Filipyanə 1 - Əka yi Fîə

¹ Aŋwaʼlə zəənə́ a lǒo lə́ á mbô Pɔl pó Timoti, pó pə́ nə́ ngaŋə́faʼ Yeso Klisto. Ńgɛnə̂ á mbô pɨ pə́ Əsê pətsəm pó chî nə́ Filipi, ńnéŋ ntɨ́ əghɔ́b nə́ Yeso Klisto, ḿbɨ ńkə́ ńgɛnə̂ á mbô mətû pópə pɨ po kwáatə nə́ á mə́m nkyeetə Pɔ́ Pə́ Əsê:

² Ńgə́ Əsê páʼ a pə́ nə́ Tǎ əwɛ̂n pó Mmaʼmbî Yeso Klisto fɛ̂ áwɨ́ nə́ apɔŋə́ntɨ́ pó mbwɔ́dnə.

Pɔlə chaʼtə́së Əfɛ̂ ndǎ á Mbô Əsê Ńté Nkyeetə Pɔ́ Pə́ Əsê á Filipiə

³ Maŋ láʼkə Əsê mə əghâ atsəm páʼ maŋ kwúmtə nə́ áwə́ənə́,

⁴ əghâ atsəmə ándó maŋ tə nə́ ńchaʼtə́sê atû pɨ maŋ chaʼtə̂ nə́ akɔŋtə,

⁵ ńté ndúmə ándó pɨ kə kwáatə nə́ mə ə́wə́ á mə́mə afaʼə nkɨ yi əshîʼnə ə́fɛ́lə nəchwaakənə́ tə ńkoʼ əghâ nə́.

⁶ Ńdaŋ ə́lɨ́d maŋ pyádnə ńjî ńgə́ Əsê páʼ a kə chwáakə nə́ afaʼ yə əshîʼnə zəənə́ á mə́m pɨ, á yǐ ghɛn nə́ mbi nə́ zɨ́d tə á yǒ měe nə́ alě páʼ Yeso Klisto a yǐ nə́ pɨ yǐəə.

⁷ Pɨ chîə á ntɨ́ maŋ əghâ atsəmə, a pə́ ńgə́ a koʼnə̂ á mbô maŋ ndzaŋ maŋ kwaŋ nə́ nə́ ndú ghɛn ntê áwɨ́ pətsəm lə́, ńté ńgə́ nə́ kə́ ńchîə á mə́mə anu yə əshîʼnə zɨ Əsê a fɛ̂ nə́ nə́ maŋ leenə́, ḿbá nə́ əghâ nə́ maŋ chî nə́ atsáŋ ńdzoŋ ḿbə́ nə́ ndɛd maŋ kə́ póʼnə nə́ ńté nkɨ yi əshîʼnə ghɛn, ḿbɨ ńgɛlə̂ ńgə́ wɨ́d tɨ́ ńtyantə̂.

⁸ Əsê lə́ əgha ŋwu páʼ a zɨ nə́ ńkə́ ḿbí ńgə́ maŋ tséebə lə́ ndə̌ŋdəŋ əghâ atsəmə ándó maŋ sóŋ nə́ á mbô pɨ ńgə́ akwaŋ yə əshîʼnə maŋ túg nə́ ńté áwɨ́ pətsəmə á fɛ́d lə́ á mə́m akɔŋnə Yeso Klisto nə́ nkɔ̌ʼmbɨ yə́.

⁹ Mäŋ chaʼtə́sê ńgə́ akɔŋnə azə́ənə́ a kə́ ńgɛnə̂ tsɔʼə nə́ mbiə á mə́ kwéŋ nə́, ńdzoŋ ḿbegə̂ ajíənuə wɨ́ pó atûə yə tsɔ́ʼnə nə́ ńgɛn ə́fyagə̂,

¹⁰ ńjî ńgə́ nə́ chî tə mbɔʼ nə́ zə́ənə ajú páʼ a chígə́ nə́ ńkoʼnə̂, ńchî mbɔʼ nə́ ŋwaʼə̂, ńkě kɔntə yitsə̌ kə́ ńtúgə alě ándó Klisto a yǐ nə́ ńtə́ ḿbəənə̂ pô.

¹¹ Nchîmbî əzɨ ə́ yǐ lwɛ́nkə nə́ ndə̌ŋdəŋ mənu mimə əshîʼnə páʼ mbɔʼ mə́ fɛ́d lə́ tsɔʼə á mə́m Yeso Klisto, á mə́ fɛ̂ nə́ nəgháʼə á mbô Əsê ə́ kə́ pɨ lɔg ŋ́ŋáŋkə yí wə́.

Maŋ Chîə Mbî lə́ mə́ Faʼ nə́ á Mbô Klisto

¹² Pəlimə́ mə, maŋ loonə̂ ńgə́ nə́ jî ńgə́ mənu mə́ laŋ nə́ nə́ maŋ lə́, mə́ nə́ ḿbyádnə ńkwáatə á mə́ ghɛd nə́ ńgə́ nkɨ yi əshîʼnə ə́wə́ ə́ ghɛn nə́ mbiə.

¹³ Ńdaŋ ə́lɨ́d ngaŋə́pyáabə ntɔ́ʼ pópə ŋwu ntsəm páʼ a chî nə́ aliʼə́ nə́ pó jî ńgə́ maŋ chîə atsáŋ lə́ ńté ńgə́ maŋ lə́ ngaŋəfaʼ Klisto.

¹⁴ Pəlim pipə nɨ́ nə́ pó tɨ́ ńtyantə̂ nə́ Mmaʼmbî ńté atsáŋ páʼ maŋ nə kwú nə́ lə́, ḿbɨ ńkə́ ńtyantə̂ á mə́ sóŋ nə́ anǔəsê tə apɔ́gə.

¹⁵ Lə́, pɨ pətsə́ á mə́m pó, pö náŋkə nkɨ Klisto lə́ ńté ńgə́ pó túgə ŋwéetə́ ńkə́ ńtúgə afyaʼə́, lə́ pətsə́ pə́ náŋkə lə́ nə́ ntɨ́ əghɔ́b ətsəmə.

¹⁶ Pɨ pɨ pó faʼə̂ azɨ́ lə́ á mə́m akɔŋnə, ńté ńgə́ pó jî ńgə́ Əsê a tsɔ́ʼə a mə ńgə́ maŋ póʼnə ńté nkɨ yi əshîʼnə wə́.

¹⁷ Pətsə́ pɨ pə̂ pó kě nkɨ Klisto lə́ nə́ ntɨ́ əghɔ́b ətsəm náŋkə pô. Pó náŋkə lə́ nə́ ntɨ́ təpɔŋə, ńdoonə̂ á pə́ ape, pó kwaŋ ńgə́ pó yǐ peg ngə́ʼə a mə á mə́mə atsáŋ páʼ maŋ chî nə́ ə́wə́.

¹⁸ Azɔŋə á kě ə́wɨ́ chî pô! Maŋ kɔŋtə̂ ńté anu yə ə́wə́ - tsɔʼə ńgə́ pə́ náŋkə nkɨ Klisto nə́ məndú mətsəm təmbɔʼ pə́ náŋkə, kɨ nə́ akwaŋə təpɔŋ kɨ yə əshîʼnə: Maŋ yǐ ghɛn nə́ mbiə á mə́ kɔŋtə̂ nə́,

¹⁹ Lə́ ndə̌ŋdəŋ maŋ yǐ kɔŋtə̂, ńté ńgə́ maŋ jî ńgə́ ńdaŋ nə́ achaʼtə́sê azɨ́ ḿbɨ́ ḿbə́ nə́ akwá páʼ á fɛ́d nə́ á mə́mə ajwiə Yeso Klisto, á yǐ ghɛd ńgə́ pə́ fógə a mə á mə́mə atsáŋ zəənə́.

²⁰ Azéemə anu maŋ tə nə́ ńdoonə̂ chigə á mə́m ntɨ́ maŋ ḿbɨ ńkə́ ńkwaŋə̂ ḿbyáabə lə́ ńgə́ maŋ kě anu yitsə̌ yǐ faʼə̂ á yǐ nə́ néŋ əsə́ənə atû maŋ pô. Lə́ ńdaŋə̂ á mə́m atséebə mə páʼ maŋ yǐ nə́ tséebə tsɔʼə tə pɔ́g, maŋ yǐ pɨ ghɛlə̂ pə́ anuə atsəm əghâ nə́ tsɔʼə ndzaŋ maŋ kə pěʼ nə́ ńgɛlə̂ á mə́ jɨ́ nə́ ńgə́ maŋ kɔ́ʼkə Yeso á mə́m nchîmbîə mə, kɨ maŋ chîə á mbî kɨ ńkwûə.

²¹ Ńté ńgə́ á mbô maŋ, mə chî nə́ á mbî lə́ Klisto, mə kwû nə́ á pə́ ape.

²² Mbɔʼ maŋ chîə á mbîə á mə́m na mbɨ, á pə́ ńgə́ lə́ afaʼ yə əshîʼnə maŋ yǐ nə́ ghɛn nə́ mbiə á mə́ faʼ nə́. Maŋ kě jîə yi páʼ mbɔʼ maŋ tsɔ́ʼ pô.

²³ Pə́ tíʼə soŋnə̂ mə nə́ məlá mə́ mbɛ̌. Maŋ lánə ńtə́ ńdoonə̂ á mə́ mɛdtə̂ nə́ mbî jɨ ə́ chî pəg Klisto páʼ á pə́ nə́ chigə anu yə əshîʼnə tə ńdaŋə̂;

²⁴ Lə́ nə́ əjɨ ngǎ, á pɔŋ ńgə́ maŋ ghɛn nə́ mbiə á mə́ chî nə́ mbîə

²⁵ Atûə mə a kě tə́ ńkoʼlə̂ ńté anu zɨ pô, ńdaŋ ə́lɨ́d maŋ jî ńgə́ maŋ yǐ chîə mbîə. Maŋ yǐ ghɛn nə́ mbiə á mə́ chî nə́ pɛn pətsəmə, á mə́ ghɛd nə́ nə́ kwíŋ ḿbɨ ńkə́ ńtúgə akɔŋtə á mə́m mbimə́.

²⁶ Ńjî ńgə́ təmbɔʼ pɨ kə́ ńchígə́ ńtúgə kətəələ á mə́m Yeso Klisto ńté mə á əghâ ándó maŋ pɨ nə́ ḿbəənə̂ á mbô pəənə́.

²⁷ Túg nə́ nchîmbî əzɨ tsɔʼə nə́ ndúmə ándó páʼ nkɨ yi əshîʼnə ńté Klisto ə́ sóŋ nə́, ńjî ńgə́ kɨ maŋ yǐ ńdzə́ənə áwɨ́ kɨ ńchî yǐ, maŋ yǐ zóʼə anu ńté áwɨ́ ńgə́ pɨ tə̈ ńtə́əmə ńtyantə̂ á mə́m táʼə ajwi, ə́faʼə̂ nə́ mbô nə́ mbô á mə́m táʼə akwaŋ ńté mbimə́ pɛn túg nə́ á mə́m nkɨ yi əshîʼnə,

²⁸ ńkě pí ńgə́ pɨ pɨ po kě nə́ pímnə pô, pó ghɛd nə́ chî nə́ apɔ́g pô; zəənə́ á nəələ̂ ághɔ́b lə́ ńgə́ pə́ yǒ chwádkə áwə́ənə́, ə́ pə́ tsəŋkə̂ ághóobə́, zɨ lə́ yǒ faʼ Əsê.

²⁹ Ńté ńgə́ atûə azə́ənə́ nə́ ḿbɔŋ ńgə́ Əsê nə́ apɔŋə́ntə́əmə ají a ghɛd nə́ kě tsɔʼə ntɨ́ əwɨ́ nə́ Klisto néŋ pô, a nə ńkə́ ńgɛd ńgə́ pɨ kə́ ńjɨ́ ngə́ʼ ńté yə́.

³⁰ Nə́ əghâ nə́, ghɛn nə́ nə́ mbiə á mə́ póʼnə nə́ məlaʼ pɛnə̂, pɨ póʼnə lə́ tsɔʼə məlaʼ páʼ pɨ kə jɨ́ nə́ maŋ póʼnə ntsɛɛmbi lə́. Maŋ kə́ ḿbɛ́d tsɔʼə á mə́m ə́wə́.