Akyaʼəmə́nuə 1 - Əka yi Fîə

¹ Mənu pə́ ŋwaʼlə̂ nə́ á mə́mə aŋwaʼlə zɨ lə́ mənuə ándó Yeso Klisto a kə kyaʼ nə́ á mbô Jɔnə. Əsê a nə ńkyaʼ mənu məənə́ á mbô Yeso Klisto lə́ á mə́ laŋ nə́ ə́lɨ́d nɨd ngaŋə́faʼ əjí nə́ mənu páʼ mə yǐ nə́ lɔgə̂ aliʼə́ á mə́m mɔ́ akəmə ndɛlə́. Klisto a kə ghɛd ngaŋəfaʼ əyǐ Jɔnə a jî mənu mɨ ńdaŋ lə́ nə́ ntseŋndɛ̂ əyǐ páʼ a kə tú nə́ á mbô yə́,

² Jɔnə a tíʼ fiʼtə̂ anuə atsəm páʼ a nə ńdzɨ́ nə́; lɛ̌ mənu mimə wɨ́ páʼ ä fiʼtə̂ nə́ ńté nkɨ páʼ ə́ kə lǒo nə́ á mbô Əsê ḿbɨ́ ńkə ńté ndə̌ŋdəŋ páʼ Yeso Klisto a nə̈ ńkyaʼ nə́.

³ Mbɔŋə yə ŋwunə ándó páʼ a fóŋ nə́ aŋwaʼlə zəənə́, mbɔŋə a kə ḿbə́ yə pəənə ándó pó jwə́ʼtə mənu mɨ əghâ nə́ pó mi mə́ yǒ nə́ ə́lɔgə̂ aliʼə́, ńkə́ ńdzóʼnə anu pə́ ŋwaʼlə̂ nə́ á mə́mə aŋwaʼlə zəənə́! Ńté ńgə́ ndɛd ə́ páatə páʼ mənu mɨ mətsəm mə́ yǐ nə́ lɔgə̂ aliʼə́.

Jɔnə a Túmə Achaʼtə á Mbô Mənkyeetə mə́ Pɔ́ pə́ Əsê mə́ Asaambɛ̂

⁴ Aŋwaʼlə zəənə́ á lǒo lə́ á mbô maŋ Jɔn ńgɛnə̂ á mbô mənkyeetə mə́ pɔ́ pə́ Əsê mə́ asaambɛ̂ á mboʼ Esya. Apɔŋə́ntɨ́ pó mbwɔ́dnə lə́ əzɨ páʼ ə́ lǒo nə́ á mbô Əsê, Əsê páʼ ə́ chî nə́ əghâ nə́, páʼ a nə ḿbɛ́d nə́ tə ńchî ə́wə́, páʼ a kə́ nə́ ńchîə á mə́ yǐ nə́. Apɔŋə́ntɨ́ pó mbwɔ́dnə zɨ kə́ ńdǒo á mbô əjwi pə́ pɛ́n asaambɛ̂ á mbi aləŋə nəfoonə Əsê lə́

⁵ ńkə́ ńdǒo á mbô Yeso Klisto ŋwunə ä sóŋ nə́ tsɔʼə anuə a zɨ́ nə́ ńkə́ ḿbí ńgə́ lə́ ndə̌ŋdəŋə́, ntsɛɛmbi ŋwu pə́ nə ńjúmkə nə́ yə́ nəwûə, ḿbɨ́ ḿbə́ ŋwunə ä sáʼ nə́ pəfo pə́ mbîə. A kɔŋə̂ áwɛ̂nə, ńdaŋə̂ á mə́m nəwû əyǐ a fógə áwɛ̂nə á mə́m təpɔŋ əwɛ̂nə.

⁶ Ńtíʼ ńgɛd ńgə́ pɛn pə́ aláʼə á pə́ nə́ yə pəpépə́sê á mbô Əsê a pə́ nə́ Tǎ əyǐə. Nəgháʼ pó mətɨ ə́ chîə á mbô Yeso Klisto tə mbî láʼ měe! Amɛn.

⁷ Náŋ nə́, a tə́ ńgyǐəə á mə́mə alə́mə, ŋwu ntsəmə a yǐ zə́ənə́ yə́, ńdzoŋ ḿbeg pəənə ándó pó kə sɔb nə́ yə́. Ətú mbî ətsəmə á ndu mbî ə́ yǒ kyéŋ té yə́. A yǒ pə́ lə́ ə́lə́ələ́!

⁸ “Maŋ lə́ nəchwaakənə́ ńkə́ ḿbə́ nəlwigtənə́” lə́ sóŋ Mmaʼmbîə, Əsê páʼ ə́ tsɛ nə́ ajúmə atsəmə, páʼ a chî nə́ əghâ nə́, páʼ a nə ḿbɛ́d nə́ tə ńchîə, páʼ a kə́ nə́ ńchîə á mə́ yǐ nə́.

Jɔnə a Zə́ənə Klisto á Mə́m Ndzəəmə Atəəmə́tə́əmə

⁹ Maŋ lə́ Jɔnə, ḿbə́ mɔ́mɛ́ əwəənə́, ndzaŋ maŋ pə́ nə́ ndzoŋ ndzəm Yeso lə́, pɛn pətsəm nɔd ńdzɨ́ ngə́ʼ ńté Yeso, páʼ pɛn kə́ nə́ ńnoolə̂ ńgwam ntɨ́ ńtə́ ńdzɨ́ ngə́ʼ páʼ zɨ́d zoŋ nə́ pəənə ándó pó chî nə́ á mə́mə Anuənə́foonə ajíə. Pə́ nə ńgwaamə̂ mə ńnéŋə á mə́m kyádkənkǐ yitsə̌ pə́ fóŋə nə́ Patmos, ńté ńgə́ maŋ nə́ ńnáŋkə atséebə Əsê pó ndə̌ŋdəŋ páʼ Yeso a nə̈ ńkyaʼ nə́ lə́.

¹⁰ Á nə ḿbə́ alě Mmaʼmbî lə́ Ajwiə á kwúnə á mə́m maŋə, maŋ tíʼ ńdzóʼə tə́kɔʼ ngye yitsə̌ ə́ chûə ándó nəpaŋə, ńtíʼə ńtséebə á ndzəm maŋə.

¹¹ Ngye yi wɨ́ ə́ sóŋ ńgə́, “Ŋwaʼlə̂ ajú páʼ gho zɨ́ nə́, ńtíʼ ńtúmə aŋwaʼlə yi wɨ á mbô mənkyeetə mə́ pɔ́ pə́ Əsê mə́ páʼ mə́ chî nə́ á mə́m pətə́kɔʼ pə́ tɔ̂ŋ pɨ pɛnə̂ asaambɛ̂: pɨd lə́ Ɛfesus, Səmiləna, Pəgamo, Tiyatila, Sadis, Filadefya, Lawodesya.”

¹² Maŋ sɛdnə̂ á mə́ zɨ́ nə́ ńgə́ lə́ tsáb əwə á mbô maŋə, ńtíʼ ńdzə́ənə á pə́ əpú pə̈ tə́g nə́ lamə á ndu wɨ́, pɛnə̂ asaambɛ̂ pə lɔgə̂ gôlə ńtsoŋkə̂ ə́wə́,

¹³ Tətɨ əpúmə atə́gə́lam pə̂, ajûtsə́ á tɨ́ ə́wə́ ándó ŋwu mbîə, ńgwê tə́sɛ atsəʼə́ á tsó nə́ ńkoʼə̂ á ətád məko yə́, ḿbɨ́ ńkwúlə aŋkəndá pə́ tsoŋkə̂ nə́ nə́ gôlə á ngyéŋ yə́

¹⁴ Mənoŋ mə́ atû mí mə́ fógə ándó fufu apagə atsəʼə́, ə́fógə ńgə́ púu ándó məwəŋə́, əmə́g mí mə́ kɛ́lə ándó mógə́,

¹⁵ məko mí mə́ nə ńchîə ándó məngɔʼ mimə ŋwaŋkə̂ nə́, ńkɛ́lə ńchîə ándó pə́ lɔg móg ə́sog ə́wə́, ngye əjǐ ə́ chîə ándó mənkǐ mə́ tə́ ńtsóolə,

¹⁶ Á mə́mə apô ají yə tɨ́ a túg pɔ́ pə́ sáŋ pɛ́nə asaambɛ̂ ə́wɨ́, á ntso yí ŋwíŋ ntso mətû mətû páʼ ə́ pyádnə nə́ ńtsə́g məlá mə́ mbɛ̌, ə́ fɛ́d ə́wɨ́, əshî əyí ə́ ŋwaʼə̂ ándó mə́nu ntɨ ənumnə á pyádnə nə́ ńtə́ ńtɛ̂.

¹⁷ Əghâ maŋ nə ńdzɨ́ nə́ yí lə́, ńgwǔəə á məko yí ńtíʼ ńchîə ándó akwûə ŋwunə. A tíʼ noŋkə̂ apô ají yə təənə á ndu maŋ ə́sóŋ ńgə́, “Kɔ pɔ́gə, maŋ lə́ nəchwaakənə́ ńkə́ ḿbə́ ndwigtə,”

¹⁸ Maŋ lə́ yí páʼ maŋ chî nə́ á mbîə, maŋ nə ńkwûə, lə́ nə́ pə əghâ nə́ maŋ pɛn ḿbɨ́ ńchîə á mbî tə yǒ ḿmɛdnə̂, maŋ túg mətəənə á ndu nəwû ńkə́ ńtúg mətəənə á ndumə aláʼə pəkwûə.

¹⁹ Nə́ pə əghâ nə́, ŋwaʼlə̂ mənu páʼ gho zɨ́ nə́, yi páʼ á lɔg nə́ aliʼ əghâ nə́, pópə yi á yǒ nə́ yǐəə.

²⁰ Lɛ̌ anuə nəlyaŋnə́ páʼ ä sóŋ nə́ anu ńté pɔ́ pə́ sáŋ pə́ pɛ́nə asaambɛ̂ páʼ gho zɨ́ nə́ apô maŋ yə tɨ lə́, ḿbá əpúmə atə́gə́lam pə̂ pɛ́nə asaambɛ̂ páʼ pə́ tsoŋkə̂ nə́ nə́ gôlə lə́, pɔ́ pəsáŋ pɨ pɛ́nə asaambɛ̂ lə́ pətseŋpə́ndɛ́pə́sê pə́ mənkyeetə mə́ pɔ́ pə́ Əsê mə́ asaambɛ̂, ətə́gtə́lam pə́ asaambɛ̂ ə́ pə́ mənkyeetə mə́ pɔ́ pə́ Əsê mə́ asaambɛ̂.