Efishanə 5 - Əka yi Fîə

Pɛn Chîə Mbîə á Mə́m Nkyaʼə

¹ Ndzaŋə ándó pɨ pə́ nə́ pɔ́ pə́ Əsê páʼ a kɔŋ nə́ lə́, tə́ nə́ fiʼnə̂ yə́.

² Túg nə́ akɔŋnə tsɔʼə ndzaŋə ándó Klisto a kə kɔŋ nə́ áwɛ̂n, əfɛ̂ nchîmbî əjǐə ándó mbéŋə afyaʼə́nu páʼ pə́ tɔ nə́ azagə́ yə əshîʼnə á kɔ́ʼə əwɨ̈ ńgɛlə̂ mbɨ Əsê pɔŋə̂.

³ Ndzaŋ nə́ pə́ nə́ pɨ pə́ Əsê lə́, a kě pɔŋ ńgə́ anu yətsə́ ńté á mə́ zɔ́ʼ nə ndzɔʼə́ mbǒʼḿbóʼ, kɨ ńté mənu mə́ əsɨ́ ńdzoŋ ḿbə́ nə́ mənu ńté mə́ lɔ nə́ ajúmə a kě nə́ pə́ azɨ́ pô, mə́ pə́ mənu mbɔʼ pə́ láʼ ńkwéʼnə ńdzóʼ zóʼ nə́ á ndzɔʼ pɨ pô.

⁴ Kɔ mənu mə́ əsɨ́ mətsə́ kəənə akəkógə́ atsáb yətsə́ pópə atséebə awágə á chîə tətɨ pəənə́, ńté ńgə́ lə́ kě mənu mə́ koʼnə̂ nə́ pô, pɛn chîə á mə́ tə́ nə́ fɛ̂ lə́ ndǎ á mbô Əsê.

⁵ Lánə nə́ ńjîə atû pɨ ńgə́ ŋwu ntsəm páʼ a zɔ́ʼ nə́ ndzɔʼə́ mbǒʼḿbóʼ, ńgɛlə̂ mənu mə́ əsɨ́ kɨ ḿbɨ ńdoonə̂ ajú páʼə a kě nə́ pə́ ají pô (ńté ńgə́ mə lɔ nə́ ajúmə a kě nə́ azô pô a chî lə́ ándó əsê məfɨgə yitsə̌) a láʼ kě nənaanənə́ á mə́m nəfɔ nə́ Klisto pó Əsê túg pô.

⁶ Kɔ nə́ pí ŋwu tsə̌ a fɨgə̂ áwɨ́ nə́ ətsáb kətaŋə, lə́ mənu mɨ páʼ mə́ yǒ nə́ ghɛd Əsê á záŋ ndě á mbô pɨ pó kě nə́ yí zóʼnə pô.

⁷ Lə́ pə́ ńgə́ kɔ nə́ túgə anu yətsə̌ á mə́ faʼ nə́ pɨ̌pə ntê pɨ zəənə́.

⁸ Pɨ nə ńchî lə́ ndzəmə́, nə́ pə əghâ nə́ pɨ tíʼ ńchî lə́ á mə́m nkyaʼ Mmaʼmbîə; ghɛd nə́ nchîmbî əzɨ chîə ándó yi pəənə ándó pó túg nə́ nkyaʼə,

⁹ (ńté ńgə́ nənta nə́ atǐ nə́ nkyaʼ nə́ chî lə́ á mə́m ajúmə atsəm páʼ á pɔŋ nə́, ńkoʼnə̂ ńkə́ ḿbə́ ndə̌ŋdəŋə́)

¹⁰ Fǔ nə́ alóʼ ńdzéʼ mənu páʼ mə́ yǐ nə́ ghɛd mbɨ Mmaʼmbî ə́ pɔŋə̂.

¹¹ Kɔ nə́ néŋə apô azɨ́ nə́ mənu mə́ kətaŋ páʼ pɨ pə̈ faʼ nə́ páʼ mə́ pə́ nə́ mənu mə́ ndzəmə́, nə́ chî lə́ á pə́ mə́ kyaʼ nə́ mə́ələ́ á əshîsaŋə.

¹² Ńté ńgə́ lə́ chigə əsə́ənə á mə́ pěʼ nə́ sóŋ mənu pó faʼ nə́ nəlyaŋnə́ tsɔʼə sóŋ nə́.

¹³ Lə́ á pə́ ńgə́ əghâ ándó anuə atsəmə á fɛ́d nə́ á mə́m nkyaʼ lə́, pə́ zə́ənə ázə́ələ́, ńté ńgə́ ajúmə atsəmə á fɛ́d nə́ pə́ zə́ənə zɨ́d lə́ nkyaʼə.

¹⁴ Lə́ ghɛd ə́lɨ́d pə̈ sóŋ ńgə́, “Ngaŋpəlê, lǒo əsê, júmnə nəwûə, ńjî ńgə́ Klisto a yǒ fɛ̂ nkyaʼ nə́ gho.”

¹⁵ Lɔg nə́ ndɛd nə́ nchîmbî zəənə́, ńkě chîə mbîə á pə́ ándó əkəkóg pɨ pô, ḿbə́ pə́ ándó pɨ pó yáŋ nə́.

¹⁶ Kɔ pɛn ghɛd mɔ́ ndɛd əwɛ̂n yitsə̌ a laŋ kətaŋə, ńté ńgə́ təpɔŋə á nɨ́ nə́ ndɛd mbî zəənə́.

¹⁷ Lə́ á pə́ ńgə́ kɔ nə́ chîə ándó əkəkógə́, lə́, atûə azə́ənə́ a tsɔ́ʼnə á pə́ nə anu páʼ Mmaʼmbîə a lɔ nə́.

¹⁸ Kɔ nə́ nô məloʼ ḿbɛ́ɛlə, ńté ńgə́ apɛ̌lə yǐ ghɛd pɨ ghɛd mənu mə́ əsə́ənə, lwɛ́nkə nə́ pə́ nə́ Ajwiə á mə́m pəənə́.

¹⁹ Tsáb nə́ á mə́m pɨ́ nə́ atsáb páʼ á fɛ́d nə́ á mə́m Salmsə, tsáb nə́ nə́ mənkǐ mə́ ngóʼkə pópə mənkǐ mə́ ajwiə, zɔb nə́ mənkǐ mə́ ngóʼkə pó pəsalms á mbô Mmaʼmbî ŋ́ŋáŋkə yə́ á mə́m məntɨ́ pəənə́.

²⁰ Nə́ əlɛ́n Mmaʼmbî əwɛ̂n Yeso Klisto tə́ nə́ ńdzá ə́fɛ̂ ndǎ á mbô Əsê nə́ anuə atsəmə, Əsê páʼ a pə́ nə́ Tǎ.

Pəngyě pópə Pəlúmə

²¹ Ŋwu ntsəmə a ndzɔʼ pəənə́ a tə́ ńdzóʼnə mɔ́mɛ́ əyǐə, ńté ngóʼkə pɛn túg nə́ nə́ Klisto.

²² Pəngyě, nə́ tə́ ńdzóʼnə pəlú pə́ənə́ ándó nə́ kə́ nə́ ńdzóʼnə Mmaʼmbî lə́.

²³ Ńté ńgə́ ŋwu mbyâŋnə lə́ nətûə á mbô ngwě əyǐ, tsɔʼə ndzaŋ páʼ Klisto a pə́ nə́ nətû nə́ nkyeetə pɔ́ pə́ Əsê lə; Klisto nə́ nkɔ̌ʼmbɨ əyí lə́ Nchwádkə nkyeetə pɔ́ pə́ Əsê, páʼ zɨ́d ə́ pə́ nə́ mbɨ əjǐ lə́.

²⁴ Ńdaŋ ə́lɨ́d pəngyě pó yǐ shib zóʼnə pəlú pɔ́b nə́ mənu mətsəm tsɔʼə nə́ ndú páʼ nkyeetə pɔ́ pə́ Əsê ə́ zóʼnə nə́ Klisto lə́.

²⁵ Pəlú, kɔŋ nə́ pəngyě pɨ́ tsɔʼə ndzaŋ Klisto a kə kɔŋ nə́ nkyeetə pɔ́ pə́ Əsê tə ə́fɛ̂ atûə ají ńté zɨ́d lə́,

²⁶ A kə lɔg nkǐ pó atséebə ají ə́sog nkyeetə pɔ́ pə́ Əsê wɨ́ zɨ́d ŋwaʼə̂.

²⁷ Ńjî ńgə́ təmbɔʼ a ghɛd nkyeetə pɔ́ pə́ Əsê yi wɨ́ ə́ yǐəə á mbi yí nə́ nəpɔŋ əyí ntsəm, ŋ́ŋwaʼə̂, ńkě kɔntə yitsə̌ túg pô, tə alɔʼə́, tə aliʼ yə twíŋkə nə́ kəənə anuə təkoʼ yətsə́.

²⁸ Pəlú pə́ chîə á mə́ kɔŋ nə́ pəngyě pɔ́b tsɔʼə ndzaŋ pó kɔŋ nə́ mbɨ əzoobə́. Ŋwu páʼ a kɔŋ nə́ ngwě əyǐə a kɔŋ lə́ nkɔ̌ʼmbɨ əyə́.

²⁹ Ŋwu əwɛ̂n yitsə̌ a kě ə́wɨ́ chî páʼ a pa nə́ na mbɨ əjǐ pô; Pɛn zə́gə zɨ́d lə́ zə́g nə́ ńkə́ ńdɔg ndɛd wɨ́ tsɔʼə ndzaŋə ándó Klisto a náŋ nə́ nkyeetə pɔ́ pə́ Əsê lə́,

³⁰ ńté ńgə́ pɛn lə́ əlam mbɨ píə.

³¹ Ndzaŋ páʼ aŋwaʼlə Əsê a sóŋ nə́ ńgə́, “Lɛ̌ anu á ghɛd nə́ ŋwu mbyâŋnə a chîə á mə́ fɛ́d nə́ ḿmɛdtə̂ Tǎ əyǐ pó Mǎ əyǐ, pó ngwě əyǐ ə́ kyeetə̂ táʼə aliʼə́, pɨ pɨ pə́ pɛ̌ pó yǐ tíʼ pə́ lə́ táʼ na mbəəmə.”

³² Anuə nəlyaŋnə́ yətsə̌ páʼ á shǐ nə́ ńkə́ ḿbə́ ndə̌ŋdəŋə́ á chîə á mə́mə aliʼə́ aŋwaʼlə Əsê zəənə́, páʼ maŋ zɨ́ nə́ ńgə́ zə́ələ́ á sóŋə lə́ anu ńté Klisto pópə nkyeetə pɔ́ pə́ Əsê.

³³ Lə́ zəənə́ á kə́ sóŋə lə́ anu ńté áwə́ənə́: Ŋwu mbyâŋnə ntsəmə a chîə á mə́ shib nə́ kɔŋə̂ ngwě əyǐə ándó a kɔŋ nə́ mbɨ əjǐə, məngyě ntsəmə a kə́ shib ńdə́əkə ndú əyǐə.