Efishanə 4 - Əka yi Fîə

Pɔ́ pə́ Yeso lə́ Táʼə á Mə́m Mbɨ Əjǐə

¹ Maŋ tíʼə ḿbóʼmbô á mbô pəənə́, maŋ páʼ maŋ pə́ nə́ ngaŋətsáŋ ńté ńgə́ maŋ tə́ faʼə̂ á mbô Mmaʼmbîə: ghɛd nə́ nchîmbî əzɨ ə́ fîə afaʼ páʼ pə́ nə fóŋ nə́ áwɨ́ ńgə́ nə faʼə̂.

² Tə́ nə́ ńtsóokə mbɨ əzɨ əghâ ətsəm, mbwɔ́dnə, ḿbɨ ńtúgə awaamə́ntə́əmə, ńdɔgə̂ ŋwu ntsəmə á ndzɔʼ pɨ tsɔʼə ndzaŋə a chî nə́, á mə́mə akɔŋnə.

³ Fǔəlóʼə á mə́ lɔʼkə̂ nə́ apímnə zə́ páʼ Ajwiə á fɛ̂ nə́ ńdaŋə̂ á mə́m mbwɔ́dnə páʼ zɨ́d kyeetə̂ nə́ áwɨ́ nə́ tíʼ ḿbə́ táʼ ŋwu lə́.

⁴ Lə́ chî táʼ mbɨ ə́wə́ nə́ táʼə Ajwi tsɔʼə ndzaŋə ándó lə́ kə kə́ nə́ ńchî táʼə akwaŋ əwɨ́ ńtə́ ḿbyáabə, yə ándó páʼ Əsê a kə fóŋ nə́ áwə́ənə́ á mə́m ə́wɨ́ lə́.

⁵ Lə́ chî táʼ Mmaʼmbî ə́wə́, táʼ mbimə́ nə́ táʼə akwáalə́nkǐə.

⁶ Lə́ chî táʼ Əsê ə́wɨ́ páʼə a pə́ nə́ Tǎ əwɛ̂n pətsəmə, ńtsɛɛlə̂ ajúmə atsəm, ə́faʼə̂ ńdaŋə̂ á mə́m ŋwu ntsəm, ńkə́ chîə á mə́m ŋwu ntsəmə.

⁷ Ŋwu ntsəmə á mə́m pɛnə̂ a kwá məfɛ̂nə ńdzoŋ ndzaŋə ándó Klisto a kə fiʼ nə́ ə́fɛ̂ nə́ apɔŋə́ntə́əmə.

⁸ Tsɔʼə ndzaŋə ándó aŋwaʼlə Əsê a sóŋ nə́ ńgə́, “Ndɛd páʼ a kə kɔ́ʼ nə́ tə ńkoʼ chigə atǐ lə́, a kə wam pɨ pipə nɨ́ nə́ ándó əpǒʼntso ńdɔg ńgɛnə̂; ḿbɨ́ ə́fɛ̂ məfɛ̂nə á mbô pəənə.”

⁹ Nə́ pə́ əghâ nə́ aliʼə́ atsáb zɨ ńgə́, “a kə kɔ́ʼə atǐə” ä sóŋə lə́ ńgə́ akə̂? A sóŋə lə́ ńgə́ a kə peg ńtsó tə ńkoʼ chigə á nətɛ́n nə́ mbîə.

¹⁰ Lə́ a pə́ ńgə́ ŋwu páʼ a kə tsó nə́ əsê lə́, lə́ tsɔʼə yí páʼ a kə kɔ́ʼ nə́ atǐə, ńkɔ́ʼ tə ńtóokə məpó mətsəm, ńjî ńgə́ mbɔʼə a lwɛ́nkə əliʼ ətsəmə.

¹¹ Lə́ kə pə́ yí páʼ a kə “fɛ̂ nə́ məfɛ̂nə” á mbô pəənə. A kə tsɔ́ʼ pɨ pətsə́ ńgə́ pó pə́ məntú mə́ Yeso, ńtsɔ́ʼ pətsə́ ńgə́ pó pə́ ngaŋə́náŋkə́nkɨ Əsê pó zóʼ nə́, ḿbɨ́ ńtsɔ́ʼə pətsə́ ándó pɨ pó nyi nə́ ńnáŋkə nkɨ yi əshîʼnə pó zóʼ nə́, pətsə́ pó pə́ pətseŋnə pə́ pɔ́ pə́ Əsê nə́ ngaŋə́zéʼkə anǔəsê.

¹² A kə ghɛd ndɛn mənu ghɛn lə́ á mə́ tyáŋtə nə́ pɔ́ pə́ Əsê pó koʼnə̂ á mə́ faʼ nə́ afaʼə Əsê ńjî ńgə́ təmbɔʼ pó kwíŋkə mbɨ Klisto.

¹³ Ńdaŋ ə́lɨ́d pɛn pətsəm yǐ tsɛntə̂ tíʼ pə́ táʼə á mə́m mbimə́ ə́ kə́ pə́ táʼə á mə́mə ajíənuə azɛ̂n ńté Mɔ́ Əsê, pɛn yǐ tíʼ pə́ pɨ pó kwíŋ nə́, ə́ kwíŋ tə́ chîə ándó Klisto.

¹⁴ Ńjî ńgə́ kɔ pɛn pɨ ḿbɛ́d ḿbə́ tsɔʼə pɔ̂nkə̂, páʼ pə́ lɔg nə́ ndzeʼkə́ pɨ pə́ məfɨgə mbɨ ḿbə́ nə́ məŋɔ́dtə́ nə́ ngɔ́b páʼ pó tə́m nə́ ńchǐə áwɛ̂n ə́wɨ́ ńgɛnə̂ nə́ mbi ḿbəənə̂ nə́ ndzəmə.

¹⁵ Pɛn chî lə́ pə́ mə́ tsáb nə́ ndə̌ŋdəŋə́ á mə́mə akɔŋnə, ə́ kwíŋ nə́ ndú ətsəmə á mə́m Klisto páʼ a pə́ nə́ nətûə.

¹⁶ Ńdaŋ nə́ yí páʼ a chî nə́ nətû nə́ əlam mbɨ, əlam mbɨ ətsəm chwíʼtə táʼə aliʼə́, mbɨ ntsəm tíʼ ńgwamnə̂ á nəkaʼ ńdaŋə̂ nə́ mələŋə́ míə; lə́ á pə́ ńgə́ təmbɔʼ alamə́ atsəmə a tə́ faʼ ndzaŋə á pěʼ nə́ ńchîə á mə́ faʼ nə́, mbɨ ntsəm kwíŋə, ńkə́ ńkwíŋə á mə́mə akɔŋnə, ńkɔŋnə̂ məmbɨ móobə́.

Nchîmbî yi Fîə á mə́m Klisto

¹⁷ Lə́ á pə́ ńgə́, ńdaŋ nə́ əlɛ́n Mmaʼmbî mäŋ kwantə̂ áwɨ́ ńgə́ kɔ pɨ ghɛn nə́ mbiə á mə́ túg nə́ nchîmbî əzəənə́ ándó Pətəjǐsê, pɨ páʼ akwaŋə azóobə́ á kě nə́ atûə anu yətsə́ chî pô,

¹⁸ ḿbɨ ńkə́ ḿbə́ pəənə ándó məntɨ́ mɔ́b mə́ pɛ́d nə́ á mə́m ndzəmə́, pó kě túgə anu yətsə̌ á mə́m nchîmbî páʼ Əsê ä fɛ̂ nə́ lə́ pô, ńté ńgə́ pó kě anu yətsə́ kwéʼnə ńjî pô, ətû pɔ́b ə́ pɨ ńtyantə̂,

¹⁹ Əshɨ́ yitsə̌ ə́ kě ághɔ́b pɛ́lə ńkóolə pô, pó kwéʼnə fɛ̂ mbɨ əzoobə́ á mə́m mənu mə́ təpɔŋə, ńtíʼə ə́faʼ ńté mənu mə́ əshɨ́ mətsəm tə ńkě awaamə́mbɨ yətsə́ túg pô.

²⁰ Lə́ kě mənu pɨ nə́ ńdzéʼ nə́ ńté Klisto lə́ pô!

²¹ Á nəələ̂ ńgə́ pɨ nə́ ńdzéʼə anu ńté yə́, ḿbɨ ḿbə́ ngaŋə́zoŋə́ndzəm əjí lə́, pə́ zéʼkə áwɨ́ nə́ ndə̌ŋdəŋ páʼ á chî nə́ á mə́m Yeso.

²² Lə́ á pə́ ńgə́ nə́ myaʼ nkɔ̌ʼmbɨ wɨ́ yi lɛn wə́ páʼ wɨ́d kə ghɛd nə́ pɨ túg nchîmbî páʼ pɨ kə túg nə́ lə́. Nkɔ̌ʼmbɨ yi lɛn wə́ páʼ mənu mə́ ngóobə á ntɨ́ gho mə́ kə lɔ nə́ á mə́ tsəŋkə̂ nə́ áwɨ́d lə́.

²³ Ghɛd nə́ Əsê kwúblə məntɨ́ mɨ́ pópə əkwaŋ pɨ́ pɨ́d tíʼ ə́sɛdnə̂ ḿbə́ pipə fîə,

²⁴ nə́ yǐ shib wê nkɔ̌ʼmbɨ yi fî wə́, páʼ pə́ tsoŋkə̂ nə́ wɨ́d ə́ pə́ afiʼkə Əsê ńnɨd nkɔ̌ʼmbɨ yə́ á mə́m nchîmbî páʼ ə́ chígə́ nə́ ńtɨ́ ndə̌ŋdəŋ ńkə́ ńchígə́ ŋ́ŋwaʼə̂.

²⁵ Lə́ á pə́ ńgə́ kɔ pɛn tə́ ńtsɨ́d ntsəələ, ŋwu ntsəmə a tséebə ndə̌ŋdəŋ pó ngaŋnəpad əyǐ ńté ńgə́ pɛn tsɛntə̂ ḿbə́ lə́ əlam mbɨ Klisto.

²⁶ Túgə azáŋə́ndé, kɔ pə́ ńgɛlə̂ təpɔŋə, ńkɔ ńkə́ ḿbí mə́numə á mɛ́d páʼ gho pɛ́d nə́ á mə́mə azáŋə́ndé,

²⁷ ńjî ńgə́ kɔ gho fɛ̂ əseenə á mbô Satanə.

²⁸ Kɔ ndzə̌lə a pɨ ńtə́ ńdzəələ̂, a tə́ faʼ ə́faʼ nə́, ńdɔg mbô mí ə́faʼə̂ ə́wɨ́ nə́ ntɨ́ əyǐ ətsəmə, ńjî ńgə́ a chî təmbɔʼ a kwá pəənə ándó pó kě nə́ túg pô.

²⁹ Kɔ atséebə təpɔŋ yətsə́ a fɛ́lə á ntso pəənə́, tsáb nə́ á pə́ atsáb páʼ təmbɔʼ á zéʼkə tsɔʼə anu páʼ zə́ələ́ yǐ nə́ kwá pɨ nə́ ndɛd yi wə́, ńjî ńgə́ təmbɔʼ zə́ələ́ á fɛ̂ apɔŋə́ntə́əmə á mbô pɨ páʼ pó zóʼ nə́.

³⁰ Kɔ pɛn ghɛlə̂ Ajwǐəsê a pə́ nə́ yə ŋwaʼ nə́ a chî nə́ afɨnə, lə́ Ajwǐəsê zɨ pə́ nə́ ńdɔg nə́ ńdeŋkə̂ áwɨ́ ə́wə́. Alě yǒ yǐ páʼ Əsê yǒ nə́ tsóʼə atûə azə́ənə́

³¹ Kɔ nə́ túg nəsɛnə́, kɔ nə́ tə́ ńdɔgə̂ mənu nə́ mətəənə, ńkɔ kə́ ńtúgə áwə́ənə́ azáŋə́ndé. Kɔ nə́ tə́ ə́sáʼnə kɨ ńdzɔmnə̂, kɔ nə́ kə́ ńtúgə áwɨ́ ntê kəpa yitsə̌.

³² Tə́ nə́ ńgɛd əshîʼnə á tətɨ pəənə́ ńkə́ ńtúg mbwɔ́dnə á mə́m ngɛdmə́nu əwə́ənə́. Ləgnə̂ nə́ təpɔŋ pɔ́pə́mɛ́ pɨ́ tsɔʼə ndzaŋ Əsê kə ləgnə̂ nə́ pəpɨ́ ńdaŋə̂ á mə́m Klisto lə́.