Filemunə 1 - Əka yi Fîə

¹ Aŋwaʼlə zɨ lə́ ŋwaʼlə̂ Pɔl páʼ á pə́ nə́ ngaŋətsáŋ ńté Yeso Klisto, lə́ ŋwaʼlə̂ pó ndim əwɛ̂n Timotiə. Zə́ələ́ á ghɛnə̂ lə́ á mbô ngaŋəko əwɛ̂n Filemun páʼ pɛ̌npo faʼ nə́,

² ńkə́ ńgɛnə̂ á mbô nkyeetə pɔ́ pə́ Əsê páʼ ə́ jwánə nə́ á ndɛ̂ yə́, ńgɛnə̂ á mbô ndim əwɛ̂n yi məngyě páʼ á pə́ nə́ Afya, ńkə́ ḿbɨ́ ḿbə́ nə́ Akipus ngaŋə́maʼə́ntsoolə ándó pɛnə̂, ḿbóʼnə ńté nkɨ yi əshîʼnə:

³ Ńgə́ Tǎ əwɛ̂n Əsê ndzoŋ ḿbə́ nə́ Mmaʼmbî Yeso Klisto a fɛ̂ apɔŋə́ntɨ́ pó mbwɔ́dnə á mbô pəənə́.

Akɔŋnə Filemun Pó Mbimə́ Əjǐə

⁴ Ndimə́ mə Filemun, əghâ atsəm maŋ tə́ nə́ ńchaʼtə́sê lə́ maŋ kwúmtə gho, ə́fɛ̂ ndǎ á mbô Əsê ńté gho.

⁵ Ńté ńgə́ maŋ nə̈ ńdzóʼə anu ńté akɔŋnə pópə mbimə́ páʼ gho túg nə́ nə́ Mmaʼmbî Yeso ńkə́ ńtúg nə́ pɨ pə́ Əsê pətsəmə.

⁶ Maŋ chaʼtə́sê ńgə́ ndzaŋ ghö ghab nə́ atsáb ńté mbimə́ əzo ándó mɔ́ Əsê lə́, mbɔʼ a ghɛd nə́ zə́ənə afoʼə atsəm páʼ pəg túg nə́ zə́ələ́ á mə́m nchîmbî əzəgə́ á mə́m Klisto.

⁷ Ńté ńgə́ ḿbə́ ndim əgha, akɔŋnə azô á kə ghɛd maŋ kɔŋtə̂ á kə́ néŋ ntə́əmə mə. Gho ghɛd məntɨ́ mə́ pɔ́ pə́ Əsê mə́ chî əshîʼnə.

Pɔlə a Póʼ Mbô nə́ Filemun Ńgə́ a Kwáalə Onisimusə

⁸ Ńté zəənə́ anu, maŋ chîə á mə́ túg nə́ ntə́əmə a mə́ tsáb nə́ á mbô gho ándó ndim əgho á mə́m Klisto, ə́sóŋ ńgə́ gho faʼə̂ anu páʼ a koʼnə̂ á mə́ faʼ nə́.

⁹ Maŋ yǐ kə̈ póʼə tsɔʼə mbô á mbô gho ńté ńgə́ maŋ kɔŋə̂ gho. Lə́ maŋ Pɔl páʼ maŋ tsáb nə́ aliʼ Klisto Yeso, nə́ pə́ əghâ nə́ maŋ chîə atsáŋ ńté yə́.

¹⁰ Mäŋ póʼmbô á mbô gho ńté lə́ Onisimusə, á pə́ nə́ móonə mə á mə́m Yeso. Maŋ nə ḿbímə Tǎ əyə́ á mə́m Klisto ə́fɛ́d əghâ maŋ nə chî nə́ atsáŋə.

¹¹ A nə ḿbə́ nə́ ndɛd yitsə̌ lə́ a kě atûə anu yətsə́ á mbô gho chî pô, lə́ nə́ əghâ nə́ a chîə atûə anu á mbô pɔ̌ pətsəmə.

¹² Maŋ pɨnkə̂ yə́ á mbô pɨ əghâ nə́, lə́ yǐ ntə́əmə mə á mbô pəənə́.

¹³ Maŋ pěʼ ńkɔŋə̂ á mə́ mɛdtə̂ nə́ yə́ aliʼə́ nə́ pəg yə́, ńjî ńgə́ təmbɔʼ a kwáalə mə nə́ aliʼə́ azɨ́ ndɛlə́ ándó maŋ chî nə́ atsáŋ ńté nkɨ yi əshîʼnə wə́.

¹⁴ Lə́ maŋ kě kɔŋə̂ á mə́ fyád nə́ gho ńgə́ gho kwáalə mə pô, lə́ maŋ pěʼ ńkɔŋ lə́ ńgə́ gho faʼə̂ zə́ələ́ á pə́ ńkɔŋ gho. Lə́ pə́ ńgə́ maŋ kě yǐ faʼə̂ anu yətsə̌ tə ńdéʼtə gho pímə.

¹⁵ Əghâ tsə̌ anuə a nə ńgɛd nə́ ńgə́ a fɛ́lə á nəpɛnə́ pɨ nə́ mɔ́ akəmə ndɛd lə́ ńgə́ a yǐ ńtíʼ ḿbəənə̂ á mbô pɨ nə́ nkóŋə.

¹⁶ Ńkě pɨ ḿbə́ tsɔʼə apoʼ pô, ḿbɨ ńchî tə ńtsɛɛlə̂ apoʼə: Lə́ ndim pɛn kɔŋ nə́ á mə́m Klisto, tə ḿbyádnə ḿbə́ pə́ á mbô maŋə ńkə́ ḿbə́ á mbô pəənə́. Ńkě tsɔʼə ndimə́ á mə́m na mbɨ pó ńkə́ ḿbə́ ndimə́ á mə́m Mmaʼmbîə.

¹⁷ Lə á pə́ ńgə́ təmbɔʼ gho lɔgə̂ mə ándó ŋwu pɔ̌ faʼ nə́, gho kwáalə yí tsɔʼə ndzaŋ təmbɔʼ gho pěʼ ńkwáalə mə.

¹⁸ Təmbɔʼ a nə ńgwǔəə anuə á mbô gho kɨ ńgwaamə̂ gho á pə́ nə́ ajûtsə́, gho néŋə zɨ́d nə́ əlɛ́nə mə.

¹⁹ Maŋ Pɔl, lə́ ŋwaʼlə̂ maŋ ŋ́ŋwaʼlə̂ azɨ́ nə́ apô mə, maŋ yǐ tûə á mbô gho maŋ kě chîə mə́ kwúmtə gho ńgə́ gho tə́ ńgwaamə̂ mə tə ńgwaamə̂ mə pə́ nə́ nchîmbî əzo pô.

²⁰ Ndimə́ mə, maŋ póʼ mbô ńgə́ gho ghɛlə̂ akwá zəənə́ á mbô maŋə ńté Mmaʼmbîə, ghɛd mbəəmə mə pɔŋə̂ ándó ndimə́ á mə́m Klisto.

²¹ Ndzaŋə ándó maŋ ŋwaʼlə̂ nə́ ə́lɛ̌ lə́, maŋ pyádnə ńjî ńgə́ gho yǐ faʼə̂ anu maŋ pítə nə́, ə́faʼ tə laŋ ndzaŋ maŋ pěʼ nə́ ńdoonə̂.

²² Á mə́ pegtə̂ nə́, maŋ póʼ mbô ńgə́ gho tsoŋkə̂ atɔ́gə ndɛ̂ pəghəənə á mbô maŋ ńté ńgə́ maŋ kwaŋ ńgə́ Əsê a yǐ zóʼə achaʼtə́sê azɨ́ pətsəm ə́ pɨ fɛ̂ mə á mbô pəənə́.

Ndwigtə Achaʼtə

²³ Ɛpaflasə páʼ a chî nə́ atsáŋ pəg yí ńté atûə Klisto Yeso, a túmə achaʼtə ajíə á mbô pəənə́,

²⁴ ńdzoŋ ḿbɨ ḿbə́ nə́ Mag, Alistakusə, Dɛmasə ḿbéenə Lukasə páʼ pəg pö faʼ nə́.

²⁵ Ńgə́ apɔŋə́ntə́əmə Mmaʼmbî Yeso Klisto a chîə á mə́m pɨ pətsəmə.