Efishanə 6 - Əka yi Fîə

Pɔ̂nkə̂ pópə Pətǎ

¹ Pɔ̂nkə̂, lə́ aliʼə́nuə azə́ənə́ ándó pɔ́ pə́ Yeso á mə́ zóʼnə nə́ pətǎ pə́ənə́, ńté ńgə́ lə́ anu páʼ á koʼnə̂ nə́ á mə́ faʼ nə́.

² “Lə́əkə tǎ əgho pó mǎ əgho” ńté ńgə́ lə́ ntsɛɛmbi ntəgə́ páʼ ə́ túg nə́ ndaʼnə:

³ “Ńjî ńgə́ mənu mətsəm mə́ yǒ ńnyi əshîʼnə á mbô gho, nchîmbî əzo ə́ yǒ ḿbə́ yi sag nə́ á ndu mbîə.”

⁴ Pətǎ, kɔ nə́ tə́ ńgɛlə̂ mənu nə́ pɔ́ pɨ́ nə́ ndú páʼ mbɨ əzɔb yǐ nə́ tə́ pə́gə́. Á tíʼə ə́lɨ́d, nə́ kɔ́ʼkə ághóobə́ a pə́ nə́ ndú pó yǐ nə́ pɔ́gə Mmaʼmbî ə́ kə́ zoŋ pənoŋkə píə.

Əpoʼ pópə pəŋwúd Póobə́

⁵ Əpoʼ, zóʼnə nə́ pɨ pə́ mbî páʼ pó pə́ nə́ pəŋwúd pɨ nə́ apɔ́g ńdzoŋə̂ ḿbɛ́nkə, faʼ nə́ ə́lɨ́d nə́ ntɨ́ əwɨ́ ətsəmə ándó nə́ faʼə̂ pə́ á mbô Klisto.

⁶ Faʼ nə́ ndɛn mənu ghɛn ńkě faʼ lə́ tsɔʼə a əghâ pə́ tə́ nə́ ńnáŋə áwɨ́ pô, ńjî ńgə́ pə́ kɔŋə̂ áwɨ́ pô. Lə́ nə́ ntɨ́ ə́wɨ́ ətsəm faʼ nə́ anuə ándó Əsê a lɔ nə́, ándó əpoʼ Klisto.

⁷ Faʼ nə́ afaʼə azɨ́ nə́ ntɨ́ yi əshîʼnə, tsɔʼə ándó nə́ faʼə̂ á pə́ á mbô Mmaʼmbî lə́, ńkě á pə́ á mbô pə́pə̌ ŋwu mbî pô.

⁸ Kwúmtə nə́ ńgə́ Mmaʼmbîə a yǐ tsɔ́ʼə afaʼə ŋwu ntsəm nə́ afaʼ yə əshîʼnə ándó pó faʼ nə́ kəənə a pə́ apoʼ kɨ ńkě apoʼ pô.

⁹ Pəŋwúd pə́ əpoʼ, faʼ nə́ tsɔʼə ə́lə́ələ́ á mbô əpoʼ əpə́ənə́, kɔ nə́ tə́ ńgɛlə̂ pó tə́ ńchîə nə́ apɔ́gə. Kwúmtə nə́ ńgə́ pəənə́, ńdzoŋ ḿbə́ nə́ əpoʼ əpɨ́, pɨ túg lə́ táʼ ŋwúd páʼ a chî nə́ nəpóolə, páʼ a sáʼ nə́ əsáʼ ŋwu ntsəm ndə̌ŋdəŋə́.

Əpú Ntso Əsê Ətsəmə

¹⁰ Á mə́ lwigtə̂ nə́, kwíŋ nə́ á mə́m Mmaʼmbî ńtyantə̂ ńdaŋə̂ á mə́m mətɨ mí páʼ mə́ chigə nə́ ńtyantə̂ lə́.

¹¹ Wê nə́ əpú ntso ətsəm páʼ Əsê a fɛ̂ nə́ nə́ pəənə́, ńjî ńgə́ nə́ chî təmbɔʼ nə́ tɨ́ ńtyantə̂ á mə́m mənu mə́ təpɔŋ Dɛbəələ a lɔ́btə nə́.

¹² Ńté ńgə́ pɛn kě póʼnə məláʼ lə́ pɛ̌npə pɨ pə́ mbî pô, pɛn póʼnə lə́ pə́ mətɨ mə́ təpɔŋ páʼ mə́ chî nə́ nə́ nəpó təpɔŋ əghoobə́ á nɨ́ nə́, ngaŋə́sáʼə́láʼə, mətû mə́ aláʼə, pɨ pə́ túg nə́ mətəənə á mə́m mbî ndzəmə zəənə́.

¹³ Lə́ á pə́ ńgə́ nə́ wê əpú ntso Əsê əghâ nə́! Ńjî ńgə́ təmbɔʼə alě təpɔŋ zə́ á yǐ, nə́ chî təmbɔʼ nə́ tɨ́ ńtyantə̂ á mə́m məlaʼ ngaŋkə́pa əzɨ́ ə́ yǐ nə́ nə́ mɨ́d lə̂, əghâ ándó nə́ yǒ nə́ ḿbóʼnə tə ńkoʼə̂ á ndwigtə, nə kə́ ḿbɛ́d ńtɨ́ ńtyantə̂.

¹⁴ Lə́ á pə́ ńgə́ nə́ tɨ́ ńtə́ ḿbyáabə: Túg nə́ ndə̌ŋdəŋə́ ándó atwíŋ pə́ kwúd nə́ á ntə̂ pəənə́, mə́ tɨ́ nə́ ndə̌ŋdəŋ mɨ mə́ chîə ándó kɨ́ʼ ntso ghaŋə,

¹⁵ lɔg nə́ anuə mə́ kád nə́ fiʼtə̂ nkɨ Əsê yi əshîʼnə ə́ yǐ nə́ nə́ mbwɔ́dnə á pə́ ngwub məko əzə́ənə́.

¹⁶ Túg nə́ mbimə́ əghâ ntsəmə ándó kɨ́ʼ ntso əwəənə́, ńté ńgə́ təmbɔʼ nə́ lɔgə̂ áwɨ́d nə́ chî təmbɔʼ nə́ pə́gtə məkɔŋ mə́ ntso mətsəm mə́ kɛ́d nə́, páʼ ŋwu təpɔŋə a meg nə́ áwɨ́ ə́wə́.

¹⁷ Lɔg nə́ ńgə́ mə chwádkə nə́ mɨ́ mə́ chî lə́ ándó akáŋə́tûə azə́ənə́, atséebə Əsê á pə́ ŋwíŋ ntso páʼ Ajwǐəsê a fɛ̂ á mbô pəənə́.

¹⁸ Faʼ nə́ mənu mɨ́ mətsəmə á mə́m achaʼtə́sê, ḿbítə akwáalə á mbô Əsê. Tə́ nə́ ńchaʼtə́sê əghâ ətsəmə, á mə́mə anuə atsəm ndzaŋə Ajwiə á sóŋ nə́. Ńté anu zɨ́d zɨ nə́ tə́ ńdɔg ndɛd wɨ́ kɔ nə́ kéenə, ńchaʼtə́sê əghâ ətsəmə á mbô pɨ pə́ Əsê pətsəmə.

¹⁹ Kə́ nə́ ńchaʼtə́sê á mbô maŋə, ńjî ńgə́ Əsê a yǐ ə́fɛ̂ nkəənə á mbô maŋ əghâ ándó maŋ koʼnə̂ nə́ á mə́ tsáb nə́, ńjî ńgə́ mbɔʼ maŋ tsáb tə apɔ́g, pə́ jî nkɨ yi əshîʼnə yi nəlyaŋnə́.

²⁰ Ńtê nkɨ yi əshîʼnə wɨ́d ghɛn, maŋ lə́ ənyintúmə, əghâ nə́ maŋ pǎ nə́ tə ńchîə á pə́ á nkáʼə atsáŋ lə́. Chaʼtə́sê ńgə́ maŋ sóŋə áwɨ́d tsɔʼə tə apɔ́g tsɔʼə ndzaŋ maŋ chî nə́ mə́ sóŋ nə́.

Ndwigtə Achaʼtə

²¹ Taakikusə, ndim əwəg páʼ a faʼ nə́ mbô Mmaʼmbî nə́ ntɨ́ əyí ətsəm, a yǐ fiʼtə̂ áwɨ́ nə́ anuə atsəm ńté mə, ńjî ńgə́ pɨ tíʼ ńjî ndzaŋ maŋ chî nə́ ńkə́ ḿbə́ ndzaŋ maŋ tə́ nə́ faʼə̂.

²² Lə́, anu páʼ a ghɛd nə́ maŋ tíʼə ńtúmə yə́ á mbô pɨ lə́, á mə́ fiʼtə̂ nə́ áwɨ́ ndzaŋ pəg pətsəm pə́ nə́, ə́ kə́ zoŋ ńnéŋ məntɨ́ mə́ənə́.

²³ Əsê páʼ a pə́ nə́ Tǎ pó Mmaʼmbî Yeso Klisto ə́fɛ̂ mbwɔ́dnə pó akɔŋnə ḿbá mbimə́ á mbô pəlim pətsəmə á mə́m Yeso Klisto.

²⁴ Apɔŋə́ntə́əmə Əsê á chîə á mbô ŋwu ntsəm páʼ a kɔŋ nə́ Mmaʼmbî Yeso Klisto nə́ akɔŋnə tə měe.