntɨ́ yi əshîʼnə pópə akóolə́mə́lə́ŋə á mə́m pəənə́.

² Maŋ tíʼə ḿbóʼmbô á mbô pɨ ńgə́ nə́ ghɛd mbəəmə mə ə́ pɔŋ ńgɛn fyag ńdaŋə̂ á mə́m táʼ akwaŋ əwəənə́, táʼə akɔŋnə, ḿbɨ ḿbə́ nə́ táʼ ntə́əmə, nə́ táʼə akwaŋə́nuə.

³ Kɔ nə́ ghɛlə̂ anu yətsə́ páʼ á yǐ nə́ ghɛd nə́ kwíŋə á pə́ mə́m əkad kəənə akɔ́ʼkə mbəəmə, lə́ á mə́m atsóokə́mbɨ, zɨ́ nə́ pɨ pipə ndaʼə ándó pɨ pó tsɛ nə́ áwə́ənə́.

⁴ Kɔ ŋwu tsə̌ á mə́m pəənə́ a tə́ ńnáŋə á pə́ mənu mə́ yǐ nə́ kwáalə yə́, a tə́ ńnáŋə á pə́ mənu mə́ yǐ nə́ kwá pɨ pə́ ndaʼə.

⁵ Ghɛd nə́ akwaŋə́nu páʼ á chî nə́ á mə́m pɨ á kə́ ḿbə́ tsɔʼə yi páʼ á kə chî nə́ á mə́m Yeso Klisto.

⁶ A kə chî lə́ ándó Əsê, lə́ a kə kě kwaŋ ńgə́ təmbɔʼ a shib tə ńtíʼ ńchî pó Əsê pələŋ pô.

⁷ Ńtíʼə á pə́ ə́lɨ́d, a tsɔ́ʼə á ngǎ yə́ á mə́ myaʼ nə́ ajúmə atsəm páʼ á nə ḿbə́ nə́ ajíə, ńtíʼ ńgwê ngwub ngaŋəfaʼə. Pə́ pîə yə́ ándó ŋwu mbîə, á ə́fɛ́d ńchîə ándó ŋwunə.

⁸ A kə tsóokə mbɨ əjǐə, ńkə́ ńdzóʼnə tə ńkoʼə̂ á ndɛd nəwûə, tə ńkwûə á pə́ atǐə apagləpaglə.

⁹ Ńdaŋ ə́lɨ́d Əsê a ŋáŋkə yí ńtə́g nə́ aliʼ páʼ a ŋáŋnə nə́ ńtsɛ əliʼ ətsəmə atǐə, ńtíʼ ə́fɛ̂ əlɛ́n nə́ yí páʼ ə́ ŋáŋnə nə́ ńtsɛ məlɛ́n mətsəmə.

¹⁰ Ńjî ńgə́ ŋwu ntsəmə a zóʼ nə́ əlɛ́n Yeso a yǐ kwə́ʼtə, kəənə a chîə á nəpó, á ndu ndəsê kəənə á ntɛ́n əsê.

¹¹ Alə́əmə atsəmə á kə́ ḿbímə á əshîsaŋ ńgə́ Yeso Klisto lə́ Mmaʼmbîə á mə́ fɛ̂ nə́ nəgháʼ á mbô Əsê páʼ á pə́ nə́ Tǎ.

Chî nə́ Ándó Nkyaʼə á Mə́m Mbîə

¹² Pəshunə́ mə, lə́ á pə́ ńgə́ tsɔʼə ndzaŋ nə́ zá nə́ ńdzóʼnə mə, ńkě pə́ tsɔʼə əghâ maŋ chî nə́ aliʼ yə wɨ́ pô, ńkə́ ḿbyádnə ńdzóʼnə əghâ páʼ maŋ kě nə́ ə́wɨ́ chî pô lə́. Faʼ nə́ á mə́ túg nə́ nchwadkə́ əzəənə́ á mə́mə apɔ́g ńdzoŋə̂ ḿbɛ́nkə,

¹³ ńté ńgə́ Əsê lə́ ŋwu páʼ ä faʼ á mə́m pəənə́, á mə́ ghɛd nə́ pɨ kɔŋə̂ a mə́ faʼ nə́ anu páʼ a pɔŋ nə́ yí, ńkə́ ḿbɨ ə́fɛ̂ mətəənə á mbô pɨ mbɔʼ nə́ faʼ ə́wə́.

¹⁴ Faʼə̂ anuə atsəm tsɔʼə tə ŋwuntə̂, tə pítə anu yitsə̌.

¹⁵ Ńjî ńgə́ kɔ nə́ túgə filə, ńkə́ ńchî nə́ əpoʼ əwə́ənə́ ándó pɔ́ pə́ Əsê pə́ kě nə́ kɔntə túg pô, ńchîə á mə́m mbîə ajîəmbə̂glə́ ə́ túg nə́ pɨ pə́ təpɔŋə. Nə́ chîə á mə́ tɛ̂ nə́ a ndzɔʼ pó ándó pɔ́ pə́ sáŋ pə̈ kyaʼ nə́ atǐə.

¹⁶ Lə́ ndzaŋə ándó páʼ pɨ yǐ nə́ waamə̂ atséebə nchîmbîə á tyantə̂ ńjî ńgə́ mbɔʼ maŋ yǒ ńtəələ̂ alě Klisto yǒ nə́ yǐ ńté ńgə́ maŋ nə ńkě lə́ afaʼə kətaŋ faʼ pô.

¹⁷ Lə́ mbɔʼ pə́ pěʼ ńkwɛlə̂ pə́ achǐə mə ándó ajúmə afyaʼə́nu á mə́ lɔg nə́ peg mbimə́ əzɨ ə́wɨ́, mbəəmə mə pɔŋ maŋ kə́ ńkɔŋtə̂ pɛnə̂.

¹⁸ Tsɔʼə nə́ ndú yi wɨ́, mbɨ əzɨ kə́ ńchîə mə́ pɔŋ nə́, pɨ kə́ ńkɔŋtə̂ pɛnə̂.

Timoti pó Epafloditusə

¹⁹ Mbɔʼ a pə́ ndzaŋ Əsê a lɔ nə́, tə ḿbə́ maŋ tə́ ńkwaŋə̂ ḿbyáabə ńgə́ maŋ yǐ túmə Timotiə á mbô pɨ tsɔʼə nga pɛ̌, ńjî ńgə́ a néŋ ntə́əmə mə nə́ apəələ atsáb páʼə a lǒo nə́ á mbô pəənə́,

²⁰ lə́ ndaʼ ŋwu páʼ a lánə nə́ ńtúgə anu ńté mə, ńkə́ ḿbɨ ńdánə ńtúg ndɛd əzəənə́.

²¹ Apuʼə pəənə á túg ndɛd lə́ tsɔʼə nə́ mənu móobə́, ńkě ndɛd nə́ afaʼə Yeso Klisto túg pô.

²² Lə́, pɨ nə́ nkɔ̌ʼmbɨ əwɨ́ nə jî ndzaŋə ándó a kə nɨd nə wɨ́ nə́ afaʼ təmbɔʼ a faʼə̂, ndzaŋə ándó pəg yí kə faʼ nə́ ándó mɔ́ pó tǎ, ə́faʼə̂ nə́ apô mɔʼə́ ńté nkɨ yi əshîʼnə.

²³ Maŋ tə́ ńkwaŋə̂ á mə́ tú nə́ yə́ á mbô pɨ nə́ ndɛd ntsəmə ándó maŋ yǐ nə́ ńdzɨ́ ndzaŋ mənu mə́ tə́ nə́ ńnyinə̂ á mbô maŋə.

²⁴ Lə́ maŋ néŋ ntə́əmə mə nə́ Mmaʼmbî ńgə́ maŋ nə́ nkɔ̌ʼmbəəmə mə, tsɔʼə nga pɛ̌ maŋ chî tə mbɔʼ maŋ kə́ ńgyǐəə á mbô pəənə́.

²⁵ Maŋ kwaŋ ńgə́ á koʼnə̂ ńgə́ maŋ túmə ndim əwɛ̂n Epafloditusə á mbô pəənə́, páʼ a faʼ nə́ ńkə́ ḿbóʼnə pəg yə́, ḿbə́ ə́faʼə̂ ándó ntú əwəənə́ a yǐ nə́ á mə́ kwá nə́ mə.

²⁶ A tə́ ńdublə̂ á mə́ jɨ́ nə́ áwɨ́ pətsəmə, á pɨ ńkə́ ńtə́ ńjwaʼə̂ yí ńté ndzaŋ pɨ kə zóʼ nə́ ńgə́ a tə́ ńgoonə̂ lə́.

²⁷ Lə́ ndə̌ŋdəŋə́, a kə pyádnə ńgɔ tə ńdɔ pə́ kwûə. Lə́ Əsê á pə́ ńkó mələ́ŋ míə, ńkě pə́ tsɔʼə məmɨ́ kó pó ńkə́ ńkó məméemə, ə́fógə mə á mə́mə afɨnə yə nɨ́ nə́.

²⁸ Maŋ pyádnə ńchígə́ ńtə́gə atûə mə á mə́ tíʼ nə́ túmə yə́ á mbô pəənə́, ńjî ńgə́ pɨ yǐ mbɨ ńkɔŋtə̂ ngǎ yitsə̌ əghâ nə́ jɨ́ nə́ yí lə́, azéemə afɨnə á kə měe.

²⁹ Tíʼ nə́ ńkwáalə yí əshîʼnə, nə́ akɔŋnə, ándó ndim páʼ pɨ po pətsəm néŋ nə́ ntɨ́ nə́ Mmaʼmbîə. Zóʼnə nə́ ntê pəənə ándó yí lə́,

³⁰ a kə néŋ ntɨ́ yə́ á mə́mə afaʼ tə ńdɔ pə́ péŋkə nchîmbî əjǐ ńté afaʼə Klisto, a kə ghɛd ndɛn mənu ghɛn lə́ á mə́ tɔ́mtə nə́ mə nə́ ndú páʼ mbɔʼ pɨ nə́ nkɔ̌ʼmbɨ wɨ́ nə́ ńkě chî mbɔʼ pɨ tɔ́mtə pô.