2 Jɔnə 1 - Əka yi Fîə

¹ Aŋwaʼlə zəənə́ á lǒo lə́ á mbô nətû nə́ nkyeetə pɔ́ pə́ Əsê, ńgɛnə̂ á mbô Mǎ pə́ tsɔ́ʼ nə́ yə́, pópə pɔ́ píə, yí páʼ maŋ kɔŋ nə́ yí ndə̌ŋdəŋə́. Yí lə́ kě tsɔʼə maŋ kɔŋ pô, pɨ páʼ pó jî nə́ ndə̌ŋdəŋ pó kə́ ńkɔŋə̂ a yə́,

² ńté ńgə́ ndə̌ŋdəŋ a chîə á mə́m pɛnə̂, ə́ yǒ kə́ chîə á mə́m pɛn tə mɛdnə̂.

³ Ńgə́ Əsê páʼ a pə́ nə́ Tǎ pó Yeso Klisto páʼ a pə́ nə́ Mɔ́ Tǎ, pó fɛ̂ apɔŋə́ntɨ́ pópə akóolə́mə́lə́ŋ nə́ mbwɔ́dnə á mbô pɛnə̂, ńgə́ pɨ́d pə́ pəpɛ́nə á mə́m ndə̌ŋdəŋ nə́ akɔŋnə.

Ndə̌ŋdəŋ pópə Akɔŋnə

⁴ Maŋ nə ḿbyádnə ńkɔŋtə̂ ndzaŋ maŋ nə ńdzɨ́ nə́ pɔ́ pó pətsə́ pó tə́ ńdzoŋə̂ ndə̌ŋdəŋ tsɔʼə ndzaŋ Tǎ a nə sóŋ nə́ á mbô pɛnə̂.

⁵ Ńdaŋ ə́lɨ́d maŋ póʼmbô á mbô gho mǎ maŋ kɔŋ nə́, ńgə́: pɛn kɔŋ məmbɨ mɛ́nə. Lɛ̌ kě ntəgə́ yi fî páʼ mäŋ ŋwaʼlə̂ nə́ á mbô gho pô; lə́ ntəgə́ páʼ pɛn nə ńtúg nə́ ə́fɛ́lə á nəchwaakənə́ mbîə.

⁶ Akɔŋnə zɨ páʼ mäŋ tsáb nə́ ńté lə́ á sóŋə lə́ ńgə́, pɛn shib ńtúg nchîmbî ə́ zoŋ nə́ pə́ məntəgə́ mə́ Əsê. Ntəgə́ zɨ páʼ pɨ pətsəm nə ńdzóʼ nə́ ə́fɛ́lə á nəchwaakənə́ lə́ ńgə́, pɨ pətsəm nə́ shib ńchîə á mə́mə akɔŋnə.

⁷ Ngaŋmə́fɨg yi nɨ́ nə́ pɛ́d tə ńnyinə̂ á mə́m mbî ntsəmə, pɨ páʼ pó kě nə́ pí ńgə́ Yeso Klisto a nə ńgyǐ lə́ á mə́m na mbɨ pô; ntê ŋwu zə́ lə́ ngaŋməfɨgə ńkə́ ḿbə́ ngaŋkə́pa Klisto.

⁸ Lɔg nə́ ndɛd nə́ məmbɨ mə́ənə́, ńjî ńgə́ nə́ kě yǐ ḿbéŋkə ajú páʼ nə́ faʼ nə́ ńté pô, lə́ nə́ yǐ kwá ntsɔ́ʼəfaʼ əzɨ ntsəmə.

⁹ Ŋwu páʼ a lɔ nə́ á mə́ laŋ nə́ ghɛnə̂ á mbi, ńkě á mə́m ndzeʼkə́ Klisto mɛdnə̂ pô, a kě Əsê á mə́m yí túg pô. Lə́ ŋwu ntsəm páʼ a mɛdnə̂ nə́ á mə́m ndzeʼkə́ Klisto, a túgə Tǎ pó Móonə.

¹⁰ Təmbɔʼ ŋwu tsə̌ a yǐəə á mbô pɨ páʼ a kě nə́ á pə́ nə́ ndzeʼkə́ zɨ yǐ pô, kɔ nə́ lɔgə̂ yə́ á ndɛ̂ pəənə́, kɔ nə kə́ ńchaʼtə̂ yə́;

¹¹ ńté ńgə́ ŋwu páʼ á chaʼtə̂ nə́ yí, a néŋə apô ajíə á mə́m mənu mə́ təpɔŋ páʼ ä ghɛd nə́ lə́.

Ndwigtə Atséebə

¹² Maŋ túg mənu mimə nɨ́ nə́ á mə́ sóŋ nə́ á mbô pəənə́, lə́ maŋ kě yǐ lɔgə̂ aŋwaʼlə pó nkɔŋə́ aŋwaʼlə ŋ́ŋwaʼlə̂ wɨ́ pô; lə́ maŋ túgə akwaŋ ńtə́ ḿbyáabə ńgə́ maŋ yǐ yǐ ə́zə́ənə áwɨ́ pɛn lɔg ndɛd ńtsáb, ńjî ńgə́ akɔŋtə azɛ̂nə á lwɛ́nkə.

¹³ Pɔ́ pə́ mɔ́mɛ́ əgho yi məngyě páʼ Əsê a tsɔ́ʼ nə́ pó tə́ ńchaʼtə̂ áwə́ənə́.