3 Jɔnə 1 - Əka yi Fîə

¹ Aŋwaʼlə zəənə́ á lǒo lə́ á mbô nətû nə́ nkyeetə pɔ́ pə́ Əsê, ńgɛnə̂ á mbô Gayɔsə, páʼ maŋ kɔŋ nə́ yí ndə̌ŋdəŋə́.

² Əshunə́ mə maŋ kɔŋ nə́, maŋ chaʼtə́sê ńgə́ təmbɔʼ anuə atsəmə á nyi əshîʼnə nə́ gho, ńgə́ gho chî əshîʼnə, ndzaŋ páʼ maŋ jî nə́ ńgə́ gho chî əshîʼnə á mə́m ntɨ́ əgho lə́.

³ Maŋ nə ḿbyádnə ńkɔŋtə̂ ndzaŋ pəlim pətsə́ pó nə ńgyǐ nə́ ə́fiʼtə̂ mə ndzaŋ páʼ gho pyádnə nə́ ńdzoŋə̂ ndə̌ŋdəŋ nə́ ntɨ́ əgho ətsəm tsɔʼə ndzaŋ páʼ nchîmbî əzo ə́ zá nə́ ńtúgə ndə̌ŋdəŋ lə́.

⁴ Anu yətsə́ á kě ə́wɨ́ chî təmbɔʼ á ghɛd maŋ kɔŋtə̂ ńtsɛ ńgə́ maŋ zóʼ ńgə́ póonə mə pó tə́ ńdzoŋə̂ ndə̌ŋdəŋ pô.

Pə́ Ŋáŋkə Gayɔsə

⁵ Əshunə́ mə maŋ kɔŋ nə́, ghö pyádnə ə́faʼə̂ afaʼ gho faʼ nə́ á mbô pəlim lə́ nə́ ńtɨ́ əgho ətsəm, páʼ pó pǎ nə́ tə ḿbə́ pə́ pəghɨ lə́.

⁶ Pó tséebə á mbô nkyeetə Pɔ́ pə́ Əsê aliʼə́ nə́ ńté ndzaŋ gho túg nə́ akɔŋnə ńté ághóobə́, maŋ póʼmbô ńgə́ gho kwáalə ághɔ́b pó ghɛn nə́ mbi nə́ nənyi əghɔb nə́ ndú páʼ Əsê a yǐ nə́ kɔŋtə̂

⁷ Ńté ńgə́ pó chwáakə nənyi əghoobə́ mə́ faʼ nə́ á mbô Klisto lə́ ńkě pímə mə́ kwá nə́ akwá yətsə́ á mbô pətəpǐsê pô.

⁸ Lə́ á pə́ ńgə́ pɛn pɔ́ pə́ Klisto chîə á mə́ shib nə́ ə́ tɔ́mtə pɨ pəənə́, ńjî ńgə́ pɛ̌npo yǐ ńtsɛntə̂ ḿbə́ ngaŋə́faʼə á mə́m ndə̌ŋdəŋə́.

Diyotəlefus pó Demetəlosə

⁹ Maŋ nə ŋwaʼlə̂ á mɔ́ akəmə aŋwaʼlə á mbô nkyeetə pɔ́ pə́ Əsê; lə́ Diyotəlefus páʼ a kɔŋ nə́ á mə́ pə́ nə nətû zɔ́b lə́, a kě kɔŋə̂ á mə́ jwə́ʼtə nə́ anu maŋ sóŋ nə́ pô.

¹⁰ Lə́, əghâ maŋ yǐ nə ńgyǐ, maŋ yǐ fiʼtə̂ áwɨ́ nə́ anuə atsəm páʼ a ghɛd nə́, mənu mə́ təpɔŋ páʼ a sóŋ nə́ pópə ntsɨd páʼ á tsɨd nə́! lə́, ndɛn mənu ghɛn ə́ kě á mbô yí kə́ ńkoʼnə̂ pô, a pɛ́d ńgɛn nə́ mbi ńkǐə yə́ á mə́ lɔg nə́ pəlimə́ á ndɛ̂ yə̈, ńdzɔŋə̂ nə́ pəənə́ ándó pó pí nə́ a mə́ lɔg nə́ pəlim pipə wə́ á ndɛ̂ pó, ńkəmə̂ ághóobə́ á mə́m nkyeetə!

¹¹ Əshunə́ mə maŋ kɔŋ nə́, kɔ gho fiʼnə̂ anuə təpɔŋə, fiʼnə̂ pə́ anu yə əshîʼnə. Ŋwu ntsəm páʼ a faʼ nə́ anu yə əshîʼnə a chî lə́ á mbô Əsê, ŋwu ntsəm páʼ a faʼ nə́ anuə təpɔŋ a kě Əsê kə́ zə́ənə pô.

¹² Ŋwu ntsəmə a tsáb əshîʼnə ńté Demetəlosə, tə ḿbegə̂ ndə̌ŋdəŋ ə́wə́. Pəg nə́ nkɔ̌ʼmbɨ əwə́g ə́ zɨ́ ńkə́ ḿbí ńgə́ lə́ ŋwu yi əshîʼnə, pɨ jî ńgə́ anuə atsəm pəg sóŋ nə́ lə́ ndə̌ŋdəŋə́.

Ndwigtə Achaʼtə

¹³ Maŋ chî nə́ mənu mimə nɨ́ nə́ a mə́ ŋwaʼlə̂ nə́ á mbô pəənə́, lə́ maŋ kě kɔŋə̂ á mə́ lɔg nə́ aŋwaʼlə pó nkɔŋə́ aŋwaʼlə ŋ́ŋwaʼlə̂ ə́wɨ́ pô.

¹⁴ Maŋ túgə akwaŋ ńtə́ ḿbyáabə ńgə́ maŋ yǐ zə́ənə áwɨ́ tsɔʼə əghâ nə́, ńjî ńgə́ pɛn lɔg ndɛd ńtséebə.

¹⁵ Ńgə́ mbwɔ́dnə chîə á mbô pəənə́. Ngaŋmə́ko əzɨ́ ətsəm ə́ tə́ ńchaʼtə̂ áwə́ənə́. Lɔg nə́ ndɛd ńchaʼtə̂ ngaŋmə́ko əzə́g ətsəmə.