Efishanə 3 - Əka yi Fîə

Ndzaŋ Pɔlə á nə Faʼ nə á Mbô Pətəjǐsê

¹ Lɛ̌ anu páʼ á ghɛd nə́, maŋ Pɔlə ngaŋə atsáŋ Klisto Yeso tíʼə chaʼtə́sê ńté áwɨ́ Pətəjǐsê.

² Maŋ kwaŋ ńgə́, pɨ zóʼ, ńgə́ Əsê nə́ apɔŋə́ntə́əmə ají a fɛ̂ afaʼ zɨ ńgə́ maŋ faʼə̂ zə́ələ́ á mə́ kwá nə́ áwə́ənə́.

³ Əsê a nə ńkyaʼə̂ anu páʼ a kə lɔ́btə nə́ zə́ələ́ á nəlyaŋnə́ ńgɛd maŋ jîə (Maŋ ŋwaʼlə̂ mɔ́ akəmə aŋwaʼlə yitsə̌ ńté anu zəənə́,

⁴ Təmbɔʼ nə́ fóŋə anu maŋ nə ŋ́ŋwaʼlə̂ nə́, nə́ zéʼə ajíənu maŋ túg nə́ zɨ́d ńté anuə nəlyaŋnə́ Klisto).

⁵ Á nə ḿbə́ nə́ mbî ntsɛɛmbi lə́ pə́ kě pɨ pə́ mbî nə́ anuə nəlyaŋnə́ fiʼtə̂ pô, lə́ Əsê a pɛn kyaʼə̂ zɨ́d əghâ nə́ ńdaŋə̂ á mə́mə Ajwiə á mbô məntú mə́ Klisto pó məntú mə́ Əsê mimə ŋwaʼ nə́.

⁶ Anuə nəlyaŋnə́ zɨ lə́ ńgə́ Pətəjǐsê pó pəjus pó laŋə̂ á mə́m nkɨ yi əshîʼnə ńtíʼ ńchîə azóobə́ á mə́mə afoʼ páʼ á pə́ nə́ yə́ Əsê; pó tíʼ ḿbə́ lə́ əlam táʼ mbɨ, ḿbɨ ńchîə á mə́m ndaʼnə páʼ Əsê a kə ghɛd nə́ zɨ́d ńdaŋə̂ á mə́m Klisto Yeso.

⁷ Pə kə ghɛlə̂ á mə lə́ ándó ngaŋəfaʼ nkɨ yi əshîʼnə lə́ pə́ ḿbə́ ajú yə səglə̂ nə́ páʼ Əsê a fɛ̂ nə́ á mbô maŋə. A kə fɛ̂ á mbô maŋ lə́ ńdaŋ lə́ nə́ mətɨ mə́ Əsê páʼ mə́ kə faʼ nə́ á mə́m maŋə.

⁸ Maŋ kə́g ńtsɛɛlə̂ chigə mɔ́ kə́nyaŋ ŋwunə a chî nə́ á mə́m pɨ pə́ Əsê pətsəmə, lə́ Əsê a pə́ fɛ̂ ngóʼkə zəənə́ á mbô maŋ á mə́ ghɛd nə́ ńgə́ maŋ lɔg nkɨ yi əshîʼnə wə́ ńgɛn nə́ wə́ələ́ á mbô Pətəjǐsê ńté afoʼə Klisto zə́ yə tə afiʼə.

⁹ Á mə́ kə́ nə́ ghɛd ŋwu ntsəmə a zɨ́ ndzaŋə anu Əsê a nə ńdɔ́btə nə́ á nəlyaŋnə́, á yǒ néŋə ázə́ələ́ á mə́mə afaʼə. Əsê páʼ a pə́ nə́ ńtsoŋkə̂ ajúmə atsəm, a kə lɔʼkə̂ anuə nəlyaŋnə́ zɨ ə́fɛ́lə á ngoʼ pəchə́,

¹⁰ ńjî ńgə́ mbɔʼ ndɛd zɨ yǐ ńkoʼ ńdaŋə̂ á mə́m nkyeetə pɔ́ pə́ Əsê mətɨ mə́ nəpó pópə pɨ pó sáʼ nə́ nəpó pó yǒ jîə ayáŋə Əsê tsɔʼə nə́ məndú mí mətsəmə.

¹¹ Əsê a nə ńgɛlə̂ azɨ́ lɛ ńdaŋ lə́ nə́ anuə ají a kə lɔ́btə nə́ a ntɨ́ yí tə ə́fɛ́lə nəfɛdnə́, a nə ńgɛlə̂ zɨ́d ńdaŋ lə́ nə́ Klisto Yeso páʼ a pə́ nə́ Mmaʼmbî əwɛ̂nə.

¹² Pɛn lə́ táʼə a mə́m yə́, ńkə́ ḿbɨ ḿbə́ nə́ mbimə́ pɛn túg nə́ nə́ yí lə́, pɛn túg ntɨ́ tə mbɔʼ pɛn yǐəə á mbi Əsê tə ńkě ajûtsə́ pɔ́g pô.

¹³ Maŋ tíʼə ḿbóʼə lə́ mbô á mbô pɨ ńgə́ kɔ mbô mɨ́ mə́ pwɔ́d ńté ńgə́ maŋ jɨ́ ngə́ʼ ńté lə́ áwə́ənə́, ape anu yəwə́ atsəmə a kə́ ḿbə́ azə́ənə́.

Akɔŋnə Klisto

¹⁴ Ńté anu zɨ́d zɨ maŋ tíʼ ńkwə́ʼtə á məko Tǎ,

¹⁵ Tǎ páʼ ngwud ntsəmə á nəpó pó ndəsê ə́ lɔg nə́ chigə əlɛ́n əghóobə́ á mbô yə́.

¹⁶ Maŋ pítə Əsê á mə́mə afoʼə nəgháʼə ajíə, ńgə́ a fɛ̂ mətəənə á mbô pɨ ńdaŋə̂ á mə́m Ajwiə ají ńjî ńgə́ məntɨ́ mɨ́ mə́ tyantə̂ á mə́m mənu míə,

¹⁷ maŋ pəənə̂ ńchaʼtə́sê ńgə́ təmbɔʼ Klisto a ghɛd ndɛ̂ əjǐ á mə́m məntɨ́ pɨ ńdaŋə̂ á mə́m mbimə́. Maŋ chaʼtə́sê ńgə́ pɨ pǐ məŋaŋ mɨ́ mə́ tyantə̂ á mə́mə akɔŋnə,

¹⁸ ńjî ńgə́ mbɔʼ pɨ̌pə pɨ pə́ Əsê pətsəm túg mətɨ, atûə azə́ənə́ a tsɔ́ʼnə, nə́ jî ndzaŋə ándó akɔŋnə Klisto a shamnə̂ nə́, ə́sagə̂, ŋ́ŋáŋnə ḿbɨ ńkə́ ə́shǐəə.

¹⁹ Kə́ nə́ ńjîə akɔŋnə Klisto páʼ á tsɛ nə́ ajíənuə ŋwu mbîə, ńjî ńgə́ mbɔʼ nə́ lwɛ́nkə nə́ ajúmə atsəm Əsê a pə́ nə́ zə́ələ́.

²⁰ Á mbô yí wə́ a laŋ nə́ á mə́m mətɨ mí mə́ chî nə́ á mə́m pɛn ə́faʼə̂ ə́wɨ́, páʼə a chî nə́ təmbɔʼ a faʼ mənuə á mbô pɛn ńtsɛ ndzaŋ mbɔʼ pɛn pítə kɨ ńkwaŋə̂:

²¹ Nkyeetə pɔ́ pə́ Əsê yǐ fɛ̂ nəgháʼə á mbô yí əlaŋə̂ mə́m Yeso, á mə́m ndɛd mbî ntsəmə, tə ḿmɛdnə̂! Amɛn.