Efishanə 1 - Əka yi Fîə

¹ Aŋwaʼlə zəənə́ á lǒo lə́ á mbô Pɔlə, páʼ Əsê a kə lɔ nə́ ńgə́ a pə́ ntú Klisto Yeso lə́. A ghɛnə̂ lə́ á mbô pɨ pə́ Əsê pó chî nə́ á Ɛfesusə, pɨ páʼ pó faʼ nə́ afaʼə azóobə́ á mə́m Yeso Klisto nə́ ntɨ́ əghɔ́b ətsəmə.

² Ńgə́ apɔŋə́ntɨ́ pó mbwɔ́dnə páʼ ə́ lǒo nə́ á mbô Tǎ əwɛ̂n Əsê pó Mmaʼmbî Yeso Klisto ə́ chîə á mə́m pəənə́.

Afoʼə Ajwi Páʼ á Lǒo nə́ á Mbô Klisto

³ Pɛn fɛ̂ ndǎ á mbô Əsê páʼ a pə́ nə́ Tǎ pə Mmaʼmbî əwɛ̂n Yeso Klisto! Ńté ńgə́ a fɛ̂ afoʼə ajwiə atsəmə á mbô pɛn páʼ á chî nə́ nəpó ńdaŋə̂ á mə́m Yeso Klisto.

⁴ Pə́ nə ḿbɛ́d tə ńtsoŋkə̂ mbî lə́, Əsê pɛ́dtə ńtsɔ́ʼə áwɛ̂n ńdaŋə̂ á mə́m Yeso Klisto ńgə́ pɛn pə́ pɨ píə, ńjî ńgə́ mbɔʼ pɛn ŋwaʼ, ḿbɨ ńkě kɔntə yitsə̌ á mbi yí túg pô.

⁵ Əsê a nə ńtúgə akɔŋnə ńté áwɛ̂n, ńtíʼ ńkwaŋ tsɔʼə ngǎ yí ńgə́ a yǐ ghɛd pɛn pə́ pɔ́ pí ńdaŋə̂ á mə́m Yeso Klisto. Lɛ̌ anuə a nə ńkɔŋ nə́ ńkə́ ńdɔ ńgə́ á pə́ ə́lə́ələ́.

⁶ Pɛn tə́ ŋ́ŋáŋkə Əsê ńté nəgháʼ əyǐ pó apɔŋə́ntə́əmə əjí páʼ a nə́ fɛ̂ nə́ nə́ pɛn yə tə ndɛn ńdaŋə̂ nə́ Mɔ́ əyǐ Yeso Klisto páʼ a kə kɔŋ nə́.

⁷ Ńdaŋə̂ á mə́m nəwû Klisto á atǐəpagləpaglə, a tsóʼə atûə azɛ̂nə, ńtíʼ ńgɛd ńgə́ Əsê a ləgnə̂ pətəpɔŋ pɛnə̂, apɔŋə́ntə́əmə Əsê á pyádnə ńgáʼə,

⁸ apɔŋə́ntɨ́ páʼ a fɛ̂ nə́ nə́ pɛn tə́ a nɨ́ lə́, á mə́mə ayáŋə ají pópə ajíənuə ajíə.

⁹ Əsê a kə ghɛd nə́ ndú ətsəm ńdaŋə̂ á mə́mə ayáŋə ají ńgə́ pɛn jî mənu a kə tyáŋtə nə́ á nəlyaŋnə́ á mə́m Klisto

¹⁰ Anu zɨ Əsê a kə tyáŋtə nə́ lə́ ńgə́, təmbɔʼ chigə ndɛd yi əwɨ ə́ koʼ a tsɛntə̂ ajúmə atsəm a kə tsoŋkə̂ nə́, ajúmə atsəmə á chî nə́ nəpó pó ndəsê, Klisto a tíʼ ḿbə́ nətûə.

¹¹ Pə́ faʼə̂ anuə atsəm ńdzoŋə̂ lə́ ndzaŋ Əsê a kə tyáŋtə nə́ ńkə́ ńtsɔ́ʼə; Əsê a kə tsɔ́ʼə áwɛ̂n ńgə́ pɛn tíʼ táʼə á mə́m Yeso Klisto ndzaŋə a nə ńtyáŋtə nə́, ńdzoŋə̂ lə́ ndzaŋ a nə ńtyáŋtə nə́ ńgə́ a yǒ lɔgə̂ aliʼ tə ə́fɛ́lə á nəfɛdnə́.

¹² Lə́ á pə́ ńgə́ pɛn páʼ pɛn nə ḿbeg nə́ ńtúgə akwaŋ ńtə́ ḿbyáabə á mə́m Yeso, pɛn ŋáŋkə nəgháʼ Əsê.

¹³ Pɨ nə ńkə́ ńtíʼ ńkə́ ḿbí pɨ pə́ Əsê əghâ ándó pɨ nə ńdzóʼ nə́ ndə̌ŋdəŋ nkəənə, Nkɨ yi Əshîʼnə páʼ ə́ nə ńgyǐ nə́ nə́ nchîntəənə á mə́m pəənə́; pɨ nə néŋ ntɨ́ nə́ Klisto, Əsê tíʼ néŋə aleŋkə nə́ pɨ ńgə́ pɨ lə́ pɨ pí. Aleŋkə jɨ lɛ lə́ Ajwǐəsê a fɛ̂ nə́ nə́ pɛnə̂, páʼ a kə laʼnə̂ nə́ ńgə́ a yǐ fɛ̂ lə́.

¹⁴ Ajwi zəənə́ á nəələ̂ lə́ ńgə́ pɛn yǒ kwáalə ajú páʼ Əsê a kə laʼnə̂ nə́ pɨ pí ə́wɨ́ lə́, ḿbɨ ńkə́ nəələ̂ áwɛ̂n ńgə́ Əsê a yǒ kwéʼnə tsóʼə atûə pɨ pí ńjî ńgə́ pɛn ŋáŋkə nəgháʼ əyǐə.

Achaʼtə́sê Pɔlə

¹⁵ Ńté anu zɨ, ə́fɛ́lə ándó maŋ nə́ ńdzóʼ nə́ anu ńté mbimə́ əzɨ nə́ Mmaʼmbî Yeso Klisto ḿbéenə akɔŋnə nə́ túg nə́ ńté pɨ pə́ Əsê lə́,

¹⁶ maŋ kě kə́ láʼə jwitə̂ á mə́ fɛ̂ nə́ ndǎ á mbô Əsê ńté áwɨ́ pô. Mäŋ kwúmtə áwə́ənə́ á mə́m achaʼtə́sê mə,

¹⁷ ḿbítə Əsê páʼ ə́ pə́ nə́ yi Mmaʼmbî əwɛ̂n Yeso Klisto ḿbɨ ḿbə́ Tǎ páʼ a túg nə́ nəgháʼ ńgə́ a fɛ̂ Ajwiə á mbô pəənə́, ńjî ńgə́ Ajwi zɨ́d zə́ á ghɛd pɨ túgə ayáŋə, ḿbɨ fiʼtə̂ áwɨ́ nə́ ajú Əsê a pə́ nə́ zə́ələ́, ńjî ńgə́ pɨ jîə yə́.

¹⁸ Maŋ loonə̂ lə́ ńgə́ təmbɔʼ atûə azə́ənə́ a ŋáʼnə nə́ zɨ́ nkyaʼ əjǐə, ńjî ńgə́ nə́ jîə ajú páʼ pɨ náanə nə́ ńkwaŋə̂ ḿbyáabə páʼ a kə́ fóŋ nə́ áwə́ənə́ á mə́m ə́wɨ́ lə́, ḿbɨ́ ńkə́ ńjî ndzaŋə afoʼ yə yɛ́d nə́ yɛ́d nə́ páʼ a kə laʼnə̂ nə́ pɨ pí ə́wə́,

¹⁹ ḿbɨ ńkə́ ńjî ndzaŋə ándó mətɨ mí mə́ pyádnə nə́ ńtyantə̂ ńkə́ ńtə́ faʼə̂ á mə́m pɛn páʼ pɛn néŋ nə́ ntɨ́ əwɛ̂n nə́ yə́. Mətɨ mí mə̈ faʼ nə́ á mə́m pɛn lə́, lə́ tə́kɔʼ mətɨ wə́

²⁰ páʼ a kə lɔg nə́ ńjúmkə Klisto ə́wə́ á nəwû ńtíʼ ńnáakə əlá apô yí yə təənə á nəpó lə́.

²¹ Klisto a náanə ə́wə́ á nətûə, ə́sáʼə mətû mətsəm, pəmɛ́ pə́ pəənə, pɨ pə́ túg nə́ mətəənə ḿbá pətǎ pə́ faʼ pətsəmə, Klisto a túg əlɛ́n páʼ wɨ́d tsɛ nə́ məlɛ́n mətsəm páʼ mə́ chî nə́ á ndu mbî ḿbá mimə mbî páʼ ə́ chî nə́ á mə́ yǐ nə́.

²² Əsê a kə néŋə ajúmə atsəmə á mətɛ́n mə́ məko Klisto ńtíʼ fɛ̂ yə́ á mə́m nkyeetə pɔ́ pə́ Əsê ándó nətû nə́ ajúmə atsəmə.

²³ Nkyeetə pɔ́ pə́ Əsê lə́ mbɨ Klisto, nkyeetə pɔ́ pə́ Əsê ə́ lwɛ́nkə nə́ Klisto páʼ a kwéʼnə nə́ ńkə́ ńdwɛ́nkə nə́ ajúmə atsəmə aliʼə́ atsəmə.